Read abua Dutoronomi 14 Bible Online

Dutoronomi 14 - abua bible

Dutoronomi 14

¹“Nyina ạnmuny Ọmoogh-we Ẹnaan phọ anyina. Mem lọ oye amugh, kégbua ghan rẹlem ịdipho ạbunon awe; kéekporonaan ghan rụmhu anyina rꞌiidum ariḍien anyina,

²loor esi dị nyina awe iigbia kꞌỌmoogh-we Ẹnaan phọ anyina. Ọmoogh-we phọ mịsaḅar inyina aḍighi we phọ ọdi sịphe ogbo oomo areelhe phọ ọdi bọ sịen aḅirini phọ.

³“Tọrobo ịyaar lọ eḍighi ḅạphanya, íle ghan.

⁴Ịphen kụ ịnam dị nyina kẹba ghan: nạm, oyool-ọga rꞌạtu-ọga;

⁵ọnuen, ezoogh, ọoroogh, ạno, dịer, nạm eḍum rꞌẹekpoko.

⁶Tọrobo ẹnam lọ aruwol phọ ọdi edia ẹzaghagha kụ rekuḅa ghan kẹraala, ịphen kụ ịdi nyina kẹ́ba ghan.

⁷Kẹ́ba ghan ịnam mọ ịphen sịphe oomo ịnam mọ ịpe rekuḅa ghan bọ ni kẹraala kụ ẹzaghagha bọ kụ aruwol phọ ạbidi egophan bọ ni: kạmel, ẹkpeghenem, rakpogha. Bịdi rokuḅa ghan ni kẹraala kụ ụ́zaghagha kụ iḍighi bịdi ụ́ḅaal.

⁸Ophoropo kẹn, dị aruwol phọ ọdi edia ni kụ rákuḅa ghan kạraala, ọ́ḅaal; ị́ba ghan, ḅịle kẹn ị́ḅogh ghan ọlo mamugh.

⁹“Ịphen kụ ịdi nyina kẹba ghan esi oomo ịpe edi bọ ologhi ạmuum ọphiiny phọ: tọrobo ẹpe ẹmoogh bọ ịleem ẹmoogh ipholopol, pọ ịba ni.

¹⁰Kụ tọrobo ẹlo ị́moogh ịleem ị́moogh ipholopol, ị́ba ghan. Bịdi ụ́ḅaal esi anyina.

¹¹“Oomo ịnun phọ ịpe ẹḅaal bọ, ịba ni.

¹²Kẹ́ba ghan ịnun phọ ịphen: uga, ọoke, ạakpo, ọsighe-sigbem, eghulhe, ọdelhe rꞌọmar ọdi, tọrobo ẹghiligho rꞌọmar phọ ọdi, eekughum, kpekpereegh, ubereḍum rꞌọmar ọdi, ẹbam eekughum, rꞌegbogh eekughum, rꞌọowooph; ạkeledeeny, obar-uga rꞌobilogo; ọgbaghaghaany, ạbitesikiri, ọophu, ọgbom.

¹⁹“Oomo ạraraar phọ ịpe ẹmoogh bọ raphaaph kụ rẹpepheghuan bọ ịdipho asuogh-aben, kẹ́ba ghan. Bịdi ụ́ḅaal.

²⁰Oomo ịpheri phọ ịpe ẹmoogh bọ raphaaph ẹḅaal li. Ịba ni.

²¹“Tọrobo ịyaar lọ ogina ọdi apu bịn amugh, ị́ba ghan. Ịsighe ẹngaani ruuruen awe lọ ituman inyina bịdi ạa; kẹn ịsighe aalha we lọ ituman inyina, ịdi eḍighi bọ nyina awe iigbia kꞌỌmoogh-we Ẹnaan phọ anyina. “Ị́sighe ghan nmụny ọga emiim mạmaam onhiin phọ ạbidi ẹsaam.

²²“Ị́bile ghan odi eḍien phọ ẹpe nyina ebugha bọ sịphe iizo phọ anyina ḍioph abin phọ ẹlo ạlha rꞌạlha.

²³Kụ ẹrol sịphe egbodo Ọmoogh-we Ẹnaan phọ anyina kụ elhe, esi phọ ẹpe ọdi ạsaḅar bọ aseere ḍien phọ ọdi, muniin abin sịphe aḍioph phọ, mụo ịbiakpa, mụo avain, mụo ạmunum, rꞌabin ịḅel ạnmuny lọ ạsinam mọ anyina ẹmar, ịḅel ạnmuny phọ ịpe iyool-ịga phọ anyina ẹmar bọ. Ịtuugha oghueni ghan Ọmoogh-we Ẹnaan phọ anyina oomo amem.

²⁴Kụ eru mạar dị eten phọ ẹdoony ẹphughan dị nyina kétue etool dool etelhiom; eru mạar dị ekpisi phọ ẹkelan rꞌesi ẹpe Ọmoogh-we Ẹnaan phọ anyina ạsaḅar bọ aseere ḍien phọ ọdi; mem dị Ọmoogh-we Ẹnaan phọ anyina mịseph inyina,

²⁵pọ ịsighe etene ikpoki, kụ ẹghoroghi ikpoki phọ ẹpham ḍịghaagh ẹghimom esi phọ ẹpe Ọmoogh-we Ẹnaan phọ anyina ẹsaḅar bọ.

²⁶Ịdaph ghan ẹephua phọ anyina kụ elhiom ghan ikpoki phọ, mꞌịlo ạnam, mꞌịlo oyool-ọga, mꞌịlo amiim, mꞌịlo ạmuukpara amiim, tọrobo ịyaar phọ ẹpe rịphu bọ inyina, ẹrol egbodo Ọmoogh-we Ẹnaan phọ anyina kụ elhe ghan, kụ ẹmoogh iboh rꞌọḅaal ologhi, nyina rꞌọto anyina.

²⁷“Íkel ghan ọto aLivait phọ odi bọ sịphe ạramha phọ anyina, ịdi eḍighi bọ bịdi ụ́moogh aani bọ ẹmoogh ịdipho anyina.

²⁸“Tọrobo amem lọ mẹman ịraar ạsia, ikori ghan ẹsighe muniin abin phọ esi aḍioph abin phọ, ẹsighe eru oomo ịpe iizo phọ anyina esoor bọ lhạ phọ ạḍiphe kụ ẹsighe ẹde ghan sịphe ạramha phọ anyina.

²⁹Kụ bụo aLivait phọ, loor esi dị bịdi úpin aani bin ḅịle kẹn ụ́moogh aani bin ẹmoogh phọ ịdipho anyina, rꞌaruuruen phọ, rꞌịnyigo ạnmuny phọ rꞌarukpekele ạnmariir phọ, bụphe odi bọ sịphe ạramha phọ anyina, bịdi oru ọsighe olhe aani ẹpher bịdi, ọbo Ọmoogh-we Ẹnaan phọ anyina ạseph oomo arukumuan phọ anyina ịpe nyina ẹsighe bọ rạghaagh phọ anyina kụ ekumuanam.