Read abua Mạk 5 Bible Online

Mạk 5 - abua bible

Mạk 5

¹Kụ bịdi ụḅeeny ni ọphiiny phọ ophun ḍịeri phọ ạḍighaagh phọ osi reelhe aGerasa.

²Ịdipho ạJizos ạḍua bọ pạ oghuugh phọ rapun, bịn oniin uw-ẹlaal dị ọkaraph uwaloor ạrol ẹmhu, dị arugh ẹpe ẹkaraph eḍum mọ, ạḍua amite. Ịlo ọphaḍi ọdi, úlegheri mun.

⁴Izime bịn mọkasaghiom ni nyọdi. Ụ́gba ghan mem ọlogh ọdi olool rꞌọphaḍi ghan ọdi, kụ arunyian ghan izime phọ, ạḅile awunughi ghan igbaḅiri phọ. Oye lọ ạmoogh ịnyaam ọphamaghan ọdi ọ́rol.

⁵Ḍughul rꞌootaany, ọdi ạlooghi ghan ni ẹpe ẹkaraph eḍum mọ rꞌạnyu ạraaḅaraph phọ, kụ ạsighe ghan ipoḍi ạrana ạgonyian ghan loor ọdi.

⁶Kụ mem dị ọdi ạmiin bọ Jịzos kꞌegher, aghiil li ạghi akpuḍian ghisigh ọdi,

⁷kụ ạlooghi kpoghoogh kpoghoogh kụ ạḅem mọ, “Jịzos, nạ Ọony Egbogh Ẹnaan phọ, nạ rụwa ghan ịmi eeghe ịyaar? Mị asipha nyịna ḅạphanya esi aḍien phọ Ẹnaan, ịmi kụ́miine,”

⁸ịdi eḍighi bọ ạJizos mạḅeni nyọdi mọ, “Nạ ọkaraph uwaloor, mite loor oye phọ ạḍua!”

⁹Kụ ạJizos apuru nyọdi mọ, “Ḍien ạna ughol ika?” Kụ ọdi aghola mọ, “Ḍien ạmi ughol mọ Ọoloogh, ịdi eḍighi bọ yoor aḍita ni.”

¹⁰Kụ ọdi ạaḅereghian ni Jịzos iboom mọ kúporogh ịkaraph aruwaloor phọ umitiom sịphe eelhe phọ ẹpe.

¹¹Kụ aḍiboom aḍita arophoropo ịrol li sịphe ạnyu ẹeḅaraph phọ ẹḅal ghan ịḅal.

¹²Kụ ịkaraph aruwaloor phọ ẹeḅereghian Jịzos mọ, “Ụsighe iyoor ạlogh loor arophoropo phọ. Yoor oḍigh loor ạbidi!”

¹³Kụ ọdi ameeraam, kụ ịkaraph aruwaloor phọ emite eḍiku loor arophoropo phọ, kụ arophoropo phọ eghilighu esoor ẹpe ekpululu bọ, kụ esumughu ọphiiny phọ, bịn eḅiighi emuughu. Kụ arophoropo phọ ịghiom ni ịyal ọonir.

¹⁴Kụ awe phọ ạbuphe ropogh ghan bọ bịdi oghiil ogheel, kụ ọghaaph ịphen phọ oleenye ẹmha phọ rꞌạsiraaghana phọ. Kụ awe ọghi ọmiin aani ịpe emite bọ.

¹⁵Kụ bịdi ọghi ọteeny Jịzos, kụ ọmiin dị oye phọ ọpo aḍita ịkaraph aruwaloor phọ ẹrol ghan bọ ẹmhu phọ masereghian amuuna ukpe ạrol ude, kụ eḍigh ruugu esi ạbidi.

¹⁶Kụ bụphe ọmiin aani bọ ọghaaph ọḅeni bịdi ịpe emitenaan bọ uw-ẹlaal phọ rꞌarophoropo phọ.

¹⁷Kụ bịdi omiigh ọoḅereghian mọ ạJizos ạḍua eelhe phọ ạbuno.

¹⁸Kụ mem dị ọdi raḍigh oghuugh, kụ oye phọ ọpo ịkaraph aruwaloor phọ ẹrol ghan bọ ẹmhu phọ ạaḅereghian ịlo ọdaph aani ọdi.

¹⁹Kụ ạJizos ómeera kụ ạḅeni nyọdi mọ, “Keel kꞌanyina ạghaaph ạḅeni bịdi ịpe Ọmoogh-we phọ ạnma bọ nyịna ighirigiir, rꞌiboom mọ ịpe ọdi aḍighi bọ nyịna.”

²⁰Kụ ọdi agheel kụ ạghaaph oomo phọ ịpe ạJizos aḍighi bọ nyọdi aleenye eelhe dị oghol mọ ạDekapolis, kụ eḍigh iikia esi oomo awe.

²¹Kụ ạJizos ạḅile aḍigh oghuugh phọ ạḅeeny asul ḍịeri phọ ạḍighaagh phọ, bịn aḍiboom aḍita awe uru ni okoom nyọdi. Ịdipho ọdi ạrol bọ pạ oogbom ọphiiny phọ,

²²bịn oniin oye dị oghol mọ ạJairos, uwo ẹmhu oniin obughotu, aru ọmiin ọdi. Kụ rọmiin nyọdi, bịn akpuḍian pạ aruwol phọ ọdi,

²³kụ ạaḅereghian nyọdi iboom mọ, “Esina ọnyani ạmi ramugh. Seseeny, tue ạzu nyọdi aakonom aḍume!”

²⁴Kụ ạJizos ạdaph nyọdi rạki, kụ aḍiboom aḍita awe ọdaph aani nyọdi kụ onyuughian.

²⁵Kụ oniin ạnir, dị ạghi ẹmha ạnmariir dị mẹrol ḍioph rꞌịyal ạsia, ạrol aani ni pạ phọ.

²⁶Mạmiinom ni iboom esi ịminighan ariil, aliom oomo ikpoki dị ạmoogh ạmadan. Arookonoma phọ nyọdi ḍịghaagh ị́loghonaan, kụ elegheri ghan ghụn bịn ẹloghori.

²⁷Kụ ọdi ạnaghan ịdi rọkaaph ghan ịlo ạJizos, kụ ạḍua ọman pạ igbo aḍita awe phọ ạghi ạḅogh ạsuoma ọdi,

²⁸loor esi dị ọdi ạḅem ghan mọ, “Ghạlamo rꞌibura phọ ọdi bịn kụ mị ạḅogh aani, mị kaḍum ni.”

²⁹Mem mem mọ ọdi rọḅogh bọ bịn ẹmha ạnmariir phọ ẹḍua, kụ ọdi aloghoma mọ ọno maḍum esi ịminimiin phọ ọno.

³⁰Kụ etir Jịzos kụ aloghoma mọ ịikpo mẹḍua loor ọno emite. Ịdipho etir bọ nyọdi, egina amem bịn akiton asoman we phọ kụ apuru mọ, “Ạnhian kụ ạḅogh bọ ạsuoma phọ ạmi?”

³¹Kụ ạbumatuan phọ ọdi ọḅeni mọ, “Nạ rạmiin aani bọ ni ḍita awe phọ ạbuen ronyuughian bọ ịduon, kụ nạ ạḅile rapuru ghan mọ, ‘Ạnhian kụ ụḅogh ịmi?’”

³²Kụ ọdi odi rạnmanaghian ghan ọmiin oye phọ aḍighi bọ ịphen phọ,

³³kụ ạnir phọ malhoghoma bọ ịpe emitenaan bọ nyọdi, amite ni rapiigha rꞌeepuph, kụ akpuḍian pạ aghisigh phọ ọdi, kụ ạgba igey phọ amitiom.

³⁴Kụ ọdi ạḅeni nyọdi mọ, “Nịr phọ, omeeraam mọ ạna maakonom nyịna. Keel rꞌedughom, kụ ẹlo mẹghi ẹdi ẹrin íḅula ghan mun!”

³⁵Kụ ọdi odi rạkaaph ghan ịphen phọ, kụ awe ọḍua ẹpe kꞌuwo ẹmhu obughotu phọ oru ọḅeni Jạiros mọ, “Ọnyani phọ ạna mamugh. Nạ upu kẹn rạaḅaghami ghan ọtughemia phọ eeghe ịyaar?”

³⁶Kụ ạJizos ạnaghan ni ịpe bịdi rọkaaph bọ, kụ ạḅeni uwo ẹmhu obughotu phọ mọ, “Aruugu nyịna kúsiph. Mọogh omeeraam bịn!”

³⁷Kụ ạJizos ómeera mọ awe ọdaph nyịno, omuton Pita rꞌaJems rꞌạJon, umor phọ aJems.

³⁸Kụ mem dị bịdi ọghi osi kꞌuwo ẹmhu obughotu phọ, ọdi ạmiin ḍita awe dị rọyugh komoghi yogh rꞌiḅeleghu.

³⁹Kụ ạJizos ạghi aḍigh otu phọ kụ apuru bịdi mọ, “Eeghe kụ riḍighi inyina kụ nyina rẹyugh bọ kemoghi yogh? Ọnyani phọ ómugh, rạnaani ni.”

⁴⁰Kụ bịdi ọgilaam nyọdi. Kụ ọdi aphorogh we phọ amiteghom erugh, kụ ạsighe ọde rꞌonhiin ọnyani phọ, rꞌạbuphe rꞌọdi ọghi bọ, aḍighom pạ ọmuneen bọ ọnyani phọ.

⁴¹Kụ rọpham ḍịghaagh ọnyani phọ kụ ạḅeni nyọdi mọ, “Talita kumi!” ẹmhu ịduon phọ, pọ “Nyạni phọ, ḅetenu!”

⁴²Egina amem bịn ọnyani phọ aḅetenu arelhe yogh. (Ọdi ạman bọ ḍioph rꞌịyal ạsia.) Kụ ịphen phọ ịngo ni bịdi iboom iikia.

⁴³Kụ ạJizos ạphur bịdi rụru mọ oye kụ́naghan, kụ ạḅeni bịdi mọ, “Ịngo ọnyani phọ ịyaar ole.”