Read abua Mạk 15 Bible Online

Mạk 15 - abua bible

Mạk 15

¹Eḅon ạḍiroor phọ, kụ ạbuo ạrumhu ariil ạrikia phọ rꞌikumoor awe phọ rꞌạbutughemia iilogh phọ rꞌoomo ikpolom awe phọ umite ni ezue, kụ ọphaḍi Jịzos, kụ ọghi ọḅogh ọngo Pailet.

²Kụ aPailet apuru nyọdi mọ, “Nạ kụ ọdaam ẹmha ạbuo aJu phọ ni?” Kụ ạJizos mọ, “Sịen dị nạ kụ mạḅem.”

³Kụ ạbuo ạrumhu ariil ạrikia phọ ọgba ọdorodo ọḅam ẹmhu ọdi.

⁴Kụ aPailet ạḅile apuru nyọdi mọ, “Nạ ọ́moogh ịyaar ọghaaph ọphelaam ẹmhu ạna? Nạ rạnaghan aani bọ ni ọdorodo phọ ịphen bịdi rọgbaanaan bọ nyịna?”

⁵Kụ ạJizos ịyaar ọ́phagharanaan mun, kụ ịphen phọ ịngo ni Pailet iikia.

⁶Mem ẹyaal ọphel otene phọ, aPailet raseere ghan ni nyoniin ọnyo-ikoli lọ awe phọ ọlom, kạngo.

⁷Mem mọ ạmuphe, oniin oye dị oghol mọ ạBarabas ạrol li ikoli rꞌaḍita ạbuo ịgbagharan dị ọko enu, mem mọ ọgbaragbara phọ asoor bọ.

⁸Kụ aḍita awe phọ ọghi ọḅeni Pailet, mọ ạtuugh aḍighi ịpe ọdi raḍighi ghan bọ kạngo bụno.

⁹Kụ aPailet mọ, “Nyina rẹwa mọ mị useere ọdaam ẹmha ạbuo aJu phọ kụ ịngo inyina ḍụghum?”

¹⁰Ọdi alegheri ni mọ ạbuo ạrumhu ariil ạrikia phọ ụsighe mụlogh-ḍien kụ ọḅoghom bọ Jịzos ọngo nyịno.

¹¹Kụ bịdi owiiliom ḍita awe phọ ọnhu mọ, kpạripe rꞌoseere ạJizos, ọdi aseere Bạrabas kụ ạngo bụno.

¹²Kụ aPailet ạḅile apuru bịdi mọ, “Kụ nyina rẹwa mọ ạmi uḍighinom eeghe nyọon nyina rekol ghan bọ mọ ọdaam ẹmha ạbuo aJu phọ?”

¹³Kụ bịdi ọyughuronaan Pailet mọ, “Kạn nyọdi loor oreeny aghiigh!”

¹⁴Kụ aPailet mọ, “Uḍighi ika? Ịghen ịkaraph kụ ẹdi ọdi aḍighi bọ?” Kụ bịdi ọḅile kẹn ọyughuron opuemi ịḅel phọ mọ, “Kạn nyọdi loor oreeny aghiigh!”

¹⁵Kụ esi ọḅaalami iloghi aḍita phọ aPailet aseere ni Bạrabas ạngo bịdi, kụ ạgurogh Jịzos, kụ ạḅogh ạngo bịdi mọ ọkan oghiigh.

¹⁶Kụ ạbuo ẹgham mọ ụsighe ni Jịzos ọghi oḍighom ogiga ọolha phọ, kụ ọmagh oomo ạbueri phọ ookpomoghi.

¹⁷Kụ ọsighe oodor ọkpologhi nyọdi, kụ ọsighe iitoor oloom eghoony ọdaam ẹmha ozu nyọdi.

¹⁸Kụ ọgilaam ghan nyọdi mọ, “Oboom oboom ạbuo aJu!”

¹⁹Kụ ọguroghom ikpu ẹmhu ọdi, omurughiom nyọdi ịghor, kụ okpuḍughian ọnmoghoghoom ghan nyọdi.

²⁰Kụ bịdi rọnmoghoghoom yogh bọ nyọdi rọwile, kụ ọkporion oodor phọ, kụ ọsighe rụsuoma phọ ọdi ọkpologhi, kụ ọpham onyeeniom ẹpe kọkan bọ nyọdi okiigh.

²¹Kụ ẹpe eten phọ, bịdi uuzuanan ni oniin oye dị oghol mọ aSaimon, dị ạḍua eniin ẹmha ratu Jeruselem, kụ ọkpaariom mọ ọdi kụ aroolaan oreeny phọ kọkanam bọ Jịzos. (ASaimon phọ ọlo ẹmha dị oghol mọ aSairini. Ọdi ọde Ạleksander rꞌạRufos.)

²²Kụ bịdi ọsighe Jịzos ọghi osiemi esi dị oghol mọ ạGolgota, ịsien phọ ạwara, ạkpaḍi igbaany ạrumhu.

²³Kụ ọwa ghan ọngo ọdi miim dị oḅunyonom ọogho, dị oghol mọ amaa, kụ ọdi ómeera ọphughol.

²⁴Kụ ọkan nyọdi loor oreeny phọ kụ ogim, kụ ọsaaghi ghan ẹlhel odianam iinmenan phọ ạJizos.

²⁵Esugha asuo ḍịroor kụ amem mọ ọkan bọ nyọdi.

²⁶Kụ ọge sịphe ạnyu oreeny phọ ịpe ọgba bọ ọḅamaghi ẹmhu ọdi mọ “Ọdaam ẹmha ạbuo aJu phọ.”

²⁷Kụ ụkan aani ni ịyal ạruḅa loor ịnon ireeny ọḅaram Jịzos, oniin ḍịghaagh elhiom, ọphori phọ ekeeny.

²⁸[Ịduon phọ kụ ịdi emuzeḍiom ịpe ọge bọ pạ ạḍinya iigbia phọ mọ, “Ugbiom aani ni nyọdi bụo ạsipioghom mọ.”]

²⁹Kụ abuteneneen phọ oofolomi ghan nyọdi ooḅoghomi ghan rụmhu ạbidi, kụ ọḅem ghan mọ, “Ịhii. Nạ phọ ạḅem bọ mọ nạ kalereghi Otu Ịiḅereghi phọ kụ ạlogh ọnon ạmadan esi ịraar aḍughul-otu,

³⁰ḍụa sịphe oreeny phọ asoor ạphela ẹmhu ạna.”

³¹Igina phọ kẹn kụ ịdi ạbuo ạrumhu ariil ạrikia phọ rꞌạbutughemia iilogh phọ, oniin ạḅeni ghan nyoniin esi ịnmoghoghoom mọ, “Ọpel bụnon dị ẹmhu odi útue ụpela!

³²AKraist, ọdaam ẹmha phọ Ịzirel, ạḍua pạ oreeny phọ asoor pịdi yira ọmiin kụ omeeraam nyọdi!” Kụ ịyal phọ ạbuphe ọḅaram bọ nyọdi ọkan ụḅeni aani ni nyọdi sịkaraph.

³³Mẹrol ẹteeny ogbo ootaany, kụ ufiri aḍigh oomo eelhe phọ, kụ ạrol ẹteeny ịraar asuo dulhe.

³⁴Kụ ịraar asuo phọ, kụ ạJizos ạlho ạghiom ạnyu mọ, “Eloi Eloi, lạma sạbaktani,” ịduon phọ pọ, “Ẹnaan ạmi, Ẹnaan ạmi, uḍighi ika kụ nạ mughel bọ ịmi?”

³⁵Kụ buniin ạbudi ọmeregha pạ phọ rọnaghan bọ, kụ ọḅem mọ, “Ịnaghan, ọdi rạmagh ghan Ilaija.”

³⁶Kụ oniin aghiil kụ ạsighe iisighom, kụ tọghoḍiom mụkpueneen amiim, kụ ạpharari loor oreeny, kụ asu ạghiom mọ ọdi ạphughol. Kụ ọdi asiemi ịidoronhu ạJizos, kụ ạḅem mọ, “Ikori ọmiin mọ Ilaija katu ni ọsighe ọdi osoore.”

³⁷Kụ ạJizos rọlo rọghiom ạnyu, kụ amugh.

³⁸Kụ otu-ukpe dị osophom ologhi Otu Ịiḅereghi phọ ạkoghoronaan kꞌạnyu kꞌude.

³⁹Kụ oniin uwo ẹmhu ạbuo ẹgham dị ạmeera esomanan ạJizos, rọmiin ịdipho ọdi amugh bọ, kụ ạḅem mọ, “Agey ni, oye phọ ọphon kụ Ọony Ẹnaan phọ ni.”

⁴⁰Buniin ạnmariir ụrol li egher kụ ophogh ghan — sịphe ogbo phọ ạbidi, aMeri ọpo ạMagdala phọ, rꞌaSalomi, rꞌaMeri, onhiin phọ ọbam aJems rꞌạJosef.

⁴¹Bụen phọ ụdaph aani ghan ni nyọdi mem mọ dị ạrol bọ Galili, kụ okumuanaan ghan nyọdi. Aḍita ạbunon ạnmariir, dị ọtuan aani nyọdi osi Jeruselem, ụrol aani kẹn ni.

⁴²Retuanaan dulhe aḍio ookolobian phọ, dị reghul pọ kẹḅaal ḍio ophooghian phọ,

⁴³kụ ạJosef ọlo Arimatia, ọnyo ookpomoghan ikpolom awe phọ, dị ragon aani ghan ọmiin ọmar phọ kꞌẸnaan, rꞌạkpo ologhi kụ ạghi ạteeny Pailet ạlom ḍizu phọ ạJizos.

⁴⁴Iḍighi ni iikia esi aPailet ọnaghan mọ ọdi mamugh ghụn ni, kụ arom ạghiomonaan uwo ẹmhu ạbuo ẹgham mọ, kụ roru kụ apuru mọ, “Mạkar ri amugh?”

⁴⁵Kụ mem dị uwo ẹmhu ạbuo ẹgham mọ ạḅeni bọ nyọdi mọ mamugh ni phọ, aPailet ameeraam ni mọ ạJosef ạsighe ḍizu phọ ạJizos.

⁴⁶Kụ ạJosef ạghi agho ọmur, kụ rosoore ḍizu phọ kụ aphurughi kụ aḍi nyọdi oḍi, dị oguph loor asighiigh, kụ aakilemi ḍighiigh apukiom ọnhu oḍi phọ.

⁴⁷AMeri ọpo ạMagdala phọ, rꞌaMeri onhiin phọ ạJosef, ụmiin ni esi phọ oḍi bọ nyọdi.