Read abua Luk 23 Bible Online

Luk 23 - abua bible

Luk 23

¹Kụ oomo aḍita awe phọ uḅerenu ni ọsighe Jịzos ọghiomonaan Pailet.

²Kụ bịdi omiigh ọgba ọḅam ẹmhu ọdi mọ, “Yoor usiph oye phọ ọphon, dị mạphueghi iloghi awe phọ ayoor. Ọdi ạḅeni ghan bịdi mọ kúsogh ghan iisogh uwo ẹmha phọ aRom, kụ ạḅile ghan kẹn rakola mọ ọno aKraist ọdaam ẹmha.”

³Kụ aPailet apuru nyọdi mọ, “Nạ kụ ọdaam ẹmha ạbuo aJu phọ ni?” Kụ ọdi mọ, “Nạ kụ mạḅem ịduon phọ.”

⁴Kụ aPailet ạḅeni bụo ạrumhu ariil ạrikia phọ rꞌawe phọ mọ, “Erugh ípum oye phọ ọphon.”

⁵Kụ bịdi ụḅile ghụn ni bịn ọokonoghian opu ịḅel phọ mọ, “Ịtughemi phọ ọdi rẹgbaragbarami ghan iloghi awe. Ọdi amiigh ni kꞌaGalili kụ ạghaaph aleenye oomo aJudia, kụ nyịidipho ọdi maru bọ asi aani ẹphen.”

⁶APailet ạnaghan bọ ịduon phọ apuru ni mọ, “Oye phọ ọphon ọnyo aGalili ḍụghum?”

⁷Mem dị ọdi ạnaghan bọ mọ ạJizos ọlo eelhe phọ ẹpe ạHerod kụ ạda bọ, ọdi ạlogh ni we dị ọsighe nyọdi ọghiomonaan Hẹrod. ẠHerod ạrol aani ni ẹpe Jeruselem mem mọ ọpo phọ.

⁸Ịḅaal li ologhi ạHerod iboom, mem dị ọdi ạmiin bọ Jịzos, ịdi eḍighi bọ ọdi mạnaghan ghan ni ịlo ọdi, kụ ạwa ghan ọmiin ọdi kꞌamem dị mebia ni. Ọdi ạwa ghan ni ọmiin ịiḍaany lọ ạJizos kaḍighi.

⁹Kụ ạHerod apuru ni Jịzos ịbadi asipuru, kụ ọdi ọ́phagharanaan rꞌaḍiniin.

¹⁰Kụ ạbuo ạrumhu ariil ạrikia phọ rꞌạbutughemia iilogh phọ umite ni kụ ọgba ịikpara ạsiagba iilogh ọḅam ẹmhu ọdi.

¹¹Kụ ạHerod rꞌaweye ẹgham mọ ọdi uphogh ni nyọdi osooromi, ọḅile ọgilaam. Uunmenemi ni nyọdi ịkuakua iinmenan kụ oḅulemi ọghiomaan Pailet.

¹²Kụ ḍio phọ ạḍiphe phọ bịn ạHerod rꞌaPailet oḍighi rịghiri, kụ ạri ọbo ẹpomoghian phọ ạbidi mịtol li ẹghiom ghisigh.

¹³APailet ạmagh ni bụo ạrumhu ariil ạrikia phọ rꞌạbuo ịtooghi phọ rꞌawe phọ aakpomoghi

¹⁴kụ ạḅeni bịdi mọ, “Nyina ịsighe oye phọ ọphon iruomonaan ịmi kụ ẹgba mọ ọdi rạpueghi ghan iloghi awe phọ. Kụ nyịidipho, mị ạwa ạmiin sịen ghisigh anyina mọ erugh nyọdi ípum esi oomo phọ ịphen nyina rẹgba bọ kẹḅamaghi ẹmhu ọdi.

¹⁵ẠHerod kẹn ósoph ịiruen ophume nyọdi. Ọdi aḅulemi nyọdi uruom iyira. Ịyaar dị oye phọ ọphon aḍighi dị ạkpe oghiigh ílho.

¹⁶Loor ịphen phọ, mị kạgurogh nyọdi bịn aseere dị agheel.” [

¹⁷Kụ ạri tọrobo amem ẹyaal ọphel otene phọ aPailet rạ́bile ghan oseere oniin ọnyo-ikoli ọngo ạbidi.]

¹⁸Kụ oomo phọ ạbidi ọyughuron mọ, “Kiigh ni nyọdi. Seere ghụn Bạrabas kụ ụngo iyoor.”

¹⁹(ẠBarabas phọ oniin onyugheel-ẹkpar dị ạko enu mem dị ọgbaragbara asoor ẹmha phọ kụ ọtuan ọlogh ikoli.)

²⁰APailet ạwa ni oseere ạJizos, kụ ọdi ạḅile ạghaaph ịlo oḅorionom iloghi awe phọ.

²¹Kụ bịdi ọḅile bịn ọyughuron mọ, “Kạn nyọdi loor oreeny aghiigh. Kạn nyọdi loor oreeny aghiigh.”

²²Kụ aPailet apuru bịdi amuneniom ịraar amem mọ, “Uḍighi ika? Ịghen ịkaraph kụ ẹdi ọdi aḍighi bọ? Mị ụ́miin ịyaar ọtuan oghiigh ọdi. Loor ịphen phọ, mị kạgurogh nyọdi bịn aseere dị agheel.”

²³Kụ bịdi ọyughuron kꞌẹpe ạnyu opuemi ịḅel phọ mọ ọkan Jịzos oghiigh, kụ ịlooghi phọ ạbidi eḍighi ekol.

²⁴Kụ aPailet asoph erugh phọ aphume Jịzos ịdipho bịdi ọwa bọ,

²⁵kụ aseere oye phọ ọpo ọtuan bọ ọko enu phọ rꞌọgbaragbara phọ kụ ọlogh bọ ikoli phọ, ịdipho bịdi ọlom bọ mọ oseere phọ, kụ ạḅogh Jịzos ạngo bịdi mọ oḍighi ịlo ẹḅeeraan bịdi.

²⁶Bịdi ụsighe ni Jịzos ọḍuanam. Bịdi oten rọki, kụ oozuanaan oye dị oghol mọ aSaimon ọlo aSairini, dị ạḍua eniin ẹmha ratu Jeruselem, kụ osiph kụ ọsighe oreeny phọ kọkanam bọ Jịzos ọngo nyọdi mọ arool ạdaph ọman ạJizos.

²⁷Aḍita awe ụtuan ni Jịzos; sịphe ogbo phọ ạbidi, ạnmariir ụrol li dị ọkanagha siloor ọḅile omoghinaan nyọdi.

²⁸Kụ ọdi akiton ạḅeni bịdi mọ, “Nmạriir aJeruselem, kímoghinaan ịmi. Imoghinaan ghụn loor anyina rꞌạnmuny anyina,

²⁹ịdi eḍighi bọ ariiḍio retu ni mem dị aweye kọḅem mọ, ‘Ạḍiseph edianaan ni rạmar, rꞌạrukuruḅaka phọ ịpe kẹ̋mar ghan bọ, rꞌạramamaam mọ ịpe ọony kọ́maam ghan bọ.’

³⁰Pọ kụ amem dị awe kọḅeni ruugum mọ, ‘Imeleghuom iyoor,’ ḅịle rạaḅaraph phọ mọ, ‘Iikpereghiom iyoor.’

³¹Íḍigh bịn ẹgher, kụ ạghiom ologhi.”

³²Ụsighenom ni ịyal abusereghiom sighiton ọḅaram rꞌạJizos.

³³Bịdi rọghi rosi esi dị oghol mọ ạkpaḍi ịkeeghi ạrumhu, kụ ọkan nyọdi loor oreeny phọ kụ ogim, kụ ụḅaram aani ni ịyal phọ ạbueri phọ awe phọ, oniin ekeeny, oniin elhiom.

³⁴Kụ ạJizos mọ, “Ọde, sạr ịkaraph phọ ạbidi ạwilenaan bịdi, ịdi eḍighi bọ bịdi úlegheri ịpe bịdi roḍighi bọ.” Bịdi ụsaaghi ni ẹlhel odianam iinmenan phọ ạJizos.

³⁵Awe ụmeregha ni pạ phọ ọmiin aani. Kụ ạbuo ịtooghi ạbuo aJu phọ ọgilaam ghan nyọdi mọ, “Ọpel bụnon dị ẹmhu ọdi útue ụpela. Ạphela ẹmhu phọ ọdi, eḍighi mạar dị ọdi kụ aru ni Mesaya phọ Ẹnaan eseere bọ!”

³⁶Rꞌaweye ẹgham mọ bịn ụnmoghoghoom ni nyọdi. Bịdi uru ni ghisigh ọdi, kụ ọngo nyọdi mụkpueneen amiim

³⁷kụ ọḅem ghan mọ, “Eḍighi mạar dị nạ kụ aru ni ọdaam ẹmha ạbuo aJu phọ, pẹla ẹmhu phọ ạna.”

³⁸Ụge ni pạ ạnyu oreeny phọ ikpo ọnhu phọ ịphen mọ: “Ọphon kụ ọdaam ẹmha ạbuo aJu phọ.”

³⁹Oniin ọnyo abusereghiom sighiton phọ ọḅaram bọ rꞌọdi ọkan ạḅeni yogh ni nyọdi sịkaraph mọ, “Nạ kụ káKraist phọ ḍụghum? Pẹla ẹmhu ạna ụḅaram aani iyoor.”

⁴⁰Ọphori phọ ạḅile ghụn ni ạḅaam ghan nyọori phọ mọ, “Nạ Ẹnaan rákiilaan ghan ḍụghum? Nyịidipho mosoph eniin erugh opume ḍita ayira.

⁴¹Tọrobo ịlo ẹrol, ịiruen phọ ịphen ayira ẹkpe ni, ịdi eḍighi bọ ịphen kụ ịikpia ịkaraph phọ yira oḍighi bọ, kụ oye phọ ọphon ịkaraph óḍighi.”

⁴²Kụ ọdi ạmagh mọ, “Jịzos, ụutughian aani ni ịmi mem mọ nạ katu bọ ịdipho ọdaam ẹmha phọ.”

⁴³Kụ ạJizos ạḅeni nyọdi mọ, “Mị ạkar rạḅeni ghan nyịna mọ rodon nạ rꞌạmi kụ kọtol ẹpe ooḅi ọmar phọ.”

⁴⁴Kụ rẹteeny ogbo ootaany, bịn ufiri aḍigh oomo eelhe phọ, tụtu ẹteeny ịraar asuogh dulhe.

⁴⁵Kụ ukpe phọ ọkpo bọ sịphe Ạdol Iigbia Otu Ịiḅereghi phọ ạphaaru ịyal ipoḍi.

⁴⁶Kụ ạJizos ạlho ạghiom ạnyu mọ, “Ọde, mị ạḅogh uwaloor phọ ạmi ạlogh ḍịghaagh ạna.” Ọdi rọḅem bọ ịduon phọ bịn amugh.

⁴⁷Kụ uwo ẹmhu ạbuo ẹgham mọ ạbuphe phọ ạmiin bọ ịphen emiteghu bọ ạseph ni Ẹnaan kụ ạḅem mọ, “Igey phọ ni, ọphon phọ oye aruukuan ni.”

⁴⁸Oomo awe phọ ạbuphe osoor bọ kụ ọmiin bọ ịpe emiteghu bọ uphumugha ni rokpologhi kụ osiom iloghi aruutu.

⁴⁹Kụ oomo ạbuphe olegheri bọ nyọdi rꞌạnmariir phọ ọdaph bọ nyọdi kꞌaGalili oru, ụmeregha ni kꞌegher kụ ọmiin ghan ịphen phọ.

⁵⁰Oniin ogey oye dị oghol mọ ạJosef, ọlo Arimatia sịphe eelhe ạbuo aJu phọ, ạrol li. Ọdi aḍighi ni oye aruukuan, dị agon ghan ọmiin ọmar phọ kꞌẸnaan. Ọbo ọdi aḍighi aani ni oniin ọnyo ookpomoghan ikpolom awe phọ; ọdi ómeeraam ịiruen phọ rꞌịpe bịdi oḍighi bọ.

⁵¹

⁵²Ọdi ạghi ni ghisigh aPailet kụ ạlom ḍizu phọ ạJizos.

⁵³Kụ ọdi ạsighe ḍizu phọ sịphe oreeny phọ ọkan bọ aseere ude, kụ ạsighe ọmur aphurughiom, kụ aḍi nyọdi oḍi dị oguph loor asighiigh dị kꞌekulha oye úḍi.

⁵⁴Iḍighi dulhe arookolobian dị kẹḅaal ḍio ophooghian.

⁵⁵Ạnmariir phọ ạbuphe ọdaph bọ Jịzos kꞌaGalili kụ oru ụdaph ni Jọsef ọghi ọmiin aani oḍi phọ rꞌọdo phọ eḍiom mọ oḍi bọ Jịzos.

⁵⁶Kụ rọmiin kụ oḅula yogh iloghi aruutu ookolobian rolho eeḅi eḍu rꞌọota omuur aḍizu phọ. Kụ ẹteeny bọ ḍio ophooghian phọ, bịdi uphooghian ni ịdipho iilogh phọ ẹḅem bọ.