Read abua Jọn 11 Bible Online

Jọn 11 - abua bible

Jọn 11

¹Oniin oye ọlo aBetani dị oghol mọ ạLazaros ạrol li emoon. Ẹpe phọ kụ ẹmha aMeri rꞌạMata umarani phọ ọdi.

²Phọn kụ aMeri phọ ọpo ạsighe bọ elo phọ asugh Ọmoogh-we phọ kụ ạsighe bọ sịlaal phọ ọdi agbuuroghom ruwol phọ ọdi. Ọdi kụ umarani ạLazaros phọ úmoon bọ.

³Abumarani phọ ạbuen phọ urom ni dom ọghiomaan Jịzos mọ, “Ọmoogh-we, nạghan! Ọpo nạ ạphomoghian bọ ómoon.”

⁴Mem dị ạJizos ạnaghan bọ ịduon phọ, ọdi ạḅem mọ, “Eephina phọ ẹphen kẹ́lo aḍuugh, ịtuan ịlo eghuan phọ Ẹnaan, pịdi Ọony phọ Ẹnaan ạtuan ạmoogh eghuan.”

⁵ẠJizos ạphomoghian ni Mạta rꞌumarani phọ ọdi rꞌạLazaros.

⁶Ọdi ạrol bọ ạnaghan mọ ạLazaros ómoon phọ, ạḅile ghụn ni bịn ạmina ịyal aḍughul-otu,

⁷kụ agbi ọḅeni ạbumatuan phọ ọdi mọ, “Ọḅile ọghi ẹpe Judia!”

⁸Kụ ạbumatuan phọ ọdi ọḅeni nyọdi mọ, “Ọtughemia, tọ pụruku ạbuo aJu phọ ọwa ni oroḅol ạna ikpo, kụ nạ kạḅile kẹn ạki ẹpe?”

⁹Kụ ạJizos ạḅeni bịdi mọ, “Ḍioph rꞌịyal ạwa kụ ílho ghan bọ ẹmhu aḍio ḍụghum? Oye lọ arelhe ootaany ráakpeteghaan ghan, ịdi eḍighi bọ ọdi rạmiin ni ḍịḅaal aḅirini phọ.

¹⁰Kụ oye lọ arelhe ḍughul kaakpeteghaan ni, ịdi eḍighi bọ ạḍiḅaal loor ọdi ílho.”

¹¹Ọdi rọghaaph ịphen phọ rọman, kụ ạḅeni bịdi mọ, “ẠLazaros ọyaghiri phọ ayira mameel rạlha, kụ mị rạki ọsumeeny ọdi.”

¹²Kụ ạbumatuan phọ mọ, “Ọmoogh-we, eḍighi ịyaar dị ọdi rạnaani, pọ kạsuma ni.”

¹³Kụ bịdi úlegheri aani bọ mọ ạJizos ạghaaph ghan ịlo aḍuugh phọ ạLazaros, ugbiom ghan mọ ọdi ạghaaph ghan ịlo oopho ạralha.

¹⁴Kụ ạJizos ạghaaph amitiom ạḅeni bịdi mọ, “ẠLazaros mamugh.

¹⁵Kụ ologhi ạmi ạḅaal li esi ẹmhu anyina ịdipho mị ụ́tol bọ rꞌọdi, pịdi nyina emeeraam. Ọghi ni ọmiin nyọdi!”

¹⁶Kụ ạTomos, ọpo oghol bọ mọ ạDidimos phọ, ạḅeni bụeri phọ ạbumatuan phọ mọ, “Ọghi aani ni, pịdi yira omugh aani rꞌọdi!”

¹⁷ẠJizos aru bọ asi Betani, ạmiin ni mọ ạLazaros mạrol pạ oḍi phọ oomo inya aḍughul-otu.

¹⁸ABetani atuman ni Jeruselem dị ọḍua rọki ị́man ịraar itobi.

¹⁹Ịbadi ạbuo aJu phọ ụghiighi ni ọsenyaan ạMata rꞌaMeri ịlo aḍuugh umor phọ ạbidi.

²⁰Kụ ạMata ạnaghan bọ mọ ạJizos ratu phọ, ạghi ni azuan nyọdi, kụ aMeri ạrol li ologhi otu.

²¹Kụ ạMata ạḅeni Jịzos mọ, “Ọmoogh-we, mọ nạ ụrol li sịen, ọbo umor phọ ạmi múmugh.

²²Mị alegheri ni mọ ghạlamo ạnyiidipho, tọro ịlo nạ ạlom Ẹnaan, Ẹnaan kẹngo ni nyịna.”

²³Kụ ạJizos ạḅeni nyọdi mọ, “Umor phọ ạna kạḅile ni aḅetenu.”

²⁴Kụ ạMata mọ, “Mị alegheri ni mọ ọdi kạḅile ni aḅetenu esi aḍuugh ruukuna phọ.”

²⁵Kụ ạJizos mọ, “Mị phọ kụ raḅerion ghan bọ we esi aḍuugh kạngooghi ghuḍum. Kụ ọlo umeeraam ịmi, ghạlamo amugh ni, kạmoogh ni ghuḍum.

²⁶Kụ ọpo odi bọ kụ umeeraam ịmi kámugh rꞌamem. Nạ ameeraam ni ịphen phọ?”

²⁷Kụ ọdi ameera mọ, “Ii, Ọmoogh-we. Mị mameeraam ni mọ nạ kụ aMesaya phọ Ọony phọ Ẹnaan, ọpo katu bọ sịen aḅirini phọ.”

²⁸Ọdi rọghaaph ịduon phọ, kụ asi ologhi otu ạmagh Meri, umarani phọ ọdi atenom ọgbal kụ ạḅeni mọ, “Ọtughemia phọ maru, kụ rạmagh ni nyịna.”

²⁹Kụ aMeri rọnaghan ịduon phọ, bịn gburughutuph aḅetenu anyeene ọteeny ọdi.

³⁰Kụ ạJizos kőmite ẹmha phọ, odi ni ẹpe ạMata azuan bọ nyọdi.

³¹Kụ mem dị ạbuo aJu phọ, ạbuphe ọrol bọ sịphe ologhi otu phọ rọsenyaan ghan Meri ọmiin bọ mọ ọdi maḍighi gburughutuph aḅetenu amite phọ, ụdaph ni nyọdi, ogbiom ghan mọ ọdi ranyeene ẹpe oḍi phọ kụ ọrol omoghi yogh.

³²Kụ aMeri ạghi bọ asi sịphe ạJizos ạrol bọ, rọmiin nyọdi bịn akpuḍian pạ aruwol phọ ọdi, kụ ạḅeni mọ, “Ọmoogh-we, mọ nạ ụrol li sịen, ọbo umor phọ ạmi múmugh.”

³³Mem dị ạJizos ạmiin bọ dị ọdi rꞌạbuo aJu phọ ạbuphe ọdaph aani bọ nyọdi romoghi yogh, iroor ri nyọdi, kụ ẹeḅaghami uwaloor ọdi,

³⁴kụ apuru mọ, “Nyina iḍi nyọdi ḍighen?” Kụ bịdi mọ, “Ọmoogh-we, tue ạmiin.”

³⁵Kụ ạJizos amoghi yogh.

³⁶Kụ ạbuo aJu phọ ọḅem mọ, “Ịmiin ịdi ọdi ạphomoghian ghan nyọdi.”

³⁷Kụ abuniin mọ, “Oye phọ ọphon ạḅarion bọ riḍien oye ikpom ariḍien phọ, ọdi mútue uḍighi ịyaar dị ạLazaros múmugh ḍụghum?”

³⁸Ịḅile ni eroor Jịzos kụ ạghi pạ oḍi phọ. Oḍi phọ aḍighi epogh, kụ ọsighe ḍighiigh opukiom ọnhu-aḍibuo phọ.

³⁹Kụ ạJizos ạḅem mọ, “Iikilemi ḍighiigh phọ ẹsighe.” Kụ ạMata umarani ọpo mamugh bọ ạḅeni nyọdi mọ, “Ọmoogh-we, nyịidipho ọdi rapur. Ọdi amugh bọ sịen inya aḍughul-otu.”

⁴⁰Kụ ạJizos apuru nyọdi mọ, “Mịna ḍịen nyịna ụ́ḅeni, mọ eḍighi ịyaar dị nạ ameeraam ni, mọ nạ kạmiin ni eghuan phọ Ẹnaan?”

⁴¹Kụ bịdi ookilemi ḍighiigh phọ ọsighe pạ ọnhu oḍi phọ. Kụ ạJizos aphogh ạnyu, kụ ạḅem mọ, “Ọde, mị rạseph ni nyịna, ịdipho nạ mụnaghanan bọ ịmi,

⁴²kụ mị alegheri mọ nạ rụnaghanan ghan ni ịmi oomo amem: mị ụtuan dị awe phọ ạbuen ọmeregha bọ sịen kụ rạḅem bọ ịduon phọ, pịdi bịdi omeeraam mọ nạ kụ urom bọ ni ịmi.”

⁴³Ọdi rọḅem ịduon phọ, kụ ạlho ạghiom ạnyu mọ, “Lạzaros, tue amite.”

⁴⁴Kụ ọpo mamugh bọ ni aru amite rꞌạraghaagh rꞌaruwol dị ọphiinyom ọmur ukpe, rꞌaghisigh dị ọkagh ạpookisi. Kụ ạJizos ạḅeni bịdi mọ, “Ịikpo nyọdi, ọdi agheel!”

⁴⁵Kụ ịbadi ạbuo aJu phọ oru bọ ọsenyaan aMeri ụmiin ni ịpe ạJizos aḍighi bọ kụ omeeraam nyọdi.

⁴⁶Kụ buniin ạbidi ọghi ọghaaph ịpe ạJizos aḍighi bọ ọḅeni Farisi phọ.

⁴⁷Kụ aFarisi phọ rꞌạbuo ạrumhu ariil ạrikia phọ ookpomoghi ikpolom awe phọ kụ opuru mọ, “Yira koḍighi ika? Ọpo phọ raḍighi yogh ni ịbadi ịiḍaany.

⁴⁸Yira ọwile nyọdi bịn, oomo awe komeeraam ni nyọdi, kụ ạbuo aRom otu ạar iyira Otu Ịiḅereghi phọ rꞌạbuo eelhe phọ.”

⁴⁹Kụ oniin ọnyo ạbidi, dị oghol mọ ạKayafas, ọpo aḍighi bọ uwo ẹmhu oyil ạrikia phọ lhạ phọ ạḍiphe, ạḅeni bịdi mọ, “Nyina aweye dị mạar ílegheri,

⁵⁰ḅịle kẹn nyina rẹ́etughian ghan mọ ẹkpianaan ni dị oniin oye kaghol we phọ amugh, ọbo oomo ạbuo eelhe phọ kope ghan bọ?”

⁵¹(ẠKayafas ọ́sighe ịitughian ọdi bịn kụ ạghaaphom bọ ịphen phọ. Ịdipho ọdi aḍighi bọ uwo ẹmhu oyil ạrikia lhạ phọ ạḍiphe phọ, ọdi ạmiin ni ịmiin mọ ạJizos kụ kamughanaan bọ bụo aJu phọ,

⁵²kạ́buo aJu phọ bịn, kạḅaram aani ni nmụny phọ Ẹnaan ọwalala bọ kụ aakpomoghi ạtolomi ḍiniin ạdol.)

⁵³Emiigh kꞌaḍio phọ ạḍiphe phọ, ạbuo ạrumhu phọ ụḅoph ni ọnhu oosophoghian ghan ịlo oghiigh ọdi.

⁵⁴Kụ ạJizos ạwile omite ghan egaan ogbo ạbuo aJu phọ, kụ ạḍua agheel eelhe dị etuman ẹdala phọ aḍigh ẹmha dị oghol mọ Ifraim, kụ ọdi rꞌạbumatuan phọ ọdi ọrol ẹpe phọ.

⁵⁵Retu ọteeny amem ẹyaal ạbuo aJu phọ oghol bọ mọ ẹyaal ọphel otene phọ, kụ ịbadi awe ạramha kịrokiro oḅonom osi Jeruselem ịlo oselemian asiloor ạbidi.

⁵⁶Bịdi ụwa ghan ni ọmiin ạJizos, kụ bịdi ookpomoghan bọ sịphe Otu Ịiḅereghi phọ oniin apuru ghan ni nyoniin mọ, “Nyina regbi ghan ika? Tọ, nyina elegheri ni mọ ọdi kátu aani olhe ẹyaal phọ, katu ni ḍụghum?”

⁵⁷Kụ ạbuo ạrumhu ariil ạrikia phọ rꞌaFarisi phọ oogonoghian ghan bọ osiph ọdi ụlogh ni ologh mọ oye lọ alegheri ekpisi lọ ọdi odi aru ạḅeni bụno.