Read abua Dutoronomi 20 Bible Online

Dutoronomi 20 - abua bible

Dutoronomi 20

¹“Tọro amem lọ nyina ẹghi ee ẹgham rꞌạbumulogh-ḍien phọ anyina kụ nyina ẹmiin rụsu-ịnam rꞌarughuugh-ude rꞌawe ẹgham mọ ạbidi ọbugh opu bụen anyina, kékiilaan bịdi, ịdi eḍighi bọ Ọmoogh-we Ẹnaan phọ anyina odi ni rꞌanyina, ọpo ịsighe bọ inyina ẹpe ade phọ Ijipt ạḍuanam.

²Mem lọ nyina mẹghi ẹtol repogh ẹgham mọ, kụ oyil ạrikia phọ amite ạghaaph ạḅeni we phọ mọ,

³‘Ịnaghan, nyina Ịzirel, nyina meḍuraan ẹebeeph rodon ee ẹgham rꞌạbumulogh-ḍien phọ anyina, obio anyina kúkaph, kékiilaan, kékpereghaan, kékiilaan bịdi,

⁴ịdi eḍighi bọ Ọmoogh-we Ẹnaan phọ anyina kụ rạki ni eenaan anyina bụmulogh-ḍien phọ anyina, ọphel anyina ọsighe.’

⁵“Kụ bụo ạrumhu ẹgham mọ ọghaaph opuru we phọ mọ, ‘Ạnhian oye kụ odi sịen dị ạlogh omoom otu kụ kọ̋ḅogh ọngo Ẹnaan? Pọ ọdi aḅula agheel kꞌọdi, ọbo ọdi kamugh ghan bọ ẹpe ẹgham mọ, bịn ọnon oye ạsighe otu phọ ọdi ạḅogh ạngo Ẹnaan.

⁶Ạnhian oye kụ odi sịen dị aḅeph ozo avain kụ kőlhe ebusi phọ? Pọ ọdi aḅula agheel kꞌọdi, ọbo ọdi kamugh ghan bọ ẹpe ẹgham mọ, bịn ọnon oye ale ozo phọ ọdi.

⁷Ạnhian oye kụ odi sịen dị matebeeny ḍịkala ạnir, kụ kọ̋sighe ạnir phọ osiom otu? Pọ ọdi aḅula agheel kꞌọdi, ọbo ọdi kamugh ghan bọ ẹpe ẹgham mọ, bịn ọnon oye ạsighe ọnyani phọ.’

⁸“Bụo ạrumhu ẹgham mọ ọḅile ni ọghaaph opuru mọ, ‘Ạnhian oye kụ odi sịen dị rakiil eepuph, obio rakaph? Pọ ọdi aḅula agheel kꞌọdi, ọbo iḅio abumor phọ ọdi kekaph aani ghan bọ ịdipho ọpo ọdi.’

⁹Kụ mem dị bụo ạrumhu ẹgham mọ mọghaaph ọmadan, ọḅeni we phọ mọ bịdi ọmaaghi bụo ịtooghi lọ koḍiemiom bọ we ẹgham mọ.

¹⁰“Mem lọ nyina ẹrol repogh ẹmha phọ ẹpe nyina rꞌạbidi kobe bọ ẹgham mọ, isu ghan ọghor edughom.

¹¹Kụ eru mạar dị ịphagharanaan inyina mọ edughom kụ ịrolonaan inyina, pọ oomo awe phọ ạbuphe odi bọ sịphe ẹmha phọ kiḍighinaan ghan inyina ọokpara oḍighi, ikumu ghan inyina.

¹²Kụ eru mạar dị bịdi ụ́wa ẹphomoghian kụ izuom inyina ẹgham, pọ bịdi rꞌanyina ibe ni ẹgham mọ.

¹³Kụ mem lọ Ọmoogh-we Ẹnaan phọ anyina arorori bịdi ạḅogh ạlogh rạghaagh anyina, pọ ịsighe ghan ẹdume elhool ẹgham mọ ẹziom oomo alephiri phọ ạbidi.

¹⁴Kụ nmạriir phọ rꞌịbam ạnmuny phọ rꞌạsinam mọ ạbidi edi bọ sịphe ẹmha phọ, rꞌoomo ạraraar phọ ịpe nyina ewum bọ, ịsighe aani, ekori ele rạraar ạbumulogh-ḍien phọ anyina nyina ewum bọ, ịpe Ọmoogh-we Ẹnaan phọ anyina ịngo bọ inyina.

¹⁵Ịduon kụ ịdi nyina keḍighi ghan oomo ạramha phọ ịpe ẹkelan bọ rꞌanyina, ịpe ítu bọ ịlo ẹphen.

¹⁶“Kụ rạmha awe phọ ạbuphe Ọmoogh-we Ẹnaan phọ anyina ịngo bọ inyina mọ ịmoogh phọ, ísugheeny ghan rꞌẹnum ịyaar lọ repooghu.

¹⁷Ekori ẹze oomo phọ ạbuen mị kạgo bọ ẹmadan: bụo ạHitait phọ, bụo Ạmorait phọ, bụo aKenanait phọ, bụo ạPerezait phọ, bụo aHivait, rꞌạbuo aJebusait, ịdipho Ọmoogh-we Ẹnaan phọ anyina ạto bọ ịḅeni inyina,

¹⁸ọbo bịdi kịtughemi ghan bọ inyina, bịn nyina ẹtuugh ẹdaph eḍighi aani sịḅaphanya phọ ịpe bịdi roḍighinaan bọ rụmugh phọ ạbidi.

¹⁹“Mem lọ nyina ẹrol repogh ẹmha lọ rꞌanyina ee ẹgham lọ ebia, kẹ́sighe akubu elereghiom ireeny ẹmha phọ, ịdi eḍighi bọ nyina kele ghan ni iimuma phọ. (Ireeny eḍum mọ káwe dị kizuom inyina ẹgham!)

²⁰Omuton ireeny phọ ịpe nyina elegheri bọ mọ role ghan, pọ ipiemi ni, elereghi esiphe ẹloghoḍiom riisi ạsidol ekoriom ghan ẹmha phọ ẹpe kọtu bọ izuom inyina ẹgham, tụtu dị emeel.