Read abua Dutoronomi 2 Bible Online

Dutoronomi 2 - abua bible

Dutoronomi 2

¹“Kụ yoor oḅula okiton ẹpe ẹdala phọ, ẹpe eten phọ rẹki bọ Ọphiiny Akaba, ịdipho Ọmoogh-we phọ ụḅeni bọ ịmi, kụ yoor ooghiraan ghan sịphe aroogbolom aIdom ịbadi asiḍughul-otu.

²“Kụ Ọmoogh-we phọ ạghaaph ụḅeni ịmi mọ,

³‘Nyina meyeela eeghiraan ghan sịen aroogbolom mọ ịphen ịdi mẹkasian; ikiton esoman ẹpe ephunom mọ.

⁴Lọgh ologh ạngo we phọ ạḅeni bịdi orelhe ẹpe ọku ade phọ ạnmuny phọ Ịso abumor phọ anyina, bụphe orugh bọ ẹpe Idom. Bịdi kighiilaan ni inyina, kụ ịmaar ẹphama siloor anyina.

⁵Kézuom bịdi ẹgham. Mị rị́ngo inyina de phọ ạbidi, ghạlamo rꞌẹlo ẹman ẹda owol, ịdi eḍighi bọ mị mạngo Ịso ẹpe ạraaḅaraph aIdom mọ ọdi ạmoogh; ẹpe phọ ẹlo ọdi.

⁶Ịsighe ni ikpoki eghoom eḍien lọ nyina kelhe ḍịghaagh ạbidi, ẹsighe ghan ikpoki eghoom ghan mụum lọ nyina kẹpughol.’

⁷“Ịitughian ịdi Ọmoogh-we Ẹnaan phọ anyina mạseph oomo iiḍighi ạraghaagh phọ anyina. Ọdi alegheri ni erelhe phọ anyina sịen eboom mọ ẹdala phọ ẹphen; esi inyadi ạsia phọ Ọmoogh-we Ẹnaan phọ anyina edianaan ni rꞌanyina, ịyaar inyina ki̋ku.

⁸“Kụ mem mọ yoor otenom bọ bumor phọ ayoor nmụny phọ Ịso bụphe orugh bọ ẹpe Idom, ẹpe eten phọ Araba oten Elat ẹpe Ezion Geber, kụ yoor oḅula okiton eten phọ nyẹpe ẹpe ẹdala phọ ạMoab.

⁹Kụ Ọmoogh-we phọ ụḅeni ịmi mọ, ‘Kẹ́eḅaghami we phọ ạMoab. Kézuom bịdi ẹgham ịdi eḍighi bọ mị inyina rꞌẹkpigh ade phọ ạbidi rị́ngo mọ ịmoogh, ịdi eḍighi bọ mị mạngo nmụny ạLot Ar mọ bịdi ọmoogh.’”

¹⁰(Geediidi awe Emim urugh ghan ni ẹpe phọ. Bịdi ịgbagara awe, ọbugh, oḍiza, ophophogh ịdipho awe phọ Anak.

¹¹Ogbiom aani we phọ aRefaim mọ arephelegbe ịdipho awe phọ Anak. Ạbuo ạMoab okol bịdi mọ Emim.

¹²Kẹn, ạbuo aHorait urugh ghan aani ni ẹpe Idom ḍiodiidi, kụ ạnmuny Ịso ạarom bịdi de phọ, oogulemi eelhe ạbidi kụ ọrol sịphe rꞌaloor, ịdipho awe Ịzirel oḍighi bọ ẹpe ade phọ bịdi ọmoogh bọ, ḍịphe Ọmoogh-we phọ ạngo bọ bịdi.)

¹³“Kụ mị ụḅeni ni we phọ mọ iḅerenu ọḍua sịen Ighool ạZered, kụ yoor otenom Ighool ạZered.

¹⁴Kꞌamem mọ yoor ọḍua bọ ẹpe Kades Bania oru osi Ighool ạZered mẹman ịraardi rꞌọphaanya ạsia, bịn oomo awe ẹgham mọ ayoor omuneen sịphe aḍita awe phọ ịdipho Ọmoogh-we phọ aghunya bọ.

¹⁵Ọmoogh-we phọ awiririom ni ḍịghaagh phọ ọdi bịdi, tụtu aphiemi bịdi ạmadan.

¹⁶“Mem mọ oomo awe ẹgham mọ momuughu bọ omuneen,

¹⁷kụ Ọmoogh-we ạghaaph ụḅeni ịmi mọ,

¹⁸‘Rodon nyina keten ẹpe Ar, ọku ade phọ ạMoab.

¹⁹Kụ mem lọ nyina ẹghi ẹteeny de ạnmuny Amon, ị́ki ghan ọwa asighiton esi ạbidi. Kézuom bịdi ẹgham, ịdi eḍighi bọ mị inyina kị́ngo rꞌẹkpigh ade phọ ạnmuny Amon, ịdi eḍighi bọ mị mạngo de phọ ạḍiphe nmụny ạLot, ạḍio ạbidi.’”

²⁰(Geediidi awe aRefaim urugh ghan ni de phọ ạḍiphe. Awe Amon phọ ughol bịdi mọ aZamzumim.

²¹Bịdi ịgbagara awe, oḍiza, opophogh ịdipho awe phọ Anakim, kụ Ọmoogh-we phọ aphiemi bịdi aagulemi egbodo awe Amon phọ, kụ bịdi ạarom bịdi de phọ orugh.

²²Ịdipho phọ ọdi aḍighi bọ nmụny phọ Ịso, bụphe orugh bọ ẹpe aroogbolom aIdom, mem mọ ọdi aphiemi bọ bụo aHorait egbodo ạbidi, kụ bịdi ạarom bọ de phọ kụ orugh bọ sịphe phọ kꞌarodon.

²³Kụ Avim mọ orughogh bọ ẹpe ạramha phọ ọghi osiemi ẹpe Gaza, bụo aKaftorim ọḍua ẹpe ekpu-ogbo phọ aKrit ọghi ophiemi bịdi, orughogh sịphe esoorom mọ.)

²⁴“Mem mọ yoor otenom bọ de ạMoab, Ọmoogh-we phọ ụḅeni iyoor mọ, ‘Iḅetenu emiigh erelhe, ikiton ẹḅeeny Ọphiiny Anon ephun. Mị mạḅogh rịngo inyina Sihon ọlo Ạmorait, ọdaam mọ aHesbon, rꞌade phọ ọdi. Imiigh ọsighe ade phọ ọdi. Izuom nyọdi ẹgham.

²⁵Mị mighol inyina rodon ḍien eegu dị oomo areelhe phọ edi bọ eeḍian ạke phọ kighiilaan ghan inyina. Bịdi ọnaghan ịlo anyina, kokpereghaan ghan ni kụ ẹeḅaghami bịdi loor ạrumhu anyina.’

²⁶“Ẹpe ẹdala phọ aKedemot kụ ẹdi mị arom bọ dom ạghiomonaan Sihon ọdaam mọ aHesbon ọghaaph ịlo ẹepho mọ,

²⁷‘Meera yoor ọḅeeny oten eelhe ạna. Yoor kotelhe onyeene bịn, eten phọ kọ́gbol.

²⁸Yoor kọkpe ni eḍien lọ yoor olhe rꞌạmuum lọ yoor ọphughol. Oomo ịdi yoor rọwa ọḅeeny oten eelhe phọ ạna,

²⁹tụtu yoor osi Ọphiiny Jọdan oḍigh de phọ Ọmoogh-we Ẹnaan phọ ayoor ịngo bọ iyoor. Ạnmuny ạnmuny phọ Ịso, bụphe orugh bọ ẹpe Idom, rꞌawe ạMoab, bụphe orugh bọ ẹpe Ar, umeera ni yoor ọḅeeny oten eelhe phọ ạbidi.’

³⁰“Kụ ọlo aSihon ọdaam mọ aHesbon ómeera mọ yoor ọḅeeny oten eelhe phọ ọdi. Ọmoogh-we phọ Ẹnaan phọ anyina ạngo nyọdi ọḅaar ẹmhu, ẹrol dị yoor ọkpar opu nyọdi kụ ọsighe de phọ ọdi, ḍịphe yoor odi bọ kꞌarodon.

³¹“Kụ Ọmoogh-we phọ ụḅeni ịmi mọ, ‘Mịin, mị mamiigh ọngo ạna Sihon rꞌade phọ ọdi edi bọ risigh anyina. Miigh ọmoogh. Nyina kụ kẹmoogh de phọ ọdi.’

³²Kụ aSihon aḅetenu aru uzuom iyira ẹgham, ẹpe Jahaz, ọdi rꞌoomo awe phọ ọdi.

³³Kụ Ọmoogh-we Ẹnaan phọ ayoor ạḅogh nyọdi ạlogh ḍịghaagh ayoor, kụ yoor oghiigh nyọdi kụ ọḅile ọze nmụny phọ ọdi rꞌoomo awe phọ ọdi.

³⁴Kụ yoor ọsighe oomo ạramha phọ ọdi mem mọ ạmuphe, kụ ophiemi nmạriir, lephiri rꞌịbam ạnmuny rꞌạramha phọ ẹpe phọ. Rꞌoniin yoor úsugheeny.

³⁵Yoor ọsighiogh ịnam-otu phọ ạbidi kụ orighelom, kụ owum ruphua sịphe ạramha phọ ạbidi.

³⁶Emiigh kꞌẹpe Aroer sịphe Eḍiiny Anon, rꞌẹmha phọ edi bọ sịphe ogbo eḍiiny phọ, ẹghi esi ọku ẹpe Gịliad, ẹmha ị́tol dị oghoonyom iikpe dị ụkparanaan iyoor dị yoor útue úḍigh. Ọmoogh-we Ẹnaan phọ ayoor ameera kụ yoor oḍigh ọsighiogh.

³⁷Kụ yoor ụ́ubeeph oomo phọ ạramha Amonait: rạmha phọ ịpe edi bọ iigbom Ọphiiny ạJabok ḅịle rꞌẹpe aroogbolom mọ, rꞌoomo arikpisi phọ ịpe Ọmoogh-we Ẹnaan phọ ayoor úgbiemi bọ iyoor.