Read abua Dutoronomi 24 Bible Online

Dutoronomi 24 - abua bible

Dutoronomi 24

¹“Eru mạar dị oye aphin ạnir kụ ạmiin mọ ạnir phọ ọ́nighe ẹzo ọmaar dọl, kụ ạḅamanaan ạnir phọ ikpoki, kụ ạngo ạnir phọ ḍịnya ọgbaranaan ạḅam ikpoki kụ ạḅeni ạnir phọ mọ ạḍua kꞌọno;

²kụ eru mạar dị ạnir phọ ạghi ạal ịnon ilom,

³kụ ạnir phọ olhom mọ ọdi ọphon kẹn ụḅeeraan kụ ạḅamanaan ạnir phọ ikpoki, aporogh ạnir phọ mọ ạḍua kꞌọno; kụ eru mạar dị olhom mọ ọdi ọphon phọ amugh,

⁴pọ ọḅel olhom ạnir phọ ọpo ạḅamanaan bọ ạnir phọ kụ́sighe mun ạnir phọ ọpo phọ úpin, ịdi eḍighi bọ ịphen phọ mẹphue ạnir phọ, ịdi eḍighi bọ mụen phọ ạḅaphanya ni esi Ọmoogh-we phọ. Kéḍighi ghan ịlo nyina kẹpue de phọ ạḍiphe Ọmoogh-we Ẹnaan phọ anyina ịngo bọ inyina ọmoogh.

⁵“Oye lọ pụruku aphin omoom ạnir, oye phọ ọpo ẹgham kụ́ki, ḅịle kẹn kẹ́ngo nyọdi ịyaar oḍighi, dị ạrol ẹereegh ḍiniin ạlha ạghelom omoom ạnir phọ ọdi ọpo ọdi aphin bọ.

⁶“Oye kụ́sighe ghan odo phọ ọpo rokumom ghan bọ eḍien mụghumo etubuo phọ ụ́pagh; ịdipho phọ, pọ ọdi ạsighe ghuḍum oye kụ ạpagh.

⁷“Eru mạar dị nyina esiph oye dị ami oniin umor ọdi sịphe awe phọ Ịzirel kụ rạkpiloghom dịadi ẹbene, mụghumo ạsighe kụ aal, pọ ikiigh ọḅa phọ ọpo.

⁸“Igona siloor anyina esi ẹzegh ọku ufe. Ịmaar egona loor, ẹdaph ghan ịpe ariil ạrikia aLivait phọ ịḅeni bọ inyina, kụ eḍighi ghan ịpe mị rạḅeni bọ bịdi rodon kụ eḍighi ghan.

⁹Ịitughian ghan ịpe Ọmoogh-we Ẹnaan phọ anyina aḍighi bọ Mịriam ẹpe eten phọ, mem mọ nyina ẹḍua bọ ẹpe Ijipt.

¹⁰“Umor ạna lọ ạale nyịna tọrobo ịyaar, ụ́ki ghan kꞌọdi ạsighe ịyaar phọ ẹpe nạ ạphaghan bọ nyọdi.

¹¹Mẹera ẹpe erugh kụ oye phọ ọpo alhe bọ ọmugh phọ ạna kụ aḍigh otu ạsighe ạngo nyịna.

¹²Eru mạar dị oye phọ aru uwekulom, pọ ụ́minanam ghan ịyaar phọ ọphaghan bọ.

¹³Tọrobo ịlo ẹrol, tụtu ẹnam-aḍio remeel ighool, kori ạsighe ịyaar phọ ọphaghan bọ aḅulemi ạghiom nyọdi, ọdi akori ạminanam rukpe phọ ọdi kụ ạseph nyịna. Ịphen phọ kẹḅeeraan ni Ọmoogh-we Ẹnaan phọ ạna.

¹⁴“Kạ́kpiloghom ghan uwekulom oye lọ nạ aphir oḍighinaan ạna oḍighi, mọ ọdi umor ạna mꞌooruen lọ odi sịphe ade phọ ạna, sịphe ạramha phọ anyina.

¹⁵Remunughan ḍio phọ ạḍiphe rọkpe ghan bọ nyọdi ikpoki phọ, bịn ạkpe nyọdi ikpoki phọ ọdi; kákori tụtu ẹnam-aḍio emeel ighool, loor esi dị ọdi uwekulom dị aseere ologhi ọdi sịphe, ọbo ọdi kaghol ghan bọ nyịna amoghi asueniom Ọmoogh-we phọ; bịn eḍighi nyịna ịkaraph.

¹⁶“Kẹ́tuan ghan ịkaraph ạnmuny ẹze bụrude; ḅịle kẹn kẹ́tuan ịkaraph ạburude ẹze nmụny. Tọrobo oye katelhian ghan rꞌịkaraph ọdi.

¹⁷“Kẹ́tu ghan mọ ọdi ooruen bịn enme ịiruen; ḅịle mọ ọnyigo bịn enme ịiruen akeel phọ ọdi. Kẹ́sighe ghan rukpe ekpukele ạnir ẹphagh.

¹⁸Ịitughian ghan mọ nyina iḍighi ni rẹbene ẹpe Ijipt, kụ Ọmoogh-we Ẹnaan phọ anyina ịtagharan inyina ẹsighe. Kụ iḍighi kụ mị ạtu bọ rịḅeni ghan inyina mọ íḍighi ghan ịphen phọ.

¹⁹“Mem lọ nyina reegbo ịbiakpa sịphe iizo phọ anyina kụ nạ awula ḍịgba ịbiakpa sịphe ozo phọ ạna úḅula ghan ụsighe, bịle dị ẹrolonaan ruuruen phọ, ịnyigo ạnmuny phọ rꞌarukpekele ạnmariir phọ, ọbo Ọmoogh-we Ẹnaan phọ anyina ạseph oomo arukumuan ạraghaagh phọ anyina.

²⁰Mem lọ nyina rẹkuughi iimuma ọliv, ị́ḅaram ghan iimuma ịpe ogbogh ọla phọ ẹkuom, ịbilenaan ịpe phọ ruuruen phọ, ạbunyigo ạnmuny phọ rꞌarukpekele ạnmariir phọ.

²¹Mem lọ nyina reekpomoghi ibusi iizo ịghol phọ anyina, kẹ́ekpanion oomo phọ ịdi, isughenaan ịpe phọ ruuruen phọ, bụnyigo ạnmuny phọ rꞌarukpukele ạnmariir phọ.

²²Ịitughian ghan mọ nyina iḍighi ni rẹbene ẹpe Ijipt. Kụ iḍighi kụ mị ạlogh bọ ologh phọ ọphon ịngo inyina mọ iḍighi ghan ịduon phọ.