Read abua Dutoronomi 3 Bible Online

Dutoronomi 3 - abua bible

Dutoronomi 3

¹“Ẹdi etum, yoor oḅula okiton ẹpe eten ẹlo ạBasan, kụ Ọdaam Ọg ạBasan aru uzuom iyoor ẹgham. Ọdi rꞌoomo awe phọ ọdi eeghiom iyoor ẹgham esi dị etuman ẹmha Edrei.

²Kụ Ọmoogh-we phọ ụḅeni ịmi mọ, ‘Kákiilaan nyọdi, ịdi eḍighi bọ mị kạngo ni nyịna nyọdi rꞌoomo awe phọ ọdi rꞌade phọ ọdi. Ḍighi nyọdi ịdipho nạ aḍighi bọ Sihon ọdaam mọ Ạmorait, ọpo arugh bọ ẹpe Hesbon.’

³“Kụ Ọmoogh-we phọ ạḅogh Ọg ọdaam mọ ạBasan rꞌoomo awe phọ ọdi ụngo iyoor mọ ọze ọmadan, mọ rꞌoniin oye kúsugheeny.

⁴Kụ yoor ọsighe oomo ạramha phọ ọdi mem mọ ạmuphe; ẹmha ísugha dị yoor ụ́sighe, odiinydi ạramha, ẹpe matuman Argob rꞌoomo eelhe phọ Ọg ọdaam mọ ạBasan.

⁵Oomo ạramha phọ ịphen phọ ughoonyom iikpe dị ephophogh, ọḅol okitonom ẹmha phọ, ịnhu-aḍibuo rꞌịkasiom ạramha dị úkoony ị́bugh.

⁶Kụ yoor ophiemi oomo ạramha phọ ạbidi, kụ yoor ọze lephiri rꞌạnmariir rꞌạnmuny phọ ạbidi, ịdipho yoor oḍighi bọ Sihon ọdaam mọ aHesbon.

⁷Kụ oomo ịnam mọ ạbidi rꞌạraraar phọ ịpe yoor owum bọ, yoor ụpham ni orighelom, eḍighi ịlo ayoor.

⁸“Mem mọ ọpo phọ yoor ụsighiogh rạghaagh ịyal phọ ạbudaam mọ Ạmorait de phọ ạḍien edi bọ ẹpe ạga emitenom erumuḍio phọ Ọphiiny ạJodan, emiigh ẹpe Ọphiiny Anon ẹghi esi ẹpe Eegum ạHermon.

⁹(Awe aSaidon ughol ghan Hẹrmon phọ mọ aSirion, kụ Ạmorait phọ oghol ghan mọ Senir.)

¹⁰Kụ yoor ọsighe oomo ạramha ẹpe ẹdala phọ, rꞌoomo phọ ẹpe Gịliad, rꞌoomo phọ ẹpe Bạsan, ẹghi esi Saleka rꞌEdrei, rꞌoomo areelhe phọ Ọdaam Ọg ạBasan ạda bọ.”

¹¹(Oniin phọ Ọdaam Ọg ạBasan bịn kụ asugha sịphe oomo arephelegbe phọ. Ẹmina phọ ọdi ẹlo okuron; ạḍidoony phọ ẹman inya akuḅu, ẹreghe phọ ẹkiom ịyal akuḅu. Ẹmina phọ ọdi edi nịiniin ẹpe Raba. Ạbuo Amonait phọ kụ ụmoogh ghan.)

¹²“Kụ ade phọ yoor ọmoogh bọ mem mọ ạmuphe phọ, emiigh ẹpe ạga ephunom ẹmha phọ Aroer etuman bọ ẹpe Ọphiiny Anon, rꞌạpakiri ạḍighaagh ẹpe aroogbolom ạGiliad, rꞌạramha phọ ẹrol bọ ẹpe kụ ịdi mị ạngo bọ eghun aRuben rꞌeghun ạGad.

¹³Kụ mị ạngo pạkiri eghun phọ ạManase de phọ ạḍiphe ẹpe Gịliad esugha bọ rꞌoomo phọ ạBasan ḍịphe oghol bọ mọ ade arephelegbe phọ rꞌeelhe phọ ẹpe Argob Ọdaam Ọg ạda bọ.

¹⁴“AJair ọony phọ ạManase kụ ạsighe oomo ạramha phọ Argob ẹghi esi ẹpe ọku ade ạbuo aGesur rꞌạbuo aMaaka, kụ ạsighe ḍien ọdi kụ agholom ẹpe phọ mọ ạBasan Havot Jair kꞌarodon.

¹⁵“Mị ụsighe Gịliad ạngo ọto aMakir ọlo eghun ạManase.

¹⁶Eghun aRuben rꞌeghun ạGad mị ụngo de, emiigh Gịliad kụ esi Ọphiiny Anon. Ogbo ọphiiny kụ aḍighi ọku ạga esoorom mọ, kụ Ọphiiny ạJabok dị ạkuan aani de Amonait kụ aḍighi ọku ạbidi ạga ephunom mọ.

¹⁷Mị ụngo kẹn ni bịdi ạga emitenom Ọphiiny ạJodan, emiigh Ọphiiny aGalili ẹghi esi Ọphiiny-Ạla phọ, kụ ẹteeny zin Eegum aPisga ạga emitenom erumuḍio phọ.

¹⁸“Eniin amem mọ mị ụḅeni ni bịdi ịtooghi phọ ịphen: ‘Ọmoogh-we phọ Ẹnaan phọ anyina mịngo inyina de phọ ạḍien ạga emitenom ạJodan mọ ịtol. Nyịidipho ịnyaaghian ịlo ẹgham ẹḅeeny ephun ḍịeri phọ ạḍighaagh phọ kụ ekori ghan ịpheri phọ arughunughun phọ Ịzirel ọloghonaan ạḍighaagh bịdi kọrol de phọ ạbidi.

¹⁹Ạnmariir anyina bịn, rꞌịbam ạnmuny rꞌịnam mọ — mị alegheri ni mọ nyina ẹmoogh iboom ịnam — kụ kosugha ọman sịphe ạramha phọ mị mịngo bọ inyina.

²⁰Ịloghonaan ḍịghaagh bumor anyina we Ịzirel tụtu bịdi osi ọsighe de phọ ạḍiphe Ọmoogh-we Ẹnaan phọ anyina rạngo bọ bịdi ẹpe ạga emeelom ạJodan, kụ tụtu Ọmoogh-we phọ mạngo bịdi ọgel ọrol rꞌẹepho ịduon ọdi maḍighi bọ sịen ịngo inyina.’

²¹“Mị ụlogh ni ologh ạngo Josua mem mọ ạmuphe ạḅeni nyọdi mọ, ‘Tụ, nạ ạsighe riḍien ạna ạmiinom oomo ịpe Ọmoogh-we Ẹnaan phọ ạna aḍighi bọ ịyal phọ ạbudaam mọ: ịdipho kụ ịdi Ọmoogh-we phọ kạtuugh aḍighi tọrobo oye bụlo nạ aḍighom de phọ.

²²Kékiilaan bịdi loor esi dị Ọmoogh-we Ẹnaan phọ anyina kieenaan ni inyina.’

²³“Mem mọ ọpo mị ụkar kụ ạaḅereghi mọ,

²⁴‘Ẹnaan oomo ịikpo, Ọmoogh-we, mị alegheri ni mọ nạ muḍeenaan ịmi emiighom mọ bịn esi igbogh iḍighi phọ ạna, rꞌạḍighaagh iphelegbe phọ ạna, ẹghen ẹmugh kụ edi aani ẹpe kꞌạke, mꞌịsien aḅirini phọ, dị ketue ẹtuugh aani ịphen nạ raḍighi bọ kụ eḍighi aani, ẹḅile eleeny aani ịdipho ạna?

²⁵Meera mị ụḅeeny ụki ụmiin aani ḍiiḅi ade phọ, ẹpe ẹḅeenyom mọ ạJodan, ịma aroogbolom mọ rꞌaruugum mọ ạLebanon.’

²⁶“Kụ loor ạrumhu anyina Ọmoogh-we phọ ụghagham ịmi ologhi bịn ịmi ụ́naghanan. Kpạripe ghụn, ọdi ạḅem mọ ‘Ịphen mẹkasian. Kákol mun ịphen.

²⁷Sịiny ọkar ạnyu Eegum aPisga ạnmanaghian aphogh ekeeny, aphogh elhiom, aphogh risigh, aphogh ọman. Mạar anaan ịyaar lọ nạ ạmiin, ịdi eḍighi bọ nạ rạ́ḅeeny kaphun Jọdan phọ.

²⁸Tomoghiom Josua, ạkparami oḅio ọdi, ạngo nyọdi ịnyaam. Ọdi kụ kaḍiemiom we phọ ạbuen ạḅeeny ọsighe ọtol de phọ nạ kạmiin bọ.’

²⁹“Kụ yoor ọrol sịphe eḍiiny phọ repogh bọ ẹmha Bẹt Pior.”