Read abua Luk 14 Bible Online

Luk 14 - abua bible

Luk 14

¹Eniin aḍio ophooghian, ạJizos ạghi ni olhe eḍien kꞌoniin uwo ẹmhu ọnyo aFarisi. Abuniin awe ugon ghan ni Jịzos.

²Oniin oye dị ạmoogh ẹzegh aḍiophoogh aru ạteeny Jịzos.

³Kụ ạJizos apuru bụgbaam iilogh phọ rꞌaFarisi phọ mọ, “Eḍighi ni ologh ayira ookonom ghan oye ḍio ophooghian phọ ḍụghum?”

⁴Kụ bịdi oḅoroghian bịn nam. Kụ ạJizos ạsighe oye phọ aakonom kụ ạḅeni mọ agheel,

⁵kụ apuru bịdi mọ, “Ọnyo anyina ạmoogh mọony, mụghumo ạnam, kụ asuma ghuḍia ḍio ophooghian phọ kạ́sighe egina amem apune ḍụghum?”

⁶Kụ bịdi útue ụpagharanaan nyọdi ịphen phọ.

⁷Mem dị ạJizos ạmiin dị awe phọ ạbuphe ọomaghagh bọ malhe phọ rọzua yogh igey ariisi kụ ọrol, kụ ọdi adogh ḍidogh phọ ạḍien ạḅeni bịdi mọ,

⁸“Mem lọ ọmagh nyịna olhe amalhe kꞌạrogo, kạ́tol ghan esi dị ẹnighe epu oomo phọ ịpheri phọ. Iini sịen ogbogh oye dị apu nyịna dị ọmagh aani kꞌạrogo phọ odi ni.

⁹Kụ oye phọ ọpo ịimaghagh bọ inyina katu ni ạḅeni nyịna mọ, ‘Ḅetenu ạngo esi phọ ạna oye phọ ọphon.’ Kụ mem mọ ọpo phọ, umughuloor kasiph ni nyịna kụ nạ ạḅile ạtol esi dị esoorom epu oomo phọ ịpheri phọ.

¹⁰Kpạripe ghụn, mem lọ ọmagh nyịna, tọl ghan esi lọ esoorom, pịdi oye phọ ạmagh bọ nyịna kụ aru ạḅeni nyịna mọ, ‘Ọyaghiri, tue ạrol egey esi.’ Ịduon kụ kẹngo nyịna eghuan ogbo ạbueri phọ awe phọ ọomaghagh bọ,

¹¹ịdi eḍighi bọ tọrobo oye lọ aphophe loor ọdi kosooromi ni, kụ oye lọ asooromi loor ọdi kopophe ni.”

¹²Kụ ạJizos ạḅeni nyọpo ạmagh bọ nyọdi mọ, “Mem lọ nạ kale malhe, kạ́amaghagh ghan rịghiri ạna, rꞌabumor ạna rꞌoomo asiya ạna, rꞌabumatuman ạna lọ oḍighi rạalha, ịdi eḍighi bọ bịdi kọtuugh ịdipho kụ ọmagh aani nyịna kꞌạbidi. Ịduon phọ, pọ bịdi moḍighi tọrobo ịyaar lọ nạ aḍighi ạngo bịdi oḅulemian aani nyịna.

¹³Mem lọ nạ kale malhe, gboogbologh ghan rukulom, rꞌạrukugha, rꞌạbuo ạraagha, rꞌạbuo ikpom ariḍien,

¹⁴pụruku kụ kọngo nyịna ọghor, ịdi eḍighi bọ bịdi kótue oḅulemian nyịna igoni phọ. Ẹnaan kụ kẹkpe nyịna mem dị abuḍighinom igey phọ oḅerenu esi aḍuugh phọ.”

¹⁵Oniin ọnyo ạbudi alhe aani eḍien phọ ạnaghan ni ịduon phọ kụ ạḅeni Jịzos mọ, “Ạḍiseph kẹtolonaan ni bụphe kọtologhu bọ ude ole eḍien phọ ẹpe ọmar phọ kꞌẸnaan.”

¹⁶ẠJizos ạḅeni ni nyọdi mọ, “Oniin oye ạrol li dị kale malhe, kụ ạḅeni yogh ịbadi awe.

¹⁷Tụtu kẹteeny bọ mem amalhe phọ, ọdi arom ni ẹbene ọdi mọ ạghi ạamaghagh we phọ dị mạḅeni yogh bọ mọ oru, mọ mookolobian ni oomo ạraraar phọ oseere.

¹⁸Kụ oomo phọ ạbidi oye ye ạmoogh ni ịyaar ọghaaph. Ọḅel phọ ạḅeni ẹbene phọ mọ, ‘Mị ako ozo dị mị rạwa ọghi ophogh. Seseeny, meera ni ạnaghanan ịyaar phọ eḍighi bọ kụ mị útu bọ.’

¹⁹Ọnon ạḅem mọ, ‘Mị ako ḍioph ạsinam dị mị rạwa ọghi ọmaki ophogh mọ ketue ni eḍighi oḍighi. Seseeny, meera ni ạnaghanan ịyaar phọ eḍighi bọ kụ mị útu bọ.’

²⁰Ọphori phọ mọ, ‘Pụruku mị aphin ạnir kụ mị kátue atu.’

²¹“Ẹbene phọ aḅula ạghi ạghaaph oomo phọ ịphen ạḅeni ọde-otu phọ ọdi. Ịghagh ni ologhi uwotu phọ, kụ ọdi ạḅeni ẹbene phọ ọdi mọ, ‘Nụun ạghi roḅodo rꞌạruuku asimarugh ẹmha phọ aagbologh rukulom, rꞌạrukugha, rꞌạbuo ikpom ariḍien, rꞌạbuo ạraagha.’

²²Onyebel aten kụ ẹbene phọ ạḅeni ọde-otu phọ mọ, ‘Mị maḍighi ni ịpe nạ urom bọ ịmi, kụ ariisi ọrologhu phọ esugha ni.’

²³Kụ ọde-otu phọ ạḅeni ẹbene phọ mọ, ‘Mite ẹpe areten phọ rꞌạruḅuzo phọ kụ ạkpaariom we lọ nạ ạmiin oru omuza otu phọ ạmi.

²⁴Mị rịḅeni ghan inyina mọ rꞌoniin ọnyo ạbuphe mị ạḅeni yogh bọ kạ́anema eḍien phọ ạmi.’”

²⁵Ịphen reten kụ aḍiboom aḍita awe ụdaph ni Jịzos, kụ ọdi akiton ạḅeni bịdi mọ,

²⁶“Oye lọ aru ụteeny ịmi kụ ụ́logh ḍien ọde rꞌonhiin ọdi, rꞌạnir ọdi, rꞌạnmuny ọdi, rꞌabumor ọdi rꞌabumarani ọdi, rꞌaloor phọ ọdi kẹn ni kátue aḍighi mạtuan phọ ạmi.

²⁷Oye lọ úmeeraam ḍuugh utool osuom arusu phọ ọdi ụdapham ịmi kátue aḍighi mạtuan phọ ạmi.

²⁸“Eru mạar dị oniin ọnyo anyina agbiighiom ọlogh ogbogh otu ẹedaneen, pọ ọdi ạphur ạrol ude agbiighi oomo ikpoki lọ kẹmanam ọloghom otu phọ kụ agbi omiigh.

²⁹Ịdipho kụ ílho, kụ ọdi aphighi kụ ọ́lhogh otu phọ ọman, oomo ạbulo kọmiin kọgilaam ghan ni nyọdi mọ,

³⁰‘Sịs, oye phọ ọphon amiigh ọlogh otu kụ órue ọman.’

³¹“Eḍighi mạar dị ọdaam ẹmha ạatughian ọpham 10,000 awe ọghi eenom ọdaam ẹmha dị ạmoogh 20,000, ọdi kạpur ạtol ude agbiighi mụghumo ọdi katue ni ạmoogh ịikpo ọghi ọdaluan rꞌọdaam ẹmha phọ ọpo.

³²Ọdi aphogh mọ ọno kátue, pọ kaḅonom atom rụukpaany ẹphomoghian ạkiomonaan nyọori phọ ọolha phọ.

³³Ịduon kẹn kụ ẹdi tọrobo ọnyo anyina lọ úkel oomo ạraraar ọdi kátue aḍighi mạtuan ạmi.”

³⁴“Aboph ạnighe ni, kụ eḍighi mạar dị eroph phọ ọdi mephe, kọḅile otophomiom eeghe?

³⁵Aboph phọ ọ́kpe mun ọrol ịsiphe ade phọ, ḅịle kẹn mꞌọsighe ookonomom ịizupha. Kozu ni bịn otoph. Oye lọ ạmoogh rụru ọnaghanam ạḍughum, ạnaghan!”