Read abua Matiu 26 Bible Online

Matiu 26 - abua bible

Matiu 26

¹ẠJizos rọmadan oomo phọ ịtughemi phọ ịphen, kụ ọdi ạḅeni bụmatuan phọ ọdi mọ,

²“Ịdipho nyina elegheri bọ ni, ịyal aḍughul-otu kụ isugha ọbo mẹteeny ẹyaal ọphel otene phọ, dị kọḅogh Mọony phọ Oye ọngo mọ ọkan loor oreeny oghiigh.”

³Kụ ạbuo ạrumhu ariil ạrikia phọ rꞌikumoor awe phọ ookpomoghan kꞌạKayafas uwo ẹmhu oyil ạrikia phọ,

⁴kụ bịdi omite ezue ịlo osiph ạJizos esi ịbooghian oghiigh.

⁵Kụ bịdi ụḅem mọ kíḍighi mem ẹyaal phọ ọbo awe phọ kotuphe ghan bọ.

⁶Kụ ạJizos ạrol Betani kꞌaSaimon, ọpo ẹzegh ọku ufe phọ eḍighi ghan bọ.

⁷Kụ mem dị ọdi rale eḍien, oniin ạnir aru ni rꞌeeko elo eeḅi eḍu, dị ẹman iboom ikpoki, ạteeny Jịzos, kụ asugh nyọdi elo phọ.

⁸Kụ mem dị ạbumatuan phọ ọmiin bọ ịphen phọ, iphin ni iloghi ạbidi kụ ọḅem mọ, “Amuphe phọ ạmuen phọ aḍighom ḍighen?

⁹Elo phọ ẹphen mubool bọ ni iboom ikpoki ọsighe oḍighinom iiḅi rukulom.”

¹⁰ẠJizos rọnaghan bọ kụ ạḅeni bịdi mọ, “Nyina ighol eeghe kụ rẹeḅaghami bọ ạnir phọ ọphon? Ọdi uḍighinaan ni ịmi ogey oḍighi.

¹¹Nyina rꞌarukulom mọ edianaan ghan ni oomo amem, kụ mị rꞌanyina kẹ́tolan oomo amem.

¹²Ọdi uḅom ịmi eeko elo phọ ẹphen ookolobian okoriom amaḍi phọ ạmi.

¹³Mị ạkar rịḅeni ghan inyina mọ tọrobo esi sịen aḅirini phọ, dị rọkaaph ooḅi ọghaaph phọ, kọkaaphom ghan ni ịphen phọ ọotughianam ạnir phọ ọphon.”

¹⁴Ịphen phọ reten, kụ aJudas Ịskariot oniin sịphe aḍioph rꞌịyal ạbumatuan phọ, ạḍua ni ạghi ạteeny bụo ạrumhu ariil ạrikia phọ,

¹⁵kụ apuru bịdi mọ, “Nyina kịngo ịmi eeghe, mị usiph Jịzos ịngo inyina?” Kụ bịdi ạal ịraardi ipoḍi asilva ọngo nyọdi.

¹⁶Kụ emiigh kꞌamem mọ ọpo ọdi aagonoghian ghan eepoogh aal ạJizos.

¹⁷Ẹḅel aḍio ẹyaal phọ roliom ghan bọ ạbred phọ ọpo yist rọ́logh ghan bọ, ạbumatuan phọ oru ọteeny Jịzos kụ opuru mọ, “Nạ rạwa mọ yoor oseleminaan nyịna ḍighen esi, dị kọtol ole eḍien ẹyaal phọ?”

¹⁸Kụ ọdi ạḅeni bịdi mọ, “Ịki ẹpe ẹmha phọ. Nyina kẹmiin ni oniin oye. Ịḅeni nyọdi mọ ọtughemia phọ ạḅem mọ amem mọ ọno mẹteeny, mọ ọno rꞌạbumatuan phọ ọno kọtol kꞌọdi kụ ole eḍien ẹyaal phọ.”

¹⁹Kụ ạbumatuan phọ ọtuugh ịdipho ạJizos ạḅeni bọ bịdi oḍighi, kụ ookolobian ịlo ẹyaal phọ.

²⁰Mekpereghian, kụ ạJizos ạtol ude ralian eḍien rꞌiḍioph rꞌịyal ạbumatuan phọ kụ ạḅem mọ,

²¹“Mị ạkar rịḅeni ghan inyina mọ oniin ọnyo anyina kaal li ịmi.”

²²Ịphen phọ iḍighi ni dị bịdi omeelom oboom ọto, kụ tọrobo ọnyo ạbidi amiigh opuru ọdi mọ, “Ọmoogh-we, mịna ḍụghum?”

²³Kụ ọdi mọ, “Oye phọ ọphon rꞌạmi rotiom bọ eniin esi phọ kụ kaal bọ ni ịmi.

²⁴Ọony phọ Oye kamugh ni, ịdipho ọge bọ ịlo ọdi pạ Ạḍinya Iigbia phọ, kụ pọ eeghe ọdo ịminimiin dị kẹtolonaan oye phọ ọpo kabool bọ nyọdi. Ịnighe ghụn dị ọbo oye phọ ọpo phọ mụ́mar.”

²⁵Pọ kụ amem dị aJudas ọpo aal bọ nyọdi apuru aani ni mọ, “Ọtughemia, mịna ḍụghum?” Kụ ọdi ạḅeni nyọdi mọ, “Nạ kụ ụḅem.”

²⁶Ịdipho bịdi role bọ, kụ ạJizos ạsighe ạbred, kụ rọngo Ẹnaan ḍịseph, kụ ạparion, kụ ạngo bụmatuan phọ, mọ, “Itiin ele. Ọphon kụ aḍizu phọ ạmi.”

²⁷Kụ ạsighe ọphaal amiim, kụ ạngo Ẹnaan ḍịseph, kụ ạngo bịdi, mọ, “Oomo phọ anyina, ịpughol.

²⁸Mụen kụ ịḅaal phọ ạmi ozuanaan bọ ḍita awe ịlo oghiran ịyo rꞌẸnaan, ịlo ọsar ịkaraph ọwilenaan awe.

²⁹Kụ mị rịḅeni inyina mọ mị kạ́ḅile mun ạpughol miim mọ ạmuen, tụtu ẹteeny ḍio phọ ạḍiphe mị rꞌanyina kẹpughol bọ emoom ẹphugholom mọ ẹpe ọmar kꞌỌde phọ ạmi.”

³⁰Kụ bịdi rọmoor ḍiniin ạḍuor oboom Ẹnaan kụ ọḍua ọghi ẹpe Eegum Ọlivs.

³¹Kụ ạJizos ạḅeni bịdi mọ, “Oomo phọ anyina kẹkanyanu ni esi omeeraam mọ anyina ḍughul phọ arodon, ịdi eḍighi bọ ọge ni pạ ạḍinya iigbia phọ mọ, ‘Mị Ẹnaan kakiigh opoghom iyool-ịga phọ, kụ aḍita ịga phọ ẹwalala.’

³²Mị roḅetenu esi aḍuugh phọ kụ mị aḍiemi ghan ẹpe Galili ikori inyina.”

³³Kụ aPita ạphagharanaan nyọdi mọ, “Eru dị oomo ạbueri phọ ọghanyanu ọwile nyịna, mị rꞌaloor kạ́kaaru aani.”

³⁴Kụ ạJizos ạḅeni nyọdi mọ, “Mị ạkar rạḅeni ghan nyịna mọ ḍughul phọ arodon tụtu ạkenegh rạlaay, nạ mụpharanaan ịmi ịraar amem.”

³⁵Kụ aPita ạḅem mọ, “Ghạlamo iḍighi ni dị mị rꞌạna komugh, mị nyịna kạ́pharanaan.” Kụ oomo phọ ạbumatuan phọ ọtuugh ịduon phọ ọḅem aani.

³⁶Kụ ạJizos rꞌạbumatuan phọ ọdi osi esi dị oghol mọ aGetsemani, kụ ạJizos ạḅeni bịdi mọ, “Ịtologhu sịen. Mị kạki ẹpe ạaḅereghi.”

³⁷Kụ ọdi ạpham Pita rꞌịyal phọ ạnmuny phọ aZebidi ạghimom ghisigh kụ ameelom oboom ọto kụ ologhi ọdi ạwalawala.

³⁸Kụ ọdi ạḅeni bịdi mọ, “Ọto dị mị ạmoogh upel li ịmi loor, mụdi kughiigh ni ịmi. Ịtol sịen egon aani ghan.”

³⁹Kụ ọdi arelhe ạghi ghisigh ẹphurukpu, kụ aḅololo kụ ạaḅereghi mọ, “Ọde phọ ạmi, mọ edugh ni, ọbo nạ mạar ịmi ẹgo ịminimiin phọ ẹphen, kụ ọlo káḍighi ịpe ịḅeeraan bọ ịmi, ḍighi ghụn ni ịpe ẹḅeeraan bọ nyịna.”

⁴⁰Kụ ọdi aḅula ạteeny bụmatuan phọ kụ ạmiin dị bịdi rọnaani yogh, kụ apuru Pita mọ, “Eeghe? Nạ órue ọkparam ogon rꞌọony amem?

⁴¹Igon ni ẹeḅereghi ghan, mọ nyina kímeel iḍighanaan ọdegh-ophogh. Edi ni iloghi anyina, kụ asiloor phọ kụ idugh.”

⁴²Kụ ọdi ạghi mem dị emuneniom ịyal, kụ ạaḅereghi mọ, “Ọde phọ ạmi, eḍighi ịyaar dị ẹgo ịminimiin phọ ẹphen ịmi kítenom, emuton dị mị ạphugholom, pọ ịpe nạ ạto bọ kụ emite!”

⁴³Kụ ọdi ạḅile aḅula kụ ạmiin dị bịdi rọnaani yogh, loor esi dị ạralha maḅogh riḍien ạbidi.

⁴⁴Kụ ọdi ạwile bịdi kụ ạḅile ạghi ạaḅereghi iniin phọ ịiḅereghi phọ, mem dị emuneniom ịraar.

⁴⁵Kụ ọdi ạḅile aru ạteeny bụmatuan phọ, kụ ạḅeni bịdi mọ, “Nyina edi ḍịen nịiniin rẹnaani yogh kephooghian? Ipogh aani. Amem mọ mẹteeny. Maala Mọony phọ Oye bụkaraph awe.

⁴⁶Iḅerenu ọghi ghisigh! Ipogh aani, ọpo kaal bọ ịmi mạkpulan.”

⁴⁷Kụ ọdi odi rạkaaph ghan ịduon phọ, bịn aJudas oniin sịphe aḍioph rꞌịyal phọ amite rꞌaḍiboom aḍita awe, dị ọnyaaghian rolhool ẹgham rꞌạraḅam, dị ạbuo ạrumhu ariil ạrikia phọ rꞌikumoor awe phọ kụ ọlogh.

⁴⁸Ọpo kabool bọ nyọdi rꞌạbidi mọḅoph ni ọnhu ọdo ịdi ọdi kaḍighi bọ mọ, “Ọpo mị kạkpun bọ okpo phọ kụ oye phọ. Imeleghuom nyọdi.”

⁴⁹Kụ ọdi ạghi ạteeny Jịzos kụ ạmagh mọ, “Ọtughemia, nạ odi,” kụ ạkpun okpo phọ.

⁵⁰Kụ ạJizos ạḅeni nyọdi mọ, “Ọyaghiri, ḍighi ịpe nạ ạtuan bọ kụ aru.” Kụ bịdi oru omeleghuom Jịzos osiph.

⁵¹Kụ oniin ọdi ạrolan rꞌạJizos asele ḍịghaagh aruph elhool ẹgham ọdi asophom aḅeri ẹbene uwo ẹmhu oyil ạrikia phọ.

⁵²Kụ ạJizos ạḅeni nyọdi mọ, “Ḅulemi elhool ẹgham mọ sịphe ologhi aḍuphul phọ. Bụphe okoph bọ elhool ẹgham komugh ḍuugh elhool ẹgham.

⁵³Nạ ólhegheri ḍụghum, mọ mị katue ni ạaḅereghi Ọde phọ ạmi, kụ ọdi kạsighe ni rụukpaany ẹgham dị opel ḍioph rꞌịyal asita uruom ịmi?

⁵⁴Eru mạar dị eḍighi ịdipho, ika kụ ẹdi ịpe ọge bọ pạ Ạḍinya Iigbia phọ kemunughan bọ mọ ịduon kụ kemite ni?”

⁵⁵Egi phọ ẹphen, ạJizos apuru ḍita awe phọ mọ, “Nyina ẹsighenom mọ mị ọḅa ḍụghum, kụ ẹpham bọ rolhool ẹgham rꞌạraḅam kụ erumom bọ osiph ạmi? Aḍio etum ḍio, mị ụrol ghan ni ude sịphe Otu Ịiḅereghi phọ kụ ạtughemi ghan kụ nyina ịmi ísiph.

⁵⁶Kụ oomo phọ ịphen memite omuneniom ịpe ariil phọ ọge bọ pạ Ạḍinya Iigbia phọ.” Kụ oomo ạbumatuan phọ ọwile nyọdi osumughu.

⁵⁷Kụ bụphe osiph bọ Jịzos ọpham nyọdi osiom kꞌạKayafas, uwo ẹmhu oyil ạrikia phọ, dị ạbutughemia iilogh phọ rꞌikumoor awe phọ mookpomoghan.

⁵⁸Kụ aPita ạdaph aani ni bịdi, ạrol kꞌẹgboogh ọman asi aani ogiga uwo ẹmhu oyil ạrikia phọ, kụ ạrol aani ude sịphe abukoriom ogiga phọ ọrol bọ okori ghan ịlo kemite.

⁵⁹Kụ ạbuo ạrumhu ariil ạrikia phọ rꞌoomo ikpolom awe phọ ọwaragha ghan sịagba osiphom ạJizos ọlogh esi aḍuugh,

⁶⁰kụ ụ́miin. Ịbadi ụgbaaghi ghan ni ọkpe ọḅam ẹmhu ọdi, kụ eekuna phọ ịyal awe uru ni

⁶¹kụ ọḅem mọ, “Oye phọ ọphon ạḅem mọ ọno katue ni apiemi Otu Ịiḅereghi phọ, kụ ạḅile ạlogh ọnon esi ịraar aḍughul-otu.”

⁶²Kụ uwo ẹmhu oyil ạrikia phọ aḅetenu kụ apuru nyọdi mọ, “Esi ịphen phọ bịdi ọgba bọ rọḅamaghi ẹmhu ạna, nạ ọ́moogh aani ịyaar ọphagharanaan?”

⁶³Kụ ạJizos aḅoorian kpạy kpạy. Kụ uwo ẹmhu oyil ạrikia phọ ạḅeni nyọdi mọ, “Mị akol ḍien Ẹnaan phọ edi ghan bọ, ụḅeni iyoor mụghumo nạ kụ aMesaya Ọony phọ Ẹnaan.”

⁶⁴Kụ ạJizos ạḅeni nyọdi mọ, “Nạ mạḅem, kụ mị rịḅeni ghan inyina mọ amem retu ni dị nyina kẹmiin dị Ọony phọ Oye ạrol ḍịghaagh elhiom Ẹnaan Oomo Ịikpo phọ, kụ ạḍua ẹpe ọotu okuaḍio phọ ratu ẹphen ade phọ.”

⁶⁵Kụ uwo ẹmhu oyil ạrikia phọ arunyian ibura ọdi loor ophin ologhi, kụ ạḅem mọ, “Ọdi mạapu Ẹnaan. Yira ọḅile kẹn rọwa ghan bụo ạsiagba phọ oḍighinom eeghe? Nyina rẹnaghan bọ ni ọopu phọ ọphon.

⁶⁶Edi aani ika iloghi anyina?” Kụ bịdi ọphagharanaan mọ, “Ọdi ạmoogh apum aḍuugh.”

⁶⁷Kụ bịdi omurughiom nyọdi ịghor, ọḅile ọgurogh, kụ bụdi ooḅorogh nyọdi

⁶⁸ọḅem ghan mọ, “Nạ aKraist, mịin uḍien. Ụḅeni iyoor oye phọ ọpo aḅor bọ nyịna.”

⁶⁹APita ạtol li ude ẹpe ogiga phọ, kụ oniin ọnyani-otu aru ạteeny nyọdi kụ ạḅem mọ, “Nạ oniin ọdi ạdaph aani ghan bọ Jịzos ọpo aGalili phọ.”

⁷⁰Kụ aPita ạpharanaan pạ ogbo phọ ạbidi mọ, “Mị úlegheri ẹmhu ịphen nạ rạkaaph bọ.”

⁷¹Kụ ọdi rorelhe romite ọnhu-aḍibuo phọ, kụ ọnon ọnyani-otu ạmiin nyọdi, kụ ạḅeni bụdi ọrol aani pạ phọ mọ, “Oye phọ ọphon, oniin ọdi ạdaph aani ghan bọ Jịzos, ọpo ạNazeret phọ.”

⁷²APita ạpharanaan kẹn kụ aghunya mọ, “Mị úlegheri oye phọ.”

⁷³Kụ mọony ẹnum amem kụ ạbuphe ọmeregha bọ ọḅeni Pita mọ, “Igey ni nạ oniin ọnyo ạbidi aani ni. Yoor ọsighe ọnhu ạḍiaḅa phọ ạna kụ olegheriom.”

⁷⁴Kụ aPita ạloghoḍi ịnhu, kụ aghunya kụ ạḅem mọ, “Mị úlegheri oye phọ.” Pọ kụ amem dị ạkenegh ạlaay.

⁷⁵Kụ aPita ạatughian ịpe ạJizos ạḅeni bọ nyọdi mọ, “Tụtu ạkenegh rạlaay nạ mụpharanaan ịmi ịraar amem.” Kụ ọdi amite kụ amoghi agey.