Read abua Luk 10 Bible Online

Luk 10 - abua bible

Luk 10

¹Ịphen phọ eten bọ, Ọmoogh-we phọ ạḅile ni ạlogh oḍualdi rꞌịyal ạbunon awe kụ ọdi arom ghan ịyal awe ẹku onyeene oḍiemi ghan ọghi ạtorobo ekpisi rꞌẹmha lọ ọdi kạki.

²Kụ ọdi ạḅeni bịdi mọ, “Ibugha phọ ẹbugh ni, kụ awe oḍighi phọ okom ni. Ịduon kụ iḍighi kụ ịiḅereghi ẹngo uwozo phọ ọbo ọdi ạsighe bụnon awe ạḅaram ọghi ibugha phọ ọdi.

³Mị rirom inyina mọ ịki ịdipho ạnmuny iyool-ịga ogbo ilhom ịnam.

⁴Oḍigh ikpoki rꞌokuru rꞌarokoro kẹ́pam. Kẹ́tol ịimaghaghan epiemi mem ẹpe eten phọ.

⁵Kụ otu lọ nyina eḍigh, ịpur ghan ẹmagh we phọ kụ ẹḅeni mọ, ‘Ẹepho ịrolonaan inyina!’

⁶Oye lọ ọgianaan ẹepho kụ ạrol aani sịphe phọ, pọ ạḍiseph phọ nyina ẹngo bọ nyọdi kẹtolonaan ni nyọdi. Mụghumo ólho, pọ ạḍiseph phọ anyina keḅula ni.

⁷Ịtol oniin otu bịn kénme marugh, elhe ghan ẹphughol ịlo bịdi ịngo inyina ịdi eḍighi bọ oye arukumuan rákeel ghan oopho.

⁸Kụ ẹmha lọ nyina ẹghi esi kụ awe phọ ịsighe inyina ọlogh otu ile ghan eḍien lọ ịḅamaghinaan inyina,

⁹eekonom bụo ariiphina, ẹḅeni we phọ mọ, ‘Ọmar phọ kꞌẸnaan mịkpulan inyina.’

¹⁰Kụ ẹmha lọ nyina ẹghi esi kụ inyina ị́sighe ịlogh otu, itelhe yogh roḅodo phọ ẹḅem ghan mọ,

¹¹‘Rꞌịisaar aruwol phọ ayoor bịn, yoor ọokpa ni kpel kpel roseere ọsighenaan aḍiigira ọnhu ayoor. Ịmaar elegheri mọ ọmar phọ kꞌẸnaan mạkpulan.’

¹²Mị rịḅeni ghan inyina mọ ḍio ịiruen phọ kebephenaan ni we ẹmha phọ ẹpe phọ epu we phọ ạSodom.”

¹³“Pọ eeghe ịminimiin dị kịrolonaan inyina weye aKorazin. Pọ eeghe ịminimiin dị kịrolonaan kẹn ni inyina weye aBetsaida. Iboom ịiḍaany phọ ịphen mị aḍighi bọ ogbo phọ anyina kụ oḍighi ẹpe Taya rꞌaSaidon, ọbo awe phọ ạbuphe mokiton esi ịkaraph phọ ạbidi kꞌagediidi, omunughian rukpe-ọto.

¹⁴Kụ ḍio ịiruen phọ keephenaan ni inyina epu we phọ aTaya rꞌaSaidon.

¹⁵Kụ nyina ạbuo ạKapaniom, nyina rẹwa ghan ophoophe aloor phọ anyina osiemi kꞌạke ḍụghum? Ẹnaan kisooromi ni inyina esumeeny ooni ạnian.”

¹⁶Kụ ọdi ạḅeni bụmatuan phọ ọdi mọ, “Oye lọ ịnaghanan inyina, mụnaghanan aani ịmi, kụ oye lọ ighel inyina, mughel aani ịmi, kụ oye lọ ughel ịmi, maghel aani nyọpo urom bọ ịmi.”

¹⁷Oḍualdi rꞌịyal awe phọ uḅula ni rꞌiboom iboh, kụ ọḅem mọ, “Ọmoogh-we, ghạlamo ịkaraph aruwaloor bịn ịnaghanan ghan ni ịlo yoor oghol ḍien phọ ạna kụ ọḅeni.”

¹⁸Kụ ạJizos mọ, “Mị ụmiin ni dị aSetan mạḍua kꞌạke kụ rameel mụdi ọomaany kụ rasoor.

¹⁹Ịnaghanan, mị mịngo inyina ịikpo dị nyina kẹezeghi ni rạkaraph-ạraraar rꞌasikororoph ạnyu ade kụ nyina ịyaar kéḍighima. Mị mạsighe kẹn oomo phọ ịikpo ạmulogh-ḍien phọ ạlogh ḍịghaagh anyina.

²⁰Kụ ọlo kébo mun mọ ịkaraph aruwaloor phọ rịnaghanan ghan inyina, iboh ghan ghụn ni dị Ẹnaan mẹge siḍien anyina ẹpe kꞌạke.”

²¹Egina phọ amem mọ ạmuphe phọ, bịn Uwaloor Iigbia phọ amuzeḍi ni iboh ologhi ạJizos. Kụ ạJizos ạḅem mọ, “Ọde ạmi ọpo ạmoogh bọ kẹ phọ rꞌade phọ, mị rạseph ni nyịna, ịdipho nạ maḍeenaan bọ bụphe mạar úlegheri bọ rạraar phọ ịphen nạ ạaghinaan bọ we olegheri ịyaar phọ. Ii, Ọde, ịphen ẹḅeeraan bọ nyịna oḍighi phọ ịḍua ni ologhi ạna kụ emite.

²²“Ọde phọ ạmi kụ ạḅogh ni oomo ạraraar phọ ạlogh ḍịghaagh ạmi, kụ ọlo alegheri oye dị Ọony phọ aru ólho emuton Ọde phọ; ḅịle kẹn ọlo alegheri oye dị Ọde phọ aru ólho emuton Mọony phọ rꞌoye lọ Ọony phọ kụ aḍeenaan.”

²³Kụ ạJizos akiton ni asoman bụmatuan phọ kụ amian ạḅeni bịdi mọ, “Iboh kꞌẸnaan edianaan ni bụphe rọmiin aani bọ ịphen nyina rẹmiin bọ.

²⁴Mị rịḅeni ghan inyina mọ ịbadi ariil phọ Ẹnaan rꞌạbudaam ẹmha ụwa ni ọmiin ịphen phọ kụ ụ́miin, ụwa kẹn ni ọnaghan ịpe nyina rẹnaghan bọ kụ ụ́naghan.”

²⁵Kụ oniin ọgbaam iilogh ạmeera ni ọnaghan ạḍughum ọnhu ạJizos kụ ạmagh mọ, “Ọtughemia, mị kaḍighi bọ ika kụ ạmoogh aani ghuḍum kꞌagee-pọ?”

²⁶Kụ ạJizos apuru ni mọ, “Ọge ika sịphe iilogh phọ aMozis? Nạ rạnaghan ghan ika ẹmhu ịpe nạ rạbal ghan bọ?”

²⁷Kụ ọdi ạphagharanaan mọ, “‘Nạ kạpomoghian Ọmoogh-we Ẹnaan phọ ạna rꞌoomo ologhi ạna rꞌoomo uwaloor ạna rꞌoomo ịnyaam ạna rꞌoomo ịitughian ạna, rꞌọnon oye ịdipho aloor phọ ạna.’”

²⁸Kụ ạJizos ạḅeni nyọdi mọ, “Ọphagharanaan ạna ạnighe ni. Ḍighi ghan ịphen phọ bịn ạmoogh ghuḍum!”

²⁹Oye phọ ạwa ni akeel, kụ apuru mọ, “Ạnhian kụ amatuman phọ ạmi?”

³⁰Kụ ạJizos ạḅeni ni nyọdi mọ, “Oniin oye ạḍua ni Jeruselem rạki Jeriko kụ ameel aḍigh rạghaagh ạruḅa, dị okuphogh nyọdi ọphanyiom rukpe, kụ ropogh ẹpughol ạmuum bịn ọwile ọḍuaghu.

³¹Esi amaazuan bịn oniin oyil ạrikia ạghi asoor aani oḅodo phọ, kụ rọmiin oye phọ bịn ạgbal ḍịeri phọ ạḍighaagh phọ aten.

³²Kụ oniin ọnyo aLivai dị raḍighi ghan oḍighi sịphe Otu Ịiḅereghi phọ aru asi aani esi phọ, kụ rọmiin oye phọ bịn ạgbal ḍịeri phọ ạḍighaagh phọ aten.

³³Kụ oniin ooruen ọlo aSameria dị rạki erelhe aru aazuanan oye phọ, kụ ạmoogh igbiririph,

³⁴kụ ạsighe elo rꞌamiim agbulogh riisi phọ, kụ rọghoroghi yogh kụ ạsighe oye phọ ạsaany ọman ẹnam ọdi ạghimom otu abuteneneen, kụ amiigh ookonom.

³⁵Rẹḅaal ḍịroor, kụ ạsighe ịyal ipoḍi asilva ạngo uwotu phọ kụ ạḅeni mọ, ‘Uukonomonaan oye phọ, kụ ikpoki lọ nạ ạḅile ạtuan nyọdi aliom, mị ratigheel kụ mị aḅulemian nyịna.’

³⁶“Sịphe ịraar awe phọ ạbuen ọghen kụ amatuman oye phọ ameel bọ aḍigh rạghaagh ạruḅa phọ?”

³⁷Kụ ọgbaam iilogh phọ mọ, “Ọpo ạmoogh bọ igbiririph esi oye phọ.” Kụ ạJizos ạḅeni nyọdi mọ, “Kịa aḍighi aani ghan ịduon phọ.”

³⁸Ịdipho ạJizos rꞌạbumatuan phọ oten bọ rọki, kụ bịdi oḍigh eniin ẹmha. Kụ oniin ạnir dị oghol mọ ạMata ạlogh nyọdi otu.

³⁹Kụ umarani ọdi dị oghol mọ aMeri ạrol ude pạ aruwol Ọmoogh-we phọ ạnaghanan ghan ọghaaph phọ ọdi.

⁴⁰Ooghiraan phọ ạphughan ni dị ạMata úlegheri mun ịlo oḍighi, kụ ọdi amite aru apuru Jịzos mọ, “Ọmoogh-we, ị́kigh ịyaar esi ạna mọ umarani phọ ạmi mụwilenaan ịmi oomo ooghiraan phọ? Ḅẹni ni mọ ọdi aru ụlhoghonaan ịmi ḍịghaagh.”

⁴¹Kụ Ọmoogh-we phọ ạḅeni nyọdi mọ, “Mạta, Mạta, ịbadi ạraraar kụ rẹeḅaghami ni ologhi ạna,

⁴²kụ eniin ịyaar bịn kụ iḍighi ephigh kụ aMeri mạzua ịyaar phọ ẹpe phọ nyọdi kọ́boor bọ.”