Read abua Jọn 1 Bible Online

Jọn 1 - abua bible

Jọn 1

¹Ẹḅel emiighom mọ, Ekpo Ọnhu phọ ịrol li. Ekpo Ọnhu phọ ịrolan ni Ẹnaan. Ekpo Ọnhu phọ kụ Ẹnaan phọ.

²Ẹḅel emiighom mọ Ekpo Ọnhu phọ ịrolan ni Ẹnaan.

³Ekpo Ọnhu phọ kụ ẹdi Ẹnaan ẹsighe bọ ẹlemom oomo phọ ạraraar phọ. Ịphen edi bọ mụ́lem mọ ọdi múlho bọ.

⁴Ekpo Ọnhu phọ kụ azin aghuḍum mọ, kụ aghuḍum mọ ạkuen kụ ạḍiḅaal awe.

⁵Ạḍiḅaal phọ rẹmu ghan sịphe ufiri phọ kụ ufiri phọ kőḍime ḍịḅaal phọ.

⁶Ẹnaan irom ni oniin oye dị oghol mọ ạJon.

⁷Ọdi aru ọghaaph ịlo ạḍiḅaal phọ ọḅeni awe, pịdi oomo awe ọtuan nyọdi ọnaghan dom mọ kụ omeeraam.

⁸Ọdi rꞌaloor ọdi kạ́ḍiḅaal phọ ạḍiphe phọ. Aru ni ọghaaph ịlo ạḍiḅaal phọ bịn.

⁹Ọkar ạḍiḅaal phọ resoorom ghan bọ oomo awe rẹnyaaghian ghan ni omite ịsien aḅirini phọ.

¹⁰Ekpo Ọnhu phọ ịrol ghan ni sịen aḅirini phọ. Ọdi kụ ọdi Ẹnaan ẹsighe bọ ẹlemom aḅirini phọ, kụ aḅirini phọ úlegheri nyọdi.

¹¹Ọdi aru ni ẹmha ọdi kụ awe ẹmha phọ ọdi nyọdi ụ́sighe ụloghoma.

¹²Kụ buniin ụsighe ni nyọdi ọloghoma, ọḅile omeeraam ḍien phọ ọdi. Bụen phọ kụ ẹdi ọdi ạngo bọ ịikpo mọ oḍighi nmụny phọ Ẹnaan.

¹³Bịdi úgbiighiom ologhi bịn kụ ọmaraghi bọ nmụny phọ Ẹnaan. Ụ́mar bịdi oopho ẹmaram, ịdipho eḍighinom ịyaar ịḅaal rꞌiphulupul. Ẹnaan rꞌaloor ọdi kụ Ọde phọ ạbidi.

¹⁴Ekpo Ọnhu phọ imite ni eye kụ erughan rꞌayira, kụ yoor ụmiin ni eghuan phọ ọdi, dị ẹḅaram ẹeḍiom, ọghor phọ rꞌigey. Ẹphen phọ kụ eghuan Ogina Ọony phọ Ẹnaan.

¹⁵ẠJon ạghaaph ni ịlo ọdi, ạlooghiom ghan mọ, “Ọphon phọ kụ ọdi mị ạghaaph ghan bọ aghol mọ, ‘Ọdi phọ ọony ịbaam-ọman ạmi ni kụ upu ni ịmi, ịdi eḍighi bọ ọdi odi ni kụ ogbi bọ ọmar ạmi.’”

¹⁶Ịsiphe ẹeḍiom ạḍiseph phọ ọdi kụ ẹdi yira mạar bọ ọghor atum ọghor.

¹⁷Ịdipho aMozis ạar bọ iilogh phọ aruom we kụ ẹdi ạJizos Kraist ạpham bọ ọghor phọ rꞌigey phọ arumom.

¹⁸Oye Ẹnaan kọ̋miin ghan. Ogina Ọony phọ ọdi, ọpo odi bọ ipholophool Ọde phọ bịn kụ ọdi agananami bọ nyọdi.

¹⁹Mem mọ ạbuo aJu phọ aJeruselem orom bọ riil ạrikia rꞌạbuo aLivai mọ opuru Jọn mọ, “Nạ ạnhian?”

²⁰ẠJon óghel ọphagharanaan phọ, ạḅile ghụn ni ạghaaph agananami amitiom mọ, “Mị kụ káMesaya phọ.”

²¹Bịdi mọ, “Kụ nạ phọ ạnhian? Nạ Ilaija ḍụghum?” Kụ ọdi mọ, “Eeye, kạ́mi.” Bịdi opuru mọ, “Nạ kụ oyil phọ ọpo oguanaan bọ ḍụghum?” Kụ ọdi ạphagharanaan mọ, “Eeye.”

²²Kụ bịdi mọ, “Ụḅeni iyoor oye dị nạ aru! Yoor rọwa ọsighe ọphagharanaan phọ ạna oḅulemi ọghiomaan ạbuphe urom bọ iyoor. Nạ ạḅem ika ịlo aloor ạna?”

²³Kụ ạJon mọ, “ ‘Mị kụ ẹḍogh oye phọ rẹlooghi bọ ẹpe ẹdala phọ mọ: “‘Kọghoron eesela eten dị Ọmoogh-we phọ katelhe!’” Ịphen kụ ẹdi Azaya oyil phọ Ẹnaan ạḅem bọ.

²⁴AFarisi phọ kụ urom bọ bịdi.

²⁵Kụ bịdi opuru Jọn mọ, “Nạ kụ útu bọ Mesaya phọ, mụghumo Ilaija, ḅịle kẹn mọ oyil phọ ọpo oguanaan bọ, uḍighi ika kụ nạ raburogh bọ weye mụum mọ?”

²⁶Kụ ạJon mọ, “Mị ạsighe mụum kụ raburogh ghan we. Ogbo anyina, oye ạmeera ni dị nyina ílegheri.

²⁷Mị kụ ụphur aru nyọdi. Kụ mị ụ́kar ụman ghạlamo rꞌọkporion arokoro phọ ọdi.”

²⁸Oomo phọ ịphen phọ imite ẹpe Betani ẹḅeenyom Ọphiiny ạJodan, sịphe ạJon ạrol bọ raburogh ghan we mụum mọ.

²⁹Ḍio dị etum bọ pạ, kụ ạJon ạmiin Jịzos dị ratu ọteeny ọdi, kụ ạḅem mọ, “Ọphon phọ kụ Ọony Oyool-Ọga phọ Ẹnaan eseere bọ ọtagharanam aḅirini phọ esi ịkaraph phọ ạbidi!

³⁰Ọphon phọ kụ oye phọ mị ạḅem bọ mọ, ‘Mị kụ ụphur aru nyọdi, kụ ọdi kụ ạbugh upu ịmi, ịdi eḍighi bọ ọdi odi ni kụ ogbi ọmar aani ạmi.’

³¹Mị úlegheri ghan ọdo phọ oye phọ dị katu bọ, kụ ọlo mị uru ọsighe ghan ạmuum kụ owurogh awe oḍighi ịlo aweye Ịzirel kolegheri nyọdi.”

³²Ịphen kụ ịdi ạJon ạghaaph bọ mọ, “Mị ụmiin ni dị Uwaloor Iigbia phọ ạḍua kꞌạke ịdipho ọkurughozo, kụ asoor kụ ạrolom ẹmhu ọdi.

³³Mị úlegheri ghan ọdo phọ oye phọ dị katu bọ, kụ Ẹnaan phọ ẹpe irom bọ ịmi ọsighe ạmuum kụ owurogh awe kụ ịḅeni ịmi mọ, ‘Nạ kạmiin ni dị Uwaloor Iigbia phọ katu asoor kụ ạtolom ẹmhu oye. Ọdi kụ oye phọ rạsighe ghan bọ Uwaloor Iigbia phọ kụ kawuroghom we mụum.’

³⁴Mị mạmiin ni kụ ạkaaph bọ rịḅeni ghan inyina mọ ọdi kụ Ọony phọ Ẹnaan.”

³⁵Ḍio phọ etum bọ pạ, ạJon rꞌịyal ạbumatuan ọdi ụḅile ni ọmeera sịphe phọ,

³⁶kụ ọdi ạmiin dị ạJizos arelhe raten, kụ ạḅem mọ, “Pọrono sịen Ọony Oyool-ọga phọ Ẹnaan!”

³⁷Ịyal phọ ạbumatuan phọ rọnaghan ịduon phọ, kụ ọdaph Jịzos.

³⁸ẠJizos akiton aphogh kụ ạmiin dị bịdi rọdaph nyọdi kụ apuru mọ, “Nyina rẹwa ghan eeghe?” Kụ bịdi ọphagharanaan kụ opuruom mọ, “Rạbai, nạ atugh ḍighen?” (Ẹmhu ạRabai phọ pọ ọtughemia.)

³⁹Kụ ọdi mọ, “Itu ẹmiin aani,” kụ bịdi ọdaph ọghi kụ ọmiin esi phọ dị arugh bọ, kụ ọrolan rꞌọdi opol aḍio phọ ạḍiphe. (Eḍighi ephu inya asuo dulhe.)

⁴⁰Sịphe ịyal phọ ạbuphe ọnaghanan bọ Jọn kụ ọdaph bọ Jịzos, oniin Ạndru umor aSaimon Pita.

⁴¹Egina amem bịn Ạndru ạghi ạmiin Saimon umor phọ ọdi, kụ ạḅeni mọ, “Yoor mọmiin Mesaya phọ!” (Ẹmhu aMesaya phọ pọ “AKraist”.)

⁴²Kụ ọdi ạsighe Saimon aruomonaan Jịzos. Kụ ạJizos aphogh nyọdi kụ ạḅem mọ, “Nạ aSaimon ọony phọ ạJon. Ḍien ạna kokol mọ aKifas.” (Ịduon phọ kẹn pọ aPita phọ ni, kụ ẹmhu phọ pọ “aḍighiigh”.)

⁴³Ḍio phọ etum bọ pạ, ạJizos ạḅemom ologhi mọ ọno kạki Galili. Kụ ọdi ạwa Filip ạmiin kụ ạḅeni mọ, “Ụdaph aani ịmi!”

⁴⁴AFilip phọ ọlo aBetsaida ẹmha phọ ạbuo Ạndru rꞌaPita.

⁴⁵Kụ aFilip ạwa Nạtaniel ạmiin, kụ ạḅeni mọ, “Yoor mọmiin oye phọ ọpo ạrinya iilogh phọ aMozis rꞌịgeeghi ariil phọ Ẹnaan ẹghaaph bọ ịlo ọdi. Ọdi ạJizos ọony ạJosef, ọnyo ạNazeret phọ.”

⁴⁶Kụ ạNataniel apuru mọ, “Igey kẹḍua ni Nạzeret etu ḍụghum?” Kụ aFilip ạphagharanaan mọ, “Tue ni kụ ạmiin aani!”

⁴⁷Kụ ạJizos ạmiin Nạtaniel dị ratu ọteeny ọdi, kụ ạḅem ịlo ọdi mọ, “Ịmiin aani. Ọphon phọ ọkaraghi ọnyo Ịzirel. Iigbegheḍiom loor ọdi ílho.”

⁴⁸Kụ ạNataniel apuru nyọdi mọ, “Nạ ulegheri ịmi ika?” Kụ ạJizos mọ, “Mị ụmiin ni nyịna, mem mọ nạ ạrol bọ pạ azin oreeny-ạfig phọ kụ aFilip nyịna kọ̋magh bọ.”

⁴⁹Kụ ạNataniel mọ, “Ọtughemia, nạ kụ Ọony phọ Ẹnaan. Nạ kụ Ọdaam ẹmha phọ Ịzirel.”

⁵⁰Kụ ạJizos mọ, “Nạ ụtuan dị mị mạḅeni bọ nyịna mọ mị ụmiin ni nyịna pạ azin oreeny-ạfig phọ kụ ameeraam bọ ḍụghum? Ạraraar dị nạ kạmiin kẹbugh epu ịphen phọ.”

⁵¹Kụ ọdi ạḅeni nyọdi mọ, “Mị ạkar rịḅeni ghan inyina mọ nyina kẹmiin ni okuaḍio phọ dị maghughuronu, rꞌạruukpaany phọ Ẹnaan dị rọsinyighu, ọḅile rosoorom Mọony phọ Oye.”