Read abua Matiu 6 Bible Online

Matiu 6 - abua bible

Matiu 6

¹“Igona ghan loor anyina. Kéḍighi ghan iiḅi anyina egananami, ọbo awe kọmiin ghan bọ ịseph inyina. Kụ nyina eḍighi ịphen egananami, Ọde phọ anyina odi bọ kꞌạke phọ, inyina ruunmo kíinmo.

²“Mem lọ nyina rẹngaani nyọpo ụ́moogh bọ ịyaar, kéephughemian loor ịdipho awe dị robaga ghan ẹpe arubughotu phọ rꞌikol areten phọ, pịdi awe oboom bịdi. Mị ạkar rịḅeni ghan inyina mọ mọkpe ni bịdi ịikpia ạbidi omuneni.

³Mem lọ nyina rẹngaani nyọpo ụ́moogh bọ ịyaar, ẹrol ghan ibu! Ekeeny kílegheri ghan ịlo elhiom, elhiom kílegheri ghan ịlo ekeeny! Kụ Ọde phọ anyina, ọpo rạmiin ghan bọ ịpe nyina reḍighi bọ esi ịbooghian phọ, kiinmo ni inyina ruunmo.”

⁵“Kụ mem lọ nyina rẹeḅereghi, kẹ́tuughaany bubagaam mọ. Rẹḅeeraan ghan bịdi ọmeera arubughotu rꞌikol areten kụ ọoḅereghi, pịdi awe ọmiin bịdi ọseph. Mị ạkar rịḅeni ghan inyina mọ mọkpe ni bịdi ịikpia phọ ạbidi omuneni.

⁶Kụ mem lọ nyina rẹeḅereghi, iḍigh ghan osoph eghughi eghuugh phọ kụ ẹeḅereghi ẹngo Ọde phọ anyina nyọpo rọ́miin ghan bọ ekpeḍien, kụ Ọde phọ anyina ọpo rạmiin ghan bọ ịpe nyina reḍighi bọ esi ịbooghian phọ kiinmo ni inyina ruunmo.

⁷“Kụ mem lọ nyina rẹeḅereghi, képu ghan ịyaar bịn ẹḅem eeḅula, ịdipho awe aruru rọoḅereghi ghan bọ. Bịdi rogbiom ghan ologhi mọ Ẹnaan kẹtuan ịidoony ịiḅereghi phọ ạbuno kụ ẹnaghanan.

⁸Kẹ́tuughaany bịdi. Ọde phọ anyina alegheri ni rạraar phọ ikuom bọ inyina, kụ nyina egbi bọ opuru ọdi.

⁹Ịiḅereghi ghan ịduon mọ, “‘Ọde phọ ayoor odi bọ kꞌạke phọ, eegu ẹrolonaan ḍien phọ ạna!

¹⁰Ọmar phọ ạna aru ni! Oḍighi aani ịpe nạ rạwa bọ sịen ade phọ, ịdipho roḍighi bọ kꞌạke phọ!

¹¹Ụngo iyoor eḍien ẹlo arodon!

¹²Ịkaraph lọ yoor oḍighi, sạr ụwilenaan iyoor, ịdipho yoor rọbilenaan ghan bọ bụnon!

¹³Kámeera yoor omeel oḍighanaan ọdegh ophogh, ụphel iyoor ạsighe esi ịkaraph.’

¹⁴“Eḍighi ịyaar dị nyina rẹbilenaan ghan bụnon awe lọ iḍighi inyina ịkaraph, pọ Ọde phọ anyina odi bọ kꞌạke phọ kạsar ịkaraph ịwilenaan inyina.

¹⁵Kụ nyina ị́bilenaan ghan bụnon awe lọ iḍighi inyina ịkaraph, pọ Ọde phọ anyina kạ́sar ịkaraph ịwilenaan inyina.”

¹⁶“Kụ mem lọ nyina ẹrol dọl ọkoony esi ịiḅereghi, kékiriri yogh ghan ịdipho abubagaam mọ. Bịdi rọnyighighian ghan, pịdi awe ọmiin bịdi olegheri mọ bịdi odi dọl ọkoony. Mị ạkar rịḅeni ghan inyina mọ mọkpe ni bịdi ịikpia ạbidi omuneni.

¹⁷Mem lọ nyina edi dọl ọkoony esi ịiḅereghi, iitola ghan risigh anyina egbula elo rụmhu anyina,

¹⁸ọbo awe kolegheri ghan bọ mọ nyina edi dọl ọkoony. Ọde phọ anyina ọpo rọ́miin ghan bọ ekpeḍien bịn kụ alegheri. Kụ Ọde phọ anyina ọpo rạmiin ghan bọ ịpe nyina reḍighi bọ esi ịbooghian phọ kiinmo ni inyina ruunmo.”

¹⁹“Kéeko ẹelha anyina eseerian sịen aḅirini phọ ọphon. Ịphelepheel kegbo ni, ọsari kaḍigh ni, ḅịle ạruḅa kọka ni oḍigh omi ẹelha phọ anyina.

²⁰Iiko ghụn eseerian ẹpe kꞌạke, ẹpe ịphelepheel rꞌọsari úlho bọ, ạruḅa kọ́ka bọ omi.

²¹Esi lọ ẹelha anyina edi, pọ kụ esi dị iloghi anyina kẹtol.”

²²“Ariḍien phọ ạna kụ ọtozi aloor phọ ạna. Eḍighi mạar dị nạ ạmoogh eeḅi ekpeḍien, pọ oomo aloor phọ ạna ạḍiḅaal kụ imuza.

²³Kụ eḍighi mạar dị nạ ạmoogh ẹkaraph ekpeḍien, pọ ufiri maḍigh loor ạna, kụ eḍighi ịyaar dị ekpeḍien phọ rẹngo ghan bọ ọmiin eten loor ạna kụ eḍighi ufiri, ufiri phọ ọpo kạtol ika?”

²⁴“Oye ólho dị katue ạdaph ịyal ạburude-otu. Ọdi kạlogh ni nyoniin ḍien, ạpomoghian nyọori phọ. Ọdi kạpamanam ni nyoniin akel nyọori phọ. Nyina kétue ẹḅar Ẹnaan rꞌikpoki kụ ẹdaph.

²⁵“Mị ụtuan ịphen phọ kụ rịḅeni ghan bọ inyina mọ kékol ghan ịyaar olhe, rꞌịlo ọphughol, rꞌịlo omuuna, ẹeḅaghamian loor anyina, ịdi eḍighi bọ aghuḍum mọ apu ni eḍien, ḅịle aloor phọ epu ni rukpe.

²⁶Ipogh aani ni dọl phọ ịnun. Bịdi ozo róḅeph ghan; ịizupha rọ́zuph ghan; ibugha róbugha ghan koseerian, kụ Ọde phọ anyina odi bọ kꞌạke phọ, rạngo ghan ni bịdi eḍien. Nyina kụ ị́man mạar ipu bịdi ḍụghum?

²⁷Ạnhian ọnyo anyina kụ ẹdi kakol ḍịkpo ạaḅaghamian loor kụ aḍiphooghu ọdi ẹdoonyom ẹphurukpu nụun?

²⁸“Nyina ighol eeghe kụ rẹeḅaghamian bọ loor ịlo arukpe phọ? Ipogh aani ịdipho ạsifalaway repoph ghan bọ. Rukumuan rékumuan ghan, rukpe rélo ghan kemunughian.

²⁹Kụ mị rịḅeni ghan inyina mọ Sọlomon Ọdaam mọ ạmoogh ni eboom ẹelha kụ óonmenan iinmenan dị ẹnighe ọmaam ạsifalaway phọ.

³⁰Ẹnaan rẹsighe ghan sịfalaway kụ keenmenemi rọogho elegheḍum mọ ịpe rodon ọmiin bọ bịn iḍue phọ kẹḅaal bọ koguom bọ ni nịan. Nyina ílegheri mọ ọdi kiinmenemi ni inyina apuemi pạ ḍụghum? Nyina awe dị omeeraam ụ́manam.

³¹“Ịduon kụ iḍighi kụ kẹ́eḅaghamian loor anyina opuru ghan mọ, ‘Yira kole bọ eeghe, ọpughol eeghe, omuuna bọ eeghe?’

³²Ịphen kụ ạraraar phọ bụphe Ẹnaan úmeeraam bọ roḍulha ghan bọ loor ọwa ọmoogh phọ. Ọde phọ anyina odi bọ kꞌạke phọ alegheri ni mọ ịphen phọ ẹkar ri ikuom inyina.

³³Kụ ịpur ghụn ẹwa ọmar phọ kꞌẸnaan rꞌịpe ọdi rạwa bọ mọ iḍighi ghan, bịn oomo phọ ạraraar phọ ịphen Ẹnaan kimuzeḍinaan ni inyina.

³⁴Kẹ́eḅaghamian ghan loor anyina ịlo iḍue. Ịiḅaghami iḍue ekori iḍue! Kẹ́ḅaraghiom ịlo iḍue rodon!”