Read abua Dutoronomi 23 Bible Online

Dutoronomi 23 - abua bible

Dutoronomi 23

¹“Oye lọ aḍighima ịyaar ọghum ọdi kụ aḍigh ẹgha, mꞌọlo asopha ọghum ọdi, pọ ọdi kúḍigh aani ghan sịphe ookpomoghan iigbia phọ Ọmoogh-we phọ.

²“Ọony lọ ọde ọdi kụ nyọdi úmitiom, kúḍigh aani ghan sịphe ookpomoghan iigbia phọ Ọmoogh-we phọ. Ghạlamo ịman ḍioph oghiil ọdi, pọ ọdi kúḍigh ni sịphe ookpomoghan Ọmoogh-we phọ.

³“Ọlo Amonait rꞌọlo ạMoabait kúḍigh ghan sịphe ookpomoghan iigbia Ọmoogh-we phọ. Ghạlamo ịman ḍioph oghiil ạbidi, pọ ọlo aru ọlo oghiil ạbidi kúḍigh ghan sịphe ookpomoghan iigbia phọ Ọmoogh-we phọ, kꞌagee-pọ,

⁴ịdi eḍighi bọ bịdi ụ́pam eḍien rꞌạmuum oru izuan inyina eten, mem mọ nyina ẹḍua bọ ẹpe Ijipt; ịdi eḍighi bọ bịdi ụghi ophir Bẹlam ọony phọ aBior ẹpe Petor ẹpe Mesopotamia mọ aru irulughi inyina.

⁵Rꞌamem rꞌamem dị Ọmoogh-we Ẹnaan phọ anyina kẹnaghanan ịlo ạBelam ílho. Ọmoogh-we Ẹnaan phọ anyina kakiton ghụn itulughian phọ ọdi atene ḍịseph ịngo inyina, ịdi eḍighi bọ Ọmoogh-we Ẹnaan phọ anyina ịphomoghian inyina.

⁶Ị́wa ghan ẹphomoghian esi ạbidi mꞌẹelha ạbidi oomo asiḍughul-otu aghuḍum mọ anyina kꞌagee-pọ.

⁷“Ímutonaan ghan ọlo Idomait, ịdi eḍighi bọ bịdi abumor anyina; ímutonaan ghan ọlo Ijipt, ịdi eḍighi bọ nyina ịrol li iiruen ẹpe ade phọ ạbidi.

⁸Ịraar oghiil esi ạnmuny phọ ạbuphe ọmaranaan bọ bịdi, ọghi aani ghan ni ookpomoghan awe Ọmoogh-we phọ.

⁹“Mem lọ bụo ẹgham mọ ọghi ee ẹgham rꞌạbumulogh-ḍien phọ anyina, kụ bịdi mọḍua sịphe arugbogo phọ, pọ ịmaar ghan ẹphama siloor anyina, ọbo ẹḍua esi ịkaraph.

¹⁰Eru mạar dị oye dị ụ́ḅaal, loor ịdi emiteghunaan nyọdi ḍughul, odi sịphe ogbo phọ anyina, pọ ọdi ạḍua agheel ẹpe ọman arugbogo phọ, kúḅula ụ́ubeeph sịphe arugbogo phọ.

¹¹Kụ rẹteeny dulhe ọdi ạghi awura mụum, kụ ẹnam-aḍio remeel ighool kụ ọdi arigheel sịphe arugbogo phọ.

¹²“Ikori ẹmoogh esi dị oye lọ ạḍua sịphe arugbogo phọ anyina kạki ghan ạni rịir.

¹³Ikori ẹmoogh ẹsua sịphe ạraraar phọ anyina, kụ mem lọ nyina ẹrol ẹpe erugh kụ amunum rịphu inyina, ekori ghan ẹsighe eguphom epogh kụ emunum; ekori ghan eekpereghi rịir phọ anyina,

¹⁴ịdi eḍighi bọ Ọmoogh-we Ẹnaan phọ anyina ratelhe yogh ghan ni sịphe ogbo arugbogo phọ anyina, ọphel anyina rꞌọḅogh bụmulogh-ḍien phọ anyina ọngo anyina. Kụ iḍighi arugbogo phọ anyina eseleman ghan, dị kụ́miin sịphe arugbogo phọ rạraar lọ ị́nighe ogbo anyina, ọbo ọdi kịḅitonaan ghan bọ inyina.

¹⁵“Káḅulemi ghan ẹbene lọ ẹḍua kꞌọde-otu phọ ọdi esuma erigheel kꞌạna ạghiomonaan ọde-otu phọ ọdi.

¹⁶Ọdi arugh sịphe kꞌạna sịphe ogbo phọ anyina, esi lọ ọdi azua sịphe ạramha phọ anyina, esi phọ ẹpe ẹḅeeraan bọ nyọdi.

¹⁷“Oye Ịzirel, mꞌọnyani mꞌọony, kúseere ghan loor ọdi dọl iigbia kụ aḍigh oliom ẹmha.

¹⁸Kẹ́sighe ghan ikpoki dị ọkpe ọnyo akunakuna, mꞌikpoki lọ oghoom ghoogh, eḍighom sịphe otu iigbia Ọmoogh-we Ẹnaan phọ anyina, ọkpiom ịlo nyina eguanaan. Ịyal phọ ikpoki phọ ịphen ạḅaphanya ni esi Ọmoogh-we Ẹnaan phọ anyina.

¹⁹“Kạ́logh ghan ọḅar ikpoki lọ nạ ạale umor ạna. Mꞌọḅar ikpoki mꞌọḅar ịyaar olhe, mꞌạtorobo ịyaar lọ nạ ạale umor ạna kụ rọlogh ghan ọḅar, kạ́logh.

²⁰Kụ eru ooruen, pọ lọgh ni ọḅar. Kụ eru umor ạna, pọ kạ́logh ọḅar, ọbo Ọmoogh-we Ẹnaan phọ ạna ạseph nyịna sịphe oomo arukumuan phọ ạna, ẹpe ade phọ nyina rẹki bọ ọmoogh phọ.

²¹“Tọro amem lọ nạ aguanaan Ọmoogh-we Ẹnaan phọ ạna ịyaar, kạ́bile ghan ọkpe ịpe nạ aguanaan bọ, ịdi eḍighi bọ Ọmoogh-we Ẹnaan phọ ạna kapuru ni nyịna ịpe nạ aguanaan bọ nyọdi.

²²Kụ eru mạar dị nạ úguanaan, pọ kị́karaph esi ạna, íbeeph.

²³Ịpe ẹḍua bọ ọnhu phọ ạna kụ emite, pọ pạmanaan ịpe nạ ạḅem bọ ạtuugh aḍighi, ịdipho nạ aguanaan bọ; mụghumo ịyaar aghuḍum ophooph ologhi, pọ ạtuugh aḍighi ịdipho nạ aguanaan bọ Ọmoogh-we Ẹnaan phọ ạna, ịpe nạ ạsighe bọ ọnhu phọ ạna aguanaan.

²⁴“Eru dị nạ ạghi ozo ịghol amatuman, pọ le ni iimuma avain phọ ẹpher nyịna, ịdipho rẹphu bọ nyịna, kụ ọlo ụ́sighe ghan iniin ụlogh okuru ạna.

²⁵Mem lọ nạ ạghi esi lọ ịizupha amatuman ạna ẹmeregha bọ, pọ sịghe ḍịghaagh ạna kụ ạkuom iimuma phọ; kạ́sighe epeke kụ abeneghom ịbiakpa amatuman ạna dị ẹmeregha.