Read abua Mạk 11 Bible Online

Mạk 11 - abua bible

Mạk 11

¹Mem dị moru otuman Jeruselem ẹpe ạramha phọ aBetfagi rꞌaBetani, bịdi uru ni osi Eegum Ọlivs.

²Kụ ạJizos arom ịyal ạbumatuan ọdi mọ, “Ịki ẹmha phọ ẹpe nyina rẹmiin bọ. Nyina esi, nyina kẹmiin ni onyugheel ẹnam adool dị ọkpooghi, dị oye kőḍigh ghan. Ịkatan ẹsighe iruom sịen.

³Kụ oye lọ ipuru inyina mọ, ‘Ịdipho nyina reḍighi ghan ika?’ ịḅeni mọ Ọmoogh-we phọ ạmoogh ni ịyaar oḍighinom ọdi kụ kạnuun ni aḅulemi.”

⁴Kụ bịdi ọghi kụ ọmiin onyugheel ẹnam adool sịphe eten phọ dị ọkpooghi ọnhu-aḍibuo oniin otu. Bịdi odi rọkatan ghan,

⁵kụ buniin ạbudi ọmeregha sịphe phọ upuru ni bịdi mọ, “Iḍighi ika kụ nyina rẹkatan bọ ẹnam adool phọ?”

⁶Kụ ạbumatuan phọ ọphagharanaan ịdipho ạJizos ạḅem bọ, kụ awe phọ umeera ni mọ bịdi ọpham ọḍuanam.

⁷Kụ bịdi ọsighe ẹnam adool phọ oruom Jịzos, kụ ọkporonaan rụsuoma ạbidi ozuughiom ọman ẹnam mọ, kụ ọdi aḍigh.

⁸Kụ ịbadi awe ụkporonaan kẹn ni rụsuoma ạbidi ọdeeghi oḅodo phọ, kụ buniin oḍigh elegheḍum ọgba rịphiph ireeny kụ oru ọdeeghi oḅodo phọ.

⁹Kụ bụphe oḍia bọ rꞌạbuphe ọrol bọ ọman phọ ụlooghi ghan mọ, “Iboom ni Ẹnaan! Ẹnaan ẹseph ni nyọon phọ ratumom bọ ḍien Ọmoogh-we phọ!

¹⁰Ẹnaan ẹseph ni ọmar phọ ọpo ratu bọ, ọmar aDevid, ogbogh ọde phọ ayira! Iboh ẹrolonaan ni Ẹnaan ẹpe kꞌạke!”

¹¹Kụ ạJizos amite Jeruselem, kụ ạghi aḍigh sịphe Otu Ịiḅereghi phọ, kụ ạnmanaghian oomo ạraraar phọ akitonom kụ rẹwepheghian kụ ọdi rꞌaḍioph rꞌịyal ạbumatuan phọ ọḅile oḅula Betani.

¹²Kụ rẹḅaal bịdi ọḅile ọḍua Betani rọki Jeruselem, kụ ọkoony asiph ni Jịzos.

¹³Kụ ạrol egher ạmiin oreeny dị oghol mọ ạfig dị marigheel ọnam, kụ ạghi ophogh mọ amuum ni, kụ asi sịphe azin phọ kụ ạmiin rịnya bịn, ịdi eḍighi bọ kámem iimuma.

¹⁴Kụ ọdi ạḅeni oreeny phọ mọ, “Oye kále mun iimuma ạna,” kụ ạbumatuan phọ ọdi ọnaghan.

¹⁵Kụ bịdi rosi Jeruselem kụ ạJizos aḍigh Otu Ịiḅereghi phọ, kụ amiigh ophorogh ạbuphe romuul bọ ḍighi sịphe phọ, kụ agborion ịdaabili ạbuphe roonmeeghi bọ ikpoki phọ, rꞌạsigada ạbudi roboologhi rụkurughozo.

¹⁶Kụ ómeera mọ rꞌoniin arool dool atenom ogiga Otu Ịiḅereghi phọ.

¹⁷Kụ ạtughemi mọ, “Ọge ni sịphe Ạḍinya Iigbia phọ mọ Ẹnaan ẹḅem mọ, ‘Otu ạmi kokol mọ Otu Ịiḅereghi oomo areelhe,’ kụ nyina mẹḅile ekiton eḍighi otu ạruḅa.”

¹⁸Kụ ạbuo ạrumhu ariil ạrikia phọ rꞌạbutughemia iilogh phọ rọnaghan ịphen phọ, kụ ọwa eten ịlo oghiigh ạJizos. Kụ bịdi ughiilaan ni nyọdi, ịdi eḍighi bọ ịtughemi phọ ọdi iḍighi ni iikia esi oomo awe phọ.

¹⁹Kụ aḍughul reghul, kụ ạJizos rꞌạbumatuan phọ ọdi ọḍua ẹmha phọ.

²⁰Kụ ḍịroor ạḍieri phọ aḍio phọ, bịdi otelhe roten kụ ọmiin dị oreeny phọ oghol bọ mọ ạfig phọ manyororo kꞌazin phọ kꞌạrinya phọ.

²¹Kụ aPita ạatughian ni ịpe emite bọ, kụ ạmagh Jịzos ạḅeni mọ, “Ọtughemia, pogh aani. Oreeny phọ nạ asu bọ ọnhu phọ manyororo.”

²²Kụ ạJizos ạphagharanaan bịdi mọ, “Ịmoogh omeeraam esi Ẹnaan.

²³Mị ạkar rịḅeni ghan inyina mọ oye lọ ạḅeni ẹeḅaraph phọ ẹphen mọ, ‘Tuphuronu ameel asuma ọphiiny,’ dị ologhi ọdi rạ́bal ịyal kụ ạkaraghi ni ameeraam mọ ịpe ọno ạḅem bọ emite, pọ Ẹnaan keḍighi ni ẹngo nyọdi.

²⁴Esi ịduon phọ kụ mị rịḅeni inyina mọ ịyaar lọ nyina ẹlom esi ịiḅereghi kụ emeeraam mọ nyina kẹmoogh ni, pọ keḍighi ni ẹlo anyina.

²⁵Kụ mem lọ nyina ẹmeera ọoḅereghi, ịsar ghan ịkaraph lọ oye iḍighi inyina ẹwilenaan, ọbo Ọde phọ anyina odi bọ kꞌạke ạsar aani ịkaraph anyina ịwilenaan. [

²⁶Nyina ị́bilenaan bụnon, pọ Ọde phọ anyina odi bọ kꞌạke phọ ịpe anyina kạ́bilenaan.]”

²⁷Kụ bịdi ụḅile ni osi Jeruselem. Kụ ạJizos ratelhe yogh sịphe Otu Ịiḅereghi phọ, kụ ạbuo ạrumhu ariil ạrikia phọ rꞌạbutughemia iilogh phọ rꞌikumoor awe phọ uru ni ọteeny nyọdi,

²⁸kụ opuru mọ, “Nạ ụsighe ịghen ịikpo kụ raḍighinom ghan bọ ịphen phọ? Ạnhian kụ ạngo bọ nyịna ịikpo oḍighinom ịphen phọ?”

²⁹Kụ ạJizos mọ, “Mị kipuru aani inyina ḍiniin aḍipuru ạgbagh, kụ nyina ẹphagharanaan, pọ mị kịḅeni ni inyina ịikpo phọ mị ạsighe bọ kụ raḍighinom ghan bọ.

³⁰Ịḅeni ịmi. Ịikpo phọ ạJon awurom ghan bọ we mụum mọ ịḍua ẹghen kụ eru bọ — esi Ẹnaan ḍụghum, kụ esi oye?”

³¹Kụ aḍipuru phọ ạḍien ẹsighe ọogbaghanaan ịlo kọpagharanaan ẹlogh ogbo phọ ạbidi mọ, “Yira ọḅem mọ ịḍua esi Ẹnaan, pọ ọdi kạḅem mọ, ‘Iḍighi bọ ika kụ nyina nyọdi ímeeraam bọ?’

³²Kụ yira ọḅem mọ, ‘Ịḍua esi awe,’ pọ kụnughe ni iyira ẹka.” Bịdi ughiilaan ni we phọ, ịdi eḍighi bọ oomo awe mọsighenom mọ ạJon phọ oyil Ẹnaan ni.

³³Kụ bịdi ọphagharanaan Jịzos mọ, “Yoor úlegheri,” kụ ạJizos ạḅeni bịdi mọ, “Mị kẹn inyina rị́ḅeni ịikpo phọ mị ạsighe bọ kụ raḍighinom ghan bọ ịphen phọ.”