Read abua Dutoronomi 19 Bible Online

Dutoronomi 19 - abua bible

Dutoronomi 19

¹“Mem dị Ọmoogh-we Ẹnaan phọ anyina kamutonaan kụ apiemi bọ reelhe phọ ịpe ade phọ ạḍiphe Ọmoogh-we Ẹnaan phọ anyina ịngo bọ inyina kụ nyina kẹboorom bọ bịdi kụ etugh sịphe ạramha phọ rꞌaruutu phọ ạbidi,

²ikori ẹgbatan ịraar ạramha eseere gem, ẹpe ade phọ Ọmoogh-we Ẹnaan phọ anyina ịngo bọ inyina ọmoogh phọ,

³eselemi reten phọ, edi ịraar abin de phọ ạḍiphe Ọmoogh-we Ẹnaan phọ anyina ịngo bọ inyina ọmoogh phọ, ọbo tọrobo oye lọ aghiigh oye aghiil ghan asuma ẹpe phọ.

⁴Oye lọ ạsighe elegheri kụ aghiigh matuman ọdi, dị útu mụlogh-ḍien ọdi, dị bịdi mạar úgbian, asuma ghan ẹpe phọ ạphela ghuḍum ọdi atene.

⁵Eru mạar dị oye rꞌamatuman ọdi ọghi ologhi ẹekpua ọso ịpe, kụ akubu phọ ạḅaphaan sịphe ḍịghaagh phọ ọdi mem mọ dị raler bọ ḍịpe phọ kụ ameelom matuman phọ ọdi kụ amugh, pọ ọdi asuma agheel eniin ẹmha ạbuo ạrookom-enu phọ ạphel ghuḍum ọdi atene,

⁶ọbo ọpo rẹkagh bọ ologhi kụ rạwa bọ oghiigh aani ọdi oḅulemian kaporogh ghan bọ ọokom-enu phọ ạteeny loor esi dị eten phọ ẹdoony bọ bịn akiigh nyọdi. Kụ ạri dị ọ́kpianaan omugh, loor esi ịdipho bịdi ụ́moogh bọ ịikonoghian, ḅịle kạ́mulogh ḍien ọdi.

⁷Kụ iḍighi, ụtuan ịphen phọ kụ ọlogh bọ ologh phọ ọphon rịḅeni inyina mọ ịgbatan ịraar ạramha eseere gem.

⁸“Kụ eru mạar dị Ọmoogh-we Ẹnaan phọ anyina ạbughe ịiku arere phọ anyina ịdipho dị aghunya bọ ạngo bụrude phọ anyina, kụ ịngo inyina oomo phọ ade phọ ạḍiphe ọdi aguanaan bọ ọngo ạburude phọ anyina;

⁹kụ eru mạar dị nyina keeko ghan ni iilogh phọ ịphen kụ ẹdaph ghan eḍighi, ịphen mị adoghoḍi bọ ḍio phọ arodon rịngo inyina, ọphomoghian Ọmoogh-we Ẹnaan phọ anyina, ọdaph ghan oomo areten phọ kụ orelhe, kụ ẹḅile ẹgbatan ịraar ịnon ạramha eseerian loor, ịḅel phọ ụ́loghom,

¹⁰ọbo kozu ghan bọ elegheri ịḅaal sịphe ade phọ Ọmoogh-we Ẹnaan phọ anyina ịngo bọ inyina ọmoogh phọ, ọbo kọsighe ghan bọ apum ozu ịḅaal ọḅam rụmhu anyina.

¹¹“Kụ eru mạar dị oye ạlogh matuman ọdi ḍien kụ aḅona rakori ghan nyọdi, kụ aḅetenu amite azuom nyọdi abenogh aghiigh, kụ asuma agheel eniin ạramha phọ ịphen,

¹²pọ ikumoor awe ịsiphe ẹmha phọ ọdi orom we ọghi osiph nyọdi oruomonaan nyọpo kaḅulemian bọ ịḅaal phọ ẹrol dị ọdi amugh aani.

¹³Kẹ́nma nyọdi ighirigiir, ọbo nyina egbuurogh elegheri ịḅaal phọ ẹsighe sịphe Ịzirel, ọbo ịnighenom inyina.

¹⁴“Kátuphuron ghan elegh ọku ade amatuman ạna ạsighe, nyọpo bụo aḍiodiidi phọ ogim bọ, sịphe ẹmoogh phọ ẹpe ketu bọ ẹlo ạna, ẹpe ade phọ Ọmoogh-we Ẹnaan phọ anyina rịngo bọ inyina ọmoogh phọ.

¹⁵“Oniin oye bịn kúḅetenu ghan ụ́gba uzuom oye ịdi dị ạmiin lọ asoor ologh, mꞌaḍighi ịkaraph. Ịyal awe mꞌịraar awe lọ ọmiin aani tọrobo ịkaraph lọ oye aḍighi, pọ pụruku aḍighiton phọ meganana.

¹⁶Kụ eru mạar dị oye aḅetenu kụ ạgba ọkpe bịn ạḅam ẹmhu oye ịpe ítu bọ ịne,

¹⁷pọ ịyal phọ ạbidi ọghi ọmeera egbodo Ọmoogh-we phọ risigh ariil ạrikia phọ rꞌabuugboom ịiruen, bụphe odi bọ mem mọ ạmuphe roḍighi ghan iiḍighi phọ ịphen.

¹⁸Abuugboom ịiruen omiigha loor ọwaaghi omitiom ọmiin mụghumo ạsiagba phọ ọpo ạḅem bọ mọ ọno kụ ạmiin phọ mọ ọkpe ni, dị ạgba ọkpe bịn ạḅam ẹmhu umor phọ ọdi.

¹⁹Pọ ịtuugh ịpe ọdi agbiighiom bọ mọ oḍighi umor phọ ọdi, eḍighi nyọdi. Iḍighi ghan ịduon ọbo ịkaraph ekunughian sịphe ogbo phọ anyina.

²⁰Bịn ạbueri phọ awe phọ kọnaghan bọ mọmoogh oghiilaan; bịn emiigh kꞌamem mọ ạmuphe kóḍighi ghan mun ọdo phọ ịkaraph phọ ịpe sịphe ogbo phọ anyina.

²¹Kẹ́nma ghan ighirigiir. Aghuḍum arelhian ghuḍum; ekpeḍien erelhian ekpeḍien; ọlaay arelhian ọlaay; ạḍighaagh erelhian ḍịghaagh, owol arelhian owol.