Read abua Dutoronomi 31 Bible Online

Dutoronomi 31 - abua bible

Dutoronomi 31

¹Kụ aMozis ạḅile ạghaaph ikpo ọnhu phọ ịphen ạḅeni oomo Ịzirel mọ,

²“Rꞌarodon mị mạman bọ oniin okuron rꞌịyaldi ạsia, kụ mị kátue mun akiraan, kẹn, Ọmoogh-we phọ mụḅeni ịmi mọ mị kạ́ḅeeny Jọdan apun.

³Ọmoogh-we Ẹnaan phọ anyina kiḍiemiom inyina apiemi oomo areelhe phọ ịpe edi bọ risigh anyina, kụ nyina kụ kẹmoogh bịdi, kụ aJosua kụ kiḍiemiom inyina, ịdipho Ọmoogh-we phọ ạḅem bọ.

⁴Ọmoogh-we phọ kaḍighi bịdi ịdipho ọdi aḍighi bọ Sihon rꞌạOg bụdaam mọ Ạmorait rꞌade phọ ạbidi mem mọ ọdi aphiemi bọ bịdi.

⁵Ọmoogh-we phọ kịngo ni inyina bịdi. Ịdaph oomo iilogh phọ ịphen mị ạlogh bọ ịngo inyina kụ ẹtuugh eeko bịdi.

⁶Ịkparami siloor anyina, ẹmoogh ạkpo ologhi, kékiilaan, kẹ́moogh eepuph, ịdi eḍighi bọ Ọmoogh-we Ẹnaan phọ anyina kụ kiḍiemiom ni inyina. Ọdi inyina kị́wile, inyina kíghel.”

⁷Kụ aMozis ạmagh Josua sịphe ogbo aḍita awe phọ Ịzirel kụ ạḅeni mọ, “Kpạrami loor ạna, ẹmoogh ạkpo ologhi. Nạ kụ kạsighe we phọ ạbuen asiemi ẹpe ade phọ Ọmoogh-we phọ aghunya bọ ạngo bụrude phọ ạbidi ọngo ạbidi; nạ kụ kạsighe bịdi asiemi bịdi ọmoogh.

⁸Ọmoogh-we phọ kụ kaḍiemiom nyịna. Ọdi kạrolonaan ni nyịna. Ọdi nyịna kạ́wile, nyịna kámutonaan. Kákiilaan, ḅịle kạ́moogh eepuph.”

⁹Kụ aMozis ạge ologh phọ ọphon ạngo riil ạbuo aLivait, bụphe ọpham bọ Igbe Ịyo phọ Ọmoogh-we phọ, rꞌoomo ikumoor awe phọ Ịzirel.

¹⁰Kụ aMozis ạlogh ologh ạngo bịdi mọ, “Tọrobo amem lọ oḍual phọ ạsia phọ memunughan, eekuna ạlha ọsar ọwilenaan ịmugh phọ, mem mọ ạmuphe ogu bọ, mem mọ oomo phọ anyina Ịzirel ẹki ghan emite egbodo Ọmoogh-we Ẹnaan phọ anyina rele ghan bọ ẹyaal arubughotu phọ, sịphe esi phọ ẹpe Ọmoogh-we phọ ạsaḅar bọ, ịbal ghan ologh phọ ọphon ẹḅeni oomo Ịzirel bịdi ọnaghan.

¹²Kụ eekpomoghi ghan oomo awe phọ, lephiri rꞌạnmariir, rꞌịbam ạnmuny rꞌaruuruen phọ odi bọ sịphe ạramha phọ anyina, ọbo bịdi ọnaghan ọtuugha oghueni Ọmoogh-we Ẹnaan phọ anyina ogona siloor, ọtuugh ghan oḍighi oomo ịpe ologh phọ ạḅem bọ.

¹³Kụ ạnmuny phọ ạbidi, bụphe kőlhegheri aani ịphen phọ, ọnaghan ọtuugha oghueni Ọmoogh-we Ẹnaan phọ anyina, oomo amem mọ ạmuphe nyina kẹtol bọ ẹpe ade phọ ạḍiphe nyina kẹḅeeny bọ Jọdan epun ọghi ọmoogh phọ.”

¹⁴Kụ Ọmoogh-we phọ ạḅeni Mozis mọ, “Nạghan, asiḍughul-otu ạna mẹebeeph dị nạ kamugh. Mạgh Josua mọ tue. Ịki eḍeenaan loor anyina sịphe Ogbogo phọ mị ụlogh ologh ạngo nyọdi.” Kụ aMozis rꞌaJosua ọghi sịphe Ogbogo phọ oḍeenaan loor ạbidi.

¹⁵Kụ Ọmoogh-we phọ aḍigh ekpoogh ọotu amite sịphe obughotu aruupuruan phọ, kụ ọotu phọ ẹmeera sịphe ọman eghuugh Ogbogo phọ.

¹⁶Kụ Ọmoogh-we phọ ạḅeni Mozis mọ, “Rẹteeny dị nạ kạnaani rꞌạburude phọ ạna, kụ awe phọ ạbuen kụwile ịmi oyeela ọdaph rụmugh aruuruen ade phọ ạḍiphe bịdi rọki bọ ọḅophoghan phọ, kụ ughel ịmi kụ ọphue ịyo phọ ạmi ịpe mị rꞌạbidi oghiran bọ,

¹⁷kụ mị ạkagham bịdi ologhi ḍio phọ ạḍiphe, kụ mị akel bịdi, kụ mị ạbooghi risigh ạmi esi ạbidi, kụ ọminogh bịdi. Kụ ọdo kịrokiro ịminimiin rꞌịkaraph esoroghuom bịdi, kụ bịdi ọḅem ghan ḍio phọ ạḍiphe mọ ịkaraph phọ ịphen ịtu ika kụ risoroghuom bọ iyira, ịdi eḍighi bọ Ọmoogh-we phọ ólhoonaan mun rꞌayira.

¹⁸Kụ mị ạkaraghi ạbooghi ghisigh ạmi ḍio phọ ạḍiphe, loor esi oomo ịkaraph phọ ịpe bịdi oḍighi bọ, loor esi dị bịdi mokiton osoman ịnon ạrumugh.

¹⁹“Kụ iḍighi, gẹ ḍụor phọ ạḍien nyịidipho, ạsighe ạtughemi we phọ Ịzirel, ạsighe ạlogh ịnhu ạbidi. Ạḍuor phọ ạḍien eḍighi oye dị kạgba ghan ịpe eru bọ ịne sịphe ogbo awe phọ Ịzirel.

²⁰Mem dị mị ạsighe bịdi asiemi ẹpe ade ẹetool rꞌọninom, ḍịphe mị aghunya bọ ạngo bụrude phọ ạbidi, bịdi role rẹpher rọbughogh bịn bịdi okiton osoman ịnon ạrumugh kụ ooseeny ghan ụḅitonaan ịmi ọphue ịyo phọ ạmi.

²¹Kụ mem dị ọdo kịrokiro ịminimiin phọ rꞌịiḅaghami phọ kesoroghuom bịdi, ạḍuor phọ ạḍien kegbororian ni risigh ạbidi, kụ ẹgba ghan ịpe eru bọ ịne, kụ ẹtol sịphe ịnhu ạnmuny phọ ạbidi dị kóbula. Mị alegheri ni oomo ịpe bịdi rọotughian bọ rꞌigbiom mọ ạbidi rodon, tụtu mị ạsighe bịdi asiemi ẹpe ade phọ mị aghunya bọ ọngo phọ.”

²²Kụ aMozis ạge ḍụor phọ ạḍiphe phọ ḍio ḍio phọ, kụ ạsighe ạtughemi we phọ Ịzirel.

²³Kụ Ọmoogh-we phọ ạlogh ologh ạngo Josua ọony phọ ạNon kụ ạḅeni mọ, “Kpạrami loor ạna, ạmoogh ạkpo ologhi. Nạ kụ kạsighe we phọ Ịzirel asiemi ẹpe ade phọ ạḍiphe mị aghunya bọ ọngo ạbidi. Mị odi ni rꞌạna.”

²⁴AMozis rọgeeghi bọ ikpo ọnhu Ologh phọ loor ạḍinya rosiemi eekuna,

²⁵kụ ạlogh ologh ạngo riil ạbuo aLivait phọ, bụphe ọpham bọ Igbe Ịyo phọ Ọmoogh-we phọ mọ,

²⁶“Ịsighe ḍịnya Ologh phọ ẹlhogh sịphe ịigaany Igbe Ịyo Ọmoogh-we Ẹnaan phọ anyina, ẹgba ghan ịpe eru bọ ịne iphume inyina.

²⁷Mị alegheri ni mọ nyina awe ịgbagharan rꞌoḅom ẹmhu. Ịitughian ghan. Ghạlamo rꞌarodon phọ ạḍien mị odi bọ ni rꞌanyina, nyina awe ịgbagharan rꞌoḅom ẹmhu, kụ ẹghiom nụun ologhi mem lọ mị mamugh.

²⁸Iikpomoghinaan ịmi ikumoor awe phọ anyina rꞌạbuo ịtooghi phọ, mị ụkaaph oomo phọ ịphen phọ adoghoḍi sụruru ạbidi. Kụ mị kạmagh kẹ phọ rꞌade phọ ọge oseenaan bịdi.

²⁹Mị alegheri ni mọ mị romugh bịn nyina kẹpioghom ni ẹpuenaan siloor anyina, ekiton ẹgbatanaan eten phọ ẹphen mị ạlogh bọ ologh ịngo inyina. Nyina kẹpioghom ni ghisigh Ọmoogh-we phọ, kụ ẹkagh ologhi ọdi loor esi ịpe ạraghaagh phọ anyina reḍighi bọ, kụ ịminimiin isoroghuom inyina, suḍughul-otu phọ ịpe retu bọ.”

³⁰Kụ aMozis ạghaaph ikpo ọnhu ạḍuor phọ adoghoḍi sụruru oomo awe phọ Ịzirel sịphe ookpomoghan phọ asiemi eekuna.