Read abua Luk 22 Bible Online

Luk 22 - abua bible

Luk 22

¹Retu ọteeny amem ẹyaal phọ roliom ghan bọ ạbred phọ ọpo yist rọ́logh ghan bọ, nyẹpe oghol bọ mọ ẹyaal ọphel otene phọ,

²kụ loor oghiilaan awe phọ, ạbuo ạrumhu ariil ạrikia phọ rꞌạbutughemia iilogh phọ ọḅoph ọnhu oosophoghian ịlo ọlogh ạJizos esi aḍuugh.

³Kụ aSetan ạar ologhi aJudas Ịskariot, oniin sịphe aḍioph rꞌịyal ạbumatuan phọ.

⁴Kụ ọdi ạghi ạteeny bụo ạrumhu ariil ạrikia phọ rꞌabugbogh awe sịphe abukoriom ogiga phọ ịlo aalha ạJizos.

⁵Kụ ẹḅaal iloghi phọ ạbidi kụ omerenyan ọngo ọdi ikpoki,

⁶kụ aJudas ameeraam, kụ ọdi aagonoghian ghan eepoogh aal ạJizos dị ọphenekpe kạ́tol.

⁷Kụ ẹteeny bọ ḍio ẹyaal phọ roliom ghan bọ ạbred phọ ọpo yist rọ́logh ghan bọ, mem mọ rọpighironaan ghan bọ ẹkia ọphel otene phọ.

⁸Kụ ạJizos arom Pita rꞌạJon mọ, “Ịki eekolobian malhe ọphel otene phọ yira olhe.”

⁹Kụ bịdi opuru nyọdi mọ, “Nạ rạwa mọ yoor oselemi ḍighen esi?”

¹⁰Kụ ọdi ạḅeni bịdi mọ, “Ịnaghan! Nyina etelhe remite ẹmha phọ, nyina kẹmiin ni oye dị arool oko ạmuum, ịdaph nyọdi. Kụ otu lọ ọdi aḍigh,

¹¹ipuru uwotu phọ mọ, ‘Ọtughemia phọ ạḅem mọ ọghen kụ osoph phọ ọno, ọpo ọno rꞌạbumatuan phọ ọno kọtol bọ kụ ole amalhe ọphel otene phọ?’

¹²Kụ ọdi kiḍeenaan ni inyina oboom osoph-ạnyu, sịphe otu ẹedaneen phọ, dị moselemi ni. Ịsiphe kụ ẹdi nyina keekolobian bọ.”

¹³Kụ bịdi ọghi kụ ọmiin ịdipho ạJizos ạḅeni bọ bịdi, kụ ookolobian ịlo ẹyaal phọ.

¹⁴Kụ ẹteeny bọ mem amalhe phọ, ạJizos alian ni eḍien rꞌabutelhedom mọ ọdi.

¹⁵Kụ ọdi ạḅeni bịdi mọ, “Mị ụwa ghan ni iboom olian amalhe ẹyaal ọphel otene phọ rꞌanyina, kụ egbi ọteeny amem ịminimiin phọ ạmi,

¹⁶ịdi eḍighi bọ mị rịḅeni ghan inyina mọ mị kále mun ẹyaal phọ ẹphen tụtu ọgba ẹmhu phọ omitiom ẹpe ọmar phọ kꞌẸnaan.”

¹⁷Kụ ạJizos ạsighe ọphaal amiim, kụ rọngo ḍịseph Ẹnaan, kụ ạḅem mọ, “Itiin ọphaal amiim mọ ạmuen oomo anyina eetinyian.

¹⁸Mị rịḅeni ni inyina mọ mị kạ́pughol mun miim mọ ạmuen egbi kꞌạnyiidipho ẹghiom ghisigh tụtu ẹteeny mem mọ ọmar phọ kꞌẸnaan katu bọ.”

¹⁹Kụ ọdi ạḅile ạsighe ạbred kụ rọngo ḍịseph Ẹnaan, kụ ạparion, kụ ạngo bịdi kụ ạḅeni mọ, “Ọphon kụ aḍizu phọ ạmi [mị aghol bọ ẹmhu phọ anyina kụ rạngo. Iḍighi ghan ịduon ịlo ọotughianam ạmi.”

²⁰Kụ ọdi ạtuugh egina phọ ẹngoom mọ ạngo bịdi ọphaal phọ kụ ạḅem mọ, “Ọphaal amiim mọ ạmuen mị rịngo bọ inyina ạkparamiom imoom ịyo phọ oghiran bọ rꞌẸnaan, dị ịḅaal phọ ạmi mị azu bọ loor ẹmhu anyina ẹmeera enye.”]

²¹“Kụ ịmiin, ọpo kaal bọ ịmi odi ni sịen rulian iyira eḍien.

²²Ọony phọ Oye kamugh ni ịdipho Ẹnaan mẹto bọ, kụ pọ eeghe ịminimiin dị kẹtolonaan oye phọ ọpo kabool bọ nyọdi.”

²³Kụ oniin amiigh opuru ghan oniin mọ ạnhian nụun kụ kaḍighi bọ ịphen phọ.

²⁴Kụ ọnunuan ạrol li esi ạbumatuan phọ ọdi olegheri oye dị kaḍighi ogbogh sịphe aḍita phọ ạbidi.

²⁵Kụ ạJizos ạḅeni bịdi mọ, “Ạbudaam ruuruen phọ ọmoogh ni ịikpo esi awe phọ bịdi ọda bọ, kụ okol bụo ịtooghi phọ mọ ạrighiri awe phọ.

²⁶Kụ ḍịen kụ kạ́dol phọ anyina. Ọkaraghi ogbogh phọ sịphe ogbo phọ anyina kạtol ghụn ni dọl ọbumoony, ḅịle kẹn oḍiemiom mọ kạtol ịdipho otelhedom.

²⁷Sịphe ọpo ạrol bọ ude kụ rale eḍien phọ rꞌọpo rạngo bọ nyọdi eḍien phọ, ạnhian kụ apu ạnhian? Ọbo ghụn ọpo ạrol bọ ude phọ. Kụ mị odi ni ogbo phọ anyina ịdipho otelhedom.

²⁸“Nyina kụ ịrolan bọ ọman ạmi oomo phọ amem mọ ọdegh ophogh phọ ụteeny ghan bọ ịmi.

²⁹Igina phọ ịdipho Ọde phọ ạmi mụngo bọ ịmi ịikpo ọda phọ kụ ẹdi mị kạtuugh kẹn ni ịngo aani inyina.

³⁰Nyina kele ni ẹpughol, ẹpe ọmar phọ ạmi, kụ nyina kẹtolom ni sịgada ọdaam ẹmha eegbo ịiruen ẹngo ḍioph rꞌịyal arughunughun phọ Ịzirel.”

³¹“Saimon, Saimon, nạghan. ASetan mạar ịikpo oḅiligha anyina ịdipho oḅephom iizo rạsal ghan bọ ịzeghe loor ịbiakpa phọ ọdi.

³²Kụ mị mạaḅereghi ạngo nyịna, mọ omeeraam mọ ạna kúpe oopho. Kụ mem dị nạ mạḅile akiton aḅula esi ạmi, kpạrami iloghi ạbuo asiya phọ ạna.”

³³Kụ aPita ạphagharanaan mọ, “Ọmoogh-we, mị ạnya ni ọdaph ạna ọghi ikoli, ḅịle kẹn rꞌomugh.”

³⁴ẠJizos mọ, “Pita, mị rịḅeni ghan inyina mọ ạkenegh kạ́laay rodon tụtu nạ mạpharanaan ịraar amem, mọ nạ ịmi úlegheri.”

³⁵Kụ ạJizos apuru bịdi mọ, “Mem mọ irom bọ inyina dom mọ, kụ nyina ị́pam bọ oḍigh ikpoki rꞌokuru rꞌarokoro, ịyaar ikuom ni inyina ḍụghum?” Kụ bịdi mọ, “Ịyaar iyoor íkuom.”

³⁶Kụ ạJizos mọ, “Kụ nyịidipho, tọrobo oye lọ ạmoogh oḍigh ikpoki rꞌokuru ạsighe ni! Oye lọ ụ́moogh elhool ẹgham aal ạsuoma ọdi aghoom nyeniin,

³⁷ịdi eḍighi bọ mị rịḅeni ghan inyina mọ ọghaaph ạḍinya iigbia phọ ọphon katu ni ịne ịlo ekpisi ạmi mọ, ‘Ọloghom ni nyọdi esi awe phọ ạbuphe osoroghu bọ iilogh phọ.’ Ịpe mọge bọ ịlo ạmi retu ni omite.”

³⁸Kụ ạbumatuan phọ ọḅeni nyọdi mọ, “Ọmoogh-we, pogh. Pọono ịyal arolhool ẹgham.” Kụ ọdi mọ, “Mẹkasian ni.”

³⁹Kụ ạJizos ạtuan ni ẹeghara phọ ọdi amite ạghi Eegum Ọlivs, kụ ạbumatuan phọ ụdaph ni nyọdi ọghi aani.

⁴⁰Mem dị ọdi aru bọ asi esi phọ, ọdi ạḅeni ni bịdi mọ, “Ịiḅereghi mọ nyina kímeel iḍighanaan ọdegh ophogh.”

⁴¹Kụ ọdi atenom bịdi asi esi dị ẹman oroph ekpo osiemi, kụ akpuḍian ạaḅereghi mọ,

⁴²“Ọde, mọ ẹḅeeraan nyịna, pọ ạar ịmi ẹgo ịminimiin phọ ịphen, kụ ọlo káḍighi ịpe ịḅeeraan bọ ịmi, ḍighi ghụn ni ịpe ẹḅeeraan bọ nyịna.” [

⁴³Kụ ọokpaany Ẹnaan amite aru, ạngo nyọdi ịnyaam.

⁴⁴Rꞌamukum ologhi kụ ọdi ạaḅereghiom rꞌịikpo ạkananaam. Itẹph elhoman ikilogh ni loor ọdi ịdipho ịḅaal, kụ emeleghu ghan ude.]

⁴⁵Ọdi roḅetenu esi ịiḅereghi phọ, kụ aḅula ạteeny bụmatuan phọ kụ ạmiin dị bịdi rọnaani yogh loor oboom ọto.

⁴⁶Kụ ọdi apuru bịdi mọ, “Nyina ịtu eeghe kụ rẹnaani yogh bọ? Iḅerenu ẹeḅereghi mọ nyina kímeel iḍighanaan ọdegh ophogh.”

⁴⁷Ọdi odi ni rạkaaph, kụ aḍita awe oru osi. AJudas, oniin sịphe aḍioph rꞌịyal ạbumatuan phọ, kụ aḍiemiom bịdi kụ ọdi aru ạteeny Jịzos ịlo ọkpun okpo phọ.

⁴⁸Kụ ạJizos ạḅeni mọ, “Judas, nạ ạsighe ḍịkpun kụ raboolom Mọony phọ Oye ḍụghum?”

⁴⁹Mem dị ạbumatuan phọ ạbuphe ọrolan bọ rꞌạJizos ọmiin bọ ịpe kemite bọ, bịdi upuru ni mọ, “Ọmoogh-we, yoor oruphogh rolhool ẹgham mọ ayoor obenoghom ḍụghum?”

⁵⁰Kụ oniin ọnyo ạbidi ạsighe elhool ẹgham abenom aḅeri-elhiom ẹbene uwo ẹmhu oyil ạrikia phọ asoph.

⁵¹Kụ ạJizos mọ, “Ịphen phọ mẹkasian,” kụ ạḅogh aḅeri oye phọ bịn atulan.

⁵²Kụ ạJizos apuru bụo ạrumhu ariil ạrikia phọ rꞌabugbogh awe sịphe abukoriom ogiga phọ, rꞌikumoor awe phọ oru bọ osiph nyọdi mọ, “Nyina ẹsighenom mọ mị ọḅa ḍụghum, kụ ẹpham bọ rolhool ẹgham rꞌạraḅam kụ erumom bọ sịen phọ?

⁵³Aḍio etum ḍio mị rꞌanyina kụ ịrolan ghan ni sịphe Otu Ịiḅereghi phọ, kụ nyina ípiigha ịpue osiph ạmi, kụ mụen phọ kụ amem mọ anyina rꞌịikpo ufiri.”

⁵⁴Kụ bịdi usiph ni Jịzos ọpham oḍighom ologhi otu kꞌuwo ẹmhu oyil ạrikia phọ, kụ aPita ạdaph aani ni kꞌẹgboogh ọman.

⁵⁵Mọkpooni nịan sịphe ogbo ogiga phọ, kụ aPita ạghi ạrol ude aaḍikuan bụphe rọonma bọ nịan phọ.

⁵⁶Kụ ịdipho ạnian phọ esoorom bọ nyọdi, kụ oniin ọnyani aḅiila ghisigh ọdi kụ ạḅem mọ, “Oye phọ ọphon ạdaph aani ghan ni nyọdi.”

⁵⁷Kụ ọdi ạpharanaan mọ, “Nyạni phọ, mị úlegheri nyọdi.”

⁵⁸Onyebel aten bịn ọnon oye ạmiin nyọdi kụ ạḅem kẹn mọ, “Nạ oniin ọnyo ạbidi aani ni.” Kụ aPita mọ, “Ye phọ. Mị úḍigh aani.”

⁵⁹Ephu oniin ạwa rẹḅile reten kụ ọnon oye ạḅem ạkpaariom mọ, “Igey ni, oye phọ ọphon ạdaph aani ghan ni nyọdi, esi dị ọdi ọlo aGalili ni.”

⁶⁰Kụ aPita mọ, “Ye phọ, mị úlegheri aani ẹmhu ịphen nạ rạkaaph bọ.” Ọdi ạkaaph rạmadan bịn ạkenegh ạlaay.

⁶¹Kụ Ọmoogh-we phọ akiton aphogh Pita, kụ aPita ạatughian ịpe Ọmoogh-we phọ ạḅeni bọ nyọdi mọ, “Tụtu ạkenegh rạlaay rodon nạ mụpharanaan ịmi ịraar amem.”

⁶²Kụ ọdi amite kụ amoghi igey.

⁶³Kụ bụphe rokori ghan bọ Jịzos ụgilaam ni nyọdi kụ ọgurogh,

⁶⁴kụ ọkagh riḍien ọdi ukpe kụ ọḅeni ghan nyọdi mọ, “Mịin uḍien. Ụḅeni iyoor oye phọ ọpo aḅor bọ nyịna.”

⁶⁵Bịdi ụḅeni ni nyọdi ịbadi ịnon ạraraar ạrigilaam.

⁶⁶Mem dị mẹḅaal ḍịroor kụ ikumoor awe ạbuo aJu phọ, rꞌạbuo ạrumhu ariil ạrikia phọ, rꞌạbutughemia iilogh phọ ookpomoghan, kụ ọpham Jịzos osiemi otu ezue phọ ạbidi.

⁶⁷Kụ bịdi mọ, “Ụḅeni iyoor, nạ kụ aMesaya phọ ḍụghum?” Kụ ọdi mọ, “Mị kụ ịḅeni inyina, nyina ịmi kímeeraam.

⁶⁸Kụ mị ipuru inyina ḍipuru, nyina ịmi kị́phagharanaan.

⁶⁹Kụ emiigh kꞌạnyiidipho ẹghiom ghisigh, kọtolomi ni Mọony phọ Oye ḍịghaagh elhiom Egbogh Ẹnaan phọ.”

⁷⁰Kụ oomo phọ ạbidi opuru mọ, “Kụ ẹrol dị nạ kụ Ọony phọ Ẹnaan ḍụghum?” Kụ ọdi mọ, “Nyina kụ rẹḅem mọ mị kụ ọno phọ.”

⁷¹Kụ bịdi mọ, “Yira ọḅile kẹn rọwa ghan bụo ạsiagba phọ oḍighinom eeghe? Yira rꞌaloor ayira mọnaghan bọ ni ọkar ikpo ọnhu phọ ọdi.”