Read abua Dutoronomi 30 Bible Online

Dutoronomi 30 - abua bible

Dutoronomi 30

¹“Nyịidipho mị mịsu inyina ooḅi ọghor rꞌọkaraph ọghor ophin. Mem lọ nyina ẹteeny reelhe phọ ịpe Ọmoogh-we Ẹnaan phọ anyina kiphorogh bọ inyina kụ oomo ạraraar phọ ịphen isoroghuom inyina, ịitughian ghan sịphe iloghi phọ anyina.

²Mem ḍi nyịna ekiton eḅula esi Ọmoogh-we Ẹnaan phọ anyina, ẹnaghanan ghan ẹḍogh phọ ọdi, kụ ẹdaph ghan oomo phọ iilogh phọ mị ạlogh bọ ịngo inyina ḍio phọ arodon.

³Pụruku Ọmoogh-we Ẹnaan phọ anyina kiḅulemi inyina ḍigbaany ạdol ẹelha phọ anyina, kụ Ọdi ịnma inyina ighirigiir, kụ Ọdi aakpomoghi bụphe Ọdi ạwalalami bọ ịnon areelhe phọ aḅulemi.

⁴Ghạlamo rꞌạbuphe ophorogh bọ ọwalami ọsighe ọghi eekuna aḅirini phọ, pọ Ọmoogh-we Ẹnaan phọ anyina kạki ni ẹpe phọ aakpomoghi bịdi ạsighe aḅulemi.

⁵Kụ Ọmoogh-we Ẹnaan phọ anyina ịsighe inyina asiemi ẹpe ade phọ ạḍiphe ạburude phọ anyina ọmoogh bọ, kụ nyina ẹmoogh, kụ ọdi iḍighi inyina iiḅi kụ nyina ẹmaraghian epu bụrude phọ anyina.

⁶Kụ Ọmoogh-we Ẹnaan phọ anyina aḍunogh iloghi phọ anyina rꞌiloghi ạnmuny phọ anyina, ọbo nyina ẹphomoghian Ọmoogh-we Ẹnaan phọ anyina rꞌoomo iloghi phọ anyina rꞌoomo aruwaloor phọ anyina, ọbo ẹrol ebia.

⁷Kụ Ọmoogh-we Ẹnaan phọ anyina ạsighe oomo itulughian phọ ịphen ạḅam rụmhu ạbumulogh-ḍien phọ anyina rꞌạbuphe nyina ekia bọ kụ rẹgbiphoghom bọ inyina.

⁸Kụ iḅula ẹnaghanan ghan ẹḍogh Ọmoogh-we phọ, eeko ghan oomo iilogh phọ ịphen mị ạlogh bọ ịngo bọ inyina rodon.

⁹Kụ Ọmoogh-we Ẹnaan phọ anyina kiḍume inyina ạbalabalami, oomo iiḍighi ạraghaagh phọ anyina rꞌọophi anyina, rꞌạnmuny anyina, rꞌạsinam anyina, rꞌịizupha ịsiphe ade phọ anyina. Ọmoogh-we phọ kạḅile ni ạmoogh ḍịḅeeraan anyina, ịbughe inyina, ịdipho dị ạmooghom bọ bụrude phọ anyina ḍịḅeeraan phọ,

¹⁰eru mạar dị nyina kẹnaghanan ni ẹḍogh phọ Ọmoogh-we Ẹnaan phọ anyina, kụ eeko ghan iilogh phọ ọdi rꞌịtooghi phọ ọdi ịphen ọge bọ sịen ạḍinya iilogh phọ, kụ nyina ekiton esoman Ọmoogh-we Ẹnaan phọ anyina rꞌoomo iloghi phọ anyina rꞌaruwaloor phọ anyina.

¹¹“Iilogh phọ ịphen mị ạlogh bọ ịngo inyina ḍio phọ arodon, ị́booghian esi anyina ị́kel esi anyina.

¹²Ílho ẹpe kꞌạke ọbo nyina kẹḅem ghan mọ, ‘Ạnhian kụ kạki bọ ẹpe kꞌạke phọ ạsighe uruomonaan iyoor, ọbo yoor ọnaghan ọtuugh oḍighi?’

¹³Kẹn, ílho ẹpe ẹḅeenyom ọphiiny phọ, ọbo nyina kẹḅem ghan mọ, ‘Ạnhian kụ kạḅeeny bọ ọphiiny phọ ạsighe uruomonaan iyoor ọbo yoor ọnaghan ọtuugh oḍighi?’

¹⁴Eeye, ọghaaph phọ ọphon phọ ituman ni inyina, odi ni sịphe ịnhu phọ anyina, rꞌịsiphe iloghi phọ anyina, dị nyina mịdaph ghan ni eḍighi.

¹⁵“Ịmiin, mị miseenaan inyina ḍio phọ arodon ghuḍum rꞌẹelha, ḍuugh rꞌịkaraph.

¹⁶Mị ụtuan ịphen phọ kụ ạlogh bọ iilogh phọ ịngo inyina ḍio phọ aḍien arodon phọ mọ ịpomoghian Ọmoogh-we Ẹnaan phọ anyina, ẹdaph ghan reten phọ ọdi kụ erelhe ghan, eeko ghan iilogh phọ, ịtooghi phọ, rꞌịiruen phọ ọdi, ọbo nyina ẹrol ẹmaraghian, ọbo Ọmoogh-we Ẹnaan phọ anyina ịseph inyina ẹpe ade phọ nyina rekeel bọ ọmoogh.

¹⁷Kụ eru mạar dị iloghi phọ anyina enmia kụ nyina ị́naghanan kụ ẹḍua ẹghi rẹeḅereghi reeseeny ghan ịnon ạrumugh,

¹⁸pọ mị rịḅeni ni inyina rodon phọ aḍien mọ nyina keegulaan ni bịn epe, asiḍughul-otu phọ anyina kẹ́doony ẹpe ade phọ ạḍiphe nyina ẹḅeeny bọ Jọdan ephun rẹki bọ ọmoogh phọ.

¹⁹Mị ạmagh kẹ phọ rꞌade phọ mọ oḍighi bụdi kọgba ịphen mị rịḅeni bọ inyina rodon. Mị miseenaan inyina ghuḍum rꞌaḍuugh, ḍịseph rꞌitulughian. Kụ iḍighi, ịsaḅar ghuḍum mọ ạkuphe nyina rꞌạnmuny phọ anyina keḍum bọ.

²⁰Ịpomoghian Ọmoogh-we Ẹnaan phọ anyina, ẹnaghanan ghan ẹḍogh phọ ọdi, eḍighom nyọdi, ịdi eḍigh bọ dị kụ aghuḍum mọ anyina rꞌạḍikpo phọ anyina, ọbo erugh sịphe ade phọ ạḍiphe Ọmoogh-we phọ aghunya bọ ạngo bụrude phọ anyina Ebraham, Ạizik rꞌạJekob ọngo ạbidi.”