Read abua Mạk 14 Bible Online

Mạk 14 - abua bible

Mạk 14

¹Ịyal aḍughul-otu kụ isugha ọbo mẹteeny ẹyaal ọphel otene phọ, nyẹpe roliom ghan bọ ạbred phọ ọpo yist rọ́logh ghan bọ, kụ ạbuo ạrumhu ariil ạrikia phọ rꞌạbutughemia iilogh phọ ụḅoph ni ọnhu oosophoghian ịlo osiph ạJizos esi ịbooghian oghiigh.

²Bịdi ụḅem mọ kíḍighi mem ẹyaal phọ ọbo awe phọ kotuphe ghan bọ.

³Kụ ạJizos ạrol Betani kꞌaSaimon, ọpo ẹzegh ọku ufe phọ eḍighi ghan bọ. Kụ mem dị ọdi rale eḍien, oniin ạnir aru ni rꞌeeko elo eeḅi eḍu, dị ẹman iboom ikpoki, kụ aḅom eeko phọ kụ asugh nyọdi elo phọ.

⁴Kụ buniin ạbudi ọrol aani bọ ụghagh ni iloghi, kụ oniin apuru nyoniin mọ, “Amuphe phọ ạmuen phọ aḍighom ḍighen?

⁵Nyẹen mubool bọ ni ikpoki dị mipel ịraar okuron ipoḍi asilva, ọsighe oḍighinom iiḅi rukulom,” kụ bịdi ọgumom ạnir phọ.

⁶Kụ ạJizos ạḅeni bịdi mọ, “Ịkporion ạnir phọ ọphon rạghaagh! Nyina ighol eeghe kụ rẹeḅaghami bọ nyọdi? Ọdi uḍighinaan ni ịmi ogey oḍighi.

⁷Nyina rꞌarukulom mọ edianaan ghan ni oomo amem, kụ mem lọ ologhi anyina aḍigh, nyina ketue ni eḍighi bịdi iiḅi, kụ mị rꞌanyina kẹ́tolan oomo amem.

⁸Ạnir phọ maḍighi ịpe ọdi arue bọ. Ọdi uḅom ịmi eeko phọ ookolobian okoriom amaḍi phọ ạmi.

⁹Mị ạkar rịḅeni ghan inyina mọ tọrobo esi sịen aḅirini phọ, dị rọkaaph ooḅi ọghaaph phọ, kọkaaphom ghan ni ịphen phọ ọotughianam ạnir phọ ọphon.”

¹⁰Ịphen phọ reten kụ aJudas Ịskariot, oniin sịphe aḍioph rꞌịyal ạbumatuan phọ, ạḍua ni ạghi esi ạbuo ạrumhu ariil ạrikia phọ ịlo aal ạJizos bịdi.

¹¹Iloghi ạbidi ịḅaal li mem mọ bịdi ọnaghan bọ ịphen phọ, kụ omerenyan ọngo ọdi ikpoki, kụ ọdi aagonoghian ghan eepoogh aal ạJizos.

¹²Ẹḅel aḍio ẹyaal phọ roliom ghan bọ ạbred phọ ọpo yist rọ́logh ghan bọ, mem mọ rọpighironaan ghan bọ ẹkia ọphel otene phọ, ạbumatuan phọ ạJizos upuru ni nyọdi mọ, “Nạ rạwa mọ yoor oseleminaan nyịna ḍighen esi dị kọtol olhe eḍien ẹyaal phọ?”

¹³Kụ ọdi arom ịyal ạbuno mọ, “Ịki ẹpe ẹmha phọ. Nyina kẹmiin ni oye dị arool oko ạmuum, ịdaph nyọdi.

¹⁴Kụ esi lọ ọdi aḍigh, ipuru uwotu phọ mọ, ‘Ọtughemia phọ ạḅem mọ ọghen kụ osoph phọ ọno, ọpo ọno rꞌạbumatuan phọ ọno kọtol bọ kụ olhe eḍien ẹyaal ọphel otene phọ,’

¹⁵kụ ọdi kiḍeenaan ni inyina oboom osoph-ạnyu, sịphe otu ẹedaneen phọ, dị moselemi ni. Ịsiphe kụ ẹdi nyina keekolobian bọ ịlo amalhe phọ ayira.”

¹⁶Kụ ạbumatuan phọ ạbuen onyeene ọghi ẹpe ẹmha phọ, kụ ọmiin ịdipho ạJizos ạḅeni bọ bịdi, kụ ookolobian ịlo ẹyaal phọ.

¹⁷Mekpereghian, kụ ạJizos ạpham ḍioph rꞌịyal ạbumatuan phọ arumom.

¹⁸Kụ bịdi omiigh role eḍien phọ, kụ ạJizos ạḅem mọ, “Mị ạkar rịḅeni ghan inyina mọ oniin ọnyo anyina kaal li ịmi, ọdi rꞌạmi rolian ni.”

¹⁹Ịphen phọ iḍighi ni dị bịdi omeelom ọto, kụ oye atum oye apuru ghan nyọdi mọ, “Mịna ḍụghum?”

²⁰Kụ ọdi mọ, “Oniin sịen aḍioph rꞌịyal phọ anyina ni. Ọphon rꞌạmi rotiom bọ ni eniin esi phọ.

²¹Ọony phọ Oye kamugh ni, ịdipho ọge bọ ịlo ọdi pạ Ạḍinya Iigbia phọ, kụ ịminimiin kẹtolonaan ni oye phọ ọpo kabool bọ nyọdi. Ịnighe ghụn dị ọbo oye phọ ọpo phọ mụ́mar.”

²²Ịdipho bịdi rolhe bọ, kụ ọdi ạsighe ạbred, kụ rọngo ḍịseph Ẹnaan, kụ ạparion, kụ ạngo bịdi mọ, “Itiin. Ọphon kụ aḍizu phọ ạmi.”

²³Kụ ạsighe ọphaal amiim kụ rọngo ḍịseph Ẹnaan, kụ ạngo bịdi, kụ oomo phọ ạbidi ootiyan.

²⁴Kụ ọdi ạḅeni bịdi mọ, “Mụen kụ ịḅaal phọ ạmi ozuanaan bọ ḍita awe ịlo oghiran ịyo rꞌẸnaan.

²⁵Mị ạkar rịḅeni ghan inyina mọ mị kạ́ḅile mun ạpughol miim mọ ạmuen, tụtu ẹteeny ḍio phọ ạḍiphe mị kạpughol bọ emoom ẹphugholom mọ, ẹpe ọmar phọ kꞌẸnaan.”

²⁶Kụ bịdi rọmoor ḍụor kụ ọḍua ọghi ẹpe Eegum Ọlivs.

²⁷Kụ ạJizos ạḅeni bịdi mọ, “Oomo phọ anyina kẹkanyanu ni esi omeeraam mọ anyina, ịdi eḍighi bọ ọge ni pạ ạḍinya iigbia phọ mọ, ‘Mị Ẹnaan kakiigh opoghom iyool-ịga phọ, kụ ịga phọ ẹwalala.’

²⁸Mị roḅetenu esi aḍuugh phọ kụ mị aḍiemi ghan ẹpe Galili ikori inyina.”

²⁹Kụ aPita mọ, “Eru dị oomo ạbueri phọ ọghanyanu, mị rꞌaloor kạ́kaaru aani.”

³⁰Kụ ạJizos ạḅeni nyọdi mọ, “Mị ạkar rạḅeni nyịna mọ ḍughul phọ arodon, tụtu ạkenegh rạlaay ịyal amem, nạ mụpharanaan ịmi ịraar amem.”

³¹Kụ aPita ạḅile ạḅem ạkparami mọ, “Ghạlamo iḍighi ni dị mị rꞌạna komugh, mị nyịna kạ́pharanaan ni bịn emuneen,” kụ oomo phọ ạbidi ọtuugh ịduon phọ ọḅem aani.

³²Kụ bịdi ụghi ni osi esi dị oghol mọ aGetsemani, kụ ạJizos ạḅeni bụmatuan phọ ọdi mọ, “Ịtologhu sịen. Mị kạaḅereghi.”

³³Kụ ọdi ạpham Pita rꞌaJems rꞌạJon ạghimom ghisigh, kụ akururu iboom, kụ ologhi ọdi ạwalawala.

³⁴Kụ ọdi ạḅeni bịdi mọ, “Ọto dị mị ạmoogh upel li ịmi loor, mụdi kughiigh ni ịmi. Ịtol sịen egon ghan!”

³⁵Kụ ọdi arelhe ạghi ghisigh ẹphurukpu, kụ aḅololo kụ ạaḅereghi mọ, ịghigh ni, ọbo mịkpe ni dị ịminimiin amem mọ ạmuen phọ mitenom nyịno.

³⁶Ọdi mọ, “Ạba, Ọde ạmi, oomo ạraraar edughanaan ni nyịna. Ụaar ịmi ẹgo ịminimiin phọ ẹphen, kụ ọlo káḍighi ịpe ịḅeeraan bọ ịmi, ḍighi ghụn ni ịpe ẹḅeeraan bọ nyịna.”

³⁷Kụ ọdi aḅula kụ ạmiin dị bịdi rọnaani yogh, kụ apuru Pita mọ, “Saimon, nạ rạnaani? Nạ órue ọkparam ogon rꞌọony amem?

³⁸Igon ni ẹeḅereghi ghan, mọ nyina kémeel eḍighanaan ọdegh ophogh. Edi ni iloghi anyina, kụ asiloor phọ kụ idugh.”

³⁹Kụ ọdi ạḅile kẹn ạghi kụ ạaḅereghi iniin phọ.

⁴⁰Kụ ạḅile aḅula kụ ạmiin dị bịdi rọnaani yogh, loor esi dị ạralha maḅogh riḍien ạbidi, kụ bịdi úlegheri ịlo ọḅeni ọdi.

⁴¹Kụ ọdi ạḅile aru mem dị emuneniom ịraar, kụ ạḅeni bịdi mọ, “Nyina edi ḍịen nịiniin rẹnaani yogh kephooghian? Mẹkasian. Amem mọ mẹteeny. Maala Mọony phọ Oye bụkaraph awe.

⁴²Iḅerenu ọghi ghisigh! Ipogh aani, ọpo uaal bọ ịmi mạkpulan.”

⁴³Kụ ọdi odi rạkaaph ghan ịduon phọ, bịn aJudas oniin sịphe aḍioph rꞌịyal phọ amite rꞌaḍita awe, dị ọnyaaghian rolhool ẹgham rꞌạraḅam, dị ạbuo ạrumhu ariil ạrikia phọ rꞌạbutughemia iilogh phọ rꞌikumoor awe phọ kụ ọlogh.

⁴⁴Ọpo kabool bọ nyọdi rꞌạbidi mọḅophoghi ni ọnhu ọdo ịdi ọdi kaḍighi bọ, mọ, “Ọpo mị kạkpun bọ okpo phọ kụ oye phọ. Imeleghuom nyọdi esiph ẹḍuanam!”

⁴⁵Kụ aJudas ạphurom owol kụ ạghi ạteeny nyọdi, kụ ạmagh mọ, “Ọtughemia,” kụ ạkpun okpo phọ.

⁴⁶Kụ bịdi omeleghuom nyọdi osiph.

⁴⁷Kụ oniin ọdi ạrol aani sịphe phọ aruph elhool ẹgham ọdi asophom aḅeri ẹbene uwo ẹmhu oyil ạrikia phọ.

⁴⁸Kụ ạJizos apuru bịdi mọ, “Nyina ẹsighenom mọ mị ọḅa ḍụghum, kụ ẹpham bọ rolhool ẹgham rꞌạraḅam kụ erumom bọ osiph ạmi?

⁴⁹Aḍio etum ḍio mị rꞌanyina kụ ịrolan ghan ni sịphe Otu Ịiḅereghi phọ kụ mị ạtughemi ghan kụ nyina ịmi ísiph. Kụ ịphen phọ memite omuneniom ịpe ọge bọ sịphe Ạḍinya Iigbia phọ.”

⁵⁰Kụ oomo ạbumatuan phọ ọwile nyọdi osumughu.

⁵¹Kụ oniin onyugheel ọony dị ạgbagha ọmur bịn, ạdaph aani ni nyọdi, kụ bịdi omeleghuom kẹn.

⁵²Kụ ọdi ạnyagharanaan ọmur phọ ạwilenaan bịdi kụ asuma rꞌẹdaḅa.

⁵³Kụ bịdi ụpham ni Jịzos osiom kꞌuwo ẹmhu oyil ạrikia phọ, kụ oomo phọ ạbuo ạrumhu ariil ạrikia phọ rꞌikumoor awe phọ rꞌạbutughemia iilogh phọ ookpomoghan.

⁵⁴Kụ aPita ạdaph aani ni bịdi, ạrol kꞌẹgboogh ọman asi aani ogiga uwo ẹmhu oyil ạrikia phọ kụ ạrol aani ni, sịphe abukoriom ogiga phọ ọrol bọ, ạanma ghan nịan.

⁵⁵Kụ ạbuo ạrumhu ariil ạrikia phọ rꞌoomo ikpolom awe phọ ọwaragha ghan sịagba osiphom ạJizos ọlogh esi aḍuugh, kụ ụ́miin.

⁵⁶Ịbadi ụgbaaghi ghan ni ọkpe ọḅam ẹmhu ọdi, kụ ạsiagba phọ ạbidi ị́ḅophan.

⁵⁷Kụ buniin uḅetenu ni kụ ọgba ọkpe phọ ọphon ọḅam ẹmhu ọdi mọ,

⁵⁸“Yoor ụnaghan ni ịdi ọdi ạḅem mọ, ‘Mị kalereghi ni Otu Ịiḅereghi phọ ọphon awe kụ ọlogh bọ, kụ esi ịraar aḍughul-otu mị kạmadan ni ọdi awe kụ ụ́logh.’”

⁵⁹Kụ sịen phọ kẹn, bịn ạsiagba phọ ạbidi ị́ḅophan.

⁶⁰Kụ uwo ẹmhu oyil ạrikia phọ aḅetenu sịphe ghisigh ạbidi, kụ apuru Jịzos mọ, “Esi ịphen phọ bịdi ọgba bọ rọḅamaghi ẹmhu ạna, nạ ọ́moogh aani ịyaar ọphagharanaan?”

⁶¹Kụ ọdi aḅoorian kpạy kpạy. Kụ uwo ẹmhu oyil ạrikia phọ apuru kẹn nyọdi mọ, “Nạ kụ aMesaya phọ ni, Ọony Ẹnaan phọ ẹpe ọseph bọ?”

⁶²Kụ ạJizos ameera mọ, “Ii, mị ni, kụ nyina kẹmiin ni dị Ọony phọ Oye ạrol ḍịghaagh elhiom Ẹnaan Oomo Ịikpo phọ, kụ ạḍua ẹpe ọotu okuaḍio phọ ratu ẹphen ade phọ.”

⁶³Kụ uwo ẹmhu oyil ạrikia phọ arunyian ibura ọdi loor ophin ologhi, kụ ạḅem mọ, “Yira ọḅile kẹn rọwa ghan bụo ạsiagba phọ oḍighinom eeghe?

⁶⁴Nyina rẹnaghan bọ ni ọopu phọ ọphon. Edi aani ika iloghi anyina?” Kụ oomo phọ ạbidi ọḅoph iniin ịiruen, mọ erugh aḍuugh epum ni nyọdi.

⁶⁵Kụ buniin omiigh omurughiom ọdi ịghor, kụ ọkagh riḍien ọdi ukpe, kụ ooḅorogh nyọdi, kụ ọḅeni ghan nyọdi mọ, “Mịin uḍien.” Kụ abukoriom ogiga phọ okuphogh nyọdi.

⁶⁶Kụ mem mọ ạmuen phọ, aPita ạrol aani ni sịphe ogiga phọ, kụ oniin ọnyani-otu uwo ẹmhu oyil ạrikia phọ aru,

⁶⁷kụ ạmiin dị aPita rạanma ghan nịan, kụ aḅiila ghisigh ọdi kụ ạḅem mọ, “Nạ oniin ọdi ạdaph aani ghan bọ Jịzos, ọpo ạNazeret phọ.”

⁶⁸Kụ ọdi ạpharanaan mọ, “Mị úlegheri, ḅịle mị ụ́naghan kẹn ẹmhu ịphen nạ rạkaaph bọ,” kụ ạḍua ạghi ḍịagaany otu phọ.

⁶⁹Kụ ọnyani phọ ạḅile ạmiin nyọdi, kụ ạḅeni bụdi ọmeregha aani pạ phọ, mọ, “Ọphon oniin ọnyo ạbidi aani ni.”

⁷⁰Kụ ọdi ạḅile kẹn ạpharanaan. Kụ mọony ẹnum amem, kụ ạbuphe ọmeregha bọ ọḅeni Pita mọ, “Igey ni nạ oniin ọnyo ạbidi ni, esi dị nạ ọlo aGalili ni.”

⁷¹Kụ aPita ạloghoḍi ịnhu, kụ aghunya kụ ạḅem mọ, “Mị úlegheri oye phọ ọphon phọ nyina rekol ghan bọ.”

⁷²Pọ kụ amem dị ạkenegh ạlaay amuneni ịyal amem, kụ aPita ạatughian ịpe ạJizos ạḅeni bọ nyọdi mọ, “Tụtu ạkenegh rạlaay ịyal amem nạ mụpharanaan ịmi ịraar amem.” Kụ ọdi agim emoghi kụ azu izin.