Read abua Mạk 6 Bible Online

Mạk 6 - abua bible

Mạk 6

¹Kụ ạJizos ạḍua ẹpe phọ arigheel ẹmha ọdi, kụ ạbumatuan phọ ọdi ụdaph aani ni nyọdi.

²Kụ rẹteeny ḍio ophooghian phọ, kụ ọdi amiigh ọtughemi ịsiphe obughotu phọ, kụ aḍita ạbuphe ọnaghan bọ ịtughemi phọ ọdi usinighian ni kụ ọḅem mọ, “Oye phọ ọphon ạghi ẹghen kụ alegheri bọ ịphen phọ? Ọphon ọngo bọ nyọdi ọghen ọdo olegheri ịyaar? Esi ịghen ịikpo kụ ẹdi ọdi raḍighinom ghan bọ ọdo phọ ịiḍaany phọ ịphen?

³Ọphon phọ ḍịen kọ́kaam-ạmaka phọ, ọony phọ aMeri, umor phọ aJems rꞌạJosef rꞌaJudas rꞌaSaimon? Bụen rꞌayira odi bọ sịen, kábumarani phọ ọdi?” Kụ bịdi ughel li Jịzos.

⁴Kụ ọdi ạḅeni bịdi mọ, “Oyil ólho ghan dị eghuan ụ́moogh, emuton ẹmha phọ ọdi rꞌeghunotu phọ ọdi rꞌọto ọdi.”

⁵Kụ ọdi ọ́kar oḍighi ịiḍaany ẹpe phọ, emuton ọozuogh ịyal-ikpo ạbudi úmoonogh bịn oḍume.

⁶Kụ ẹmoogh omeeraam mọ ạbidi ịngo ni nyọdi iikia. Kụ ạJizos ạḍua arelhe yogh rạmha phọ kụ ạtughemi ghan.

⁷Kụ ọdi ạmagh ḍioph rꞌịyal ạbumatuan phọ aakpomoghi kụ ạlogh ịyal yạl ekpisi, kụ ạngo bịdi ịikpo ophoroghom ịkaraph aruwaloor.

⁸Kụ ạphur bịdi rụru mọ, “Omuton ịkpara bịn ẹnon ịyaar kẹ́pam, mꞌeḍien, mꞌokuru, mꞌoḍigh ikpoki.

⁹Ịloghoḍian rokoro, kụ ịyal ạrusuoma kẹ́kpologhian.”

¹⁰Kụ ọdi ạḅeni bịdi mọ, “Otu lọ nyina eḍigh ịtol li, tụtu ẹteeny mem lọ nyina kẹḍua ẹmha phọ ẹpe.

¹¹Kụ ẹmha lọ nyina ẹghi esi kụ inyina ị́sighe ịnaghanan, pọ rẹḍua ịikpa ịisaar aruwol phọ anyina eseere, ẹsighenaan ḍiigira ọnhu anyina.”

¹²Kụ bịdi ọghi ọghaaph ghan mọ awe okiton esi ịkaraph phọ ạbidi.

¹³Kụ bịdi ophorogh yogh ịminighan aruru, kụ ọsighe ghan elo ogbulogh ịminighan ạbudi asiloor ímoonogh oḍume yogh.

¹⁴Kụ ạHerod ọdaam ẹmha phọ ạnaghan ni ịlo ịphen phọ, ịdi eḍighi bọ aḍien phọ ạJizos meeleghaan. Buniin ụḅem ghan mọ, “Ọdi ạJon oburogh mụum mọ, kụ maḅetenu sịphe aḍuugh phọ. Ịduon kụ iḍighi kụ ịikpo phọ ịphen reḍighi bọ oḍighi phọ ọphon loor ọdi.”

¹⁵Buniin ọḅem ghan mọ, “Ilaija”, bụeri mọ, “Oyil, ịdipho oniin ọnyo ariil aḍiodiidi phọ.”

¹⁶Kụ mem dị ạHerod ạnaghan bọ ịphen phọ kụ ạḅem mọ, “Oye phọ ọphon ạJon oburogh mụum mọ mị asoph bọ ẹmhu phọ kụ maḅetenu sịphe aḍuugh phọ.”

¹⁷Ọdi ạghaaph ịduon esi okaphian oomiigh ịpe ọdi aḍighi bọ. Mem dị meten ọdi ạar Hẹrodias, ạnir aFilip umor ọdi, aphin. ẠJon ạḅeni ghan Hẹrod mọ ị́kpe ịduon ọdi ạsighe bọ ạnir umor phọ ọdi aphin. Esi ọḅaalami ologhi ạHerodias, ạHerod arom ni osiph Jọn ọlogh ikoli. ẠHerodias ạlogh Jọn ḍien, kụ ạwaaghi ghan ịlo oghiigh ọdi, kụ órue,

¹⁸

¹⁹

²⁰ịdi eḍighi bọ ạHerod aghueni ghan ni Jọn, mọ ọdi ogey oye rꞌoye aruukuan, kụ ạphel nyọdi ạsighe. Tọrobo amem dị ạHerod ạnaghan ọghaaph phọ ọdi, ịiḅaghami ghan ni ịitughian ọdi, kụ ọlo ísophoghom ghan nyọdi ọnaghanam rꞌọphalaḅaal ologhi.

²¹Eepoogh ịrolonaan ni Hẹrodias, ḍio dị ạHerod aagbologh rạalha rꞌạbuo ạrumhu awe ẹgham rꞌikpolom awe ạbuo aGalili, kụ ạko bịdi igoni ọotughianam aḍio phọ ọmar bọ nyọdi.

²²Ọnyani ạHerodias aru ni aḍigh kụ ạgher ịḅa, kụ ạḅeeraan Hẹrod rꞌaruuruen phọ ọdi iboom. Pọ kụ amem dị ọdaam ẹmha phọ ạḅeni ọnyani phọ mọ, “Zụa tọrobo ịyaar lọ ẹḅeeraan nyịna, mị ạkuom nyịna.”

²³Kụ ọdi aghunya mọ, “Ịyaar lọ nạ ạzua kụ ẹdi mị kạkuom ni nyịna, ghạlamo rꞌạpakiri eelhe phọ mị ạda bọ.”

²⁴Kụ ọnyani phọ ạghi apuru onhiin phọ ọdi mọ, “Mị ụzua eeghe?” Kụ ọdi mọ, “Zụa ẹmhu ạJon oburogh mụum mọ.”

²⁵Kụ ọnyani phọ aagborion aḅula egina amem, kụ ạḅeni ọdaam ẹmha phọ mọ, “Mị rạwa mọ nụun ạsighe ẹmhu ạJon oburogh mụum mọ, ạlogh ẹteleleeny ụngo ịmi.”

²⁶Kụ ẹngo ọdaam ẹmha phọ oboom ọto, kụ ọdi ọ́wa ọka ọnhu phọ ọdi, loor iikunya phọ dị maghunyian bọ pạ arisigh aruuruen phọ.

²⁷Ọdaam ẹmha phọ arom oye ẹgham, mọ ạghi asoph ẹmhu phọ ạJon ạsighe aru. Kụ oye ẹgham mọ ạghi ẹpe otu ikoli phọ asoph ẹmhu phọ ọdi,

²⁸ạlogh ẹteleleeny aruom ọnyani phọ. Kụ ọnyani phọ ạsighe ạghiomonaan onhiin phọ.

²⁹Kụ mem dị ạbumatuan phọ ạJon ọnaghan bọ ịphen phọ, bịdi ụghi ni ọsighe ḍizu phọ ọdi, ọghi oḍi.

³⁰Kụ abutelhedom mọ ookpomoghan esi ạJizos, kụ ọghaaph oomo phọ ạraraar phọ bịdi oḍighi bọ, ọḅile bọ ọtughemi, ọḅeni nyọdi.

³¹Kụ ọdi ạḅeni bịdi mọ, “Itu ọwile we phọ ọghi ekpisi dị enamian ophooghian ẹnum amem!” Ịyaar phọ eḍighi bọ bịdi ụ́moogh rꞌeepoogh olhe eḍien, loor esi dị buniin rotu, buniin rokeel.

³²Kụ bịdi oḍigh oghuugh, kụ ọghi ekpisi dị enamian kụ bịdi bịn ọrol.

³³Kụ ịbadi awe ụmiin ni bịdi mem mọ bịdi rọḍua bọ, kụ ọlogh bịdi elegh, kụ awe ọḍua ẹpe oomo ạramha phọ oogborion okiton owol ade, osoph bịdi osoor.

³⁴Ọdi rasul, bịn ạmiin ḍiboom aḍita awe, kụ ọdi ạmoogh igbiririph ạbidi, loor esi dị ọkighogh ịdipho iyool-ịga dị opoghom úlho, kụ ọdi amiigh ọtughemi ạbidi ịminighan ạraraar.

³⁵Kụ mem dị adulhe retu, kụ ạbumatuan phọ ọdi ọghi ọḅeni nyọdi mọ, “Ẹphen kẹ́mha, kụ adulhe retu.

³⁶Ḅẹni we phọ mọ bịdi ọghi ẹpe ạsiraaghana phọ rꞌạramha phọ etuman bọ sịen, ogho ịyaar olhe.”

³⁷Kụ ọdi ạphagharanaan mọ, “Nyina kụ ịngo bịdi ịyaar olhe!” Kụ bịdi opuru nyọdi mọ, “Yoor ọsighe ịyal okuron ipoḍi asilva oghoom eḍien ọngo bịdi olhe ḍụghum?”

³⁸Kụ ọdi apuru bịdi mọ, “Nyina ẹmoogh bọ ika iiḅoghoḍi ạbred? Ịki ephogh!” Kụ bịdi ọki opogh oḅula, kụ ọḅeni nyọdi mọ, “Oogh, rꞌịyal ina.”

³⁹Kụ ạJizos ạḅeni bụmatuan phọ ọdi mọ ọḅeni oomo awe phọ mọ ọrologhu ude rụuku, sịphe ạtugbiir ạroogho phọ.

⁴⁰Kụ bịdi ọrologhu ude rụuku, oniin okuron ẹku, ooghdi ẹku.

⁴¹Kụ ạJizos ạsighe oogh phọ iiḅoghoḍi ạbred phọ rꞌịyal phọ ina phọ, kụ aphogh ạnyu ạke, kụ ạngo ḍịseph Ẹnaan, kụ ạparion, kụ ạsighe ạngo bụmatuan phọ mọ odiemi ḍita awe phọ, kụ adiemi kẹn oomo phọ ạbidi ịyal phọ ina phọ,

⁴²kụ oomo phọ ạbidi olhe ẹpherogh.

⁴³Kụ ọson ipoḍi phọ esugha bọ, kụ emuza ḍioph rꞌịyal ạrigiel.

⁴⁴Kụ bụphe olhe bọ iiḅoghoḍi ạbred phọ ọman bọ oogh ọonir alephiri.

⁴⁵Kụ ạJizos ạkpaariom bụmatuan phọ, mọ oḍigh oghuugh ọḅeeny ophun ḍịeri phọ ạḍighaagh phọ, oḍiemi ghan ẹpe Betsaida, mọ ọno kạḅeni we phọ mọ ogheleghu.

⁴⁶Kụ rọḅeni bọ we phọ mọ ọmaar ọrol, kụ ạghi ẹpe ẹeḅaraph phọ ọoḅereghi.

⁴⁷Meghul li, kụ oghuugh phọ asi ẹpe ogbo ọphiiny phọ, kụ ọdi bịn kụ asugha ẹpe ạnyu ade phọ.

⁴⁸Kụ ọdi ạmiin dị bịdi rọmiinom ịzoghi, ịdi eḍighi bọ oghim ạda bịdi. Kụ rẹteeny eḅon ạḍiroor, kụ ọdi arelhe ạnyu ạmuum mọ, ịlo ọghuuraam ạbidi kụ oten.

⁴⁹Kụ mem dị bịdi ọmiin bọ nyọdi dị ratelhe bọ ạnyu ạmuum mọ, bịdi ugbi mọ oḍim, kụ ọlooghi,

⁵⁰ịdi eḍighi bọ oomo phọ ạbidi kụ ụmiin ni nyọdi, kụ asiloor ạbidi eḍighi nyạam nyạam. Egina amem ạJizos ạḅeni bịdi mọ, “Iḅio anyina kíkaph. Mị ni. Kékiilaan!”

⁵¹Kụ ọdi ạada aḍigh aani ologhi oghuugh phọ, kụ oghim mọ ạpho. Ịphughanam ni kụ eḍigh ḍiigu esi ạbidi,

⁵²ịdi eḍighi bọ ụ́naghan ịpe iiḅoghoḍi ạbred phọ, kụ iloghi phọ ạbidi eḍuughi.

⁵³Kụ bịdi ụḅeeny ni osul Gẹnesaret, kụ osumughi ịluma oghuugh phọ.

⁵⁴Kụ bịdi ropun bọ bịn awe ụlogh ni Jịzos elegh,

⁵⁵kụ oghilighuan oomo phọ eelhe phọ; kụ ọsighe yogh we dị úmoonogh ọmuneen yogh rịmina, kụ orool ghan ọwaam tọrobo ekpisi lọ ọnaghan mọ ạJizos odi.

⁵⁶Tọrobo ekpisi lọ ọdi ạghi, mꞌạramha, mꞌịphalagbal, mꞌạsiraaghana, bịdi ụsighe yogh ghan bụphe asiloor phọ ị́nighe bọ osereghi igbogh arurugh, kụ ọoḅereghian ghan nyọdi mọ bịdi ọḅogh ghạlamo rꞌạḍimaam ạsuoma phọ ọdi. Kụ oomo ạbudi ọoḅoghogh bọ uḍumogh ni.