Read abua Luk 24 Bible Online

Luk 24 - abua bible

Luk 24

¹Esoph ạḍiroor ạSondi phọ, ạnmariir phọ ụphamagh ni oomo arolo eeḅi eḍu phọ bịdi ookolobian bọ ọghimom sịphe oḍi phọ.

²Bịdi ụmiin ni mọ mookilemi ḍighiigh phọ opukiom bọ oḍi phọ ọkiom ḍiniin ạḍighaagh.

³Kụ bịdi oḍigh ologhi oḍi phọ kụ ụ́miin ḍizu phọ ạJizos Ọmoogh-we phọ.

⁴Bịdi ọmeera ni rookia ghan ịpe emite bọ, kụ ekperenom bịn ịyal awe dị oonmenan ịnmananmana ịphalaḅaal iinmenan ọmeera sịphe ịigaany ạbidi.

⁵Rꞌakuboom aruugu kụ ạnmariir phọ ozumeri yogh ghisigh ạbidi ude, kụ awe phọ opuru bịdi mọ, “Uḍighi ika kụ nyina etu rẹwa ghan oye dị odi, ogbo ạbudi momuughu?

⁶Ọdi ólho sịen, maḅetenu. Ịitughian ịpe ọdi ịḅeni bọ inyina mem mọ dị ạrol bọ ẹpe Galili mọ,

⁷‘Kọḅogh ni Mọony phọ Oye ọngo buḍighinom ịkaraph, ọkan loor oreeny okiigh kụ ạḅile aḅetenu ḍughul otu dị emuneniom ịraar.’”

⁸Kụ ạnmariir phọ ogbi ọotughian ikpo ọnhu phọ ọdi,

⁹kụ ọḍua ẹpe oḍi phọ oḅula kụ ọghaaph oomo phọ ịphen phọ ọḅeni ḍioph rꞌoniin ạbumatuan phọ rꞌạbueri phọ awe phọ.

¹⁰Nmạriir phọ uughologh mọ aMeri ọpo ạMagdala phọ rꞌaJoana, rꞌaMeri onhiin phọ aJems. Bịdi rꞌạbueri phọ ạnmariir phọ ọrol aani bọ ụghaaph ni ịphen phọ ọḅeni butelhedom mọ.

¹¹Kụ abutelhedom mọ úmeeraam, ịdi eḍighi bọ bịdi ugbi mọ ạnmariir phọ upu ni oopho ọghaaph bịn ọghaaph aani.

¹²Kụ aPita aḅetenu aghiil ạghi asi sịphe oḍi phọ, kụ aḅiriman aḅiila kụ ạmiin ịphalaḅaal iidugha phọ bịn kụ aakia ni ịpe emite bọ asiom ologhi otu.

¹³Egina phọ aḍio phọ ạḍiphe phọ, ịyal ạbuno oten rọki ọony ẹmha dị oghol mọ Ẹmaos, dị ẹghiom ni ḍioph rꞌoniin itobi ọḍua aJeruselem ọghi.

¹⁴Bịdi ụghaaphan ghan ịlo oomo phọ ịpe emite bọ.

¹⁵Bịdi rọkaaph ni koopuruan, kụ ạJizos rꞌaloor ọdi aḍuraan ạteeny bịdi kụ orelhian.

¹⁶Bịdi ọmiin bọ nyọdi ụ́kar ụlogh elegh.

¹⁷Kụ ạJizos apuru bịdi mọ, “Nyina rẹkaaph ghan eeghe ọghaaph kụ retelhiom bọ?” Kụ bịdi ọmeera zin okiriri yogh.

¹⁸Oniin ọnyo ạbidi dị oghol mọ aKliopas, apuru ni nyọdi mọ, “Nạ ạkar ri aḍighi ooruen dị odi sịphe Jeruselem dị úlegheri aani ịphen emite bọ ịyal-ikpo aḍughul-otu phọ ịphen eten bọ?”

¹⁹Kụ ọdi mọ, “Eeghe ạraraar?” Kụ bịdi mọ, “Ạraraar phọ ịpe emiteghunaan bọ Jịzos ọnyo ạNazeret phọ. Oye phọ ọphon aḍighi ni oyil dị Ẹnaan rꞌoomo awe olegheri ni mọ ogbogh ni sịphe ọghaaph phọ rꞌeḍighinom ạraraar phọ ọdi.

²⁰Ạbuo ạrumhu ariil ạrikia rꞌạbudaam mọ ayoor ụḅogh ni nyọdi ọngo mọ oghiigh kụ bịdi ọkan nyọdi loor oreeny.

²¹Kụ ọbo yoor uḍuom ni ologhi mọ ọdi kụ kaḍighi bọ nyọpo kạtagharan bọ weye Ịzirel. Ịphen phọ emite bọ rꞌarodon sịen ịraar aḍughul-otu.

²²Buniin ạnmariir sịphe aḍita phọ ayoor ụngo ni iyoor iikia. Bịdi ụghi ni ẹpe oḍi phọ mem dị mẹkpoghoronu,

²³kụ ụ́miin ḍizu phọ ọdi. Bịdi uḅula ghụn ni kụ ọḅem mọ bụno mọmiin rụukpaany Ẹnaan uḍien dị ọḅeni bụno mọ ọdi odi ni rapooghu.

²⁴Buniin awe phọ rꞌayoor ọrolan ghan bọ ụghi kẹn ni ẹpe oḍi phọ kụ ọmiin ịdipho ạnmariir phọ ọḅem bọ, bịn nyọdi phọ ụ́miin.”

²⁵Kụ ạJizos ạḅeni bịdi mọ, “Uḍighi ika kụ nyina ẹmoogh bọ elologhi ẹḅile bọ reebinya ghan omeeraam oomo phọ ịpe ariil phọ Ẹnaan ọghaaph bọ?

²⁶Ị́kpe dị aMesaya phọ kạmiinom oomo phọ ịphen kụ ạtuan aḍighom eghuan phọ ọdi ḍụghum?”

²⁷Kụ ạJizos ạgba ẹmhu oomo ịpe ọghaaph bọ ịlo ọdi sịphe Ạḍinya Iigbia phọ emiigh kꞌịpe aMozis ẹteeny oomo phọ ịpe ariil phọ Ẹnaan ọge bọ.

²⁸Kụ bịdi ọtol ropogh ọony ẹmha phọ bịdi rọki bọ, kụ ạJizos apu aḍighi mụdi rạwa ni oten ịsiphe.

²⁹Kụ bịdi ọmagh nyọdi ọmeremi kụ ọḅeni mọ, “Tue ọrol sịen. Adulhe retu, ḅịle kẹn, aḍio phọ mẹghi ni iboom.” Kụ ọdi aḍigh ọrolan ạbidi.

³⁰Ọdi rꞌạbidi ọtol rolian eḍien kụ ạsighe ạbred phọ kụ rọngo ḍịseph Ẹnaan kụ ạparion ạngo bịdi.

³¹Kụ ariḍien ạbidi ekpoghoronu kụ ogbi ọlogh ọdi elegh, kụ ọdi aphe sịphe ariḍien phọ ạbidi.

³²Kụ oniin apuru ghan nyoniin mọ, “Aloor ayira ígbirighaan ẹpe eten phọ, mem mọ dị ạghaaph ghan bọ ạḅile ạgba ẹmhu ịpe ọge bọ pạ Ạḍinya Iigbia phọ ụḅeni iyira?”

³³Kụ bịdi oḅerenu egina amem oḅula ẹpe Jeruselem kụ ọmiin ḍioph rꞌoniin ạbumatuan phọ dị odianaan rꞌạbunon awe

³⁴kụ rọḅem ghan mọ, “Ọkar igey ni. Ọmoogh-we phọ aḅetenu ni sịphe aḍuugh phọ. ASaimon mạmiin ni nyọdi.”

³⁵Kụ ịyal phọ awe phọ ọghaaph ọḅeni bụeri phọ ịpe emite bọ ẹpe eten phọ, rꞌịpe bịdi ọlogh bọ elegh Ọmoogh-we phọ mem mọ ọpo ọdi mạparion bọ ạbred phọ.

³⁶Bịdi odi rọkaaph ghan ịphen phọ kụ Ọmoogh-we phọ aru ạmeera pạ ogbo phọ ạbidi ekperenom, kụ ạḅeni bịdi mọ, “Ẹepho ịrolonaan inyina!”

³⁷Esi eegu rꞌeepuph bịdi ugbi mọ bụno rọmiin ghan ọlo úlho.

³⁸Kụ ọdi mọ, “Eeghe kụ rẹeḅaghami iloghi anyina? Iḍighi ika nụun kụ iikia phọ ịphen edianaan bọ iloghi phọ anyina?

³⁹Ipogh rạghaagh phọ ạmi rꞌaruwol phọ ạmi, bịn ẹmiin mọ ọkar ạmi phọ ni! Ịḅogh ịmi nyina kẹmiin ni! Ọlo úlho rạ́moogh ghan iphulupul rꞌịḅarara ịduon ạmi.”

⁴⁰Mạḅem ịduon phọ kụ aḍeenaan bịdi rạghaagh rꞌaruwol phọ ọdi.

⁴¹Kụ úmeeraam úmeeraam ni. Ọḅaal ologhi rꞌiikia kụ ịrolonaan iloghi phọ ạbidi. Kụ ọdi apuru bịdi mọ, “Nyina ẹmoogh ni ịyaar olhe sịen ḍụghum?”

⁴²Kụ bịdi ọngo nyọdi ḍịkpol ẹsaaneen ena,

⁴³kụ ọdi ạsighe ạany ghisigh ạbidi.

⁴⁴Kụ ọdi mọ, “Ịphen kụ ikpo ọnhu phọ ạmi mị ịḅeni bọ inyina, mem mọ mị ạrolan bọ rꞌanyina: oomo phọ ịpe ọge bọ ịlo ạmi sịphe iilogh phọ aMozis, rꞌịgeeghi ariil phọ Ẹnaan, rꞌạḍinya Ạsuor phọ kẹ́bile dị kémite emunughan.”

⁴⁵Ọdi aghunyon ni iloghi phọ ạbidi mọ bịdi olegheri ẹmhu Ạḍinya Iigbia phọ,

⁴⁶kụ ọdi ạḅeni bịdi mọ, “Phọn kụ ịdi ọge bọ mọ aKraist phọ kạmiinom ni kụ aḅetenu esi aḍuugh phọ ḍughul otu dị emuneniom ịraar,

⁴⁷kụ okol ghan ḍien phọ ọdi kụ ọkaaph dom okiton esi ịkaraph rꞌọsar ịkaraph ọwilenaan phọ oleenye oomo areelhe phọ emiigh kꞌẹpe Jeruselem.

⁴⁸Nyina kụ kẹgba ni rạraar phọ ịphen emitiom ẹḅeni we.

⁴⁹Kụ mị rꞌaloor ạmi kaḍighi ni dị ịyaar phọ Ọde phọ ạmi miguanaan bọ inyina ketu ịteeny inyina. Kụ ọlo nyina kẹtol li sịphe ẹmha phọ kụ ekori ghan tụtu ịikpo ẹḍua kꞌạke eru isoorom inyina.”

⁵⁰Kụ ọdi arorori bịdi ạḍuanam sịphe ẹmha phọ asiemi kꞌẹpe Betani. Pọ kụ esi dị ọdi ạrol kụ aphoophe rạghaagh ọdi, kụ ạngo bịdi ooḅi ọghor.

⁵¹Ịdipho ọdi rạngo bọ bịdi ọghor phọ, bịn ạgbatanaan bịdi, bịn ọsighe nyọdi osiemi kꞌạke.

⁵²Bịdi uuseeny ni nyọdi kụ ọḅile oḅula ẹpe Jeruselem rꞌiboom iboh,

⁵³kụ oomo phọ amem mọ ạmuphe phọ bịdi ụrol ghan ni sịphe Otu Ịiḅereghi phọ oboom ghan Ẹnaan.