Read abua Dutoronomi 4 Bible Online

Dutoronomi 4 - abua bible

Dutoronomi 4

¹Kụ aMozis ạḅeni we phọ Ịzirel mọ, “Nyịidipho iler rụru ẹnaghanan oomo iilogh phọ rꞌịiruen phọ ịpe mị ịtughemi bọ inyina, ịpe nyina keḍighi ghan bọ ọbo nyina ẹrol ẹghelom de phọ ạḍiphe Ọmoogh-we Ẹnaan ạburude phọ anyina rịngo bọ inyina.

²Kẹ́loghom rꞌịyaar sịphe ịpe mị ạto bọ rịḅeni inyina, kụ kémuton rꞌịyaar. Iiko ghan iilogh phọ ịpe Ọmoogh-we Ẹnaan phọ anyina ạlogh bọ, ịdipho mị ạlogh bọ ịḅeni inyina.

³Ariḍien anyina ịmiin ni ịpe Ọmoogh-we phọ aḍighi bọ ogbo anyina ẹpe Eegum aPior. Ọmoogh-we Ẹnaan phọ anyina aagulemi oomo awe lọ ọoḅereghi Baal sịphe phọ,

⁴kụ nyina phọ ạbuphe eḍighom bọ Ọmoogh-we Ẹnaan phọ anyina edi ni kꞌarodon.

⁵“Mị mịtughemi inyina iilogh phọ rꞌịiruen phọ ịpe Ọmoogh-we Ẹnaan phọ anyina ạlogh bọ ụḅeni ịmi mọ ịduon kụ ịdi nyina keḍighi ghan ẹpe ade phọ nyina rẹki bọ ọmoogh phọ.

⁶Iiko ghan ẹdaph ghan eḍighi ịphen phọ. Awe ịnon areelhe phọ kolegheriom olegheri ịyaar rꞌọnaghan ạḍughum mọ anyina; kọnaghan oomo iilogh phọ kụ ọḅem ghan mọ, ‘Phọn eeghe olegheri ịyaar rꞌọnaghan ạḍughum dị eboom eelhe phọ ẹphen ẹmoogh!’

⁷“Ẹnon eelhe ílho, ịlo ẹbugh ẹbugh, dị ẹmoogh ịyaar dị rọoḅereghi dị etuman bịdi, ịdipho Ọmoogh-we Ẹnaan phọ ayira. Ọdi rụnaghanan ghan iyira tọrobo amem lọ yira ọmagh nyọdi.

⁸Ẹnon eelhe ílho, ịlo ẹbugh ẹbugh, dị ẹmoogh iilogh dị ẹnighe ịdipho ịphen mị mịtughemi bọ inyina rodon.

⁹Igona siloor anyina, ẹphama uwaloor anyina, ọbo nyina kebula ghan bọ rạraar phọ ịpe nyina ẹmiin bọ, ọbo kẹḍua ghan bọ iloghi anyina oomo asuḍughul-otu aghuḍum mọ anyina; ẹtughemi ịphen phọ nmụny phọ anyina rꞌạnmuny ạnmuny phọ anyina.

¹⁰Ịitughenam ḍio phọ ạḍiphe nyina ẹmeera bọ egbodo Ọmoogh-we Ẹnaan phọ anyina ẹpe Eegum aSainai, mem mọ Ọmoogh-we phọ ụḅeni bọ ịmi mọ, ‘Uukpomoghinaan ịmi oomo awe phọ egina esi. Mị kaḍighi ịdi bịdi kọnaghan ịpe mị kạkaaph bọ, ọbo bịdi ọtuugha ịlo oghueni ạmi oomo asuḍughul-otu phọ ịpe bịdi kọtol bọ sịen aḅirini phọ, kụ ọtughemi nmụny ạbidi.’

¹¹“Ịḅeni nmụny anyina ịdi nyina ẹghi kụ ẹmeera esi dị etuman eegum dị ookpereghiom ọotu ạmughi dị awil rꞌasinem ạnian dị esi okuaḍio phọ.

¹²Ọmoogh-we phọ ạrol sịphe ologhi ạnian phọ, kụ ạghaaph ịḅeni inyina. Nyina ịnaghan ni ẹḍogh phọ ọdi, kụ nyọdi ị́miin. Ẹḍogh phọ bịn kụ ẹdi nyina ẹnaghan ghan.

¹³Kụ odi agananami ịyo phọ ọdi ịḅeni inyina mọ iiko ghan ḍioph phọ iilogh phọ ịpe ọdi ạge bọ loor ịyal ịdaabili aḍighiigh.

¹⁴Kụ Ọmoogh-we phọ ạto ụḅeni ịmi mọ mị ịtughemi inyina iilogh phọ rꞌịiruen phọ, ịdi nyina kẹsighe kụ ẹtolom ẹpe ade phọ nyina reḍigh bọ ọrol.

¹⁵“Ḍio phọ ạḍiphe Ọmoogh-we phọ ạghaaph bọ ologhi ạnian phọ ịḅeni inyina ẹpe Eegum aSainai, nyina ị́miin rꞌịyaar. Kụ iḍighi, ịmaar ẹphama siloor anyina,

¹⁶ọbo nyina kẹepuan ghan bọ siloor anyina, ẹkaaghi rụmugh lọ ẹghigh oye, mꞌolephiri ọony mꞌạnir-ephoph;

¹⁷lọ ẹghigh ẹnam lọ edi sịen aḅirini phọ, lọ ẹghigh ẹnun lọ edi sịen aḅirini phọ rẹpepheghuan ghan ẹpe okuaḍio phọ,

¹⁸lọ ẹghigh tọrobo ịyaar lọ rekuura ghan sịen ade phọ, lọ ẹghigh ena lọ edi ologhi ạmuum.

¹⁹Ọbo nyina kẹnmanaghian ghan bọ epogh ẹpe ạnyu ạke bịn nyina rẹmiin erumuḍio phọ mꞌụnwanyu phọ mꞌạraanaan phọ rꞌaḍita ạraraar phọ edi bọ ẹpe kꞌạke, bịn rinyuughi inyina ọghi ọoḅereghi ghan okumu ạbidi. Ịphen phọ Ọmoogh-we Ẹnaan phọ anyina madiemi bọ oomo ịnon areelhe phọ edi bọ sịen aḅirini phọ mọ ọoḅereghi,

²⁰kụ nyina awe dị Ọmoogh-we phọ ạtagharan ẹpe Ijipt sịphe aḍiboom ạnian phọ reemor bọ. Ọdi imitiom inyina dị nyina eḍighi we ọdi, ịduon nyina edi bọ rodon.

²¹Ọmoogh-we phọ ạtuan rụmhu anyina kụ ụghagham ịmi ologhi, kụ aghunya ạḅem mọ mị kạ́ḅeeny Ọphiiny ạJodan apun ạki asi aani ẹpe aḍiiḅi ade phọ ạḍiphe Ọmoogh-we Ẹnaan phọ anyina rịngo bọ inyina mọ ịmoogh phọ.

²²Kụ mị kamugh sịen ade phọ ạḍien. Mị rạ́ḅeeny aani bọ Jọdan kaphun. Nyina kẹḅeeny Jọdan epun ẹki ẹmoogh ịma phọ ade phọ.

²³Igona siloor anyina ọbo nyina kebula ghan bọ ịyo phọ Ọmoogh-we Ẹnaan phọ anyina, ịpe ọdi rꞌanyina eghiran bọ,

²⁴ịdi eḍighi bọ Ọmoogh-we Ẹnaan phọ anyina ạnian ọnuza. Ọdi Ẹnaan dị ótiran roḅopha.

²⁵“Ghạlamo amem lọ nyina mẹrol sịphe ade phọ ebia kụ ẹmaraghi nmụny rꞌạnmuny ạnmuny, kẹ́epuan siloor anyina, kụ ẹ́kaaghi rụmugh lọ ẹghigh ịyaar. Ịphen phọ ạsipioghom dị kẹkagh ologhi Ọmoogh-we phọ.

²⁶Mị ạmagh kẹ rꞌade oḍighi ạbugbaanaan anyina rodon. Eḍighi ịyaar dị nyina ẹḅaar ẹmhu esi ạmi, nyina kẹ́tol ebia iboom sịphe ade ẹḅeenyom ạJodan phọ nyina keḍigh bọ. Nyina keegulaan ni kpel kpel, emuneen.

²⁷Ọmoogh-we phọ kịiwalami ni inyina ạngo ịnon areelhe dị ịphurukpu anyina bịn kụ koḍum.

²⁸Ẹpe nyina kẹeḅereghi ghan rụmugh ekpisi phọ ẹpe phọ, ireeny dị awe kụ ọkaaghi, rꞌạrana dị rẹ́miin ghan eten, rẹ́naghan ghan ḍụghum, réle ghan eḍien, rẹ́naghan ghan eḍu ịyaar.

²⁹Ẹpe phọ kụ ẹdi nyina kẹwa Ọmoogh-we Ẹnaan phọ anyina, kụ eḍighi dị nyina ẹwaam nyọdi rꞌoomo ologhi phọ anyina, rꞌoomo uwaloor phọ anyina, nyina kẹmiin ni nyọdi.

³⁰Mem lọ ịiḅaghami eru rịteeny inyina, kụ oomo ịphen phọ eru isoroghuom inyina mem eekuna aḍio phọ, eru mạar dị nyina ekiton esoman Ọmoogh-we phọ Ẹnaan phọ anyina kụ ẹnaghanan ẹḍogh phọ ọdi,

³¹pọ Ọmoogh-we Ẹnaan phọ anyina, Ẹnaan ọnma ighirigiir phọ, inyina kígheel, ḅịle kẹn inyina kíphiemi, ḅịle kẹn kábula ịyo phọ ịpe ọdi rꞌạburude phọ anyina oghiran bọ.

³²“Ịitughian eḅula ọman mem dị eten kụ ogbi ọmar anyina, emiigh kꞌaḍio phọ Ẹnaan ẹlhem bọ oye sịen aḅirini phọ. Iḅiligha oomo ade phọ, emiigh kꞌeekuna ẹphen ạke phọ ẹghi esiemi ẹpheri phọ eekuna phọ. Ịyaar dị ẹbugh ịduon memite ghan ni kꞌekulha?

³³Awe ịnon areelhe odi ni ḍụghum dị mọnaghan ghan ẹḍogh phọ Ẹnaan dị ẹrol ologhi ạnian kụ rẹḅa, ịdipho nyina ẹnaghan bọ kụ edi bọ?

³⁴Ẹkaaneen ịyaar mẹghi ghan ni ẹsighe we ẹnon eelhe kụ eḍighi bụo ọdi, ịdipho Ọmoogh-we Ẹnaan phọ anyina iḍighi bọ inyina ẹpe Ijipt? Risigh anyina kụ ọdi aḍeenaan ịikpo rꞌịnyaam; ọdi amitiom rẹezegh rꞌẹgham, aḍighi ịiḍaany rꞌimananaan, rꞌiiḍighi aḍiigu.

³⁵Iḍeenaan bọ inyina ịphen phọ, ọbo nyina ẹsighe elegheriom mọ Ọmoogh-we phọ, ọdi bịn kụ Ẹnaan. Omuton nyọdi ẹnon ílho.

³⁶Ạrol ẹpe ạnyu ạke kụ aḍighi ịdi nyina ẹnaghan ẹḍogh phọ ọdi; ịphur inyina rụru ịdi rọtol ghan, kụ iḍeenaan inyina ḍiboom mọ ạnian phọ sịen aḅirini phọ, kụ nyina ẹnaghan ẹḍogh phọ ọdi sịphe ologhi ạnian phọ.

³⁷Ịdi eḍighi bọ dị ạphomoghian bụrude phọ anyina, ạtuan ịdipho kụ ạsaḅar bọ nmụny phọ ạbidi, kụ ịsighe bọ inyina amitiom egbodo ọdi, kụ ạsighe igbogh ịikpo phọ ọdi ịsighenom bọ inyina ẹpe Ijipt.

³⁸Aphorogh rạmha dị ẹbugh kụ ẹmoogh ịikpo ipu inyina, ạsighe de phọ ạbidi egbodo anyina, ịsighe inyina ạlogh, ạsighe de phọ ạbidi ịngo inyina mọ ịmoogh, ịduon edi bọ kꞌarodon.

³⁹Kụ iḍighi, ilegheri rodon, kụ ẹetughian ghan sịphe iloghi phọ anyina mọ Ọmoogh-we phọ, ọdi kụ Ẹnaan phọ edi bọ ẹpe kꞌạke rꞌịsien aḅirini phọ. Omuton nyọdi, ẹnon ílho.

⁴⁰Kụ iḍighi, iiko ghan ịtooghi phọ ọdi rꞌiilogh phọ ọdi, ịpe mị ạlogh bọ ịngo inyina rodon, ọbo ịnighenom inyina rꞌạnmuny phọ anyina kọtol bọ dọl phọ anyina, ọbo asuḍughul-otu anyina ẹdoony sịen aḅirini phọ Ọmoogh-we Ẹnaan phọ anyina iseere bọ inyina kꞌagee-pọ.”

⁴¹AMozis ạgbatan ịraar ạramha ọman phọ ọphon ạJodan ẹpe erumuḍio phọ remite ghan bọ aseere gem,

⁴²aseenaan ọokom-enu mọ aghiil asuma agheel ẹpe, tọrobo ọlo úlegheri kụ aghiigh matuman ọdi, lọ úḍighi mụlogh-ḍien ọdi mem dị eten. Ọdi kasuma ni akiil asi eniin ẹmha phọ ẹpe, kụ kókiigh.

⁴³Ịphen kụ ạramha phọ: Bezer ẹyaghaghaany ẹmha phọ edi bọ ẹpe ẹdala phọ, ẹlo eghun aRuben; Ramot ẹpe Gịliad, ẹlo eghun ạGad; Golan ẹpe Bạsan, ẹlo eghun ạManase.

⁴⁴Ịphen phọ iilogh phọ Ẹnaan dị aMozis ạlogh ạngo we Ịzirel.

⁴⁵Iḍighi mem mọ bịdi mọḍua bọ ẹpe Ijipt kụ mosi ạga emitenom ạJodan ẹpe ekpululu bọ ọtol ropogh Bẹt Pior, kụ ọdi ạngo bọ bịdi iilogh phọ ịphen. Ịsien phọ iḍighi ghan eelhe phọ aSihon ọdaam mọ Ạmorait ọpo arugh bọ ẹpe Hesbon. AMozis rꞌawe Ịzirel ụkpar bọ opu nyọdi mem dị bịdi mọḍua ẹpe Ijipt.

⁴⁶

⁴⁷Bịdi ọsighe bọ de phọ ọdi, rꞌạḍio Ọdaam Ọg ạBasan, ịyal phọ ạbudaam mọ Ạmorait orugh bọ ẹphen ạga emitenom mọ ạJodan.

⁴⁸Ade phọ imiigh kꞌẹmha Aroer ọogaany Ọphiiny Anon kꞌẹpe ephunom mọ kụ esi Eegum aSirion phọ oghol aani bọ mọ ạHermon.

⁴⁹Ịloghom oomo phọ ade ạga emitenom ạJodan phọ, kụ ẹghi esoorom esi Ọphiiny-Ạla, kụ ẹteeny zin Eegum aPisga ạga emitenom erumuḍio phọ.