Read abua Luk 15 Bible Online

Luk 15 - abua bible

Luk 15

¹Eniin aḍio, ịbadi ạbubonyiom iisogh rꞌabuḍighinom ịkaraph uru ni ịlo ọnaghanan ạJizos.

²Kụ aFarisi phọ rꞌạbutughemia iilogh phọ omiigh ogumogh mọ, “Tạa, oye phọ ọphon rạloghoma ghan buḍighinom ịkaraph kalian ghan eḍien rꞌạbidi.”

³Kụ ạJizos adogh ḍidogh phọ ạḍien ạḅeni bịdi mọ:

⁴“Eru mạar dị oniin ọnyo anyina ạmoogh okuron iyool-ịga kụ oniin aphe, ọdi kaḍighi ika? Ọdi kạbile esughadi rꞌesugha phọ ẹpe ẹdala phọ, ạki ạwa nyọpo aphe bọ tụtu ọdi ạmiin.

⁵Ọdi rọmiin, kụ anyora ọpha ọdi rꞌọḅaal ologhi.

⁶Kụ rorigheel ologhi otu kụ ạamaghagh rịghiri ramatuman ọdi, kụ ạḅeni mọ, ‘Mị mạmiin oyool-ọga ạmi dị aphe. Itu ọmoogh iboh.’”

⁷Kụ ạJizos ạghaaph ạloghom mọ, “Mị rịḅeni ghan inyina mọ ịduon kẹn kụ ẹdi kokol oniin ọkaraph oye lọ akiton esi ịkaraph phọ ọdi oboh iboh ẹpe kꞌạke opu ịlo esughadi rꞌesugha awe aruukuan dị rogbi ghan mọ ạbuno úḍighi ịkaraph oghol kụ okiton.”

⁸“Ḅịle kẹn, ạnir lọ ạmoogh ḍioph ipoḍi asilva kụ oniin aphe kaḍighi ika? Ọdi kạsu ọtozi, aḅeer, ạmaar azuumaam aaphoghogh oomo ạrughulukul otu phọ tụtu ọdi ạmiin.

⁹Kụ ạmiin, kạamaghagh ni rịghiri rꞌamatuman ọdi kụ ạḅeni mọ, ‘Mị mạmiin opoḍi asilva ạmi dị aphe. Itu ọmoogh iboh.’”

¹⁰Kụ ạJizos ạghaaph ạloghom mọ, “Mị rịḅeni ghan inyina mọ ịduon kẹn kụ ẹdi ạruukpaany phọ Ẹnaan kekol ẹmhu oniin ọkaraph oye lọ akiton esi ịkaraph phọ ọdi ẹmoogh iboh.”

¹¹ẠJizos ạḅem mọ, “Oniin oye ạmar ri ịyal ạnmuny,

¹²kụ rọmanam, bịn esoony phọ ạmagh ọde phọ ọdi mọ, ‘Ọde ạmi, di bin erua mụo ạmi ụngo.’ Kụ ọde phọ adiemi nmụny phọ erua phọ ọdi imoom.

¹³Íbia bịn esoony phọ aalhaghi oomo ạraraar phọ ọdi, kụ ạghi eelhe dị ẹkel, kụ aliom ikpoki phọ ọdi uruur.

¹⁴Kụ roliom rọmadan, kụ ilhom ịgbakuro esoor ẹmha phọ, kụ ọdi amiigh ọrol ọkoony.

¹⁵Kụ ạghi oḍighinaan oḍighi oniin ọlo ẹmha phọ ẹpe, dị ạlogh nyọdi ọghi ghan ozo ookonom arophoropo.

¹⁶Ọdi ạnya ghan ni ọsighe ịiya phọ arophoropo phọ rele ghan bọ omuzeḍian ọkuruḅaka, kụ rꞌoye ọ́ngo nyọdi ịyaar ole.

¹⁷Mem dị ọdi malhoghoma loor ọdi kụ ạḅem mọ, ‘Ọde ạmi ạmoogh ni ịbadi iphireneen awe dị rạperemi ghan eḍien, kụ mị odi bọ ẹphen ramugh ọkoony.

¹⁸Mị kaḅetenu ni ạki ạteeny ọde phọ ạmi ạḅeni mọ, “Ọde ạmi, mị maḍighi ni ịkaraph ghisigh Ẹnaan rꞌaghisigh ạna.

¹⁹Mị ụ́kpianaan mun oghol mọ ọony ạna. Ụsighe ghụn ịmi aḍighi aani oniin ophirineen oye kꞌạna.”’

²⁰Kụ ọdi aḅetenu ạghi ọteeny ọde phọ ọdi. “Kụ ọdi odi ni kꞌegher, kụ ọde phọ ọdi ạmiin nyọdi, kụ ạmoogh igbiririph esi ọdi, kụ aghiil ạghi aghurughi nyọdi, kụ ạkpun okpo ọdi.

²¹Kụ ọony phọ ạḅeni nyọdi mọ, ‘Ọde ạmi, mị maḍighi ni ịkaraph ghisigh Ẹnaan rꞌaghisigh ạna. Mị ụ́kpianaan mun dị nạ kakol mọ ọony ạna.’

²²Kụ ọde phọ ọdi ạmagh rẹbene ọdi ạḅeni mọ, ‘Ịnuun ẹghi ẹsighe ạsuoma dị ạnighe ẹkpologhi nyọdi, ẹlhogh gulu ghụnugh ọdi, ẹlhogh rokoro rạda ọdi,

²³ẹsighe oophoony ọony ạnam mọ eghiigh, oliom eḍien oboom iboh,

²⁴ịdi eḍighi bọ ọony phọ ạmi ọphon amugh ni kụ mạḅile atigheel, aphe ni kụ mamite.’ Kụ bịdi omiigh olhe ẹyaal.

²⁵“Mem mọ ạmuen phọ ọkpana ọony phọ ạrol ozo. Kụ mem dị ọdi ạḍua ratigheel, kụ rọobeeph sịphe otu phọ kụ ạnaghan iitia rꞌạḍigum ịḅa.

²⁶Kụ ọdi ạmagh oniin ọony-otu apuru mọ, ‘Eeghe kụ imite sịen?’

²⁷Kụ ọdi mọ, ‘Umor phọ ạna marigheel, kụ ọde phọ ạna akiigh oophoony ọony ạnam mọ, loor esi dị ọony phọ ọdi ạkologha ni atigheel rꞌomoon aloor.’

²⁸“Kụ iphin ni ologhi ọkpana ọony phọ iboom dị úmeera uḍigh otu. Kụ ọde phọ ọdi amite ạaḅereghian nyọdi mọ aru aḍigh otu.

²⁹Kụ ọdi ạphagharanaan ọde phọ ọdi mọ, ‘Mịin, mị makumu ni nyịna ịbadi ạsia phọ ịphen, kụ amem lọ mị mapel ghan ọnhu ạna kẹ̋rol. Nạ mụngo ghan ịmi eeghe? Rꞌọga kẹn ni bịn, nạ ịmi kụ̋ngo ghan mọ ạrighiri ạmi rꞌạmi oghiigh olhiom ẹyaal.

³⁰Kụ ọony phọ ạna ọphon phọ aphiemi bọ oomo ạraraar phọ ạna loor abulhiom ẹmha ạnmariir, kụ ọdi rorigheel kụ nạ maghiighaan oophoony ọony ạnam mọ.’

³¹Kụ ọde phọ mọ, ‘Mọony ạmi, oomo amem mọ nạ odi ghan sịen ologhi otu. Oomo ạraraar phọ mị ạmoogh bọ ịlo ạna ni.

³²Kụ ẹkpe ni dị yira kole ẹyaal ọmoogh ọḅaal ologhi, ịdi eḍighi bọ umor phọ ạna amugh ni kụ mạḅile atigheel, aphe ni kụ mamite.’”