Read abua Matiu 3 Bible Online

Matiu 3 - abua bible

Matiu 3

¹Mem mọ ọpo phọ ạJon oburogh mụum aru ni amite ạghaaph ọghaaph Ẹnaan ẹpe ẹdala phọ aJudia.

²Ạḅem ghan mọ, “Ikiton esi ịkaraph anyina, ọmar phọ kꞌẸnaan masi sịen ẹda ạḍighaagh.”

³Ọphon kụ ọdi Azaya oyil phọ Ẹnaan ạghaaph ghan bọ ịlo ọdi kụ ạḅem mọ, “Oye atu ni rạlooghi ẹpe ẹdala phọ mọ ‘Ọmoogh-we ratu. Iseleminaan eten phọ ọdi, esele yogh iloghi phọ anyina!’”

⁴ẠJon phọ ọphon phọ ạkpologhian ghan ạsuoma asuphuugh ạsikamel rꞌokuughaam ozu ẹnam. Eḍien ọdi, igurubia rꞌẹnuum aḍiowo.

⁵Kụ awe ụḍua ghan ni Jeruselem, rꞌoomo aJudia, rꞌareelhe phọ eko bọ Jọdan ọghi ọteeny nyọdi.

⁶Kụ ọgba ịkaraph phọ ạbidi omitiom, kụ ọdi awurogh ghan bịdi mụum ẹpe Ọphiiny ạJodan.

⁷Kụ mem dị ạJon ạmiin bọ ịbadi aFarisi rꞌaSadusi dị rotu mọ ọdi awur bụno mụum, ọdi ạḅeni ni bịdi mọ, “Nyina ọmar ạsiḅom. Ạnhian kụ iroma bọ inyina mọ nyina kekpetenaan ghẹlhe phọ ratu bọ?

⁸Ịmoogh ẹzo ẹlo awe lọ mokiton esi ịkaraph ạbidi.

⁹Kéḍuom ologhi Ebraham ọde phọ ayira. Boonaan Ebraham kạ́tol, mem dị nyina eḍighi ịkaraph. Mị rịḅeni ni inyina mọ Ẹnaan ketue ni ẹsighe sighiigh phọ ịphen eḍighi nmụny ẹngo Ebraham.

¹⁰Kꞌạnyiidipho ni bịn oseere ni akubu zin ạtorobo oreeny. Oreeny lọ úmuum igey iimuma koler ri oguom nịan.

¹¹Mị iwur inyina mụum mọ ịlo oḍeenaan mọ nyina mekiton esi ịkaraph phọ anyina, kụ ọpo ratu bọ upu ni ịmi. Mị ụ́man ọpham arokoro ọdi. Ọdi kạsighe Uwaloor Iigbia phọ rꞌạnian kụ iwurom inyina.

¹²Ọdi ạpam ni ọsalam ḍịghaagh ọdi ọlo okori ọsalam ịbiakpa phọ ookpomoghi igey phọ oseere, kụ ọsighe ịzeghe phọ oguom nịan dị kéḍim.”

¹³Mem mọ ọpo phọ ạJizos ạḍua ni ẹpe Galili ạghi Ọphiiny ạJodan ạteeny Jọn, mọ awur aani nyịno mụum mọ.

¹⁴Kụ ạJon ọ́wa omeera kụ ạḅem mọ, “Mịna phọ ọphon ạkpe bọ dị nạ kụ kabur mụum, kụ nạ ạḅile atu, mọ mị kụ awur nyịna!”

¹⁵Kụ ạJizos mọ, “Ẹrol li ịduon phọ! Ẹkpianaan ni dị yira komuneni oomo ịtooghi phọ Ẹnaan.” Kụ ạJon ameera

¹⁶kụ awur Jịzos mụum mọ, kụ ạJizos rạsoghoronu bọ pạ ạmuum mọ, bịn ạmiin ni okuaḍio phọ dị maghughuronu, rꞌUwaloor Iigbia phọ, dị ạghigh ọkurughozo, dị rasoorom nyọdi.

¹⁷Kụ ẹḍogh ẹḍua ẹpe kꞌạke kụ ẹḅem mọ, “Ọphon kụ ogina Ọony phọ ạmi, ọpo ạkar bọ ụḅeeraan ịmi iboom.”