Read abua Dutoronomi 28 Bible Online

Dutoronomi 28 - abua bible

Dutoronomi 28

¹“Eru mạar dị nyina ẹnaghanan ni ẹḍogh Ọmoogh-we Ẹnaan phọ anyina kụ eeko ghan iilogh phọ ọdi, ịphen mị ạlogh bọ rịḅeni inyina rodon, pọ Ọmoogh-we Ẹnaan phọ anyina kiphoophe ni inyina apuemi oomo ịpheri phọ areelhe ịsien aḅirini phọ,

²Eru mạar dị nyina ẹnaghanan ni ẹḍogh Ọmoogh-we Ẹnaan phọ anyina, pọ oomo phọ ạḍiseph phọ ạḍien keḍighi ḍịo anyina, ịmooghom inyina.

³“Ạḍiseph kịrolonaan ghan ni inyina sịphe ạramha phọ. Ạḍiseph kịrolonaan ghan ni inyina ẹpe iizo phọ.

⁴“Ọmoogh-we phọ kạseph ni ọophi ạnmuny phọ anyina, rꞌariḍien iizo phọ anyina, sịnam mọ rꞌiyool-ịga phọ anyina.

⁵“Ọmoogh-we phọ kạseph ni rugunum mọ anyina rꞌạrodo phọ ịpe nyina rekumogh ghan bọ eḍien.

⁶“Ạḍiseph kịrolonaan ghan ni inyina mem lọ nyina edi ologhi otu. Ạḍiseph kịrolonaan ghan ni inyina mem lọ nyina emite erugh.

⁷“Ọmoogh-we phọ katulughi ni mụlogh-ḍien anyina bụphe oḅetenu bọ bịn izuom inyina, kọze ni bịdi ọmadan risigh anyina. Bịdi kokiton eniin eten kụ otu izuom inyina, kụ osumughu sịphe arisigh phọ anyina oḍual areten ọḍuaghu.

⁸“Ọmoogh-we phọ kạlogh ni ologh ạngo ḍịseph phọ ọdi inyina, rꞌoomo arukue phọ anyina, rꞌoomo arukumuan phọ anyina, kụ dị ịseph inyina ẹpe ade phọ Ọmoogh-we Ẹnaan phọ anyina ịngo bọ inyina.

⁹“Ọmoogh-we phọ kimitiom ni inyina agananami nyina eḍighi we iigbia phọ ọdi, ịdipho dị aghunya bọ ịngo inyina, dị nyina eeko ni iilogh Ọmoogh-we Ẹnaan phọ anyina kụ ẹdaph reten phọ ọdi kụ retelhe.

¹⁰Kụ oomo awe ịsien aḅirini phọ ọmiin mọ ụsighe ḍien phọ Ọmoogh-we phọ kụ ịmagham inyina, kụ bịdi ighiilaan ghan inyina.

¹¹Ọmoogh-we phọ kịbughe ni inyina ịngo inyina edughom, rꞌọophi anyina, rꞌọophi ạsinam mọ anyina, rꞌariḍien ịsiphe ade phọ, ḍịphe Ọmoogh-we phọ aghunya bọ esi ạburude phọ anyina ọngo anyina.

¹²Ọmoogh-we phọ kighughuronaan ni inyina ogey otu ikpoki phọ ọdi ẹpe kꞌạke, kụ ọlophia ạloph sịphe ade phọ anyina mem mọ ọdi, kụ ạseph oomo arukumuan ạraghaagh phọ anyina, kụ nyina kụ keteneghi ghan ịimugh ịnon ạramha, nyina ọmugh kéle ghan.

¹³Ọmoogh-we phọ kiḍighi ni inyina ikpolom awe; nyina kéḍighi ighiil awe. Nyina eganana emitiom ḍien, nyina kẹ́tol eeḍian ạbunon, dị nyina keeko ni iilogh phọ Ọmoogh-we Ẹnaan phọ anyina, ịpe mị ạlogh bọ ologh ịngo inyina rodon. Igona loor ẹtuugh ghan kụ ẹdaph eḍighinom.

¹⁴Ị́bile ghan ịphen mị rịḅeni bọ inyina rodon, ẹgbatanaan ẹghi ḍịghaagh elhiom mꞌạḍighaagh ekeeny, ẹghi ẹeḅereghi, eeseeny ghan ịnon ạrumugh.

¹⁵“Eru mạar dị nyina rẹ́naghanan ghan ẹḍogh phọ Ọmoogh-we Ẹnaan phọ anyina kụ nyina ísereghian kụ réḍighi ghan oomo ịpe edi bọ sịphe iilogh phọ ọdi rꞌịtooghi phọ ọdi, ịphen mị ạlogh bọ ịngo inyina rodon, pọ oomo itulughian phọ ịphen kisoroghuom ni inyina, ịmooghom inyina.

¹⁶“Itulughian kịrolonaan ghan ni inyina sịphe ạramha phọ. Itulughian kịrolonaan ghan ni ẹpe iizo phọ.

¹⁷“Ọmoogh-we phọ katulughi ni rugunum mọ anyina rꞌạrodo phọ ịpe nyina rekumogh ghan bọ eḍien.

¹⁸“Ọmoogh-we phọ katulughi ni ọophi ạnmuny phọ anyina, rꞌariḍien iizo phọ anyina, rꞌạsinam mọ rꞌiyool-ịga phọ anyina.

¹⁹“Iitulughian kịrolonaan ghan ni inyina mem lọ nyina edi ologhi otu. Iitulughian kịrolonaan ghan ni inyina mem lọ nyina emite erugh.

²⁰“Ọmoogh-we phọ katom ni itulughian rꞌọwalawala rꞌọgbaragbara etu isoroghuom inyina sịphe oomo arukumuan phọ anyina, tụtu nyina eegulaan epe egina amem, loor ạsipioghom mọ anyina, ịdi eḍighi bọ nyina mighel ịmi.

²¹Ọmoogh-we phọ katom ni ẹepoph dị reeteneghian ghan isoorom inyina; dị kile inyina ephiemi sịphe ade phọ nyina rẹki bọ ọmoogh phọ.

²²Ọmoogh-we phọ kạsighe omineniom, osipheeny ọghola, rꞌẹghologhol, kụ ịguroghom inyina, ạsighe ogogo, oghim rꞌọogbi ade kụ ọmiiniom inyina tụtu nyina eguul epe.

²³Ọlophia kạ́loph mun kụ ade phọ anyina ẹkpar ịdipho okuron.

²⁴Ọmoogh-we phọ kaḍighi ịdi ọlophia phọ rạloph ghan bọ sịphe ade phọ anyina keḍighi ọoru rꞌophugh kụ ạḍua ẹpe kꞌạke phọ ịlophom ghan inyina tụtu nyina eguul epe.

²⁵“Ọmoogh-we phọ kaḍighi ni ịdi ạbumulogh-ḍien phọ anyina kọkpar ipu inyina. Nyina kekiton eniin eten kụ ẹki ozuom ạbidi, kụ nyina kesumughian oḍual areten kụ ẹḍuaghu, kụ imutonaan inyina sịphe oomo areelhe ịsien aḅirini phọ.

²⁶Kụ mem lọ nyina emugh, aḍizu phọ anyina keḍighi eḍien ịnun rꞌilhom ịnam mọ.

²⁷Ọmoogh-we phọ kạsighe rufuku phọ Ijipt, rọko, ḍịkpabala rꞌẹruphe dị nyina kétue eekonoma, kụ ịguroghom inyina.

²⁸Ọmoogh-we phọ kạsighe ẹlaal rꞌoḅomoghian ariḍien rꞌologhi dị ụ́gbeme ghan, kụ ịguroghom inyina.

²⁹Kụ nyina eeba ghan ootaany ịdipho oye lọ ariḍien eḅomoghian raaba ghan bọ ḍughul, kụ inyina kịnighenom oomo areten phọ anyina; ẹlo kịnighenom inyina ílho, kụ nyina ẹtol dọl ịminimiin, ẹkigh oye lọ rozirion ghan rạraar ọdi kọsighiogh oomo amem. Oye inyina ḍịghaagh kị́lhoghonaan.

³⁰“Nyina kepinogh ni nmạriir kụ ạbunon awe rꞌạnmariir phọ anyina kụ kọtolan ghan esi. Nyina kedoghoḍi ni ruutu kụ nyina kétugh. Nyina kẹzuph ni ịghol, kụ nyina kụ kéle ibusi phọ.

³¹Kọze ghan ni sịnam mọ anyina risigh anyina. Nyina ẹmiin ni kụ nyina kẹ́ba aani ghan. Kosiph ni ịnam adool phọ anyina risigh anyina ọḍuanam, kụ kóḅulemi irom inyina. Kosiph ni iyool-ịga phọ anyina ọngo bụmulogh-ḍien phọ anyina, kụ oye inyina ḍịghaagh kị́lhoghonaan.

³²Kotu ni sịphe risigh anyina kụ osiphi nmụny phọ anyina rꞌạnmanyaan phọ anyina ọngo bụnon awe, kụ nyina keyaghagha yogh ni bịn. Ị́kigh ịyaar esi anyina, igbiririph ílho. Nyina kẹwa bịdi oomo asuḍughul-otu phọ bịdi úlho bọ. Nyina kẹ́moogh ịikpo omirighan ạbidi.

³³Eelhe dị nyina ílegheri kụ kole ghan riiḍien iizo phọ anyina rꞌoomo arukumuan phọ anyina; kụ nyina ẹtol ghan dọl oye lọ roogbegheḍiom, rꞌoguuleeny oye, oomo asuḍughul-otu aghuḍum mọ anyina.

³⁴Loor ịpe phọ nyina rẹmiin bọ, nyina kẹkigh ghan ịdipho oye lọ raaphedu.

³⁵Ọmoogh-we phọ kạsighe rufuku dị keḅologh ruukum anyina rꞌaruwol anyina kụ ịguroghom inyina, ịdi kótue iikonom inyina, emiigh kꞌẹpe ạrada aruwol phọ anyina esiemi kꞌẹpe ọkeeghi ẹmhu phọ.

³⁶“Ọmoogh-we phọ kịsighe ni inyina rꞌọdaam mọ ọpo nyina ẹdaami bọ sịphe ẹmha phọ anyina ạsighe ạki ẹmha dị nyina rꞌạburude phọ anyina úlegheri; kụ nyina ẹtol ẹpe kụ ẹeḅereghi ghan, eeseeny ghan rụmugh dị ọsighe ireeny rꞌạrana kụ ọkaam.

³⁷Kụ nyina eḍighi ighiil awe, we dị kodoghom ghan sidogh rꞌawe dị kọgilaam ghan, ẹpe oomo ạramha phọ Ọmoogh-we phọ kirorori bọ inyina ẹsighe ẹki.

³⁸“Nyina keḅephogh ghan ni ẹminighan eḍien sịphe iizo phọ anyina, kụ nyina ebugha ghan ẹphurukpu bịn. Igurubia kụ kele ghan eḍien phọ anyina ephiemi.

³⁹Nyina kẹzuph ni ịminighan avain eselemi, kụ nyina kụ kẹ́pughol ghan miim mọ; ḅịle kẹn nyina kụ iimuma phọ kéle ghan. Ạsileegbem kụ kele ghan avain phọ epiemi.

⁴⁰Nyina kẹzuph ni ọliv eleeny oomo ịiku ade phọ anyina, kụ nyina kụ kégbula elho phọ ọdi, ịdi eḍighi phọ iimuma ọliv phọ anyina kẹekaraghan ni bịn.

⁴¹Nyina kẹmaraghi ni nmạnyaan rꞌalephiri, kụ nyina kụ kẹ́kelom bịdi, ịdi eḍighi bọ kosiphi ni bịdi ọsighiogh.

⁴²Oomo ireeny phọ rꞌariiḍien phọ edi bọ sịphe ade phọ anyina, igurubia kụ kele epiemi.

⁴³“Ooruen phọ ọpo odi bọ rꞌanyina kụ kaḍum ghan ipu inyina, kụ nyina esoorom.

⁴⁴Oye phọ ọpo phọ kụ ọdi nyina kele ghan ọmugh; ọdi ọmugh phọ anyina kále ghan. Ọdi kụ kaḍighi uwo ẹmhu anyina, kụ nyina ẹtol eeḍian ọdi.

⁴⁵“Oomo ọkaraph ọghor phọ ọphon isu bọ inyina kịdaph ghan ni inyina ạteeny isoroghuom inyina, iphiemi inyina, ịdi eḍighi bọ nyina ị́naghanan ẹḍogh phọ Ọmoogh-we Ẹnaan phọ anyina ooko ghan iilogh phọ ọdi rꞌịtooghi phọ ọdi, ịpe ọdi ạlogh bọ ịngo inyina.

⁴⁶Kisoroghuom ni inyina eḍighi eḍeenaan rꞌịiḍaany kụ ẹtol ọophi anyina kꞌagee-pọ,

⁴⁷ịdi eḍighi bọ nyina ị́sighe ọḅaal ologhi rꞌogey ologhi kụ reeseenyom ghan bọ Ọmoogh-we Ẹnaan phọ anyina loor ẹeḍiom mọ anyina emuza bọ.

⁴⁸Kụ iḍighi, nyina kekumu ni bụmulogh-ḍien phọ anyina, bụphe Ọmoogh-we phọ katom bọ oru ozuom anyina. Kụ ọkoony, ẹḍogh ạmuum, ẹdaḅa oomo phọ ạraraar phọ ịphen kikuom ni inyina kụ ọsighe ẹemor ayon odoghoḍi irum anyina tụtu nyina eguul epe emuneen.

⁴⁹Ọmoogh-we phọ kạsighe ni eelhe ẹpe egher ekpisi otu izuom inyina ẹpe eekuna aḅirini phọ, eelhe dị rẹpepheghuan ịdipho uga, eelhe dị nyina kẹ́naghan ịpe bịdi rọḅa bọ,

⁵⁰eelhe dị eḍigh ruugu, eelhe dị rọ́logh ghan okumoor oye eegu, rọ́nma ghan ọbumoony ighirigiir.

⁵¹Kụ bịdi ọba ghan nmụny ịnam-otu phọ anyina, rꞌariiḍien ịsiphe ade phọ anyina, tụtu nyina eguul. Ḅịle kẹn, bịdi kị́wilenaan inyina ịbiakpa phọ rꞌamiim mọ, rꞌạmunum mọ, rꞌạnmuny lọ ạsinam mọ anyina ẹmaraghi, rꞌạnmuny iyool-ịga phọ anyina, tụtu bịdi iphiemi inyina ẹmadan.

⁵²Bịdi kisophoghom ni inyina sịphe oomo ạramha phọ anyina, tụtu iiphopha ikpakara iikpe phọ ịpe nyina eḍuom bọ ologhi emeleghu sịphe oomo ade phọ anyina, ḍịphe Ọmoogh-we Ẹnaan phọ anyina ịngo bọ inyina.

⁵³“Loor esi ẹgham mọ rꞌịminimiin phọ ịpe ạbumulogh-ḍien phọ anyina kịmiine bọ inyina mem mọ bịdi oko bọ okitonom rạmha phọ anyina, nyina kẹba ghan iphulupul ạnmuny phọ anyina rꞌạnmanyaan phọ anyina, bụphe Ọmoogh-we Ẹnaan phọ anyina ịngo bọ inyina.

⁵⁴Kẹteeny mem dị oye phọ ọpo ạmoogh bọ ophooph ologhi inmo sịphe ogbo phọ anyina kápoghom ghan mun egey ekpeḍien umor ọdi rꞌạnir ọdi rꞌạnmuny ọdi, bụphe osughanaan bọ nyọdi.

⁵⁵Kụ ẹteeny mem dị ọdi kạ́ngo ghan mun rꞌoniin ọnyo ạbidi iphulupul ạnmuny phọ ọdi ịpe ọdi rạba bọ, loor esi dị ịyaar lọ esughanaan nyọdi ílho. Ẹgham mọ mạarom nyọdi kụ ọdi odi dọl ịminimiin. Ịduon kụ ịdi ạbumulogh-ḍien phọ anyina kịmiine inyina.

⁵⁶Kẹteeny mem dị ạnir phọ ọpo ạmoogh bọ ophooph ologhi inmo sịphe ogbo phọ anyina kápoghom ghan mun egey ekpeḍien olhom ọdi rꞌọony ọdi rꞌọnyani ọdi

⁵⁷rꞌạbuphe ọḍua bọ ni sịphe ọkuruḅaka phọ ọdi kụ omite, rꞌạbuphe ọdi kụ ạmar bọ ni. Loor esi ekuom oomo ạraraar, ọdi kạbooghian ghan kụ ạbaanaan loor. Ẹgham mọ mạarom nyọdi kụ ọdi odi dọl ịminimiin. Ịduon kụ ịdi bụmulogh-ḍien phọ anyina kịmiine inyina.

⁵⁸“Eru mạar dị nyina ísereghian kụ réḍighi ghan oomo ikpo ọnhu iilogh phọ ịphen ọge bọ sịen ạḍinya phọ ạḍien, nyina ímeera oghiilaan ghan aḍien arughuenian phọ Ọmoogh-we Ẹnaan phọ anyina eḍigh bọ ruugu,

⁵⁹pọ Ọmoogh-we phọ kạsighe ni iboom ịminimiin dị kisoroghuom inyina rꞌạnmuny phọ anyina, ịminimiin dị ẹphughan, ịminimiin dị kẹtol bịn, rꞌiboom ạreezegh dị kẹtol bịn, kẹ́ḍua.

⁶⁰Kụ ọdi ạsighe oomo ạreezegh phọ Ijipt iḍighi yogh inyina, ịpe nyina eghiilaan bọ kụ iḍighi inyina.

⁶¹Oomo ạreezegh phọ rꞌịminimiin phọ ịpe ụ́ge bọ sịen ạḍinya iilogh phọ ạḍien, Ọmoogh-we phọ katom ni, kụ etu iḍighi yogh inyina tụtu nyina eguul.

⁶²Nyịidipho nyina eḍiza ịdipho ạraanaan phọ edi bọ kꞌạke phọ, kụ Ọmoogh-we Ẹnaan phọ anyina kighome inyina, ịdi eḍighi bọ nyina ị́naghanan ẹḍogh phọ ọdi.

⁶³Ịdipho Ọmoogh-we phọ ạmoogh bọ ḍịḅeeraan kụ iḍighi ghan bọ inyina igey, ịbughe inyina; ịdipho kụ ịdi Ọmoogh-we phọ kạsighe ni ḍịḅeeraan kụ iphiemiom inyina kụ ịkam inyina atoḅologhi ẹpe ade phọ nyina rẹki bọ oḍigh ọmoogh.

⁶⁴“Ọmoogh-we phọ kịwalami ni inyina aleenye oomo arikpisi, emiigh kꞌeekuna aḅirini phọ ẹphen ẹghi esiemi nyẹeri phọ eekuna phọ; kụ nyina ẹtol ẹpe phọ kụ ẹeḅereghi ghan ịnon ạrumugh ireeny rꞌạrana, dị nyina rꞌạburude phọ anyina úlegheri.

⁶⁵Ẹpe ạramha phọ ịpe, obio anyina kạ́po ghan. Nyina kẹ́moogh ghan esi ọdaphari ẹda owol anyina. Ọmoogh-we phọ kịngo inyina ẹpe phọ ologhi okpereghaan ghan rꞌọnmanaghian ghan ịḅagi rꞌamukum ologhi, ogbiriḅa ghan.

⁶⁶Nyina ghuḍum mọ anyina esi kẹ́kpaariom ḍughul rꞌootaany. Nyina kẹtol ghan dọl okpereghaan bịn. Nyina kẹ́moogh oḍuom ologhi ghuḍum mọ anyina.

⁶⁷Ḍịroor nyina kẹḅem ghan mọ, ‘Ọbo aḍughul,’ ḍughul nyina kẹḅem ghan mọ, ‘Ọbo ạḍiroor,’ loor eepuph phọ rꞌaruugu phọ odi bọ sịphe iloghi phọ anyina, ḍịḅaal phọ ạḍiphe ariḍien ịḅagi phọ anyina rẹmiin bọ loor ịkaraph phọ ịpe nyina rẹmiin bọ.

⁶⁸Ọmoogh-we phọ kịsighe inyina ạsaany oghuugh ạsighe aḅulemi ẹpe Ijipt; erelhe dị ọdi iguanaan inyina kụ ạḅem mọ nyina kételhe mun nyẹen rꞌẹnum. Kụ nyina ẹtol ẹpe phọ kụ ẹsighe siloor phọ anyina ẹwaam ghan esi ạbumulogh-ḍien phọ anyina oye lọ kigho inyina rẹbene, lephiri rꞌạnmariir, kụ oye inyina rígho.”