Read abua Luk 3 Bible Online

Luk 3 - abua bible

Luk 3

¹Mem dị ạTaibirios Siza mạrolom ạgada ọdaam ẹmha phọ aRom ẹman ḍioph rꞌoogh ạsia, ạPontios Pailet kụ ạda eelhe aJudia, ạHerod kụ ạda eelhe phọ aGalili, aFilip umor phọ ọdi kụ ạda eelhe Ituria rꞌaTrakonitis, aLisanias kụ ạda eelhe Abilini,

²kụ Ạnas rꞌạKayafas kụ ạbuo ạrumhu ariil ạrikia phọ; mem mọ ọpo kụ ẹdi ikpo ọnhu phọ Ẹnaan eru ẹpe ẹdala phọ ẹteeny Jọn ọony phọ ạZekaraya.

³Kụ ạJon arelhe yogh ni akitonom oomo eelhe dị etuman Ọphiiny ạJodan kụ ạghaaph ghan mọ, “Ikiton esi ịkaraph phọ anyina eru mị iwurogh mụum, ọbo Ẹnaan ẹsar ịwilenaan inyina.”

⁴Ịdipho Azaya oyil phọ ạge bọ sịphe ạḍinya phọ ọdi mọ, “Oye atu ni rạlooghi ẹpe ẹdala phọ mọ, ‘Ọmoogh-we ratu. Iseleminaan eten phọ ọdi esele yogh iloghi phọ anyina.

⁵Iḅologh oomo ariḍiiny phọ eḍueghi eguphogh oomo ạraaḅaraph phọ rꞌaruugum mọ ẹeberemi, esele yogh oomo ịkulakula areten phọ, ẹḅile ẹegbenyon yogh rugbugh phọ.

⁶Kụ oomo awe kọmiin ni pẹleeny phọ Ẹnaan.’”

⁷Ịbadi awe ụḍua ni oru ọteeny Jọn mọ ọdi awur bụno mụum, kụ ọdi mọ, “Nyina ọmar ạsiḅom, ạnhian kụ iroma bọ inyina mọ nyina kekpetenaan ni ghẹlhe phọ ratu bọ.

⁸Ịmoogh rọozo awe lọ mokiton esi ịkaraph phọ ạbidi. Kéḍuom ologhi Ebraham ọde phọ ayira. Boonaan Ebraham kạ́tol, mem dị nyina eḍighi ịkaraph. Mị rịḅeni ni inyina mọ Ẹnaan ketue ni ẹsighe sighiigh phọ ịphen eḍighi nmụny ẹngo Ebraham.

⁹Kꞌạnyiidipho ni bịn oseere ni akubu zin ạtorobo oreeny. Oreeny lọ úmuum igey iimuma koler ri oguom nịan.”

¹⁰Kụ aḍita awe phọ opuru nyọdi mọ, “Yoor oḍighi ika nụun?”

¹¹Kụ ọdi mọ, “Oye lọ ạmoogh ịyal ạrusuoma ạsighe nyoniin ạngo nyọpo ụ́moogh aani bọ! Uwo ạmoogh eḍien adi aani ghan ạngo.”

¹²Buniin ạbubonyiom iisogh phọ uru ni ọteeny nyọdi mọ ọdi awur bụno mụum kụ opuru mọ, “Ọtughemia, yoor oḍighi aani ika?”

¹³Kụ ọdi ạḅeni bịdi mọ, “Kẹ́boor ghan epeeliom ịpe ologh phọ ạḅem bọ.”

¹⁴Buniin ạbuo ẹgham opuru aani kẹn nyọdi mọ, “Yoor oḍighi aani ika?” Kụ ọdi ạḅeni bịdi mọ, “Kẹ́kpaariom ghan oye ẹboor ikpoki, ḅịle kẹn képu ọkpe ẹgba ẹboorom oye ikpoki. Ịpe rịkpe bọ inyina ịgbaanyan inyina!”

¹⁵Kụ oḍuom ologhi awe rạpulughu, kụ oye ye ragbiom ghan ologhi mọ iini ạJon kụ aMesaya phọ.

¹⁶Esi ịduon phọ, ạJon ạḅeni oomo phọ ạbidi mọ, “Mị iwur inyina mụum, kụ ọpo ratu bọ upu ịmi. Mị ụ́manam ozuman ọokpo iḍigh arokoro phọ ọdi. Ọdi kạsighe Uwaloor Iigbia phọ rꞌạnian kụ iwurom inyina.

¹⁷Ọdi ạpam ni ọsalam ḍịghaagh ọdi ọlo okori ọsalam ịbiakpa phọ ookpomoghi igey phọ oseere, kụ ọsighe ịzeghe phọ oguom nịan dị kéḍim.”

¹⁸Ịdipho ọdi ạghaaph bọ ooḅi ọghaaph phọ ạḅeni we phọ, ọdi ạphurom ghan ni bịdi rụru reten kịrokiro.

¹⁹Kụ ạJon ạḅaam ghan ni Hẹrod ọdaam eelhe phọ, ịdipho ọdi ạsighe bọ Hẹrodias ạnir ạHerod umor phọ ọdi kụ aphin, rꞌịnon ọdo kịrokiro ịkaraph dị ọdi aḍighi yogh.

²⁰Kụ ọkar ịkaraph ạHerod dị ẹloghori ghụn, ọsighe ạJon ọlogh ikoli phọ.

²¹Mowur mụum oomo awe phọ ọmadan, kụ owur aani Jịzos. Ọdi odi rạaḅereghi ghan kụ okuaḍio phọ aghughuronu,

²²kụ Uwaloor Iigbia phọ amite eye ịdipho ọkurughozo asoorom nyọdi. Kụ ẹḍogh ẹḍua kꞌạke kụ ẹḅem mọ, “Nạ kụ ogina Ọony phọ ạmi. Eḍighinom ịyaar phọ ạna kụ ịḅeeraan ịmi iboom.”

²³ẠJizos amiigh oḍighi phọ ọdi mem dị rạkiom ịraardi ạsia. Ọdi ọony ạJosef, ịdipho awe ogbiom bọ. ẠJosef phọ ọony aHilai,

²⁴aHilai phọ ọony ạMatat. ẠMatat phọ ọony aLivai. ALivai phọ ọony aMelki. AMelki phọ ọony aJanai. AJanai phọ ọony ạJosef.

²⁵ẠJosef phọ ọony ạMatatias. ẠMatatias phọ ọony Ẹmos. Ẹmos phọ ọony ạNehum. ẠNehum phọ ọony Esli. Esli phọ ọony aNagai.

²⁶ANagai phọ ọony aMaat. AMaat phọ ọony ạMatatias. ẠMatatias ọony aSemein. ASemein phọ ọony aJosek. AJosek phọ ọony aJoda.

²⁷AJoda phọ ọony aJoanan. AJoanan phọ ọony aResa. AResa phọ ọony ạZerubabel. ẠZerubabel phọ ọony ạSialtiel. ẠSialtiel phọ ọony aNeri.

²⁸ANeri phọ ọony aMelki. AMelki phọ ọony Ạdi. Ạdi phọ ọony aKosam. AKosam phọ ọony Ẹlmadan. Ẹlmadan phọ ọony aEr.

²⁹AEr phọ ọony aJosua. AJosua phọ ọony Eliezer. Eliezer phọ ọony aJorim. AJorim phọ ọony ạMatat. ẠMatat phọ ọony aLivai.

³⁰ALivai phọ ọony ạSimion. ẠSimion phọ ọony aJuda. AJuda phọ ọony ạJosef. ẠJosef phọ ọony aJonam. AJonam mọ ọony Ẹliakim.

³¹Ẹliakim mọ ọony aMelia. AMelia phọ ọony aMena. AMena phọ ọony aMatata. AMatata phọ ọony aNetan. ANetan phọ ọony aDevid.

³²ADevid phọ ọony ạJesi. ẠJesi phọ ọony Obed. Obed phọ ọony ạBoaz. ẠBoaz phọ ọony aSalmon. ASalmon phọ ọony aNason.

³³ANason phọ ọony Ạminadab. Ạminadab phọ ọony Ạdmin. Ạdmin phọ ọony Ani. Ani phọ ọony ạHezron. ẠHezron phọ ọony ạPerez. ẠPerez phọ ọony aJuda.

³⁴AJuda phọ ọony ạJekob. ẠJekob phọ ọony Ạizik. Ạizik phọ ọony Ebraham. Ebraham phọ ọony aTera. ATera phọ ọony aNahor.

³⁵ANahor phọ ọony aSerug. ASerug phọ ọony aRiu. ARiu phọ ọony aPeleg. APeleg phọ ọony Eber. Eber phọ ọony aSela.

³⁶ASela phọ ọony ạKenan. ẠKenan ọony Arfaksad. Arfaksad phọ ọony ạSem. ẠSem phọ ọony aNoa. ANoa phọ ọony ạLamek.

³⁷ẠLamek phọ ọony ạMetusela. ẠMetusela phọ ọony Ẹnok. Ẹnok phọ ọony ạJared. ẠJared phọ ọony ạMahalalel. ẠMahalalel phọ ọony ạKenan.

³⁸ẠKenan phọ ọony Enos. Enos phọ ọony ạSet. ẠSet phọ ọony Ạdam. Ạdam phọ ọony Ẹnaan.