Read abua Matiu 9 Bible Online

Matiu 9 - abua bible

Matiu 9

¹ẠJizos aḍigh oghuugh, kụ ạḅeeny ọphiiny phọ kụ ạghi asi ẹmha ọdi.

²Kụ ụmuneen ni ẹmina oye dị ạḍighaagh rꞌaḍuwol emugh ọsighe oruom Jịzos. Mem dị ọdi ạmiin bọ oḍuom ologhi ạbidi, kụ ạḅeni oye phọ mọ, “Mọony ạmi, kpạrami ologhi ạna. Mọsar ịkaraph ạna ọwilenaan nyịna.”

³Kụ buniin ạbutughemia iilogh phọ ọḅemom ologhi ạbidi mọ, “Oye phọ ọphon rạapu Ẹnaan.”

⁴Kụ ạJizos alegheri ni ịitughian phọ ạbidi kụ apuru mọ, “Iḍighi bọ ika kụ nyina rẹetughian bọ ịkaraph pạ iloghi phọ anyina?

⁵Ịghen kụ idugh epu ịlo ọḅem mọ, ‘Mọsar ịkaraph ạna ọwilenaan nyịna,’ rꞌọḅem mọ, ‘Ḅetenu arelhe’?

⁶Ọbo nyina elegheri mọ Ọony phọ Oye ạmoogh ni ịikpo sịen aḅirini phọ ọsar ịkaraph ọwilenaan, mị rạḅeni ghan oye phọ ạḍighaagh phọ rꞌaḍuwol phọ emugh bọ mọ ḅetenu ạsighe ẹmina phọ agheel kꞌạna!”

⁷Kụ oye phọ aḅetenu agheel kꞌọdi.

⁸Kụ awe phọ rọmiin bịn iḍighi ni ruugu kụ oboom Ẹnaan phọ ẹngo bọ ọdo ịikpo phọ ịphen we.

⁹Kụ ạJizos atelhe raten, kụ ạmiin oye dị oghol mọ aMatiu dị ạrol ude pạ otu phọ rọbonyi ghan bọ iisogh phọ, kụ ạḅeni nyọdi mọ, “Ụdaph ịmi!” Kụ ọdi aḅetenu ạdaph nyọdi.

¹⁰Kụ ịphen phọ reten, ạJizos rꞌạbumatuan phọ ọdi ụrol li ude kꞌaMatiu rolian ghan eḍien rꞌịbadi ạbuphe rọbonyi ghan bọ iisogh phọ rꞌabuḍighinom ịkaraph phọ.

¹¹Kụ mem dị aFarisi phọ ọmiin bọ ịphen phọ, bịdi upuru ni bụmatuan phọ ọdi mọ, “Uḍighi ika kụ ọtughemia phọ anyina rꞌọdo phọ awe phọ ạbuen rolian bọ eḍien phọ?”

¹²Kụ ạJizos ạnaghan ịpe bịdi rọkaaph bọ kụ ạḅeni bịdi mọ, “Bụphe úmoon bọ kụ ropir ghan oyil, kạ́buphe omoon bọ.

¹³Ịki ẹwa emitiom rụmhu ikpo ọnhu phọ ịphen mọ, ‘Ọphinyon ạrikia ịmi ụ́ḅeeraan. Ọnma ghan ighirigiir kụ ẹdi mị rạwa.’ Mị ụ́tuan ọmagh abugey kụ aru bọ. Mị uru ghụn ni ọmagh abuḍighinom ịkaraph.”

¹⁴Kụ ạbumatuan phọ ạJon oru opuru Jịzos mọ, “Iḍighi ika kụ yoor rꞌaFarisi phọ rọtuan ghan bọ ni ịiḅereghi kọrol dọl ọkoony, kụ ạbumatuan phọ ạna dọl ọkoony rọ́tol aani ghan bọ?”

¹⁵Kụ ạJizos ạsighe ḍidogh kụ apuruom bịdi mọ, “Awe dị odi kꞌọyogo kọmoogh ni ọto ḍụghum, dị olhom ọnyani phọ odi ni sịphe? Kụ amem retu ni dị kọboor bịdi olhom mọ, kụ bịdi ogbi ọrol aani ọkoony.

¹⁶“Oye ólho dị kạsighe ọpherepe omoom ukpe kụ ạgbiom ogbaany ukpe. Ạgbiom, pọ omoom mọ kạpogha ni ạḍua, kụ ukpe phọ aaguronu.

¹⁷Ḅịle kẹn, oye ólho dị kạsighe igbaany ạsikarama kụ aakoom mumoom amiim ịya. Aḅulughi, pọ amiim mọ kaḅomoghi ni sịkarama phọ, bịn amiim mọ rꞌạsikarama phọ epeeghu. Amumoom amiim rꞌimoom ạsikarama kụ rẹḅophan ghan keekuan.”

¹⁸ẠJizos odi rạkaaph ghan rạraar phọ ịphen kạḅeni bịdi, kụ oniin uwo ẹmhu aru akpuḍian ghisigh ọdi, kụ ạḅem mọ, “Ọnyani ạmi mamugh nyịidipho atenom, kụ tue ạzu nyọdi bịn ọdi kaḍum ni.”

¹⁹Kụ ạJizos aḅetenu ạdaph nyọdi rạki, kụ ạbumatuan phọ ọdi ọdaph aani.

²⁰Oniin ạnir ạrol li pạ dị mạghi ẹmha ạnmariir dị mẹrol ḍioph rꞌịyal ạsia. Ọdi ạḍua ọman ạghi ạteeny Jịzos ạḅogh ḍịmaam ạsuoma phọ ọdi,

²¹loor esi dị ọdi ạatughian ghan pạ ologhi phọ ọdi mọ, “Ghạlamo rꞌạsuoma phọ ọdi bịn kụ mị ạḅogh aani, mị kaḍum ni.”

²²Kụ ạJizos akiton ạmiin ạnir phọ, kụ ạḅeni mọ, “Nịr phọ, oḅio ạna kúkaph. Omeeraam mọ ạna maakonom nyịna.” Kụ mem mem mọ ọpo bịn ạnir phọ aḍum.

²³Kụ ạJizos rosi bọ otu uwo ẹmhu phọ, kụ ạmiin dị buniin awe ropula ghan okporo, buniin rọyugh,

²⁴kụ ạḅeni bịdi mọ, “Ịngo eepoogh. Ọnyani phọ ómugh, rạnaani ni.” Kụ bịdi ọgilaam nyọdi.

²⁵Kụ mem dị mọgbalaghi we phọ, ọdi aḍigh ni ologhi otu phọ kụ ạpham ḍịghaagh ọnyani phọ, kụ ọnyani phọ aḅetenu.

²⁶Kụ ọdu ịphen phọ aleeny eleeny oomo eelhe phọ ẹpe.

²⁷ẠJizos aten rạḍua sịphe phọ, kụ ịyal awe ikpom ariḍien ọtuan nyọdi, kụ ọlooghi mọ, “Mọony phọ aDevid, ụnma iyoor ighirigiir.”

²⁸Kụ ạJizos roḍigh ologhi otu, kụ awe ikpom ariḍien phọ oru ọteeny nyọdi, kụ ạJizos apuru bịdi mọ, “Nyina emeeraam ni mọ mị katue ni aḍighi ịphen phọ?” Kụ bịdi omeera mọ, “Ii, oye phọ.”

²⁹Kụ ọdi ạḅogh riḍien phọ ạbidi, kụ ạḅem mọ, “Ịpe nyina emeeraam bọ ẹtuugh imitenaan inyina!”

³⁰Kụ ariḍien phọ ạbidi ẹḅaranu, kụ ạJizos ạphur bịdi rụru mọ, “Kéḍighi ịdi oye kalegheri!”

³¹Kụ bịdi rọḍua bịn ọgba ịlo ạJizos oleenye oomo eelhe phọ ẹpe.

³²Ịdipho awe phọ rọḍuaghu bọ, buniin awe ọsighe ekpom ọka dị eru eghola oruomonaan Jịzos.

³³Kụ ạJizos aphorogh eru phọ, kụ ekpom ọka phọ amiigh ọḅa. Kụ iḍighi ni iikia esi oomo awe phọ, kụ ọḅem mọ, “Ịphen kꞌekulha ke̋mite ghan ẹphen eelhe Ịzirel.”

³⁴Kụ aFarisi phọ ọḅem ghan mọ, “Ọdi ạsighe ịikpo ọkpana aruru phọ kụ raporoghom ghan bọ ruru phọ.”

³⁵Kụ ạJizos arelhe yogh oomo igbogh rꞌịbam ạramha phọ aḍiku ghan rubughotu phọ ạbidi ạtughemi we, kụ ạghaaph ghan ooḅi ọghaaph ọmar phọ kꞌẸnaan aakonom ghan oomo awe dị ariiphina rꞌạreezegh eḍighi yogh.

³⁶Mem dị ọdi ạmiin bọ ḍita awe phọ, ọdi ạmoogh ni igbiririph esi ạbidi, ịdi eḍighi bọ bịdi ụrol esi ịiḅaghami kụ royeela ịdipho iyool-ịga dị opoghom úlho.

³⁷Kụ ọdi adogh ḍidogh ạḅeni bụmatuan phọ ọdi mọ, “Ibugha phọ ẹbugh ni, kụ awe oḍighi phọ okom ni.

³⁸Ịduon kụ iḍighi kụ ịiḅereghi ẹngo uwozo phọ ọbo ọdi ạsighe bụnon awe ạḅaram ọghi ibugha phọ ọdi.”