Read abua Luk 19 Bible Online

Luk 19 - abua bible

Luk 19

¹ẠJizos ạḅeeny ẹmha aJeriko raten,

²kụ oniin oye ạrol li ẹpe phọ dị oghol mọ ạZakios. Ọdi kụ uwo ẹmhu ạbuphe rọbonyi ghan bọ iisogh phọ, kụ ọolha kẹn ni.

³ẠZakios ạwa ni ọmiin ạJizos, kụ aḍikper phọ ọdi ímeera rꞌaḍita awe phọ.

⁴Kụ aghiil aḍia ghisigh ạsiiny ạnyu oreeny dị oghol mọ ạsikamor. Ọdi alegheri ni mọ ạJizos katen ni sịphe.

⁵Kụ ạJizos aru asi sịphe phọ kụ aphogh ạnyu, kụ ạḅeni nyọdi mọ, “Zạkios, gboogborion asoor! Mị kạtol kꞌạna rodon.”

⁶Kụ ọdi aagborion asoor, kụ ạpham Jịzos rꞌọḅaal ologhi asiom otu.

⁷Kụ awe phọ ọmiin bọ ugum ni mọ ọdi mạghi iiruen kꞌoḍighinom ịkaraph.

⁸Kụ ạZakios ạmeera kụ ạḅeni Ọmoogh-we phọ mọ, “Oye phọ, mịin aani. Mị kadi ẹelha phọ ạmi ịyal abin, kụ mị ạsighe muniin abin ạngo rukulom, kụ eḍighi ịyaar dị mị malhe ghan oye ipeel, mị kạloghonaan ni ọḅar inya amem.”

⁹Kụ ạJizos ạḅeni nyọdi mọ, “Rodon phọ, ạpeleeny mạteeny aani otu phọ ọphon. Oye phọ ọphon ọnyo ẹemara Ebraham kẹn ni,

¹⁰ịdi eḍighi bọ Ọony phọ Oye aru ọwa ạbuphe mophe bọ rꞌọphelom ạbidi otene.”

¹¹Kụ ạJizos adoghonaan ḍidogh phọ ạḍien we phọ ạbuphe ọnaghan bọ ịphen phọ dị ạghaaph bọ. Ọdi mạkaraghi rasi Jeruselem, kụ bịdi ugbiom ghan mọ ịduon sịen ọmar phọ kꞌẸnaan rạwa ni ọnuun oru.

¹²Loor ịduon phọ, ọdi ạḅem ni mọ, “Oye egbogh eghun ạḍua ni ạghi eelhe dị ẹkel iboom ịlo ozua eghoony ọdaam ẹmha.

¹³Tụtu ọdi kạki bọ, ọdi ạmagh ni ḍioph ạrebene phọ ọdi aakpomoghi, kụ ạngo ghan tọrobo ọnyo ạbidi oniin oniin okpoki-agol kụ ạḅeni bịdi mọ, ‘Ịsighe ikpoki phọ ịphen emuulom ghan ḍighi tụtu mị arigheel.’

¹⁴Kụ aweye ẹmha phọ ọdi ụlogh ni nyọdi ḍien kụ orom dom ọghi ọḅem mọ, ‘Yoor úmeera mọ oye phọ ọphon ạda ẹmha phọ ayoor.’

¹⁵“Kụ uzu ni eghoony ọdaam ẹmha phọ ogbogh oye phọ ọphon phọ kụ agbi oḅula. Oru osi phọ bịn ạtooghi mọ oomo ạrebene phọ ọno ạngo bọ ikpoki phọ oru ọteeny nyịno ogbiighi sụo lọ bịdi mọmooghom ikpoki phọ.

¹⁶Ọḅel phọ amite ạḅeni nyọdi mọ, ‘Oye phọ, ọḅaram rꞌọpo nạ ụngo bọ ịmi, mị ạmoogh bọ ḍioph ipoḍi.’

¹⁷Kụ ọdi mọ, ‘Maḍighi. Nạ ogey ẹbene. Ịduon nạ arue bọ ni ạphamaghan mọony phọ ịphen, nạ kapogh ḍioph ạrama.’

¹⁸Ẹbene phọ ọpo amuneniom bọ ịyal phọ aru ạḅeni nyọdi mọ, ‘Oye phọ, ọḅaram rꞌọpo nạ ụngo bọ ịmi, mị ạmoogh bọ oogh ipoḍi.’

¹⁹Ọdi ạḅeni nyọon mọ, ‘Nạ kapogh oogh ạrama.’

²⁰“Kụ ọnon aru ạḅeni nyọdi mọ, ‘Oye phọ, pọono opoḍi ạna. Mị ụkagham ni ạpookisi bịn aseere.

²¹Mị ughiilaan ni nyịna ịdi eḍighi bọ nạ ạkpar ri ẹzo. Ịlo ítu ịlo ạna, nạ rạsighiogh ni. Ịlo nạ úḅeph, nạ rabugha ni.’

²²Kụ ọdi mọ, ‘Nạ ọkaraph ẹbene, mị kạsighe ḍụghum ọnhu phọ ạna kụ asophom aphume nyịna. Nạ ulegheri ni mọ mị ạkpar ri ẹzo dị rạsighiogh ghan ịlo ítu ịlo ạmi, ạḅile rabugha ghan ịlo mị úḅeph.

²³Mọ nạ ụsighe ghụn ni ikpoki phọ ạmi ạlogh bạnk, ọbo mị mạmoogh ọḅar sịen mị arigheel bọ.’

²⁴“Kụ ọdi ạḅeni bụphe ọmeregha bọ okoom mọ, ‘Ịboor opoḍi agol phọ nyọdi ẹngo nyọpo ạmoogh bọ ḍioph phọ.’

²⁵Kụ bịdi ọḅeni nyọdi mọ, ‘Sịs, oye phọ, ọdi ạmoogh bọ ḍioph ipoḍi.’

²⁶Kụ ọdi mọ, ‘Mị rịḅeni ghan inyina mọ nyọpo ạmoogh bọ Ẹnaan kẹloghonaan ni ọḅar, kụ ọpo ụ́moogh bọ ghạlamo rꞌịyal-ikpo ịlo ạmoogh aani Ẹnaan kẹbonyi ni.

²⁷Kụ ịsighe oomo phọ ạbuphe ụlogh bọ ịmi ḍien phọ kụ úmeera bọ mọ ạmi uḍighi ọdaam ẹmha ạbuno phọ eru ẹze sịen ghisigh ạmi.’”

²⁸ẠJizos rọghaaph bọ ịduon phọ kụ anyeene ọghi aJeruselem.

²⁹Kụ roru bọ rotuman Betfagi rꞌaBetani, sịphe Eegum Ọlivs phọ, kụ arom ịyal ạbumatuan ọdi

³⁰mọ, “Ịki ẹmha phọ ẹpe nyina rẹmiin bọ. Nyina esi, nyina kẹmiin ni ẹnam dị ọkpooghi, dị oye kőḍigh ghan. Ịkatan ẹsighe iruom sịen.

³¹Kụ oye lọ ipuru inyina mọ, ‘Ịdipho nyina reḍighi ghan ika?’ ịḅeni mọ Ọmoogh-we phọ ạmoogh ni ịyaar oḍighinom ọdi.”

³²Kụ bụphe orom bọ ọghi bọ osi, ụmiin ni oomo ịdipho ọdi ạḅeni bọ bịdi.

³³Bịdi odi rọkatan ghan kụ bụphe ọmoogh bọ ạsu phọ upuru ni bịdi mọ, “Iḍighi ika kụ nyina rẹkatan bọ ẹnam mọ?”

³⁴Kụ ạbumatuan phọ ọphagharanaan mọ, “Ọmoogh-we phọ ạmoogh ni ịyaar oḍighinom ọdi.”

³⁵Kụ bịdi ọsighe ẹnam mọ oruom Jịzos, kụ ọkporonaan rụsuoma ạbidi ozuughiom ọman ẹnam mọ, kụ ọloghonaan nyọdi ḍịghaagh aḍigh.

³⁶Ịdipho ọdi aghiilom bọ rạki, awe phọ ụsighe ghan ni rụsuoma ạbidi ọdeeghi oḅodo phọ.

³⁷Ịduon ọdi rasoor bọ ḍịeri phọ ạḍighaagh Eegum Ọlivs kạabeeph Jeruselem, kụ aḍita ạbumatuan phọ ọdi omiigh ọseph roboom ghan Ẹnaan rꞌeboom ẹḍogh esi oomo iboom ịiḍaany phọ ịpe bịdi mọmiin bọ,

³⁸mọ, “Ẹnaan ẹseph ni ọdaam ẹmha phọ aghol bọ ḍien Ọmoogh-we phọ kụ aru. Ẹepho rꞌeghuan ẹrolonaan Ẹnaan, ẹpe ạnyu phọ!”

³⁹Kụ buniin aFarisi phọ ọrol sịphe aḍita awe phọ ọḅeni Jịzos mọ, “Ọtughemia, tọ ạngo bụmatuan phọ ạna mọ oḅoroghian.”

⁴⁰Kụ ạJizos mọ, “Mị rịḅeni ghan inyina mọ bịdi oḅoroghian, pọ asighiigh phọ ịphen ghụn ni kụ kẹlooghi.”

⁴¹ẠJizos ạtol rapogh kụ rọmiin ẹmha phọ kụ amoghinaan

⁴²ạḅem mọ, “Ḅẹm loon mọ rodon nyina ilegheri ni sịphe ẹepho phọ anyina edi bọ, kụ ạri nyịidipho mạaghinaan inyina,

⁴³ịdi eḍighi bọ ariiḍio ketu ni dị ạbumulogh-ḍien anyina kọḅiir iikpe ikoom inyina ọlogh ogbo.

⁴⁴Kopiemi ni ẹmha phọ rꞌoomo awe phọ ạbuphe odi bọ rokool phọ ọmadan. Rꞌaḍiniin aḍighiigh ạnyu ạḍinon kọbile dị kőlhereghi, ịdi eḍighi bọ nyina ị́logh elegh mem mọ ọpo Ẹnaan eru bọ ọphel anyina.”

⁴⁵ẠJizos aḍigh bọ sịphe Otu Ịiḅereghi phọ amiigh ni ophorogh ạbuphe romuul bọ ḍighi phọ

⁴⁶kụ ạḅeni bịdi mọ, “Ọge ni sịphe Ạḍinya Iigbia phọ mọ Ẹnaan ẹḅem mọ, ‘Otu phọ ạmi kokol mọ Otu Ịiḅereghi.’ Kụ nyina mẹḅile ekiton eḍighi otu ạruḅa.”

⁴⁷ẠJizos ạtughemi ghan ni sịphe Otu Ịiḅereghi phọ ḍio etum ḍio. Ạbuo ạrumhu ariil ạrikia phọ, rꞌạbutughemia iilogh phọ rꞌikpolom awe phọ ụwa ghan ni oghiigh ọdi,

⁴⁸kụ ịlo oḍighi úlegheri, ịdi eḍighi bọ oomo awe uzuumaam ni ọnaghanan ghan ịpe ọdi rạkaaph bọ.