Read abua Mạk 3 Bible Online

Mạk 3 - abua bible

Mạk 3

¹Kụ ạJizos ạḅile kẹn ạghi aḍigh oniin obughotu, kụ oniin oye dị ạḍighaagh ẹḅoonian ạrol aani ni pạ phọ.

²Kụ buniin awe phọ ọrol bọ pạ phọ ukori ghan ọmiin mọ ạJizos kaakonom ni oye phọ ḍio ophooghian phọ, ọbo bịdi osoorom nyọdi erugh.

³Kụ ạJizos ạḅeni oye phọ ạḍighaagh phọ ẹḅoonian bọ mọ, “Ḅetenu amite sịen ogbo phọ,”

⁴kụ apuru we phọ mọ, “Iilogh phọ ayira ẹḅem mọ yira oḍighi ghan ika ḍio ophooghian phọ? Oḍighi ghan iiḅi ḍụghum, kụ oḍighi ghan ịkaraph? Ẹkpe oḍume oye kụ ẹkpe oghiigh ḍụghum?” Kụ bịdi ụ́pagharanaan.

⁵Kụ ạJizos, rꞌọghagh ologhi loor ịikpara iloghi phọ ạbidi, kụ aphogh bịdi akitonom, kụ ạḅeni oye phọ mọ asele ḍịghaagh phọ oḍi. Kụ oye phọ rosele ḍịghaagh phọ bịn emoon.

⁶Kụ aFarisi phọ rọḍuaghu, bịn ọghi oḍighan egir rꞌạbuo ạHerod, kụ oosophoghian ịlo oghiigh ọdi.

⁷Kụ ạJizos rꞌạbumatuan phọ ọdi umian ni ọghi ẹpe oogbom ọphiiny phọ, kụ aḍiboom aḍita ạbuo aGalili, rꞌaJudia,

⁸rꞌaJeruselem, rꞌIdumia, rꞌẹḅeenyom Ọphiiny ạJodan, rꞌareelhe phọ etuman bọ Taya rꞌaSaidon, ọnaghan ịpe ọdi raḍighi ghan bọ kụ oru ọmiin aani ọdi.

⁹Loor aḍita awe phọ, kụ ọdi ạḅeni bụmatuan phọ ọdi mọ oselemi oghuugh oseenaan nyịno, ọbo awe kọozeghi ghan bọ nyịno.

¹⁰Ịduon ọdi maakonom bọ ịbadi, ạbueri phọ ạbuphe úmoon bọ unyuughian ghan ni ịlo ọteeny ọdi ọḅogh aani.

¹¹Tọrobo amem lọ aweye dị aruru eghola yogh ọmiin nyọdi, ukpuḍughian ghan ni pạ aruwol phọ ọdi, kụ ọlooghi mọ, “Nạ kụ Ọony phọ Ẹnaan.”

¹²ẠJizos ạphur ri ruru phọ rụru mọ kígananami nyịno.

¹³Kụ ạJizos ạḍua ạghi ẹpe eelhe ạraaḅaraph phọ, kụ ạmagh bụphe ọdi rạwa bọ bịn, kụ bịdi ọdaph nyọdi.

¹⁴Kụ ọdi ạma ḍioph rꞌịyal awe, dị kọtolan nyọdi, orom ghan ọghi ọghaaph ooḅi ọghaaph phọ oleenye,

¹⁵rꞌọmoogh ịikpo ophoroghom aruru.

¹⁶Ḍioph rꞌịyal awe phọ dị ạma bọ, aSaimon ọpo ọdi ạta bọ mọ aPita,

¹⁷rꞌaJems ọony phọ aZebidi, rꞌạJon umor phọ aJems, bụen dị ạta mọ aBoanajis, ạnmuny otirighaan,

¹⁸rꞌẠndru, rꞌaFilip, rꞌaBatolomiu, rꞌaMatiu, rꞌạTomos, rꞌaJems ọony Ạlfios, rꞌạTadios, rꞌaSaimon ọpo aKenan,

¹⁹rꞌaJudas Ịskariot, ọpo aal bọ Jịzos.

²⁰Kụ ạJizos agheel ologhi otu, kụ awe ọḅile kẹn ookpomoghan dị bịdi ụ́moogh rꞌeepoogh olhe eḍien.

²¹Mem dị eghunotu ọdi ọnaghan bọ, ụghi ni ọsighe ọdi ọḍuanam, ịdi eḍighi bọ awe rọḅem ghan mọ ọdi maḍigh ẹlaal.

²²Kụ ạbutughemia iilogh dị ọḍua Jeruselem kụ oru ụḅem ghan mọ aBielzebul ọkpana aruru phọ kụ aghola nyọdi, kụ ọdi ạsighe ịikpo eru phọ ẹphen kụ raporoghom ghan bọ ruru phọ.

²³Kụ ạJizos ạmagh we phọ mọ oru, kụ adoghogh sidogh mọ, “ASetan kaḍighi ika kụ aporogha loor ọdi?

²⁴Eḍighi mạar dị ẹmha ạaya, pọ ẹmha phọ ẹpe kétue mun ẹmeera.

²⁵Eḍighi mạar dị eghunotu ạaya, pọ eghun phọ ẹpe kétue mun ẹmeera.

²⁶Kụ eḍighi mạar dị aSetan ạwaanaan sighiton loor phọ ọdi kụ ạaya, pọ ọdi kátue mun ạmeera, pọ eekuna ọdi mẹteeny.

²⁷“Oye ólho dị katue ạka otu ọokpara oye abum rạraar ạḍuanam, emuton dị ọdi mạphur ạphaḍi oye phọ. Pụruku ọdi katue abum rạraar otu phọ.

²⁸“Mị rịḅeni ghan inyina mọ ịkaraph ílho, ọopu ólho dị ạphughan ọsar ọwilenaan awe.

²⁹Kụ oye lọ ạapu Uwaloor Iigbia phọ kọ́sar ọbilenaan. Erugh ịkaraph epum ni oye phọ ọpo kꞌagee-pọ.”

³⁰ẠJizos ạtu bọ kụ ạghaaph ịduon phọ, pọ bịdi ụḅem ghan mọ eru ekola nyọdi.

³¹Kụ onhiin rꞌabumor phọ ạJizos uru ni ọrol erugh kụ orom ọghiom mọ ọdi aru.

³²Kụ aḍita awe ụrol li okoom nyọdi, mem mọ ọḅeni bọ mọ onhiin rꞌabumor phọ ọdi odi erugh rọmagh nyọdi.

³³Kụ ọdi ạphagharanaan mọ, “Ạnhian kụ onhiin ạmina, ḅịle bụanhian kụ abumor ạmina?”

³⁴Kụ ọdi aphogh akitonom oomo awe phọ ọrol bọ okoom nyọdi, kụ ạḅem mọ, “Bụen phọ kụ onhiin ạmi rꞌabumor ạmi.

³⁵Tọrobo ọlo raḍighi ịpe Ẹnaan rẹwa bọ, pọ ọdi kẹn kụ umor ạmi rꞌumarani ạmi rꞌonhiin ạmi.”