Read abua Luk 17 Bible Online

Luk 17 - abua bible

Luk 17

¹Kụ ạJizos ạḅeni bụmatuan phọ ọdi mọ, “Ạraraar dị reḍighi ghan mọ awe omeleghu oḍighanaan ọdegh ophogh kẹtol li, kụ pọ eeghe ọdo ịminimiin dị kẹtolonaan oye phọ ọpo ịphen phọ kẹtuan bọ esoor!

²Ẹkpe ghụn ni ọsighe ịluma ọghoroghiom orum ọdi osumeeny ọphiiny oghiigh epu dị ọdi kaakeleghi nyoniin sịphe ịbam ạnmuny phọ ạbuen mọ aḍighi ịkaraph.

³Igona ni loor anyina. “Umor ạna aḍighi ịkaraph, ḅạam ni nyọdi. Kụ ọdi akiton, sạr ri ạwilenaan nyọdi.

⁴Mọ ọdi aḍighi nyịna ịkaraph oḍual amem ẹmhu aḍio, kụ aru ghan kụ ạḅeni nyịna mọ, ‘Mị makiton,’ pọ sạr ghan ni ạwilenaan nyọdi.”

⁵Kụ abutelhedom mọ ọḅeni Ọmoogh-we phọ mọ, “Bụghe omeeraam mọ ayoor.”

⁶Kụ Ọmoogh-we phọ mọ, “Lọ nyina ẹmoogh ni omeeraam dị aghom ịdipho ekpo ạmustad, kụ ẹḅeni sịkamin-oreeny phọ ọphon mọ, ‘Tuphuronu sịen asuma ọphiiny kụ ạḅile ạmeera,’ pọ kịnaghanan ni inyina.”

⁷“Oniin ọnyo anyina ạmoogh ẹbene dị rabul ghan esi iḅeph mụghumo rapogh ghan iyool-ịga, mem dị ọdi ạḍua ozo phọ arigheel, nạ rạḅeni ghan nyọdi mọ, ‘Gboogborion ạrol ude alhe eḍien,’ ḍụghum?

⁸Kị́dipho. Kpạripe ghụn ni, nạ rạḅeni ghan nyọdi mọ, ‘Nụun ạsa eḍien phọ ạmi, ạkparamian ukpe ạna, aru ạḅam eḍien phọ, ạmeera ukori ịmi tụtu mị malhe ạpughol, kụ agbi olhe ẹpe ạna.’

⁹Ẹkpe ni ọseph ẹbene dị mạnaghanan ịpe ọḅeni bọ nyọdi ḍụghum?

¹⁰Ịduon kẹn kụ ẹdi idianaan ni inyina. Mem dị nyina meḍighi oomo phọ ịpe ịḅeni bọ inyina oḍighi phọ, ịḅem ghan mọ, ‘Yoor ạrebene dị ịyaar ụ́man. Yoor moḍighi ịpe isi bọ iyoor bịn.’”

¹¹ẠJizos anyeene rạki Jeruselem, kụ ạghi asi ọku aSameria rꞌaGalili.

¹²Ạḍua rạki oḍigh eniin ẹbam ẹmha, kụ ḍioph awe dị ẹzegh ọku ufe eḍighi yogh ọmiin nyọdi. Kụ ụrol li kꞌegher

¹³ọlo mọ, “Jịzos, Ọtughemia, ụnma iyoor ighirigiir.”

¹⁴Kụ ạJizos ạmiin bịdi kụ ạḅeni mọ, “Ịki eḍeenaan loor anyina bụpinyon rịkia phọ.” Kụ bịdi omoonogh ẹpe eten phọ.

¹⁵Kụ mem dị oniin ọnyo ạbidi ạmiin bọ mọ ọno maḍum mọ, aḅula ni aboom Ẹnaan rꞌeboom ẹḍogh,

¹⁶kụ aḅololo ude ruwol ạJizos ạseph ghan nyọdi. Oye phọ ọlo aSameria.

¹⁷Kụ ạJizos ạḅem mọ, “Mị aakonom bọ ḍioph awe, bụeri phọ esugha phọ odi ẹghen?

¹⁸Uḍighi ika kụ oniin ooruen phọ ọphon bịn kụ aḅula bọ raboom ghan Ẹnaan?”

¹⁹Kụ ạJizos ạḅeni oye phọ mọ, “Ḅetenu agheel. Omeeraam mọ ạna maakonom nyịna.”

²⁰Eniin aḍio buniin aFarisi phọ upuru ni Jịzos mem mọ ọmar phọ kꞌẸnaan katu bọ. Kụ ọdi ạphagharanaan mọ, “Ọmar phọ kꞌẸnaan kátu erumom dị kọmiin ekpeḍien.

²¹Kọ́ḅem mọ, ‘Pọono sịen,’ mụghumo, ‘Pọrono ẹpe,’ ịdi eḍighi bọ ọmar phọ kꞌẸnaan odi ni sịen ogbo phọ anyina.”

²²Kụ ạJizos ạḅeni bụmatuan phọ mọ, “Amem ketu ni dị nyina kẹwa ni ịlo ọmiin rꞌaḍiniin aḍio sịphe asiḍughul-otu phọ Ọony phọ Oye kamite bọ egaan phọ, kụ nyina kẹ́miin.

²³Awe dị kọḅem ghan mọ, ‘Ipogh ẹphen,’ ḅịle mọ, ‘Ipogh ẹpe,’ kọtol li. Kụ kẹ́ki ẹdaph bịdi.

²⁴Ịdipho aḍio phọ rẹmephian ghan bọ kegborori ẹḅeeny okuaḍio phọ kụ ịdi kẹtol ḍio phọ ạḍiphe Ọony phọ Oye katu bọ.

²⁵Kụ tụtu rẹteeny mem mọ ọpo, ọdi kạmiinom ni iboom, kụ awe oghiil phọ ọphon kokel li nyọdi.

²⁶Kụ ịdipho ẹrol bọ mem mọ aNoa kụ ịdi kẹtol mem mọ Ọony phọ Oye katu bọ.

²⁷Awe ule ghan ni eḍien ọphughologh, alephiri ạnmuny rꞌạnmariir ạalan yogh ghan ni ilom, tụtu ẹteeny bọ ọkaraghi aḍio phọ aNoa aḍigh bọ oghuugh phọ, kụ ạmuum-aḍigho phọ aru bọ aphiemi oomo phọ ạbidi.

²⁸Ḅịle kẹn, kẹtol li ịdipho amem mọ ạLot. Awe ulheeghi ghan ni malhe ọphughologh, omuulogh siḍighi, oḅeph ghan iizo, ọloghoḍi ruutu.

²⁹Kụ ḍio phọ ạḍiphe ạLot amite bọ Sọdom ạḍua, ạnian rꞌạsolfa iimor ri kꞌạke esoor ude elhe oomo phọ ạbidi ephiemi.

³⁰Kẹtol ịduon ḍio phọ Ọony phọ Oye kamite bọ egaan phọ.

³¹“Oye lọ odi ạnyu otu ḍio phọ ạḍiphe kúsoor ookoroghian aruphua ọdi. Ḅịle kẹn, oye lọ odi ozo kúḅula ologhi otu.

³²Ịitughian ghan ạnir phọ ạLot.

³³Oye lọ ạwa ọphel aghuḍum ọdi kapiemi ni, kụ oye lọ aphiemi ghuḍum mọ ọdi kạpel li.

³⁴Mị rịḅeni ghan inyina mọ, ḍughul aḍio phọ ạḍiphe, ịyal awe lọ ọmina esi kọsighe ni nyoniin, ọbile nyọori phọ.

³⁵Ịyal ạnmariir lọ odi rọgbe ghan ịbiakpa kọsighe ni nyoniin, ọbile nyọori phọ. [

³⁶Ịyal awe lọ odi oniin ozo roḍighi oḍighi kọsighe ni nyoniin, ọbile nyọori phọ.]”

³⁷Kụ ạbumatuan phọ opuru nyọdi mọ, “Ọmoogh-we, ẹghen nụun?” Kụ ạJizos mọ, “Tọrobo ekpisi lọ ịḅoria aruzu edi kụ ẹdi ạredelhe resoor ghan keekpomoghan.”