Read abua Luk 16 Bible Online

Luk 16 - abua bible

Luk 16

¹ẠJizos ạḅile ni ạḅeni bụmatuan phọ ọdi mọ, “Oniin ọolha ạrol li dị ạsighe oniin oye mọ aphoghonaan ghan nyịno oḍighi ọno, kụ ọphenekpe ạteeny ọolha phọ mọ oye phọ ọpo rapiemi ni ephua phọ ọdi.

²Kụ ọdi ạmagh oye phọ apuru mọ, ‘Ịphen mị ạnaghan bọ ịlo ạna, imite ika? Mạar agbiighi ẹphamam mọ nạ ạpham bọ ephua phọ ạmi ụngo ịmi, ịdi eḍighi bọ nạ kápogh mun rạraar phọ ạmi.’

³Kụ opoghom mọ ạḅemom ologhi mọ, ‘Ọde-otu phọ ạmi rạwa ghan ophorogh ạmi sịen oḍighi phọ. Mịna kaḍighi bọ ika? Mị ụ́moogh ịnyaam arukumuan ạḍighaagh, kụ umugholoor kẹn kusiph ni ịmi ọlom ghan kụ ole.

⁴Mị malhegheri nyịidipho ịdi mị kaḍighi kụ ghạlamo ọde-otu phọ ạmi umitiom ni ịmi oḍighi phọ, ạrighiri ạmi kụ ụsighe ni ịmi osiemi otu.’

⁵“Kụ ọdi ạamaghagh oomo awe dị oleeghi ịimugh ọde-otu phọ ọdi, oye ye amem amem, kụ apuru ọḅel phọ mọ, ‘Ọmugh ọde-otu phọ ạmi nạ alhe bọ ạman ika?’

⁶Kụ ọdi mọ, ‘Oniin okuron ạkpaturu ạmunum,’ kụ opoghom mọ ạḅeni oye phọ mọ, ‘Tiin ḍịnya phọ ạna, nụun ạrol ude ạge ooghdi bịn.’

⁷Kụ ọdi apuru ọdi atum pạ mọ, ‘Ọlo ạna ạman ika?’ Kụ oye phọ mọ, ‘oniin ọonir ạkpuru ịbiakpa.’ Kụ ọdi ạḅeni nyọdi mọ, ‘Tiin ḍịnya phọ ạna ạge ọphaanya okuron bịn.’

⁸“Ọde-otu phọ aboom ni opoghom ephua phọ ọdi esi ikem iigbegheḍiom mọ dị ạmaar bọ, loor esi dị aweye aḅirini phọ ọphon ọsu iloghi ọphamam aloor ạbidi opu weye phọ ạbuphe oḍighi bọ bụo ẹphalaḅaal.”

⁹Kụ ạJizos ạghaaph ạloghom mọ, “Ịduon kụ iḍighi kụ mị rịḅeni inyina mọ ịsighe ghan ẹkaraph ephua aḅirini phọ kụ eḍighinom rịghiri, pịdi mem lọ ẹelha phọ emuneen bịdi ịsighe inyina osiemi marugh kꞌạke.

¹⁰Oye dị ạmaar ri ạpham ịbam ạraraar kạmaar ri ạpam igbogh ạraraar. Oye dị raagbegheḍiom ghan iigbegheḍiom esi ịbam ạraraar kaagbegheḍiom kẹn ni esi igbogh ạraraar.

¹¹Kụ eḍighi mạar dị nyina ị́maar ịpam ẹelha ịsien aḅirini phọ, pọ keḍighi bọ ika kụ iḍuom inyina ologhi esi ọkaraghi ẹelha phọ kꞌạke?

¹²Eḍighi mạar dị nyina ímeera ịpamanaan ịlo ạbunon, keḍighi bọ ika nụun kụ nyina ẹmoogh ịpe eru bọ ọkaraghi ịlo anyina?

¹³“Oye ólho dị katue ạdaph ịyal ạburude-otu. Ọdi kạlogh ni nyoniin ḍien, ạpomoghian nyọori phọ. Ọdi kạpamanam ni nyoniin, akel nyọori phọ. Nyina kétue ẹḅar Ẹnaan rꞌikpoki kụ ẹdaph.”

¹⁴AFarisi phọ ọnaghan bọ oomo phọ ịphen phọ ụgilaam ni Jịzos, ịdi eḍighi bọ bịdi ọpomoghian ikpoki.

¹⁵Kụ ọdi ạḅeni bịdi mọ, “Nyina phọ epu ẹsighe loor anyina mụdi nyina ẹnighe ni riḍien ạbuphe rịmiin bọ inyina, kụ ạri Ẹnaan elegheri ni iloghi phọ anyina. Ịyaar dị awe ọmanami mạar iboom rẹ́man ghan mạar ghisigh Ẹnaan.

¹⁶“Iilogh phọ aMozis rꞌịpe ariil Ẹnaan phọ ọge bọ ịrol li ẹteeny ọrugh phọ ạJon oburogh mụum mọ. Egbi kꞌamem mọ ọpo, rọkaaph ghan ni ooḅi ọghaaph ọmar phọ kꞌẸnaan, kụ tọrobo oye rabianaan ni kaḍigh aani.

¹⁷Edugh ghụn ni epu dị ạke phọ rꞌade phọ kephe, kpạripe ghụn dị kopiemi rꞌeniin ekpo ịpe ọge bọ sịphe iilogh phọ aMozis.

¹⁸“Tọrobo oye lọ aseere ạnir ọdi kụ aphin ọnon, pọ malhe ẹmha, kụ oye lọ aphin ạnir lọ oseere, pọ alhe aani ni ẹmha.”

¹⁹“Oniin ọolha ạrol li dị aanmenan ghan oodor rꞌọmur dị ẹman ni ikpoki, kụ aḍio etum ḍio alhe ghan ni ẹyaal.

²⁰Oniin ọlom-le dị oghol mọ ạLazaros dị ạroko eḍighi yogh, ạmina ghan ni eḍighom ogiga ọolha phọ,

²¹akori ghan rꞌịsaraghi phọ ọdi alhe bọ asugheeny olhe aani omuzeḍian ọkuruḅaka. Asuogh phọ kẹn iru ghan ni ẹlaay yogh rọko phọ ọdi.

²²“Kụ ọlom-le phọ romugh, bịn ạruukpaany phọ Ẹnaan erorori nyọdi ẹghiom mọ alhe ẹyaal ḍịghaagh elhiom Ebraham. Ọdaam phọ romugh aani, bịn oḍi.

²³Kụ ẹpe ooni ạnian phọ ịminimiin ịphughan ni, kụ aphoophe ghisigh ọdi ạmiin Ebraham ạga dị ẹkel, rꞌạLazaros dị odi ḍịghaagh elhiom ọdi.

²⁴Kụ ọolha phọ ạlooghi ạmagh mọ, ‘Ebraham, nạ ọde. Ụnma ịmi ighirigiir arom Lạzaros, mọ ạsighe izon ạghunugh ọdi ạtophori mụum, aru ạḅoromiom nem ạmi, esi dị mị rạmiinom sịen ạnian phọ.’

²⁵“Ebraham ạḅeni ni ọolha phọ mọ, ‘Mọony phọ, tụutughian mọ ạdol ạna ịnighe ni mem mọ nạ kőmugh bọ, ạdol ạLazaros kụ eeph mem mọ ạrol bọ, kụ ẹphen ọdi odi dọl igey kụ nạ odi dọl ịminimiin.

²⁶Epel ịphen phọ kẹn, eboom eḍiiny isophoghom ni iyoor dị bụlo ọwa ni ọḅeeny ạḍighaagh phọ ạḍiphe kótue, kọ́ḍua kẹn ẹpe anyina oten ẹphen.’

²⁷Ọdaam phọ ạḅeni Ebraham mọ, ‘Seseeny, ọde. Tom mọ ọdi ạghi ẹpe kꞌọde ạmi

²⁸ạphur rụru oogh abumor ạmi, ọbo bịdi kotelhe aani ghan bọ nyẹen ạdol ịminimiin phọ.’

²⁹“Kụ Ebraham ạḅeni nyọdi mọ, ‘Ẹkpe ni dị bịdi kọnaghanan ịgeeghi phọ aMozis rꞌariil phọ edianaan bọ bịdi.’

³⁰Ọdaam phọ ạḅem mọ, ‘Eeye, Ebraham nạ ọde. Oye ạḍua ọmar iḍim kụ ạghi aroma bịdi pọ konme ni eḍighinom ịyaar phọ ạbidi.’

³¹Ebraham ạḅeni nyọdi mọ, ‘Lọ bịdi ụ́naghanan ịpe aMozis rꞌariil phọ ọge bọ, pọ kómeeraam ghạlamo oye kụ aḅetenu ni esi aḍuugh.’”