Read abua Mạk 4 Bible Online

Mạk 4 - abua bible

Mạk 4

¹ẠJizos amiigh ạḅile rạtughemi pạ oogbom ọphiiny phọ, kụ aḍita dị ookpomoghan esi ọdi ụphughan ni, tụtu eḍighi ịdi ọdi aḍigh ologhi oghuugh, kụ ạrol ude; kụ oomo aweye phọ ọrologhu pạ ọgbal ọphiiny phọ, ẹpe ạnyu ade phọ.

²Kụ ọdi ạsighe sidogh kụ ạtughemiom bịdi ịminighan ạraraar. Kụ ọdi ạtughemi kụ ạḅem mọ:

³“Ịnaghan! Oḅephom iizo ạghi ooduḍi ịizupha.

⁴Kụ sịphe ọdi raaduḍi bọ, iniin imeleghu ọḅuzo, bịn ịnun eru eekpophi ẹminogh.

⁵Iniin imeleghu de asighiigh dị ịisaar ị́bugh, kụ íbia bịn ẹraarogh, loor esi dị ọninom ụ́tol.

⁶Kụ ogogo rolhom, kụ ạsel ịizupha phọ, kụ loor esi dị sịni ị́moogh bọ bịn ẹnuughi.

⁷Iniin imeleghu ogbo iitoor, kụ iitoor phọ esiighi egimi, kụ ịizupha phọ eghurughan yogh bịn iimuma ímuum.

⁸Kụ ịpheri phọ imeleghu ḍiiḅi ade, kụ esiighi kụ ephoph kụ emuum iimuma, iniin ịraardi, iniin odiinydi, iniin oniin okuron.”

⁹Kụ ọdi ạḅile ạlho ạḅaram mọ, “Ọlo ạmoogh rụru ọnaghanam ạḍughum ạnaghan!”

¹⁰Kụ esi dị bịdi bịn odi, kụ bụdi ọrol sịphe rꞌọdi rꞌaḍioph rꞌịyal ạbumatuan phọ upuru ni nyọdi ẹmhu asidogh phọ.

¹¹Kụ ọdi ạḅeni bịdi mọ, “Mịngo ni inyina olegheri ạraraar ịbooghian ọmar phọ kꞌẸnaan, kụ bụeri phọ oomo ạraraar kọtughemiom ghan sidogh,

¹²ọbo “‘Ophogh okananaam kọmiin ghan bọ, ọnaghan ọnaghan kọkpaph ghan bọ ọpam, ọbo bịdi kokiton ghan bọ esi ịkaraph bịn ọsar ọbilenaan bịdi.’”

¹³Kụ ạJizos apuru bịdi mọ, “Nyina ị́naghan ḍidogh phọ ạḍien? Keḍighi bọ ika kụ nyina ẹnaghan ịpheri phọ asidogh phọ?

¹⁴Oḅephom iizo phọ raaduḍi ghan ọghaaph phọ Ẹnaan.

¹⁵Bụphe ọghigh bọ ịizupha ịpa ọḅuzo phọ, pọ ạbudi ọnaghan ọghaaph phọ, egina amem bịn aSetan atu ạsighe ọghaaph phọ ọzuph bọ sịphe iloghi phọ ạbidi.

¹⁶Bụphe ọghigh bọ ịizupha ịpa ade asighiigh phọ, pọ ạbudi ọnaghanam ọghaaph phọ rꞌọḅaal ologhi,

¹⁷kụ ụ́moogh sịni pạ iloghi phọ ạbidi, kụ omeeraam mọony amem bịn. Mem lọ ịminimiin, mụghumo ịgbiphoghom, ẹtuan ọghaaph phọ eru, bịn bịdi ọkanyanu.

¹⁸Bụphe ọghigh bọ ịizupha ịpa ogbo iitoor phọ, pọ ạbudi ọnaghan ọghaaph phọ,

¹⁹kụ ogbiriḅa ịlo aḅirini phọ, rꞌạḍidugh ẹelha, rꞌạruuphua ịnon ạraraar eḍiku iloghi phọ ạbidi, kụ ọghaaph phọ akurughan bịn iimuma ómuum.

²⁰Bụeri phọ ọghigh bọ ịizupha ịpa aḍiiḅi ade phọ, pọ ạbudi ọnaghan ọghaaph phọ, kụ ọsighe ọmagh ịyaar kụ omuum iimuma, iniin ịraardi, iniin odiinydi, iniin oniin okuron.”

²¹Kụ ạJizos ạḅeni bịdi mọ, “Ọsu ọtozi, kọlogh eeḍian ịdaabili, mꞌọdurukpata ḍụghum? Tọ ọsu ọtozi, kọḅam ạnyu igbogh ịkasi.

²²Ịyaar dị ookpereghi dị kéganana ílho, ịyaar dị ạaghian dị kólegheri ílho.

²³Ọlo ạmoogh rụru ọnaghanam ạḍughum ạnaghan!”

²⁴Kụ ọdi ạḅeni bịdi mọ, “Ịpamanam ịphen nyina rẹnaghan bọ. Nyina ẹlogh ịbam, nyina kẹmoogh ịbam. Nyina ẹlogh iboom, nyina kẹmoogh iboom, kụ Ẹnaan kẹloghonaan ni ọḅar.

²⁵Nyọpo ạmoogh bọ Ẹnaan kẹloghonaan ni ọḅar, kụ ọpo ụ́moogh bọ ghạlamo rꞌịyal-ikpo ịlo ạmoogh aani Ẹnaan kẹbonyi ni.”

²⁶Kụ ạJizos ạḅem mọ, “Ọmar phọ kꞌẸnaan ạkigh ịduon. Oniin oye ạghi ozo aaduḍi ịizupha pạ ade phọ.

²⁷Kụ ạnaani ghan ạsuma, bịn ạmiin dị ịizupha phọ mesiighi repophogh, kụ ọdi ólhegheri ịpe eḍighi bọ.

²⁸Ade phọ kụ iḍighi bọ ịdi ịizupha phọ ẹphur esi ịmiigh, kụ emitiom ipoola, kụ egbi omuum arughuuny.

²⁹Kụ iimuma phọ rẹḅaal, kụ akoph elhool ạghi agboom, ịdi eḍighi bọ ibugha phọ mẹteeny.”

³⁰Kụ ạJizos ạḅem mọ, “Mị kạmaam ọmar phọ kꞌẸnaan eeghe nụun? Mị ụsighe ḍighen aḍidogh kụ ạghaaphom ịlo aḍiphoph phọ ọdi?

³¹Ạkigh ekpo ạmustad, dị ekom epu ịpheri phọ ịizupha ịsien aḅirini phọ, kụ mem dị ọzuph,

³²remite ghan kephoph epu ịpheri phọ ịbam ireeny phọ, kụ kamiteghom ịla rꞌuba dị kạmanam ịnun ọloghoḍi aruutu.”

³³Ịbadi ọdo asidogh phọ ịphen kụ ịdi ạJizos ạsighe ghan kụ ạghaaphom ọghaaph phọ Ẹnaan ạḅeni bịdi, ịpe bịdi kotue bọ ọnaghan.

³⁴Ọghaaph dị ụ́ḅaram ḍidogh, ọdi ọ́ghaaph ghan ọḅeni bịdi, kụ esi lọ ạbumatuan phọ ọdi bịn odi, ọdi ạgba ghan ni ẹmhu oomo phọ ịdi ạḅeni bịdi.

³⁵Dulhe aḍio phọ ạḍiphe, kụ ạJizos ạḅeni bịdi mọ, “Itu ọḅeeny ọphiiny phọ ophun ḍịeri phọ ạḍighaagh phọ.”

³⁶Kụ bịdi ọwile ḍita awe phọ kụ ọghi oḍiku ologhi oghuugh phọ ạJizos ạrol bọ ọzoghiom rọki, kụ ịnon arughuugh ẹdaph aani bịdi.

³⁷Kụ oboom oghim aghim, kụ oologh amite, kụ ạmuum mọ maḍiku oghuugh phọ ramuza.

³⁸Kụ ạJizos ạmina ẹpe eti phọ aḅetenom ẹmhu ọdi rạnaani, kụ bịdi ọsumeeny nyọdi kụ ọḅeni mọ, “Ọtughemia, ḅetenu yoor rope. Ị́kigh ịyaar esi ạna?”

³⁹Kụ ọdi rọsuma kụ ạḅaam oghim mọ, kụ ạḅeni ọphiiny phọ mọ, “Ḅoorian asereghian!” kụ oghim mọ ạpho, kụ ọphiiny phọ aḅoorian bịn nam.

⁴⁰Kụ ọdi apuru bịdi mọ, “Eeghe kụ iḍighi kụ nyina reepuph bọ ịduon phọ? Nyina oḍuom ologhi ị́moogh ni kꞌạnyiidipho.”

⁴¹Kụ aruugu asiph bịdi iboom, kụ oniin apuru ghan nyoniin mọ, “Esi ịphen phọ, ọphon phọ ọghen ọdo oye, dị oghim mọ rꞌọphiiny phọ kụ ẹnaghanan ni.”