Read abua Luk 1 Bible Online

Luk 1 - abua bible

Luk 1

¹Ooḅi ạTiofilos: Ịbadi awe mọlhogh ni ẹmhu ọge ịlo ạraraar phọ ịpe emite bọ sịen ogbo phọ ayira.

²Bịdi ụge ịlo ịpe bụphe ọmiin bọ rạraar phọ ịphen kꞌẹḅel egbiom mọ, ọḅile ghan bọ ọghaaph ọghaaph Ẹnaan oleenyemi, mọghaaph bọ ni ụḅeni iyoor.

³Esi ịduon phọ, loor esi dị mị mazuumaam bọ ni ạtuugha oomo phọ ạraraar phọ ịphen kꞌẹḅel egbiom mọ, mị ragbiom ni mọ ẹnighe ni ọge ẹkpigh etum ẹkpigh oruom ạna Tịofilos.

⁴Mị ụtu mọ legheri mọ oomo ạraraar phọ ịpe mọtughemi bọ nyịna ọkaraghi igey phọ ni.

⁵Ọrugh phọ ọpo ạHerod aḍighi bọ ọdaam eelhe phọ aJudia, oniin oyil ạrikia ạrol li, dị oghol mọ ạZekaraya. Ọdi aḍighi ọnyo ạbaay ariil ạrikia phọ dị oghol mọ ạbaay kꞌAbaija. Ạnir ọdi, dị oghol mọ Elizabet, ọnyo ẹemara ẹemara Eeron.

⁶Ịyal phọ ạbidi ụmoogh ni eeḅi ẹzo ghisigh Ẹnaan ooko ghan iilogh Ọmoogh-we phọ ọman.

⁷Bịdi nmụny ụ́moogh, ịdi eḍighi bọ Elizabet ạrol ẹmar, kụ ịyal phọ ạbidi mọkpo ḍiboom ạḍikpo.

⁸Eniin aḍio, ạZekaraya ạrol li raḍighi oḍighi abiil phọ ọdi ghisigh Ẹnaan, ịdi eḍighi bọ mesi ẹkpigh ọdi oḍighi oḍighi Otu Ịiḅereghi phọ ḍio ḍio ḍio.

⁹Esi eḍighinom ịyaar phọ ariil ạrikia phọ rọtuan ghan bọ, bịdi ụsa ni ẹlhel, kụ ẹlhel phọ emeelom nyọdi ọsu aani ịnsens ẹpe ọgbanaghi ịyaar aghuḍum mọ. Rẹteeny mem ọsuughi ịnsens phọ, kụ ọdi ạghi aḍigh ẹpe Ạdol Iigbia Otu Ọmoogh-we phọ, kụ aḍita awe ọrol ẹpe erugh phọ rọoḅereghi ghan Ẹnaan.

¹⁰

¹¹Kụ ọokpaany Ọmoogh-we phọ aru ạmeera ḍịghaagh elhiom enmeny ịyaar aghuḍum mọ.

¹²Mem mọ ạZekaraya ạmiin bọ nyọdi, ịiḅaghami ni nyọdi iboom dị aruugu asiph ni nyọdi.

¹³Kụ ọokpaany Ọmoogh-we phọ ạḅeni ạZekaraya mọ, “Aruugu nyịna kúsiph. Mọnaghan ni ịiḅereghi phọ ạna. Elizabet ạnir phọ ạna kạmaranaan ni nyịna olephiri, kụ nạ kakol mọony phọ mọ ạJon.

¹⁴Nạ kạmoogh ni iboh rꞌọḅaal ologhi, kụ ịbadi koboom ni ẹmaria phọ ẹphen.

¹⁵Ọdi kaḍighi ni ogbogh ghisigh Ọmoogh-we phọ. Ọdi kụ́pughol miim ịya rꞌạmuukpara amiim. Rọmar roseere, bịn Uwaloor Iigbia phọ kamuza ni loor ọdi.

¹⁶Ọdi kakiton ni iloghi ịbadi aweye Ịzirel olegheri Ọmoogh-we Ẹnaan phọ ạbidi.

¹⁷Ọdi kụ kaḍiemi ghan akori Ọmoogh-we phọ, ạmoogh ịikpo aḍighi ogbogh ịdipho Ilaija oyil phọ Ẹnaan. Ọdi kạpomoghi yogh ni bụrude rꞌạnmuny. Ọdi kakiton ni iloghi aweye oḅom ẹmhu olegheri aani ịyaar ịdipho awe aruukuan phọ. Ọdi kaselemi ni iloghi aweye aseenaan Ọmoogh-we phọ.”

¹⁸Kụ ạZekaraya apuru ọokpaany phọ Ẹnaan mọ, “Koḍighi bọ ika kụ mị alegheri mọ ịduon phọ ni? Mị okumoor oye, ḅịle kẹn ạnir ạmi maḍighi okumoor ạnir.”

¹⁹Kụ ọokpaany phọ mọ, “Mị aGebriel. Mị rạmeera ghan ghisigh Ẹnaan. Urom ịmi ọghaaph rꞌọḅeniom ạna ooḅi ọghaaph phọ ọphon.

²⁰Ịduon nạ úmeeraam bọ dom mọ ạmi, ḍịphe kemite bọ ni ịpe mị rạkaaph bọ, pọ nạ kaḍighi ekpom ọka. Nạ kạ́ḅa mun tụtu ẹteeny ḍio phọ ịphen phọ kemite bọ.”

²¹Mem mọ ạmuen phọ, awe phọ ukori ghan ạZekaraya, ọḅile ookia ịpe eḍighi bọ kụ ọdi rabia bọ ịdipho, ẹpe Ạdol Iigbia Otu Ịiḅereghi phọ.

²²Mem dị ọdi amite bọ aru, órue mun ọḅa, kụ bịdi ọsighenom mọ ọdi mạmiin uḍien ẹpe Ạdol Iigbia Otu Ịiḅereghi phọ. Ọdi ạmaaghiom rạghaagh, loor esi dị maḍighi ekpom ọka.

²³Kụ ariiḍio ọphinyon ạrikia phọ ịpe ọdi remunughan, kụ ọdi agheel kꞌọdi.

²⁴Onyebel roten, kụ Elizabet ạnir phọ ọdi asoph eghun kụ ómite aani ghan kꞌoye esi oogh ụnwanyu,

²⁵kụ ạḅem ghan mọ, “Nyịidipho Ọmoogh-we phọ mụnma ịmi ighirigiir ạsighe eekpoogh umugholoor phọ ạmi ghisigh awe.”

²⁶Mem dị eghun phọ ọdi mẹman odiiny ụnwanyu, Ẹnaan irom ni Gebriel ọokpaany phọ ọdi mọ ạghi ẹmha dị oghol mọ ạNazeret ẹpe eelhe aGalili.

²⁷Ọdi ạpham ni dom ạghiomonaan esina ọnyani dị oghol mọ aMeri, dị ạJosef ọnyo ẹemara ẹemara aDevid ọdaam mọ atebeeny ḍịkala.

²⁸Kụ ọokpaany phọ ạghi ạḅeni ọnyani phọ mọ, “Nyạni phọ, bọ ni. Ọmoogh-we phọ mạlhogh nyịna iboom ịiseeny.”

²⁹Adom mọ ạḍien ịiḅaghami ni ologhi aMeri iboom kụ apuruan ghan mọ, “Ẹmhu ịduon phọ ika?”

³⁰Ọokpaany phọ ạḅeni ọnyani phọ mọ, “Meri, kákiilaan. Ẹnaan mẹnma nyịna ighirigiir.

³¹Nạ kaamor ri ạmar olephiri kụ akol mọ ạJizos.

³²Ọdi kaḍighi ni ogbogh. Egbogh Ẹnaan phọ kekol nyọdi mọ Ọony ọno, kụ Ẹnaan Ọmoogh-we phọ kẹngo ni nyọdi ạgada ọdaam ẹmha, ịdipho aDevid ogbogh ọde phọ ọdi.

³³Ọdi kụ kạda ẹemara ạJekob kꞌagee-pọ. Ẹdaam ẹmha phọ ọdi eekuna kẹ́tol.”

³⁴Kụ aMeri apuru ọokpaany phọ mọ, “Ịphen phọ keḍighi ika kụ emite bọ? Mịna rꞌolephiri ọony esi kọ̋rolan ghan bọ.”

³⁵Kụ ọokpaany phọ mọ, “Uwaloor Iigbia phọ kụ kasoorom nyịna, kụ ịikpo Egbogh Ẹnaan phọ keghoph ni nyịna. Loor ịduon phọ, Ẹnaan kekol mọony phọ nạ kạmar bọ mọ Oye Aghuḍuul, Ọony phọ ọno.

³⁶Legheri mọ Elizabet ọnyo asiya phọ ạna, ghạlamo ịdipho mạkpo bọ ni tụtu agholaam ḍien ẹmar phọ, odi ni rꞌịyal amem aloor, dị mẹman odiiny ụnwanyu kụ kạmar olephiri.

³⁷Ịyaar lọ ẹkparanaan Ẹnaan oḍighi ílho mun.”

³⁸Kụ aMeri ạḅem mọ, “Mị otelhedom Ọmoogh-we phọ. Ịdipho nạ ạḅem bọ ẹtuugh ni imitenaan ịmi!” Kụ ọokpaany phọ agheel.

³⁹Ịphen phọ eten bọ íbia kụ aMeri aḅetenu aakolobian aagborion ạghi ẹpe aroogbolom mọ, asi eniin ẹmha pạ eelhe phọ aJudia.

⁴⁰Kụ aḍigh otu ạZekaraya kụ ạmagh Elizabet.

⁴¹Ịduon Elizabet ạnaghan bọ ḍịmagh phọ aMeri, bịn ọony phọ odi bọ ọophi phọ Elizabet awul, kụ Uwaloor Iigbia phọ amuza loor Elizabet.

⁴²Kụ Elizabet aphoophe ẹḍogh ọdi ạghiom ạnyu kụ ạḅem mọ, “Mọseph ni nyịna esi aḍita ạnmariir. Ạḍiseph edianaan ni mọony phọ ọpo nạ kạmar bọ.

⁴³Uḍighi ika kụ iboom mọ ịphen rimitenaan bọ ịmi, dị tụtu nạ onhiin Ọmoogh-we phọ ạmi kụ maru ophogh ạmi?

⁴⁴Ịduon mị ạnaghan bọ ḍịmagh phọ ạna bịn ọony phọ odi bọ ọkuruḅaka phọ ạmi awul li rꞌọḅaal ologhi.

⁴⁵Ạḍiseph edianaan ni nyịna ịdipho nạ ameeraam bọ ni mọ adom Ọmoogh-we phọ eru bọ ẹteeny nyịna kẹtuugh ni emite.”

⁴⁶Kụ aMeri ạḅem mọ, “Uwaloor ạmi rạbughe ni Ọmoogh-we phọ;

⁴⁷ologhi ạmi ạmoogh ni iboh esi Ẹnaan Ọpelia phọ ạmi,

⁴⁸ịdi eḍighi bọ ọdi mụlhoghomaam ịmi otelhedom mọ ọdi mạar ụ́man bọ. Egbi nyịidipho ẹghiom ghisigh, oomo awe kughol ghan ịmi mọ ọnyani dị ọseph,

⁴⁹loor esi ịma ạraraar phọ Egbogh Ẹnaan phọ meḍighi bọ ịngo ịmi. Iigbia kụ aḍien phọ ọdi;

⁵⁰ọdi rạnma ghan ni ighirigiir oomo ạbulo ọlogh nyọdi eegu, oghiil atum oghiil.

⁵¹Ọdi mạgbuton ḍịghaagh iphelegbe phọ ọdi, ạawalami bụphe robaga bọ sịphe iloghi phọ ạbidi.

⁵²Ọdi magborion bugbogh ạraalha phọ esi ạsidol phọ ạbidi kụ apophe bụphe mạar ụ́man bọ.

⁵³Ọdi mạpheremiom igey ạraraar bụphe ọkoony phọ rasiph bọ, aporogh rạalha phọ okeel rꞌoopho ạraghaagh.

⁵⁴Ọdi mạlhoghonaan ḍịghaagh weye phọ Ịzirel abutelhedom mọ ọdi, ịdipho ọdi aguanaan bọ bụrude ạburude phọ ayira.

⁵⁵ Ọdi mạnma ighirigiir Ebraham rꞌẹemara ẹemara phọ ọdi kꞌagee-pọ.”

⁵⁶AMeri ạrol li iiruen phọ kꞌElizabet dị ẹghiom ni ịraar ụnwanyu kụ agbi nụun ogheel.

⁵⁷Kụ amem ẹmaria phọ Elizabet ẹteeny bọ, ọdi ạmar olephiri.

⁵⁸Amatuman rꞌasiya ọdi ụnaghan ni iboom ighirigiir phọ Ọmoogh-we phọ mạnma bọ nyọdi, kụ oboomiom nyọdi.

⁵⁹Rẹman ọphaanya aḍughul-otu, kụ oru oḍun ọony phọ. Bịdi ụwa oghol aani ọdi mọ ạZekaraya ịdipho ọde phọ.

⁶⁰Onhiin phọ ọdi ómeera kụ ạḅem mọ, “Ḍien ọdi kokol mọ ạJon.”

⁶¹Kụ awe phọ úmeeraam kụ ọḅem mọ, “Ọlo kꞌanyina dị oghol ḍien phọ ạḍien ólho.”

⁶²Kụ bịdi ọmaaghian opuruom ọde phọ mọ oghol nyọdi ika.

⁶³Kụ ọdi ạmaaghian aḍeenaan bịdi mọ ọngo nyịno okpooghi, kụ rọngo kụ ọdi ạge sịphe mọ, “Aḍien ọdi ạJon.” Kụ iḍighi ni iikia esi oomo phọ ạbidi.

⁶⁴Mem mem mọ ọpo bịn ọdi ạtagharan ọnhu amiigh ạḅa aboom Ẹnaan.

⁶⁵Kụ aruugu asiph ni oomo ạbuo amatuman phọ ạbidi. Kụ oomo phọ ịphen phọ iileghaan ni oomo areelhe aroogbolom mọ aJudia.

⁶⁶Kụ aḍita ạbudi ọnaghan bọ ọotughian ghan sịphe iloghi phọ ạbidi kụ opuruan ghan mọ, “Ọphon phọ kaḍighi eeghe ọdo ọony?” Loor esi dị bịdi olegheri ni mọ ịikpo Ọmoogh-we phọ edianaan ni rꞌọdi.

⁶⁷Uwaloor Iigbia phọ amuza ni loor ạZekaraya ọde phọ ọdi, kụ ọdi ạmiin ịmiin kụ ạḅem mọ,

⁶⁸“Ạḍiseph ẹrolonaan Ọmoogh-we Ẹnaan phọ Ịzirel, ịdi eḍighi bọ ọdi maru ạnma ighirigiir ạtagharan we phọ ọdi.

⁶⁹Ọdi mumitiomonaan iyira ogbogh Ọpelia dị aḍighi oniin ọnyo ẹemara ẹemara kꞌaDevid otelhedom mọ ọdi.

⁷⁰Ịphen kụ ịmiin phọ ariil aruukuan phọ Ẹnaan ọmiin bọ gediidi phọ.

⁷¹Ọdi aguan ọtagharan ayira ḍịghaagh ạbuo ẹpomoghian phọ ayira ḅịle rꞌesi ịikpo oomo ạbuphe ụlogh bọ iyira ḍien phọ,

⁷²ọnma ghan ighirigiir bụrude ạburude phọ ayira, ọḅile ghan ọpham ọphuo ịyo phọ ọdi.

⁷³Esi ịyo phọ ọdi aghiran bọ ọde phọ ayira Ebraham, ọphel ayira ọsighe ḍịghaagh ẹpomoghian phọ ayira, ạḅile bọ ameeraam mọ ooseeny ni nyịno dị rꞌeepuph kị́tol, mọ ọrolom ruukuan rꞌigey ghisigh ọdi esi oomo aghuḍum mọ ayira,

⁷⁴

⁷⁵pọ ọdi maako iikunya ọghor phọ ọpo ọdi aguanaan bọ ạngo Ebraham ogbogh ọde phọ ayira.

⁷⁶“Kụ nạ ọony phọ ạmi, koghol nyịna mọ oyil Egbogh Ẹnaan phọ. Nạ kụ kaḍiemi ghan aselemi eten aseenaan Ọmoogh-we phọ,

⁷⁷kụ ạḅeni we phọ ọdi mọ bụphe ọsar bọ ịkaraph phọ ạbidi ọwilenaan kọpel li otene.

⁷⁸Ẹnaan phọ ayira eḍighi ni ẹlo iboom igbiririph. Ọphel otene phọ ọdi kuruom bọ iyira kạkigh ịdipho ạḍiroor dị ekpoghoronu kụ ạḍiḅaal phọ keporogh ni ufiri sịphe iloghi phọ ayira ẹkele.

⁷⁹Kạkigh kẹn ịdipho ogogo dị asoorom bụphe aḍuugh memoogh bọ kụ ạma eten ẹepho uḍeenaan iyira.”

⁸⁰Kụ ọony phọ aphoph eye rꞌuwaloor ạmanam kụ ạrol ẹpe ẹdala phọ tụtu ẹteeny mem dị ọdi kamite egaan ghisigh aweye phọ Ịzirel.