Read abua Matiu 27 Bible Online

Matiu 27 - abua bible

Matiu 27

¹Eḅon ạḍiroor aḍio phọ, oomo ạbuo ạrumhu ariil ạrikia phọ rꞌikumoor awe phọ umite ni ezue ịlo oghiigh ạJizos,

²kụ ọphaḍi nyọdi, kụ ororori ọghi ọḅogh ọngo Pailet ọdaam ọnyo aRom.

³Kụ mem dị aJudas, ọpo aal bọ Jịzos, ạmiin bọ mọ mosophonaan nyọdi apum, ọdi aloghoma ni aḅulemi ịraardi ipoḍi asilva phọ ạghiomaan bụo ạrumhu ariil ạrikia phọ rꞌikumoor awe phọ,

⁴kụ ạḅem mọ, “Mị mạpioman ịduon mị aal bọ oye dị mạar ụ́piom aghiigh.” Kụ bịdi ọḅem mọ, “Ịpe ẹman eeghe esi ayoor? Aḍighiton ạna.”

⁵Kụ ọdi azu ikpoki phọ pạ Otu Ịiḅereghi phọ, kụ ạḍua ạghi asina amugh.

⁶Kụ ạbuo ạrumhu ariil ạrikia phọ ọson ikpoki phọ ọsighiogh kụ ọḅem mọ, “Ị́kpe ọsighe ikpoki phọ ịphen ọlogh ịpa eekoom ikpoki Otu Ịiḅereghi phọ, ịdi eḍighi bọ ịphen ikpoki ịḅaal.”

⁷Kụ bịdi oopuruan, kụ ọsighe ikpoki phọ oghoom ekulha ade, dị oghol mọ “Ade ọlemom roko”, ọbo oḍiighi ghan ruuruen.

⁸Kụ ọtuan ịduon ogholom esi phọ mọ “Ade ịḅaal”, tụtu kꞌarodon.

⁹Ịphen imuneniom ni ịpe aJerimaya oyil phọ Ẹnaan ạghaaph bọ mọ, “Bịdi kọsighe ịraardi ipoḍi asilva phọ, ịpe awe phọ Ịzirel omerenyan bọ ọkpe ẹmhu ọdi,

¹⁰kụ okoom ‘De ọlemom roko’, ịdipho Ọmoogh-we phọ ạto bọ ụḅeni ịmi.”

¹¹Kụ ạJizos ạmeera ghisigh ọdaam mọ, kụ ọdaam mọ apuru nyọdi mọ, “Nạ kụ ọdaam ạbuo aJu phọ ni?” Kụ ạJizos mọ, “Nạ kụ mạḅem.”

¹²Kụ ạbuo ạrumhu ariil ạrikia phọ rꞌikumoor awe phọ ọgba ịkaraph ạsiagba ọḅam ẹmhu ọdi, kụ ọdi ịyaar ọ́phagharanaan.

¹³Kụ aPailet apuru mọ, “Tọ, nạ rạnaghan aani ni ọdorodo phọ ịphen bịdi rọgbaanaan bọ nyịna?”

¹⁴Kụ ọdi ekpo ọnhu ọ́phagharanaan, kụ ịphen phọ ịngo ni ọdaam mọ iboom iikia.

¹⁵Mem ẹyaal ọphel otene phọ, ọdaam mọ raseere ghan ni nyoniin ọnyo-ikoli, lọ awe phọ ọlom, kạngo.

¹⁶Kụ oniin ọnyo-ikoli ạrol li pạ, dị aaleghaan. Ḍien ọdi ughol mọ ạBarabas.

¹⁷Awe phọ mookpomoghan, kụ aPailet apuru bịdi mọ, “Mị useere ạnhian kụ ịngo inyina? Bạrabas ḍụghum, kụ ạJizos ọpo oghol bọ mọ aKraist phọ?”

¹⁸Ọdi alegheri ni mọ bịdi ụsighe mụlogh-ḍien kụ ọḅoghom bọ Jịzos ọngo nyịno.

¹⁹Ọdi rọrol bọ ạgada ịiruen phọ, kụ ạnir phọ ọdi arom ạghiomaan nyọdi mọ, “Kạ́moogh ịyaar oḍighinom ogey oye phọ ọpo, ịdi eḍighi bọ ḍughul phọ ạḍien ẹḅaal bọ rodon ạmalha dị mị ạmalha oye phọ ọpo aḍighi ni ruugu iboom.”

²⁰Kụ ạbuo ạrumhu ariil ạrikia phọ rꞌikumoor awe phọ ọkpaariom ḍita awe phọ ịlo kọlom Pailet mọ amitiom Bạrabas, kụ ọsighe Jịzos ọlogh esi aḍuugh.

²¹Kụ ọdaam mọ apuru bịdi mọ, “Sịphe ịyal phọ ạbidi mị useere ạnhian kụ ịngo inyina?” Kụ bịdi mọ, “Bạrabas.”

²²Kụ aPailet ạḅile apuru bịdi mọ, “Kụ nyina rẹwa mọ mị uḍighi ika Jịzos, ọpo nyina rekol ghan bọ mọ aKraist phọ?” Kụ oomo phọ ạbidi mọ, “Kạn nyọdi loor oreeny aghiigh.”

²³Kụ aPailet mọ, “Uḍighi ika? Ịghen ịkaraph kụ ẹdi ọdi aḍighi bọ?” Kụ bịdi ọḅile kẹn ọyughuron opuemi ịḅel phọ mọ, “Kạn nyọdi loor oreeny aghiigh.”

²⁴Mem dị aPailet ạmiin bọ mọ ọno kátue ạkaaph aḅonyon iloghi awe phọ, mọ ịgbaragbara ghụn kụ ịḅile resoor ọdi ạsighe ni mụum kụ aatola rạghaagh ọdi ghisigh aḍita phọ, kụ ạḅem mọ, “Mị úḍigh aani esi aḍuugh ogey oye phọ ọphon. Ḍịen aḍighiton anyina.”

²⁵Kụ oomo awe phọ ọphagharanaan mọ, “Ịḅaal ọdi ẹrol rụmhu ayoor rꞌạnmuny ayoor!”

²⁶Kụ aPailet aseere Bạrabas ạngo bịdi kụ ạgurogh Jịzos, kụ ạḅogh ạngo bịdi, mọ ọkan oghiigh.

²⁷Kụ ạbuo ẹgham aPailet ọpham Jịzos oḍighom ogiga ọdaam mọ kụ ọmagh oomo ạbueri phọ ookpomoghi okoom nyọdi.

²⁸Kụ ọkporion rụsuoma ọdi kụ ọsighe oodor ọkpologhi nyọdi,

²⁹kụ ọsighe iitoor oloom eghoony ọdaam ẹmha ozu nyọdi, kụ ọsighe ikpu ọlogh ḍịghaagh elhiom ọdi, kụ okpuḍughian ghisigh ọdi, kụ ọnmoghoghoom nyọdi mọ, “Oboom oboom ạbuo aJu.”

³⁰Kụ bịdi omurughiom nyọdi ịghor, kụ ọsighe ikpu phọ ọguroghom ẹmhu ọdi.

³¹Kụ bịdi rọnmoghoghoom yogh bọ nyọdi rọwile, kụ ọkporion oodor phọ, kụ ọsighe rụsuoma phọ ọdi ọkpologhi, kụ ọpham onyeeniom ẹpe kọkan bọ nyọdi okiigh.

³²Ịdipho bịdi romite bọ, bịn ozuan oye ọlo aSairini, dị oghol mọ aSaimon, kụ ọkpaariom mọ ọdi aroolaan oreeny phọ kọkanam bọ Jịzos.

³³Bịdi rosi esi dị oghol mọ ạGolgota, ịsien phọ ạwara, ạkpaḍi igbaany ạrumhu,

³⁴kụ ọngo nyọdi miim dị oḅunyonom ọogho dị oghol mọ agaul, kụ ọdi rọonema kụ ómeera ọphughol.

³⁵Kụ ọkan nyọdi loor oreeny phọ kụ ogim, kụ ọsaaghi ghan ẹlhel odianam iinmenan phọ ạJizos.

³⁶Kụ ọrologhu pạ ogon ghan nyọdi.

³⁷Kụ ọge sịphe ạnyu oreeny phọ ịpe ọgba bọ ọḅamaghi ẹmhu ọdi mọ, “Ọphon ạJizos ọdaam ẹmha ạbuo aJu.”

³⁸Kụ ụkan aani ni ịyal ạruḅa loor ịnon ireeny ọḅaram Jịzos, oniin ḍịghaagh elhiom, ọphori phọ ḍịghaagh ekeeny.

³⁹Kụ abuteneneen phọ ooḅoghomi ghan rụmhu ạbidi, kụ oofolomi nyọdi kụ ọḅem ghan mọ,

⁴⁰“Nạ phọ ạḅem bọ mọ nạ kalereghi Otu Ịiḅereghi phọ kụ ạlogh ọnon ạmadan esi ịraar aḍughul-otu, pẹla ẹmhu ạna. Eru dị nạ aru Mọony Ẹnaan, ḍụa sịphe oreeny phọ asoor!”

⁴¹Igina phọ kẹn ạbuo ạrumhu ariil ạrikia phọ rꞌạbutughemia iilogh phọ, rꞌikumoor awe phọ, oniin ạḅeni ghan nyoniin esi ịnmoghoghoom mọ,

⁴²“Ọpel bụnon dị ẹmhu ọdi útue ụpela. Eru dị ọdi aru ọdaam ẹmha phọ Ịzirel, pọ ạḍua pạ oreeny phọ asoor, pịdi yira ọmiin kụ omeeraam nyọdi.

⁴³Ọdi aḍuom ologhi Ẹnaan, kụ ạḅem mọ ọno Ọony Ẹnaan. Ophogh nụun mụghumo Ẹnaan kẹpel li nyọdi!”

⁴⁴Kụ ạruḅa phọ ọḅaram bọ nyọdi ọkan ụḅeni aani ni nyọdi igina ạsikaraph phọ.

⁴⁵Mẹteeny ogbo ootaany, kụ ufiri aḍigh oomo eelhe phọ kụ ạrol ẹteeny ịraar asuo dulhe.

⁴⁶Kụ ịraar asuo phọ, kụ ạJizos ạlho ạghiom ạnyu mọ, “Eloi, Eloi, lạma sạbaktani,” ịduon phọ, pọ “Ẹnaan ạmi, Ẹnaan ạmi, uḍighi ika kụ nạ mughel bọ ịmi?”

⁴⁷Kụ buniin ạbudi ọmeregha sịphe phọ rọnaghan bọ, kụ ọḅem mọ, “Oye phọ ọphon rạmagh ghan Ilaija.”

⁴⁸Kụ oniin anyeene aghiil, kụ ạghi ạsighe iisighom, kụ ạatoghoḍiom mụkpueneen amiim, kụ ạpharari loor oreeny, kụ asu ạghiom mọ ọdi ạphughol.

⁴⁹Kụ ạbueri phọ ọḅem mọ, “Ikori ọmiin mọ Ilaija katu ni ọsighe ọdi osoore.”

⁵⁰Kụ ạJizos rọḅile rọlo rọghiom ạnyu, kụ ạwile mọ uwaloor phọ ọdi ạḍua.

⁵¹Kụ otu-ukpe dị osophom ologhi Otu Ịiḅereghi phọ ạkoghoronaan kꞌạnyu kꞌude, kụ ade phọ ephiigha kụ asighiigh phọ ewunughian,

⁵²kụ ariiḍi phọ eḅomoghian, kụ ịbadi abugey awe oḅerenu esi aḍuugh

⁵³kụ omiteghu sịphe ariiḍi phọ, mem mọ ọpo ọdi maḅetenu bọ, kụ ọghi ẹpe ẹmha iigbia phọ, kụ ịbadi aweye ọmiin bịdi.

⁵⁴Kụ mem dị uwo ẹmhu ạbuo ẹgham mọ rꞌạbuphe ọrol bọ rꞌọdi rogon Jịzos ọmiin bọ mọ ade phọ repiigha rꞌịpheri phọ ạraraar phọ emiteghu bọ, iḍighi ni ruugu kụ bịdi ọḅem mọ, “Agey ni, oye phọ ọphon kụ Ọony phọ Ẹnaan ni.”

⁵⁵Ịbadi ạnmariir dị ọdaph aani ghan ni Jịzos mem mọ dị ạrol bọ Galili ọloghonaan nyọdi ḍịghaagh ụrol li egher kụ ophogh ghan.

⁵⁶Pạ ogbo phọ ạbidi, aMeri ọpo ạMagdala phọ rꞌaMeri onhiin phọ aJems rꞌạJosef, rꞌonhiin ạnmuny phọ aZebidi kụ ụrol aani.

⁵⁷Mẹteeny dulhe kụ oniin ọolha ọlo Arimatia dị oghol mọ ạJosef, aru asi ẹpe phọ. Ọdi ạmatuan ạJizos,

⁵⁸kụ ạghi ạteeny Pailet ạlom ḍizu phọ ạJizos. Kụ aPailet ameera mọ ọngo ni nyọdi.

⁵⁹Kụ ạJosef ạsighe ḍizu phọ kụ aphurughiom ọser-sẹr ọmur

⁶⁰kụ aḍi nyọdi omoom oḍi ọdi, dị oguph loor asighiigh, kụ aakilemi ḍigbogh aḍighiigh aakpereghiom kụ aten ạḍua.

⁶¹Kụ aMeri ọpo ạMagdala phọ rꞌọphori phọ aMeri phọ, ọrol pạ osoman oḍi phọ.

⁶²Ḍio phọ ạḍiphe etum bọ ḍio ookolobian phọ, kụ ạbuo ạrumhu ariil ạrikia phọ rꞌaFarisi phọ oru ọteeny Pailet,

⁶³kụ ọḅeni mọ, “Oye phọ, yoor mọotughian mọ obiighi-we phọ ạḅem ni mem mọ ọpo ọdi ạrol bọ, mọ ịraar aḍughul-otu mọ ọno kaḅetenu ni esi aḍuugh phọ.

⁶⁴Esi ịphen phọ, tọ ạḅeni we phọ ạna mọ ọzooghi oḍi phọ ọkparami kụ ịraar aḍughul-otu phọ egbi omunughan, ọbo ạbumatuan phọ ọdi kotu ghan bọ ḍughul omi nyọdi ọḍuanam, kụ ọḅeni we phọ mọ ọdi maḅetenu sịphe aḍuugh phọ. Iigbegheḍiom mọ ịphen kụ kebeeph epu ịḅel phọ.”

⁶⁵Kụ aPailet ạḅeni bịdi mọ, “Itiin ḍita awe ẹgham mọ ạbuen, ẹghi ẹmaar ẹkparami oḍi phọ.”

⁶⁶Kụ bịdi ọghi ọsighe oba ọḅirighiom ọnhu oḍi phọ ọkparami, kụ ọwile we ẹgham mọ mọ ọrol sịphe ogon ghan.