Read abua Dutoronomi 15 Bible Online

Dutoronomi 15 - abua bible

Dutoronomi 15

¹“Kụ rẹman oḍual ạsia nyina kẹbilenaan ghan.

²Kụ eḍighinom ịyaar ọwilenaan ghan phọ ịduon: tọrobo ọnyo aHibru lọ nạ atene ọmugh, mꞌamatuman ạna mꞌumor ạna, pọ bịlenaan, kágun mun kạ́aḅaghami nyọdi, ịdi eḍighi bọ ọwilenaan phọ Ọmoogh-we phọ aganana ni.

³Kụ eru ooruen, pọ gun ni, kụ tọrobo ịlo umor ạna kụ ale ọmugh ḍịghaagh ạna, pọ sạr ạwilenaan.

⁴“Omuton dị uwekulom sịphe kꞌanyina úlho, pọ Ọmoogh-we phọ mịseph inyina iboom sịphe ade phọ ạḍiphe Ọmoogh-we Ẹnaan phọ anyina rịngo bọ inyina bin ẹmoogh ẹlo anyina.

⁵Eru mạar dị nyina esereghian ni kụ rẹnaghanam ni ẹḍogh phọ Ọmoogh-we Ẹnaan phọ anyina; eru mạar dị nyina esereghian ni kụ rẹdaph ni iilogh phọ ịphen mị ạlogh bọ rịngo inyina ḍio phọ arodon;

⁶Ọmoogh-we Ẹnaan phọ anyina kịseph ni inyina ịdipho dị iguanaan bọ inyina, kụ nyina kẹboologhi ni ịminighan areelhe, kụ nyina ọmugh ạbidi kéle. Nyina kụ kẹtooghi ghan rạraar ẹngo bịdi, bịdi kụ kọ́tooghi ghan rạraar ịngo inyina.

⁷“Eru mạar dị oniin umor ạna aḍighi uwekulom sịphe eniin ẹmha phọ anyina sịphe ade phọ Ọmoogh-we Ẹnaan phọ anyina rịngo bọ inyina, kạ́mooghom nyọdi ọkaraph ologhi; ụ́kul ghan ḍịghaagh ạna esi uwekulom umor phọ ạna.

⁸Poghoghomi rạghaagh ạna esi ọdi, kụ ạngo ghan nyọdi ịlo kẹgbaanyan nyọdi ịpe rẹeḅaghami bọ nyọdi, tọrobo ịlo ẹrol.

⁹Igona siloor anyina. Kẹ́moogh ẹḍim ologhi, ị́ḅem ghan mọ oḍual phọ ạsia phọ ạlha ọsar ọwilenaan phọ rẹebeeph, bịn ạwiliom riḍien uwekulom umor phọ ạna, bịn nyọdi ịyaar nạ ọ́ngo mun, kụ ọdi ạmagh Ọmoogh-we phọ asueniom nyịna, kụ eḍighi ịkaraph esi ạna.

¹⁰Ngọom ghan nyọdi rꞌophooph ologhi, úgum ghan sịphe ologhi phọ ạna mem lọ nạ rạngo nyọdi; ịdi eḍighi bọ Ọmoogh-we Ẹnaan phọ anyina kạtuan ni ịphen nạ aḍighi bọ kụ ạseph oomo arukumuan phọ ạna rꞌoomo ịpe nạ ạpham bọ raḍighi.

¹¹Ekulom kémuneen sịphe ade phọ kụ iḍighi kụ mị ạlogh bọ ologh phọ ọphon rịngo inyina: ḅạrion rạghaagh ạna esi umor phọ ạna ọpo ụ́moogh bọ rꞌesi uwekulom mọ ọpo odi bọ sịphe ade phọ.

¹²“Eru mạar dị ọsighe umor ạna kụ oola nyịna, mꞌoye ọlo aHibru mꞌạnir ọlo aHibru, pọ ọdi kakumu bọ nyịna odiiny ạsia, kụ rẹman oḍual ạsia, pọ bịle nyọdi dị ạḍua ạmoogha loor.

¹³Kụ ḍio phọ ạḍiphe nạ kạḅeni bọ nyọdi mọ dị agheel ạmoogha loor, ụ́bile ghan ịdipho nyọdi bịn dị agheel rꞌoopho ạraghaagh.

¹⁴Kịa sịphe asita ịga phọ ạna rꞌịsiphe ạsigba ịbiakpa phọ ạna, rꞌịsiphe avain phọ ạna, ạsighe ịminighan ạngaani nyọdi. Ịpe Ọmoogh-we Ẹnaan phọ anyina ạsighe bọ ạsephom nyịna kụ ịdi nạ kạsighe bọ ạngaani nyọdi.

¹⁵Kụ ẹetughian ghan mọ nyina iḍighi ni rẹbene ẹpe de phọ Ijipt. Ọmoogh-we Ẹnaan phọ anyina ịtagharan inyina kụ iḍighi kụ mị ạtu bọ ạlogh ologh phọ ọphon rịngo inyina rodon.

¹⁶“Eru mạar dị ẹbene ạḅeni nyịna mọ mị rạ́ḍua, loor ịdi nạ rꞌọto ạna rꞌạmi ọphomoghian, ịdipho dị rꞌạna ẹrolan bọ ni igey,

¹⁷pọ kori ạsighe ọsisi aphuurom aḅeri ọdi sịphe eghuugh phọ, pọ ọdi maḍighi ẹbene ạna kꞌagee-pọ; ịduon kẹn, mụghumo ẹbene-ạnir.

¹⁸Kị́kparanaan nyịna mem mọ nạ kạbile bọ nyọdi mọ agheel ạmoogha loor, ịdi eḍighi bọ arukumuan phọ ọdi akumu bọ nyịna esi odiiny ạsia phọ ẹman ịyal amem ịpe rọkpe ghan bọ oye lọ ophir oḍighinaan oḍighi, kụ Ọmoogh-we Ẹnaan phọ anyina kạseph ni nyịna esi oomo arukumuan phọ ạna.

¹⁹“Oomo ịḅel ilephiri phọ ịpe ạsinam mọ ạna kẹmar bọ, rꞌịḅel ilephiri iyool-ịga phọ ạna kẹmar bọ, sịghe ghan asipha Ọmoogh-we Ẹnaan phọ anyina. Ụ́sighe ghan ịḅel ilephiri phọ ịpe ạsinam mọ ạna kẹmar bọ aḍighinom ịyaar, ḅịle kẹn úsoph ghan ẹza ịḅel idughuna phọ iyool-ịga phọ ạna kẹmar bọ.

²⁰Nạ rꞌọto ạna kẹtol ghan egbodo Ọmoogh-we Ẹnaan phọ anyina kụ ele ghan ạlha etum lhạ, sịphe Ọmoogh-we Ẹnaan phọ anyina ạsaḅar bọ.

²¹Kụ eru mạar dị ẹnam meḍigh ẹgha, mꞌẹlo ariḍien meḅomoghian, mꞌẹlo mẹphuph, pọ kẹ́sighe eḍighinom ịyaar aghuḍum ẹngo Ọmoogh-we Ẹnaan phọ anyina,

²²pọ ịtol ẹpe ạramha phọ anyina kụ elhe. Bụo ọḅaal rꞌạbulo ụ́ḅaal, olhe ni ịdipho ezoogh rꞌịdipho ọnuen.

²³Kụ ọlo ị́ḅaram ghan ịḅaal phọ kụ ạa ghan. Ịsighe ghan ịḅaal phọ eeku ghan sịphe ade phọ ịdipho ạmuum.