Read abua Luk 2 Bible Online

Luk 2 - abua bible

Luk 2

¹Ịphen phọ eten bọ íbia bịn aSiza Ọgostos ạlogh ologh mọ oomo awe areelhe phọ ịpe ọno ạda bọ ọghi ọgeeghian siḍien ạbidi ịlo okori ogbi awe.

²Ọḅel ogbi awe phọ ọphon amite mem mọ aKuirinios ạda bọ eelhe phọ ạSiria.

³Ụtuan ịduon phọ kụ ọdaam ọdi agheel ẹmha ọdi.

⁴Kụ ạJosef ạḍua Nạzeret ẹpe eelhe aGalili agheel Bẹtilihem ẹmha phọ ọmar bọ Devid, ẹpe eelhe aJudia, ịdi eḍighi bọ ọdi ọnyo ẹemara ẹemara aDevid.

⁵Ọdi ạpham Meri phọ dị matebeeny bọ ḍịkala phọ kụ ạghimom ọgeeghian asiḍien phọ. Mem mọ ọpo aMeri odi rꞌeghun-aḍien,

⁶kụ ịdipho bịdi osi bọ ẹpe Bẹtilihem, osoph ósugha mun lọ bịdi kọtol sịphe otu abuteneneen phọ kụ bịdi oḍigh otu ịnam. Kụ eghun phọ mesiom ni ọmar, kụ ọdi ạmar ọḅel ọony phọ ọdi kụ ạsighe rukpe aphurughiom mọony phọ kụ ạmuneeny ologhi esi dị rọloghonaan ghan ịnam mọ ịḅal.

⁷

⁸Matuman ẹmha phọ ẹpe, ḍughul phọ ạḍiphe phọ abupoghom iyool-ịga ụrol li ẹpe ạraaḅaraph phọ rokori ghan iyool-ịga phọ ạbidi.

⁹Kụ ọokpaany Ọmoogh-we phọ aru ạteeny bupoghom iyool-ịga phọ. Kụ ạḍiḅaal eegu Ọmoogh-we phọ esoorom bịdi ekitonom. Iḍighi ni ḍiigu esi ạbidi,

¹⁰kụ ọokpaany phọ ạḅeni bịdi mọ, “Kékiilaan. Mị uru ọḅeni anyina ḍiiḅi adom dị kẹngo ọḅaal ologhi oomo awe.

¹¹Sịen aḍughul phọ ạḍien, mịmaranaan inyina ẹpe ẹmha phọ aDevid mọony dị kaḍighi Ọpelia phọ anyina, aKraist Ọmoogh-we phọ.

¹²Esi olegheriom ịphen phọ, nyina kẹmiin ni mọony aḍipugh dị ophurughiom rukpe kụ ọmuneen ologhi esi dị rọloghonaan ghan ịnam mọ ịḅal.”

¹³Egina amem bịn aḍita ạruukpaany kꞌạke iru ni eko ọḅel ọokpaany phọ ekitonom eboom ghan Ẹnaan mọ,

¹⁴“Eghuan ẹrolonaan Ẹnaan ẹpe ạnyu phọ. Ẹepho ẹrolonaan we aḅirini phọ ọḅeeraan bọ nyọdi.”

¹⁵Ạruukpaany phọ Ẹnaan rogheel kꞌạke, kụ abupoghom iyool-ịga phọ oniin ạḅeni ghan nyoniin mọ, “Itu ọghi Bẹtilihem ọmiin aani dị ịpe Ọmoogh-we phọ uḍeenaan bọ iyira memiteghu.”

¹⁶Kụ bịdi oogborion ọghi osi ọmiin Meri rꞌạJosef rꞌọony aḍipugh phọ ọmuneen bọ sịphe ologhi esi phọ rọloghonaan ghan bọ ịnam mọ ịḅal.

¹⁷Kụ rọmiin bọ, kụ bịdi ọghaaph ọḅeni Meri rꞌạJosef ịpe ạruukpaany phọ Ẹnaan ọḅeni bọ bịdi ịlo ọony phọ ọphon.

¹⁸Kụ iḍighi ni iikia esi oomo ạbuphe ọnaghan bọ ịpe abupoghom iyool-ịga phọ ọghaaph bọ ọḅeni bịdi.

¹⁹AMeri ạphamanam ni oomo phọ ịphen phọ aseerian ologhi ạatughian ghan.

²⁰Kụ abupoghom iyool-ịga phọ oten oḅula ẹpe ạraaḅaraph phọ ọmoor sụor oboomiom Ẹnaan, ịdi eḍighi bọ oomo phọ ịphen bịdi ọnaghan bọ ọḅile ọmiin eḍighi ni ọkar ịpe ọokpaany phọ Ẹnaan ạḅeni bọ bịdi.

²¹Rẹman ọphaanya aḍughul-otu, kụ oḍun mọony phọ oghol mọ ạJizos, ḍien phọ ạḍiphe ọokpaany phọ Ẹnaan aghol bọ aseere kụ ogbi bọ osoph eghun phọ.

²²Kụ ẹteeny mem mọ ạJosef rꞌaMeri koḍighi bọ ịyaar aghuḍuul ẹmaria phọ, kụ ọsighe mọony phọ ọghimom Jeruselem ọḅogh ọlogh ạḍighaagh Ọmoogh-we phọ,

²³ịdipho ọge bọ ni sịphe iilogh Ọmoogh-we phọ mọ, “Ọmar ọkpana oogho ghan ni oseere mọ aḍighi oḍighi ạngo Ọmoogh-we phọ!”

²⁴Ẹghi phọ ạbidi ịḅaram ni ọphighiron ẹkia phọ iilogh Ọmoogh-we phọ ẹḅem bọ, mọ oḍighinom ghan ịyaar aghuḍuul ẹmaria phọ “ịyal aruukumude mụghumo ịyal ịgaami arukurughozo phọ.”

²⁵Oniin ogey oye dị oghol mọ ạSimion ạrol li ẹpe Jeruselem. Oye phọ ọphon oye aruukuan dị aako ghan ni ịpe omeeraam mọ ạḅem bọ, akori ghan kẹn ni mem mọ Ọpelia aweye phọ Ịzirel katu bọ. Uwaloor Iigbia phọ ạrolan ni nyọdi,

²⁶ạngoom oḍuom ologhi mọ ọdi kạmiin ni Mesaya phọ Ọmoogh-we phọ aguanaan bọ mọ katu phọ kụ agbi omugh.

²⁷Kụ Uwaloor Iigbia phọ aḍighi ni dị ọdi aḍigh Otu Ịiḅereghi phọ mem mọ ọde rꞌonhiin phọ ọsighe bọ Jịzos ọony phọ oru oḍighom oḍighinaan ịpe iilogh phọ ẹḅem bọ.

²⁸Kụ ạSimion ạghi ạar mọony phọ ạlhela, kụ aboom Ẹnaan kụ ạḅem mọ,

²⁹“Ọmoogh-we, nyịidipho ịpe nạ aguan bọ oḍighi phọ memite. Meera nụun mị oye arukumu phọ ạna ukeel rꞌẹepho,

³⁰ịdi eḍighi bọ mị mạmiin Ọpelia phọ ạna,

³¹ọpo nạ aakolobian bọ aseenaan ghisigh aweye oomo areelhe.

³²Ọdi kaḍighi ni ḍịḅaal dị kegananami eten phọ ạna eḍeenaan ruuruen phọ, ẹḅile ekueniom oomo aweye phọ Ịzirel.”

³³Ịphen dị ạghaaph bọ ịlo ọony phọ ịpher ri ọde rꞌonhiin phọ.

³⁴ẠSimion ạngo ni bịdi ọghor kụ ạḅeni Meri onhiin phọ mọ, “Nạghan. Mọony phọ ọphon phọ Ẹnaan kụ ịzua mọ aru ạphel ịbadi aweye Ịzirel atene, ḅịle ịbadi ọtuan nyọdi ophe ḍịghaagh ọno. Ọdi kụ kaḍighi eḍeenaan dị Ẹnaan emitiom eseere ịlo oruphughiom ịitughian ịbadi awe ogananami, kụ ịbadi awe kọgbagharan ni nyọdi. Kụ ọto kạtolonaan ni ologhi ạna onhiin phọ, mụdi elhool ẹgham kụ igim ekpom mọ ạna.”

³⁵

³⁶Oniin oyil ạnir-ephoph, dị oghol mọ Ạna ọnyani ạFanuel ọlo eghun Ạser, ạrol aani ni sịphe Otu Ịiḅereghi phọ. Ạrol bọ kꞌolhom oḍual ạsia bịn kụ ẹmugh eḍighi kụ nyịidipho mạkpo dị mẹman ọphaanyadi rꞌinya ạsia kụ odi ghan ni dọl arukpukele ạnmariir phọ. Ọdi ómite ghan sịphe phọ ọḍua ḍughul rꞌootaany, ạrol ghan ọkoony rꞌịiḅereghi kụ aaseeny ghan Ẹnaan.

³⁷

³⁸Egina phọ amem mọ ạmuphe ạJosef rꞌaMeri ọrol bọ sịphe Otu Ịiḅereghi phọ, ọdi aru ạmiin mọony phọ kụ rọngo Ẹnaan ḍịseph kụ ạḅile ạghaaph ghan ịlo ọdi ạḅeni oomo phọ ạbuphe okori bọ mem mọ Ẹnaan kẹtagharan bọ Jeruselem.

³⁹Bịdi roḍighi yogh bọ rọmadan oomo phọ ịpe iilogh Ọmoogh-we phọ ẹḅem bọ, kụ oḅula Nạzeret, ẹmha phọ ạbidi ẹpe eelhe aGalili.

⁴⁰Kụ ọony phọ ạkparagh riisi aloor aphoph ạmanam kụ ạmoogh olegheri ịyaar iboom, kụ ạḍiseph Ẹnaan ịrolonaan ni nyọdi.

⁴¹Tọrobo ạlha, ọde rꞌonhiin phọ ạJizos ụghi ghan ni Jeruselem olhe ẹyaal ọphel otene phọ.

⁴²Mem dị ạJizos mạman ḍioph rꞌịyal ạsia, kụ bịdi ọghi ẹghimom mọ rọki ghan bọ Jeruselem olhe ẹyaal phọ.

⁴³Ariiḍio ẹyaal phọ memunughan, bịdi oten rokeel, kụ ạJizos asugha ọman ạrol Jeruselem bịn ọde rꞌonhiin phọ ọdi úlegheri.

⁴⁴Bịdi ugbiom ghan ologhi mọ ọdi ratelhian aani bụeri awe phọ; morelhe oomo ẹmhu aḍio kụ ogbi ọnmanaghian ọdi ogbo asiya rꞌạrighiri phọ ạbidi.

⁴⁵Bịdi nyọdi ụ́miin, kụ ọḅile oḅula Jeruselem ọwa ọdi.

⁴⁶Ịraar aḍughul-otu reten, kụ bịdi ọmiin nyọdi sịphe Otu Ịiḅereghi phọ dị ạrol ogbo ạbutughemia phọ rạnaghanan ghan bịdi kạḅile aapuru yogh sipuru.

⁴⁷Ọnaghan ạḍughum mọ rꞌọphanyanaan asipuru phọ bịdi opuru yogh bọ iḍighi ni iikia esi oomo phọ ạbuphe ọnaghan bọ ịpe ọdi rạkaaph bọ.

⁴⁸Kụ mem dị bịdi ọmiin bọ nyọdi, iḍighi ni iikia esi ạbidi, kụ onhiin phọ ọdi apuru nyọdi mọ, “Mọony phọ, ịduon nạ uḍighi iyoor ika? Ịiḅaghami ni ọde ạna rꞌạmi ọwa ạna ọmiin phọ.”

⁴⁹Kụ ọdi apuru bịdi mọ, “Iḍighi ika kụ nyina rịwa ghan bọ ịmi? Nyina ílegheri mọ mị kạtol ghan sịphe otu ọde phọ ạmi ḍụghum?”

⁵⁰Kụ bịdi ụ́naghan ẹmhu ịpe ọdi ạḅeni bọ bịdi.

⁵¹Kụ ạJizos ạdaph bịdi aḅula Nạzeret kụ asooromi loor ạngo ghan bịdi. Kụ onhiin phọ ọdi aseerian ni ologhi oomo phọ ịphen phọ.

⁵²Kụ ạJizos aphophom ni olegheri-ịyaar ạḅile ạkpar ẹmugh ạkpar eye kụ ạḅeeraan ghan Ẹnaan rꞌawe oomo amem.