Read abua Matiu 5 Bible Online

Matiu 5 - abua bible

Matiu 5

¹Kụ ạJizos rọmiin bọ ḍita awe phọ, kụ ạghi ạsiiny ạnyu ẹeḅaraph, ạrol ude. Kụ ạbumatuan phọ ọdi oru ọteeny nyọdi,

²kụ ọdi ạtughemi bịdi mọ:

³“Iboh kꞌẸnaan edianaan ni bụphe ologhoma bọ mọ ẹkparam ni ruwaloor phọ ạbuno; ọmar phọ kꞌẸnaan ọlo ạbidi ni.

⁴Iboh kꞌẸnaan edianaan ni bụphe odi bọ ọto; Ẹnaan kẹedereghi ni bịdi.

⁵Iboh kꞌẸnaan edianaan ni bụo osooromi aloor phọ; bịdi kọmoogh ni ịpe Ẹnaan eguanaan bọ,

⁶Iboh kꞌẸnaan edianaan ni bụphe rẹpu bọ oḍighi ịpe Ẹnaan rẹwa bọ oomo amem; Ẹnaan kemuzeḍinaan ẹgbaanyemi ni bịdi.

⁷Iboh kꞌẸnaan edianaan ni bụphe rọnma ghan bọ ighirigiir phọ; Ẹnaan kẹnma ni bịdi ighirigiir.

⁸Iboh kꞌẸnaan edianaan ni we dị iloghi phọ ẹserere; bịdi kọmiin ni Ẹnaan.

⁹Iboh kꞌẸnaan edianaan ni bụphe rọḅem ghan bọ mọ kísoor phọ; Ẹnaan kekol li bịdi mọ ạnmuny ọno.

¹⁰Iboh kꞌẸnaan edianaan ni we dị ọtuan oḍighi ghan ịpe Ẹnaan rẹwa bọ kụ rọmiinom; ọmar phọ kꞌẸnaan ọlo ạbidi ni.

¹¹“Iboh kꞌẸnaan idianaan inyina mem dị awe ụtuan ịmi kụ rịgilaam inyina, ḅịle kẹn rịgbiphoghom inyina, kụ rịgbaanaan inyina oomo ịkaraph ạsiagba.

¹²Iboh ni, ẹmoogh ọḅaal ologhi loor esi aruunmo phọ kiinmo bọ inyina ẹpe kꞌạke. Ịdipho kụ ịdi ọgbiphoghom bọ ni riil phọ ạbuphe ọrol bọ kụ egbi bọ ọteeny amem mọ anyina.”

¹³“Nyina kụ aboph awe ịsien aḅirini phọ, kụ eḍighi ịyaar dị eroph aboph phọ mephe, kọḅile otophomiom eeghe? Ọ́moogh mun mạar oḍighinom, emuton dị kozu bịn awe ọozeghiom ruwol.

¹⁴“Nyina kụ ạḍiḅaal awe ịsien aḅirini phọ. Ẹmha dị ọlogh ạnyu eegbolom rẹ́booghian ghan.

¹⁵Oye ólho dị kạsu ọtozi, kụ akpereghiom igbe. Kạḅam ghan ghụn ạnyu, pịdi asoor aleeny oomo otu phọ.

¹⁶Ạḍiḅaal phọ anyina ẹtuugh ịdipho phọ ẹmhu aani ghisigh awe, pịdi bịdi ọmiin iiḅi iiḍighi phọ anyina kụ oboom Ọde phọ anyina odi bọ kꞌạke phọ!”

¹⁷“Kégbiom ghan mọ mị uru ophiemi iilogh phọ aMozis rꞌịtughemi ariil phọ Ẹnaan. Mị útu ophiemi, mị uru omuneni.

¹⁸Mị ạkar rịḅeni ghan inyina mọ, tụtu ạke phọ rꞌade phọ eten, rꞌeniin ekpo ịpe ọge bọ sịphe iilogh phọ képe, tụtu ẹteeny eekuna oomo ạraraar.

¹⁹Loor ịduon phọ, tọrobo oye lọ ạka ghạlamo rꞌoniin ọbam sịen iilogh phọ ịphen kụ ạtughemi we ọkaaghi aani iilogh phọ, pọ ọdi maḍighi ọbam ẹpe ọmar phọ kꞌẸnaan. Kụ tọrobo oye lọ aako iilogh phọ ịphen kụ ạtughemi we ịlo ooko aani iilogh phọ, pọ ọdi maḍighi ogbogh ẹpe ọmar phọ kꞌẸnaan.

²⁰Mị rịḅeni inyina mọ nyina kéḍigh ọmar phọ kꞌẸnaan, omuton dị eḍighinom ịyaar phọ anyina ẹnighe epu ẹlo ạbutughemia iilogh phọ rꞌaFarisi phọ.”

²¹“Nyina mẹnaghan ghan ni mọ ḍiodiidi ụḅeni ni bụrude phọ anyina mọ enu kụ́ko, kụ mọ oye lọ ạko enu kọmagh ni nyọdi esi ạsiagba.

²²Kụ mị rịḅeni ghan inyina mọ tọrobo oye lọ ạghagham umor ọdi ologhi, dị mạar ụ́piom, kọmagh ni nyọdi esi ạsiagba, kụ mọ oye lọ aḅom ẹmhu kụ ạḅeni umor ọdi mọ ‘Nạ ọga’ kọsighe nyọdi ọkimom otu ạsiagba ghisigh ikpolom awe phọ, kụ mọ oye lọ aphogh umor ọdi kụ ạḅitonaan mọ ọphon maphe, pọ ọdi ranyeene ni osuma ooni ạnian.

²³Loor ịduon phọ, eru dị nạ ạghi pạ otu Ẹnaan phọ ọngo inmo kụ nạ ạatughian mọ umor ạna rꞌạna ẹmoogh ḍịaḅa,

²⁴bịle inmo phọ ạna sịphe esomanan enmeny ẹkia phọ agheel ẹphomoghian, kụ agbi oḅula ọngo inmo phọ ạna.

²⁵“Eru mạar dị oye rạwa osoorom ạna erugh, pọ nụun ạghi ẹgba ẹphomoghian, ọbo osi sịagba phọ oogboom ịiruen phọ kasoph ghan bọ mọ ọsighe nyịna ọghi ọlogh ikoli. Mị ạkar rạḅeni nyịna mọ ịpa kụ ẹdi nạ kạtol.

²⁶Nyịna rómitiom, tụtu nạ ạkpeeghi oomo phọ ịpe osophonaan bọ nyịna ḅeer ạmadan.”

²⁷“Nyina mẹnaghan ghan ni mọ ḍiodiidi ụḅeni ni we mọ ẹmha kúle.

²⁸Kụ mị rịḅeni ghan inyina mọ tọrobo oye lọ aphogh ạnir-ephoph kụ ạruuphua olhe ẹmha ẹphu, pọ malhiom ni ạnir phọ ọpo phọ ẹmha sịphe ologhi phọ ọdi.

²⁹Loor ịphen phọ, mụghumo ekpeḍien elhiom ạna kụ rẹphue nyịna, pọ pọghoronaan aroph. Kẹnighe epu dị aloor phọ ạna ímunughan kụ nạ agheel kꞌạke, kpạripe rꞌomunughan kụ osumeeny nyịna ooni ạnian.

³⁰Mọ ạḍighaagh elhiom ạna kụ rẹphue nyịna, pọ soph aroph. Kẹnighe epu dị aloor phọ ạna ímunughan kụ nạ agheel kꞌạke, kpạripe rꞌomunughan ạraghaagh kụ osumeeny nyịna ooni ạnian.”

³¹“Ụḅem ghan kẹn ni mọ oye lọ aseere ạnir ọdi, mọ ạngo ghan ḍịnya ọgbaranaan.

³²Kụ mị rịḅeni ghan inyina mọ oye lọ aseere ạnir ọdi, dị ụ́tuan mọ ale ẹmha, kụ ạnir phọ ạḅile ạghi ạal ịnon ilom, pọ olhom mọ maḍighi dị ạnir phọ malhe ẹmha. Kụ oye lọ aphin ạnir lọ oseere pọ ale aani kẹn ni ẹmha.”

³³“Nyina mẹnaghan ghan kẹn ni mọ gediidi ụḅeni ni bụrude phọ anyina mọ kékunya iikunya dị nyina íiko. Ịtuugh ịpe nyina meghunya bọ ẹngo Ọmoogh-we phọ eeko.

³⁴Kụ mị rịḅeni ghan inyina mọ kékunya ghan mun mem lọ nyina reguan oguan; kékunya kẹ, ịdi eḍighi bọ ạgada ọdaam eelhe Ẹnaan;

³⁵Kékunya kẹn de, ịdi eḍighi bọ ịkasi ọkpasaghiom aruwol Ẹnaan; kékunya kẹn Jeruselem, ịdi eḍighi bọ ẹmha Ẹnaan ogbogh Ọdaam ẹmha phọ.

³⁶Kékunya kẹn rụmhu anyina, ịdi eḍighi bọ nyina kétue eḍighi dị aḍiniin ạḍilaal rụmhu anyina kebiil, ḅịle mꞌọḅaal.

³⁷Kụ ọghaaph anyina aḍighi ghan mọ ii, pọ ii, eeye, pọ eeye! Tọrobo ịyaar lọ epel ịphen, pọ ịḍua esi Eru kụ emite.”

³⁸“Nyina mẹnaghan ghan ni mọ gediidi ụḅeni ni we mọ ọkpiom ghan ekpeḍien rꞌekpeḍien, ọkpiom ghan ọlaay rꞌọlaay.

³⁹Kụ mị rịḅeni inyina mọ kéḅulemian ghan ịkaraph oye, kụ oye lọ aḅor okpo elhiom ạna, pọ ngọ nyọdi nyọpo ekeeny phọ ọdi ạḅile aḅor.

⁴⁰Eḍighi ịyaar dị oye agbo nyịna ogbo ịlo ọsighe ạsuoma ạna, ḅạram koti phọ ạna ạngoom nyọdi.

⁴¹Oye lọ ạkpaariom nyịna oroolaan adool ọdi oniin otobi, pọ toolaan nyọdi ịyal itobi.

⁴²Oye aru kụ ạlom nyịna ịyaar, pọ ngạani ni nyọdi. Oye lọ aru kꞌạna ạboole, pọ bọole ni nyọdi.”

⁴³“Nyina mẹnaghan ghan ni mọ gediidi ụḅeni ni we mọ ịpomoghian rịghiri anyina ẹlogh ḍien bụmulogh-ḍien anyina.

⁴⁴Kụ mị rịḅeni ghan inyina mọ ịpomoghian bụmulogh-ḍien anyina, kụ ẹeḅereghi ghan ẹngo bụphe rịgbiphoghom bọ inyina,

⁴⁵ọbo nyina eru nmụny Ọde phọ anyina odi bọ kꞌạke phọ. Ọdi aḍighi ni dị ogogo phọ ọdi ạmu rasoorom ghan bugey rꞌạbukaraph, ḅịle ọlophia phọ rạlophom ghan bugey rꞌạbukaraph.

⁴⁶Nyina ẹphomoghian ghan bụlo ịphomoghian inyina bịn, eeghe aruunmo kụ ẹdi Ẹnaan kiinmo bọ inyina? Rꞌạbubonyiom iisogh phọ bịn roḍighi ghan ni ịphen phọ.

⁴⁷Eru mạar dị ạrighiri phọ anyina rꞌanyina bịn kụ rẹemaghaghan ghan, eeghe kụ ẹdi nyina eḍighi bọ epeeliom bụeri phọ? Rꞌạbuo aruru phọ bịn roḍighi ghan ni ịphen phọ.

⁴⁸Iseleman, ịdipho Ọde phọ anyina odi bọ kꞌạke phọ aseleman bọ.”