Read abua Dutoronomi 9 Bible Online

Dutoronomi 9 - abua bible

Dutoronomi 9

¹“Ịnaghan Ịzirel, rodon nyina kẹḅeeny Jọdan epun, ọghi ọmoogh areelhe dị ẹbugh ipu inyina, iboom ạramha dị ẹbugh kụ okoonyogh okitonom kụ epoph kꞌẹpe ạnyu.

²Nyina elegheri nmụny phọ Anakim, we phọ ạbuphe orugh ghan ẹpe phọ, ịdi bịdi ọbughogh opophogh. Nyina rẹnaghan ghan ni ịpe rọḅem ghan bọ mọ, ‘Ạnhian kụ katue ạmeera egbodo ạnmuny phọ Anakim.’

³Ilegheri ḍio phọ arodon mọ ọpo riḍiemiom bọ inyina ịdipho ạnian ọnuza, ọdi kụ Ọmoogh-we Ẹnaan phọ anyina. Ọdi kapiemi ni bịdi asooromi, bịdi ọtol eeḍian anyina; kụ nyina eporogh bịdi ọḍuaghu, kụ nyina eegborion epiemi bịdi, ịdipho Ọmoogh-we phọ iguanaan bọ inyina.

⁴“Mem mọ Ọmoogh-we Ẹnaan phọ anyina kaporogh bọ bịdi ạsighe egbodo phọ anyina, kẹ́ḅem ghan sịphe iloghi phọ anyina mọ aruukuan anyina kụ iḍighi bọ ịdi Ọmoogh-we phọ ịsighe bọ inyina ịlo ọmoogh ade phọ ạḍien, kụ ạri ọdi ạtuan sịpioghom ạramha phọ ịpe kụ aphorogh bọ bịdi egbodo anyina.

⁵Ọ́tuan ruukuan anyina rꞌịdi iloghi anyina eseleman kụ nyina rẹki bọ ọmoogh ade phọ ạbidi. Aloor esi ạsipioghom ạramha phọ kụ iḍighi bọ ịdi Ọmoogh-we Ẹnaan phọ anyina raporogh bọ bịdi kạsighe egbodo anyina, ọbo ọdi ạkparami ikpo ọnhu phọ ọdi, ịdipho dị aghunya bọ esi ạburude phọ anyina ạngo Ebraham, Ạizik rꞌạJekob.

⁶Ilegheri mọ Ọmoogh-we Ẹnaan phọ anyina ọ́tuan ruukuan anyina kụ rịngo inyina ịma ade phọ ạḍiphe phọ mọ ịmoogh: nyina awe oḅom ẹmhu.

⁷“Ịitughian ghan ịpe nyina eḍighi bọ kụ ẹtu bọ ẹghagh ologhi Ọmoogh-we Ẹnaan phọ anyina ẹpe ẹdala phọ. Emiigh kꞌaḍio phọ ạḍiphe nyina ẹḍua bọ ẹpe ade phọ Ijipt eru esi sịen, nyina ẹmoogh oḅom ẹmhu esi Ọmoogh-we phọ.

⁸Ghạlamo rꞌẹpe Eegum aSainai bịn nyina iḍighi ni ịdi ẹghagh ologhi Ọmoogh-we phọ, kụ ọdi ạnyaaghian ịlo ophiemi anyina.

⁹Mem mọ mị maten bọ ẹpe eguum mọ ọsighe ịyal phọ ịdaabili asighiigh phọ, sighiigh ịyo phọ Ọmoogh-we phọ rꞌanyina eghiran bọ, mị ạrol bọ ẹpe ẹeḅaraph phọ inyadi aḍughul-otu. Mị eḍien úle ḅịle kẹn mụum mị ụ́pughol.

¹⁰Kụ Ọmoogh-we phọ ụngo ịmi ịyal phọ ịdaabili asighiigh phọ ịpe ọdi ạsighe bọ ḍịghaagh ọdi kụ ạgeom. Ịsiphe asighiigh phọ kụ ịdi oomo ikpo ọnhu phọ ịpe ọdi ạghaaphan bọ rꞌanyina ẹpe ạnyu eegum mọ ologhi ạnian phọ, ḍio phọ ạḍiphe ookpomoghan phọ.

¹¹Kụ rẹman inyadi aḍughul-otu, kụ Ọmoogh-we phọ ụngo ịmi ịyal phọ ịdaabili asighiigh ịyo phọ.

¹²“Kụ Ọmoogh-we phọ ụḅeni ịmi mọ, ‘Ḅetenu aagborion asoor ạḍua sịen, ịdi eḍighi bọ awe phọ ạna, bụphe nạ ạsighe bọ ạḍuanam ẹpe Ijipt, mọopuan siloor. Bịdi mọgbatanaan ọbile reten phọ ịpe mị ạlogh bọ ologh ạngo bịdi. Bịdi mọḅol igbudu.’

¹³“Kụ Ọmoogh-we phọ ạḅile kẹn ụḅeni ịmi mọ, ‘Mị rạmiin ni we phọ ạbuen. Bịdi awe oḅom ẹmhu.

¹⁴Ụwile ịmi, mị kapiemi bịdi, agbuurogh ḍien ạbidi ạsighe sịen aḅirini phọ; kụ mị kaḍighi nyịna ọde eboom eelhe dị kẹbugh epu bịdi.’

¹⁵“Kụ mị ạḍua sịphe eegum mọ asoor ude, kụ ạnian reemor ghan sịphe eegum mọ, kụ mị ạpam ịyal phọ ịdaabili asighiigh ịyo phọ rạghaagh ạmi,

¹⁶kụ mị aphogh, kụ mịin aani, nyina mẹpioman eḍighi ịkaraph ẹki esi Ọmoogh-we Ẹnaan phọ anyina. Nyina mẹḅol nạm ẹsighe eḍighi ẹmugh anyina. Nyina mẹgbatanaan ẹḍua ẹbile eten phọ ẹpe Ọmoogh-we phọ ạlogh bọ ologh ịngo inyina.

¹⁷Kụ mị ạsighe ịyal phọ ịdaabili asighiigh phọ mị ạpham bọ atebeeny ude kụ eḅomoghian. Nyina ịmiin ni.

¹⁸Kụ mị aḅololo ude risigh Ọmoogh-we phọ ịdipho ẹḅel amem mọ, inyadi ootaany phọ rꞌinyadi aḍughul, mị eḍien úle, mụum mị ụ́pughol, loor esi oomo ịkaraph phọ ịpe nyina eḍighi bọ risigh Ọmoogh-we phọ, kụ ẹghagh bọ ologhi ọdi.

¹⁹Kụ mị ughiilaan ni ịpe rẹeḅaghami bọ kụ Ọmoogh-we phọ ạghagh bọ ologhi ịlo ophiemi anyina, kụ Ọmoogh-we phọ ạḅile ụnaghanan bọ ịmi mem mọ ạmuphe.

²⁰Kụ Ọmoogh-we phọ ạghagham ologhi Eeron kụ ạwa ịlo ophiemi ọdi, kụ mị aghol ẹmhu Eeron ạaḅereghi mem mọ ạmuphe.

²¹Kụ mị ạsighe ḍilephiri ạnam mọ, ẹmugh phọ ẹpe nyina ẹḅol bọ, aguom nịan, kụ ạsighe ạagbighiḍi ạgbe atene ọoru, kụ mị ạsighe ọoru phọ asumeeny ologhi ọodu dị ạḍua sịphe eegum mọ kụ amite.

²²“Ẹpe Tabera, ẹpe Masa rꞌẹpe Kibrot Hataava, nyina ịḅile ni eḍighi ịdi ẹghagh ologhi Ọmoogh-we Ẹnaan phọ anyina.

²³Mem mọ Ọmoogh-we phọ ịḅeni bọ inyina ẹpe Kades Bania mọ, ‘Ịki ẹsighe de phọ ẹmoogh, ḍịphe mị ịngo bọ inyina,’ kụ nyina ị́naghanan ịpe mị Ọmoogh-we Ẹnaan phọ anyina ạghaaph bọ. Nyina ímeeraam, ịnaghanan ẹḍogh phọ ọdi.

²⁴Nyina awe oḅom ẹmhu esi Ọmoogh-we phọ, emiigh kꞌaḍio phọ mị ilegheri bọ inyina.

²⁵“Mị ạtuan ịduon aḅololo ude ghisigh Ọmoogh-we phọ inyadi aḍughul-otu, loor ịdi Ọmoogh-we phọ ạḅem mọ ọno kiphiemi inyina.

²⁶Kụ mị ạaḅereghi Ọmoogh-we phọ kụ ạḅeni mọ, ‘Ẹnaan oomo ịikpo, kápiemi we phọ ạna nạ ạmoogh bọ, bụphe nạ ạsighe bọ igbogh phọ ạna ạtagharanam, bụphe nạ ạsighe bọ ḍilhom ạḍighaagh ạḍuanam ẹpe Ijipt.

²⁷Tụutughian butelhedom mọ ạna Ebraham Ạizik rꞌạJekob. Kạ́maghami ịyaar oḅom ẹmhu awe phọ ạna ạbuen rꞌạsipioghom mọ ạbidi rꞌịkaraph phọ ạbidi,

²⁸ọbo bụo Ijipt phọ kọḅem ghan bọ mọ, “Ọmoogh-we phọ órue ọsighe bịdi ósiemi ẹpe ade phọ dị aguanaan bọ. Ọdi ạlogh bịdi ḍien, dị ạsighe bịdi ạḍuanam ọze ạbidi ẹpe ẹdala phọ.”

²⁹Kụ bịdi phọ awe ạna dị ạsaḅar ạmoogh, bụphe nạ ạsighe bọ igbogh ịikpo phọ ạna rꞌạḍighaagh iphelegbe phọ ạna nạ azin bọ aḍighi ịdi bịdi ọḍua.’