Read abua Matiu 7 Bible Online

Matiu 7 - abua bible

Matiu 7

¹“Kéegboonaan ịiruen bụnon, ọbo Ẹnaan kiigboonaan aani inyina.

²Ịpe nyina keegboonaan bọ bụnon kụ ịdi Ẹnaan kiigboonaan aani ni inyina. Ịpe nyina edi bọ ẹngo bụnon kụ ịdi Ẹnaan kedi ni ịngo aani inyina.

³Iḍighi bọ ika nụun kụ nạ ạmiin bọ ọpherepe ạḍipe phọ ọpo aḍigh bọ ekpeḍien umor phọ ạna, kụ nạ óloghoma bọ mọ aḍiboom ạḍupo edi aani ni ologhi ekpeḍien phọ ạna?

⁴Nạ kạḅeni bọ ika umor phọ ạna mọ, ‘Mị ạsighe ọpherepe ạḍipe phọ aḍigh bọ ekpeḍien phọ ạna,’ kụ ạri aḍiboom ạḍupo edi aani ni ologhi ekpeḍien ạna?

⁵Nạ olegheri-ịlo-ọnon, ịlo-ạna-úlegheri. Pụr ạsighenaan ḍiboom ạḍupo phọ eḍigh bọ ekpeḍien phọ ạna, pịdi nạ ạmaar ạsighe ọpherepe ạḍipe phọ ọpo odi bọ ologhi ekpeḍien umor phọ ạna.

⁶“Ịyaar dị eḍighi ẹlo iigbia kẹ́ngo suogh, ọbo bịdi keḅula ilomi inyina, ḅịle kẹn ịyaar dị ẹman ikpoki kẹ́ngo rophoropo, ọbo bịdi kẹezeghiom ruwol.”

⁷“Ịlom ghan, kịngo ni inyina. Ịwa ghan, nyina kẹmiin ni. Ikar ghan, kighughuronaan ni inyina.

⁸Tọrobo oye lọ ạlom, kọngo ni nyọdi. Oye lọ ạwa kạmiin ni. Oye lọ akar, kokughuronaan ni nyọdi.

⁹Ọghen ọde sịphe ogbo phọ anyina kụ ẹdi ọony ọdi kạlom eḍien, kụ kạsighe ẹna kụ ạngo;

¹⁰mọ ọdi ạlom ena, kụ kạsighe ẹkaraph-ịyaar kụ ạngo?

¹¹Ghạlamo nyina ạbukaraph phọ, bịn rẹngo ghan ni nmụny anyina igey ạraraar, kụ ẹghiom nụun ologhi ịdi Ọde phọ anyina odi bọ kꞌạke phọ kạngo bụphe ọlom bọ nyọdi igey?

¹²“Ịlo nyina rẹwa mọ awe iḍighi inyina kụ kẹnighe, kụ ẹtuugh eḍighi bụnon awe. Ịduon kụ ẹmhu iilogh phọ aMozis rꞌịtughemi ariil phọ.”

¹³“Itelhe eḍigh ọnhu-aḍibuo phọ ọphon ạkololo bọ, kọ́phori phọ. Ọnhu-aḍibuo phọ ọpo ạregh bọ, eten phọ edugh ni kụ eekuna phọ amuphe, kụ bụdi rọdaph eten phọ ẹpe phọ ọbugh ni.

¹⁴Ọnhu-aḍibuo phọ ọphon ạkololo ni, ḅịle kẹn eten phọ ẹkpar ri, kụ eekuna phọ aghuḍum, kụ bụdi rọdaph eten phọ ẹphen okom ni.”

¹⁵“Igona loor anyina esi ariil ọkpe. Ẹphen ạnyu phọ bịdi ọkigh iyool-ịga, kụ iloghi phọ ạbidi eḍighi ịlo ilhom ịnam.

¹⁶Esi iimuma ạbidi kụ ẹdi nyina kelegheriom bịdi. Oḍebe oreeny rámuum ghan rughuuny oogiri, ḅịle kẹn ịkughuro rémuum ghan rughuuny ọmir.

¹⁷Ogey oreeny ramuum ghan igey iimuma, ọkaraph oreeny ramuum ghan ịkaraph iimuma.

¹⁸Ogey oreeny rámuum ghan ịkaraph iimuma, ḅịle kẹn ọkaraph oreeny rámuum ghan igey iimuma.

¹⁹Tọrobo oreeny dị úmuum igey iimuma koler ri oguom nịan.

²⁰Ịduon phọ kẹn kụ ẹdi nyina kẹsighe iimuma phọ ạbidi kụ elegheriom riil ọkpe phọ.”

²¹“Oomo phọ ạbuphe rụmagh bọ ịmi mọ, ‘Ọmoogh-we, Ọmoogh-we,’ kụ kóḍigh ọmar phọ kꞌẸnaan. Bụphe oḍighi bọ ịpe Ọde phọ ạmi odi bọ kꞌạke phọ rạwa bọ kụ koḍigh.

²²Ḍio ịiruen phọ, ịbadi kụmagh ghan ịmi mọ, ‘Ọmoogh-we, Ọmoogh-we, yoor ughol li ḍien phọ ạna kụ ọghaaph ọghaaph ạna, ophorogh yogh ruru, oḍighi yogh ịiḍaany!’

²³Kụ mem mọ ọpo phọ mị kạḅeni ni bịdi mọ, ‘Mị kꞌekulha inyina ki̋lhegheri ghan. Ịḍua sịen ghisigh ạmi. Nyina awe dị reḍighi ghan ịkaraph.’”

²⁴“Loor ịphen phọ, tọrobo oye lọ ạnaghan ikpo ọnhu phọ ạmi ịphen kụ ạtuugh aḍighi, mị kạmaaniom nyọdi oye olegheri-ịyaar dị aphighi otu ọdi ạnyu aḍighiigh.

²⁵Kụ ọlophia ạloph, aḍigho eḍigh, oghim aghim kụ aphum otu phọ ọpo, kụ ómeel, ịdi eḍighi bọ opighi ạnyu aḍighiigh.

²⁶“Kụ tọrobo oye lọ ạnaghan ikpo ọnhu phọ ạmi ịphen kụ ụ́tuugh uḍighi, mị kạmaaniom nyọdi uwo elologhi dị aphighi otu ọdi ạnyu ịisaar.

²⁷Kụ ọlophia ạloph, aḍigho eḍigh, oghim aghim kụ aphum otu phọ ọpo, kụ ameel. Pọ eeghe ọdo emeleghuom dị otu phọ ameleghu!”

²⁸ẠJizos rọmadan ọghaaph phọ ọphon, kụ ịtughemi phọ ọdi eḍighi iikia esi awe,

²⁹ịdi eḍighi bọ ọdi ạtughemi bịdi ịdipho oye dị ạmoogh ịikpo, kị́dipho ạbutughemia iilogh phọ ạbidi.