Read abua Luk 8 Bible Online

Luk 8 - abua bible

Luk 8

¹Ịphen phọ eten bọ íbia bịn ạJizos aḅetenu ni ạḍua ghan ẹmha ạgba ẹmha ạghaaph ghan ooḅi ọghaaph ọmar phọ kꞌẸnaan. Ḍioph rꞌịyal ạbumatuan phọ ụdaph aani ni nyọdi ọghi.

²Buniin ạnmariir kẹn dị ạJizos aakonom yogh riiphina, ạḅile aphorogh yogh ịkaraph aruwaloor ụdaph aani ni nyọdi. Sịphe aḍita ạnmariir phọ, bụen kụ ụghi aani bọ: aMeri ọpo oghol bọ mọ ọlo ạMagdala phọ, ọpo ophorogh bọ oḍual ịkaraph aruwaloor loor phọ ọsighe,

³rꞌaJoana ạnir aKuza, dị aḍighi ogbogh oye ẹpe ogiga phọ ạHerod, rꞌạSuzana. Tọrobo ịyaar lọ ekuom Jịzos rꞌạbumatuan phọ ọdi, ạnmariir phọ ạbuen umitiom ghan ni ịlo bịdi ọmoogh ọngo.

⁴Kụ mem dị aḍita awe ạramha kịrokiro phọ oru bọ ookpomoghan, ạJizos adogh ni ḍidogh phọ ạḍien ạḅeni bịdi mọ:

⁵“Oḅephom iizo ạghi ni ooduḍi ịizupha phọ ọdi. Kụ sịphe ọdi raaduḍi bọ, iniin imeleghu ọḅuzo bịn ọozeghi, bịn ịnun phọ esoroghu eru eekpophi ẹminogh.

⁶Iniin imeleghu de asighiigh, íbia bịn ẹraarogh kụ ẹnuughi, ịdi eḍighi bọ ạmuum ọ́rol.

⁷Iniin imeleghu ogbo iitoor kụ iitoor phọ egimi kụ ịizupha phọ eghurughan yogh.

⁸Kụ ịpheri phọ imeleghu ḍiiḅi ade kụ esiighi kụ emuum rughuuny dị eḍighi ghan oniin okuron ikpo esi.” Kụ ọdi akureriom mọ, “Ọlo ạmoogh rụru ọnaghanam ạnaghan!”

⁹Kụ ạbumatuan phọ ạJizos upuru ni nyọdi ẹmhu aḍidogh phọ ạḍien phọ.

¹⁰Kụ ạJizos mọ, “Mịngo ni inyina olegheri ạraraar ịbooghian ọmar phọ kꞌẸnaan, kụ bụeri phọ kọtughemiom ghan sidogh, ọbo ophogh okananaam kọmiin ghan bọ, ọnaghan ọnaghan kọkpaph ghan bọ ọpam.”

¹¹“Ẹmhu aḍidogh phọ ạḍien ịduon. Ịizupha phọ pọ ọghaaph phọ Ẹnaan.

¹²Bụphe ọghigh bọ ịizupha ịpa ọḅuzo phọ, pọ ạbudi ọnaghan ọghaaph phọ íbia bịn Eru phọ etu eziton ọghaaph phọ sịphe iloghi phọ ạbidi ẹsighe, ọbo bịdi komeeraam ghan bọ ọmoogh pẹleeny.

¹³Bụphe ọghigh bọ ịizupha ịpa ade asighiigh phọ, pọ ạbudi ọnaghanan ọghaaph phọ rꞌọḅaal ologhi kụ ụ́moogh sịni, kụ omeeraam mọony amem bịn, kụ mem ọdegh ophogh bịn ọkanyanu.

¹⁴Bụphe ọghigh bọ ịizupha ịpa ogbo iitoor phọ, pọ ạbudi ọnaghan ọghaaph phọ, kụ ọtol pạ kụ igbiriḅa rꞌẹelha rꞌẹedugha aḅirini phọ ẹḅophoghan bịn ọghaaph phọ akurughan bịn iimuma phọ íbila.

¹⁵Bụeri phọ ọghigh bọ ịizupha ịpa aḍiiḅi ade phọ, pọ ạbudi ọnaghan ọghaaph phọ kụ ọsighe ọlogh iphooph iloghi ạbidi ọpam okananaam kụ ọmoogh ọkparam tụtu omuum iimuma.”

¹⁶“Oye ólho dị kạsu ọtozi kụ ạsighe ịyaar akpereghiom, ḅịle kẹn ạlogh ọdurukpata. Kạḅam ghan ghụn ạnyu ịidoony ịkasi, pịdi awe lọ oḍigh otu phọ ọmiin ghan eten.

¹⁷Ịyaar dị ookpereghi dị kéganana ílho; ịyaar dị ạaghian dị kọ́miin olegheri ílho.

¹⁸“Imiigha loor ịlo nyina rẹnaghan, ịdi eḍighi bọ nyọpo ạmoogh bọ Ẹnaan kẹloghonaan ni ọḅar, kụ ọpo ụ́moogh bọ ghạlamo ịyal-ikpo phọ ịpe ọdi ragbi bọ mọ ịlo ọno phọ Ẹnaan kẹbonyi ni.”

¹⁹Kụ onhiin phọ rꞌabumor phọ ạJizos uru ni kụ útue ụteeny nyọdi loor esi aḍita awe phọ,

²⁰kụ ọḅeni nyọdi mọ, “Onhiin rꞌabumor phọ ạna odi erugh rọwa ọmiin ạna.”

²¹Kụ ạJizos ạḅeni oomo phọ ạbidi mọ, “Onhiin ạmi rꞌabumor ạmi, pọ bụphe ọnaghan bọ ọghaaph phọ Ẹnaan kụ roḍighi ghan bọ.”

²²Eniin aḍio ạJizos rꞌạbumatuan phọ ọdi uḍigh ni ologhi oghuugh, kụ ọdi ạḅeni bịdi mọ, “Itu ọḅeeny ḍịeri phọ ạḍighaagh ọphiiny phọ.”

²³Kụ bịdi omitiom rọzoghi, kụ ạJizos ameel oḍigh ạralha. Kụ oboom oghim aghim, kụ ạmuum oologh aḍiku oghuugh phọ ramuza dị tụtu rạwa oḅi.

²⁴Kụ ạbumatuan phọ ọdi ọghi ọteeny nyọdi ọsumeeny kụ ọḅeni mọ, “Ọtughemia, Ọtughemia, ḅetenu yoor rope.” Kụ ạJizos aḅetenu ạḅeni oghim mọ rꞌọphiiny phọ mọ ẹpho, bịn ẹpho, kụ ọphiiny phọ aḅoorian bịn nam.

²⁵Kụ ọdi apuru bịdi mọ, “Omeeraam mọ anyina odi ghan ẹghen?” Kụ aruugu asiph bịdi, kụ iḍighi ni iikia esi ạbidi, kụ oniin apuru ghan nyoniin mọ, “Esi ịphen phọ, ọphon phọ ọghen ọdo oye, dị rạtooghi rạraar kạngo oghim mọ rꞌọphiiny phọ bịn kụ ẹnaghanan ni nyọdi?”

²⁶Kụ bịdi ụḍua ni Galili osi eelhe aGerasa ẹpe ẹḅeenyom ọphiiny phọ.

²⁷ẠJizos ạdaari ẹda rapun, bịn oniin uw-ẹlaal dị ịkaraph aruwaloor ẹrol ẹmhu phọ ạḍua sịphe ẹmha phọ amite azuan nyọdi. Mebia ni ọdi ạsuoma ọ́kpologhian ghan, otu órugh ghan, arugh ghan ẹpe ẹkaraph eḍum mọ bịn.

²⁸Ọkaraph uwaloor phọ ạsiiny ghan ni nyọdi dị ụ́gba ghan mem ọphaḍi ọdi kụ arunyian ghan izime phọ, ạḅile awunughi ghan igbaḅiri phọ. Kụ ọkaraph uwaloor phọ aphorogh ghan nyọdi asumeeny ẹpe ạradala phọ. Mem dị oye phọ ạmiin bọ Jịzos, ạlho ni amitiom kụ akpuḍian ghisigh ọdi kụ ạḅile ạlooghi mọ, “Jịzos, nạ Ọony Egbogh Ẹnaan phọ, nạ rụwa ghan ịmi eeghe ịyaar? Seseeny ni, ịmi kụ́miine.” Ọdi ạghaaph ịduon, ịdi eḍighi bọ ạJizos mạḅeni ọkaraph uwaloor phọ mọ amite loor oye phọ ạḍua.

²⁹

³⁰Kụ ạJizos apuru nyọdi mọ, “Ḍien ạna ughol ika?” Kụ ọdi aghola mọ, “Ḍien ạmi ughol mọ Ọoloogh,” ịdi eḍighi bọ ịbadi ịkaraph aruwaloor kụ iḍiku ni loor phọ ọdi.

³¹Kụ ịkaraph aruwaloor phọ ẹeḅereghian Jịzos mọ kúporogh bụno ụlogh ooni ạnian phọ.

³²Kụ aḍita arophoropo ịrol li sịphe ạnyu eegbolom mọ ẹḅal ghan ịḅal, kụ ịkaraph aruwaloor phọ ẹeḅereghian Jịzos mọ ọdi ameera ni mọ bụno oḍigh loor ạbidi. Kụ ọdi ameeraam.

³³Kụ ịkaraph aruwaloor phọ ẹḍua loor oye phọ emite ẹghi eḍiku loor arophoropo phọ, kụ arophoropo phọ eghiil esumughu ọphiiny phọ bịn ephe.

³⁴Kụ bụphe ropogh ghan bọ bịdi rọmiin bọ ịpe emite bọ, kụ oghiil ogheel, ọghaaph ịphen phọ oleenye ẹmha phọ rꞌạsiraaghana phọ.

³⁵Kụ awe ọghi ọmiin aani ịpe emite bọ. Kụ bịdi ọghi ọteeny Jịzos, kụ ọmiin dị ịkaraph aruwaloor phọ memite loor uw-ẹlaal phọ ẹḍua. Ọdi masereghian amuuna ukpe ạtol ude sịphe aruwol phọ ạJizos, kụ eḍigh ruugu esi ạbidi.

³⁶Kụ bụphe ọmiin aani bọ ọghaaph ọḅeni we ịdi uw-ẹlaal phọ ọpo aḍita ịkaraph aruwaloor phọ ẹrol ghan bọ ẹmhu phọ mamoon.

³⁷Kụ akuboom aruugu asiph ni oomo aweye eelhe phọ aGerasa etuman bọ pạ kụ ọoḅereghian mọ ạJizos ạwile bụno. Kụ ạJizos aḍigh ologhi oghuugh phọ kụ onyeene ogheel.

³⁸Kụ oye phọ ọpo ịkaraph aruwaloor phọ ẹrol ghan bọ ẹmhu phọ ạaḅereghian ịlo ọdaph aani ọdi. Kụ ạJizos ạḅeni nyọdi mọ,

³⁹“Keel kꞌanyina ạḅeni bịdi iboom mọ ịphen Ẹnaan meḍighi bọ nyịna.” Kụ ọdi agheel kụ ạghaaph oomo phọ ịpe ạJizos aḍighi bọ nyọdi aleenye ẹmha phọ.

⁴⁰Kụ ạJizos ạghi bọ asi, aḍita awe dị rokori ghan ọmiin ọdi ụghereghom ni nyọdi.

⁴¹Kụ oniin oye dị oghol mọ ạJairos, uwo ẹmhu obughotu ẹmha phọ ẹpe phọ, aru ni akpuḍian ruwol ạJizos, kụ ạaḅereghian mọ ọdi aru kꞌọno,

⁴²mọ ogina ọnyani ọno dị rạkiom ḍioph rꞌịyal ạsia ramugh. Ịdipho ạJizos ạḍua bọ rạki, awe phọ ukoom ni nyọdi ọtirighian ghan.

⁴³Sịphe ogbo awe phọ oniin ạnir rꞌẹmha ạnmariir ḍioph rꞌịyal ạsia. Ọdi malhiom ni oomo ikpoki ọdi rạghaagh ariil, kụ útue uḍume nyọdi.

⁴⁴Ọdi ạḍua ni ọman ạteeny Jịzos, kụ ạḅogh ḍịmaam ạsuoma phọ ọdi; kụ egina amem bịn ẹmha ạnmariir phọ ọdi ẹḍua.

⁴⁵Kụ ạJizos apuru mọ, “Ạnhian kụ ụḅogh bọ ịmi?” Oomo phọ ạbidi ụpharanaan ni, kụ aPita ạḅem mọ, “Ọtughemia kꞌạḍien kꞌạḍien ạbuen okoom bọ nyịna rꞌịtirighian phọ.”

⁴⁶Kụ ạJizos ạḅem mọ, “Oye ụḅogh ni ịmi. Itir ri ịmi mọ ịikpo mẹḍua loor ạmi.”

⁴⁷Kụ mem dị ạnir phọ alegheri bọ mọ ọno kátue mun ạbooghian phọ, aru ni rapiigha kụ akpuḍian ruwol ạJizos, kụ ạghaaph ịpe ọdi ạtuan bọ kụ ạḅogh bọ nyọdi, ḅịle rꞌịpe ọdi aḍum bọ egina phọ amem mọ.

⁴⁸Kụ ạJizos ạḅeni ạnir phọ mọ, “Nyạni phọ. Omeeraam mọ ạna maḍume nyịna. Keel rꞌedughom.”

⁴⁹Ọdi odi ni rạkaaph ghan ịduon phọ kụ oye ạḍua ẹpe kꞌuwo ẹmhu obughotu phọ aru ạḅeni Jạiros mọ, “Ọnyani phọ ạna mamugh. Kạ́aḅaghami mun ọtughemia phọ.”

⁵⁰Kụ ạJizos ạnaghan ni ịpe ọdi ạghaaph bọ, kụ ạḅeni Jạiros mọ, “Aruugu nyịna kúsiph. Mọogh omeeraam bịn. Ọnyani phọ kaḍum ni.”

⁵¹ẠJizos ạghi bọ asi otu phọ, ómeera mọ oye aḍigh aani emuton Pita rꞌaJems rꞌạJon, rꞌọde rꞌonhiin ọnyani phọ bịn.

⁵²Oomo phọ awe phọ romoghi yogh kophumugha rokpologhi, kụ ọdi ạḅem mọ, “Kémoghi mun. Ọnyani phọ ómugh, rạnaani ni.”

⁵³Kụ bịdi ọgilaam nyọdi, loor esi dị bịdi ulegheri ni mọ ọdi mamugh.

⁵⁴Kụ ạJizos rọpham ḍịghaagh ọdi kụ ạmagh mọ, “Nyạni phọ, ḅetenu.”

⁵⁵Kụ uwaloor phọ ọdi aḅula, egina amem bịn aḅetenu, kụ ạJizos ạḅeni bịdi mọ, “Ịngo ọnyani phọ ịyaar ole.”

⁵⁶Kụ ọde rꞌonhiin phọ ọdi omaghagha yogh, kụ ạJizos ạphur bịdi rụru mọ kụ́kaaph ịpe emite bọ ụḅeni oye.