Read abua Mạk 8 Bible Online

Mạk 8 - abua bible

Mạk 8

¹Ịphen phọ eten bọ íbia bịn aḍiboom aḍita awe ụḅile ni oru ookpomoghan. Mem dị bịdi ụ́moogh mun ịyaar ole, ạJizos ạmagh ni bụmatuan phọ ọdi aakpomoghi, kụ ạḅeni bịdi mọ,

²“Igbiririph awe phọ ạbuen risiphanaan ni ịmi, ịdi eḍighi bọ bịdi mụrolan ịmi ịraar aḍughul-otu, kụ ụ́moogh mun ịyaar ole.

³Mị ạḅem mọ bịdi ogheleghu iloghi aruutu ạbidi, bịdi komuzaan ni ḍuugh ẹpe eten, ịdi eḍighi bọ ịbadi ạbidi ụḍua ni rikpisi dị ẹkelogh kụ oru.”

⁴Kụ ạbumatuan phọ ọdi opuru nyọdi mọ, “Iḍighen sịen ẹdala phọ kụ ẹdi kọmiin eḍien dị kẹgbaanyan kꞌạbuen kꞌạbuen phọ?”

⁵Kụ ọdi apuru bịdi mọ, “Nyina ẹmoogh bọ ika iiḅoghoḍi ạbred?” Kụ bịdi mọ, “Oḍual.”

⁶Kụ ọdi ạḅeni we phọ mọ ọrologhu ude. Kụ ạsighe oḍual iiḅoghoḍi ạbred phọ kụ, rọngo ḍịseph Ẹnaan, kụ ạparion kụ ạngo bụmatuan phọ ọdi mọ odiemi ḍita awe phọ, kụ ạbumatuan phọ ọtuugh odiemi.

⁷Bịdi ụmooghom kẹn ni ịphurukpu ạnmuny ina, kụ ạJizos, rọngo ḍịseph Ẹnaan, kụ ạḅeni bụmatuan phọ ọdi mọ odiemi we phọ.

⁸Oomo phọ ạbidi ule ni ẹpherogh — awe phọ ụghiom ni inya ọonir. Kụ ạbumatuan phọ ọson ipoḍi phọ esugha bọ, kụ emuza oḍual arugunum.

¹⁰Kụ ạJizos ạḅeni we phọ mọ ogheleghu, kụ mem mem mọ bịn ọdi rꞌạbumatuan phọ ọdi oḍigh oghuugh phọ, kụ ọghi ẹpe eelhe aDalmanuta.

¹¹Buniin aFarisi phọ uru ni kụ omiigh ọogbaghanaan rꞌạJizos. Bịdi ụwa ghan ịlo ọdegh ọdi ophogh, kụ opuru nyọdi eḍeenaan kꞌạke.

¹²Kụ ạJizos ạḅiphaan kụ ạḅem mọ, “Oghiil phọ ọphon ụtuan aani eeghe kụ ropuru ghan bọ eḍeenaan phọ? Mị ạkar rịḅeni ghan inyina mọ eḍeenaan dị kọngo oghiil phọ ọphon ílho.”

¹³Kụ ọdi ạwile bịdi, kụ ạghi aḍigh oghuugh phọ, kụ amiigh ọḅeeny ạḍieri phọ ạḍighaagh ọphiiny phọ.

¹⁴Ạbumatuan phọ mowula ọpham eḍien ọghimom, kụ bịdi ọmoogh eniin eeḅoghoḍi ạbred bịn sịphe ologhi oghuugh phọ.

¹⁵Kụ ạJizos ạphur bịdi rụru mọ, “Igona loor anyina esi ayist aFarisi phọ rꞌayist ạHerod.”

¹⁶Kụ bịdi omiigh ọghaaphan sịphe ogbo phọ ạbidi mọ, “Ọdi ạḅem ịduon, ịdi eḍighi bọ yira ụ́moogh ạbred.”

¹⁷Kụ ạJizos alegheri ni mọ bịdi kọ̋naghanan mọ ọno rạkaaph ghan ịlo ịtughemi awe phọ ạbuen, kụ apuru bịdi mọ, “Iḍighi ika nụun kụ nyina ẹḅile bọ rẹkaaph ghan ịdi nyina ạbred ị́moogh? Nyina ke̋lhegheri, ḅịle kẹn kẹ̋naghanan kꞌạnyiidipho. Oḍueghi yogh ni iloghi phọ anyina.

¹⁸Nyina ẹmoogh bọ ni riḍien, nyina eten rẹ́miin. Nyina ẹmoogh bọ ni reḅeri, nyina ḍụghum rẹ́naghan. Nyina mewula

¹⁹mem mọ mị ạparion bọ oogh iiḅoghoḍi ạbred phọ, ạngo oogh ọonir awe phọ ḍụghum? Ipoḍi phọ nyina ẹson bọ emuza bọ ika ạrigiel?” Kụ bịdi mọ, “Ḍioph rꞌịyal.”

²⁰Kụ ạJizos ạḅile apuru mọ, “Kụ mem mọ mị ạparion bọ oḍual iiḅoghoḍi ạbred phọ ạngo inya ọonir awe phọ, ipoḍi phọ nyina ẹson bọ emuza bọ ika arugunum?” Kụ bịdi mọ, “Oḍual.”

²¹Pọ kụ amem dị ọdi ạḅile apuru bịdi mọ, “Nyina kẹ̋naghan nịiniin ḍụghum?”

²²Kụ bịdi uru ni osi Betsaida, kụ abuniin awe ọsighe oye ikpom ariḍien oruom Jịzos, kụ ọoḅereghian mọ ọdi ạḅogh.

²³Kụ ạJizos ạpham ḍịghaagh oye phọ arelhiom nyọdi ạḍuanam sịphe ẹmha phọ. Kụ romuurom riḍien oye phọ ịghor kụ ạzu, kụ apuru mọ, “Nạ rạmiin ni ịyaar?”

²⁴Kụ oye phọ aphogh ạnyu, kụ ạḅem mọ, “Mị rạmiin ni we, kụ bịdi ọkigh ireeny dị retelhe yogh.”

²⁵Kụ ạJizos ạḅile kẹn ạsighe rạghaagh ọdi ạzu riḍien oye phọ. Pọ kụ amem dị oye phọ ạkuami aphogh akiririom, kụ ariḍien phọ ọdi emoon, kụ ọdi ạmiin oomo ạraraar phọ agey.

²⁶Kụ ạJizos ạḅeni nyọdi mọ, “Nyeene agheel ologhi otu, úkir ghan ẹmha!”

²⁷Kụ ạJizos rꞌạbumatuan phọ ọdi ụḍua ni rọki rạmha phọ aSizaria Filipai. Kụ ẹpe eten phọ, ọdi apuru bịdi mọ, “Ịḅeni ịmi. Awe rọḅem ghan mọ mị ạnhian?”

²⁸Kụ bịdi mọ, “Buniin rọḅem ghan mọ ạna ạJon oburogh mụum mọ, buniin mọ Ilaija, kụ buniin mọ oniin oyil phọ Ẹnaan.”

²⁹Kụ ạJizos apuru bịdi mọ, “Nyina rẹḅem aani ghan mọ mị ạnhian?” Kụ aPita mọ, “Nạ kụ aMesaya phọ.”

³⁰Kụ ạJizos ạphur bịdi rụru mọ, “Ịphen phọ kẹ́kaaph ẹḅeni oye.”

³¹Kụ ạJizos amiigh ọtughemi ạbumatuan phọ ọdi mọ, “Ọony phọ Oye kạmiinom ni iboom ịminimiin. Ikumoor awe phọ rꞌạbuo ạrumhu ariil ạrikia phọ rꞌạbutughemia iilogh phọ komutonaan ni nyọdi, kokiigh ni nyọdi, kụ esi ịraar aḍughul-otu ọdi kaḅetenu ni esi aḍuugh phọ.”

³²Kụ ọdi óopuki ẹghaaphom mọ. Kụ aPita ạsighe nyọdi atenom ọgbal, kụ ạḅaam.

³³Kụ ạJizos akiton asoman bụmatuan phọ ọdi, kụ ạḅaam Pita kụ ạḅeni mọ, “Setan, ḍụa sịen ghisigh ạmi. Ịitughian phọ ạna, ịitughian awe, kị́itughian Ẹnaan.”

³⁴Kụ ạJizos ạmagh ḍita awe phọ rꞌạbumatuan phọ ọdi mọ oru, kụ ạḅeni mọ, “Oye lọ rạwa ọdaph ạmi asooromi loor ameeraam ḍuugh, kụ aḅeton osuom arusu phọ ọdi arool, kụ ụdapham ịmi!

³⁵Oye lọ ạmaghami ghuḍum mọ ọdi ịyaar kapiemi ni, kụ oye lọ ghuḍum mọ ọdi ụ́maghami ịyaar loor ẹmhu ạmi rꞌooḅi ọghaaph phọ kạmoogh ni ghuḍum.

³⁶Oye kạsighe bọ eeghe ạsuo dị ạmoogh ẹelha aḅirini phọ ạmadan kụ aphiemi ghuḍum mọ Ẹnaan ẹngo bọ nyọdi?

³⁷Kạsighe bọ eeghe kụ aanmeneniom kẹn ghuḍum mọ Ẹnaan ẹngo bọ nyọdi?

³⁸Oye lọ ughiilom ịmi umugholoor, sịen ọkaraph oghiil phọ ọphon Ẹnaan úlegheri bọ, pọ Ọony phọ Oye kạḅile ni akiilom aani nyọdi umugholoor, mem dị ọdi kạpam rụukpaany phọ Ẹnaan kụ atu rꞌigbogh Ọde phọ ọdi.”