Read abua Jọn 16 Bible Online

Jọn 16 - abua bible

Jọn 16

¹“Mị ụghaaph ịphen phọ ịḅeni inyina ọbo nyina kẹkanyanu ghan bọ.

²Bịdi kiroph ni inyina ogbeph sịphe arubughotu phọ, kụ amem retu ni dị tọrobo oye lọ ighiigh inyina kagbiom ghan mọ ọno raḍighi oḍighi kạngo Ẹnaan.

³Bịdi kiḍighi ni inyina ịphen phọ, loor esi dị bịdi Ọde phọ rꞌạmi úlegheri.

⁴Kụ mị mịḅeni inyina ịphen phọ, ọbo ẹteeny mem mọ nyina ẹghiom ologhi mọ mị mịḅeni ni inyina.” “Mị ụ́kaaph ịphen phọ ịḅeni inyina kꞌemiighom mọ, loor esi dị mị ụrolan ni rꞌanyina.

⁵Kụ nyịidipho mị rakeel kꞌỌpo urom bọ ịmi, kụ rꞌoniin ọnyo anyina ịmi rúpuru ghan mọ, ‘Nạ rakeel ẹghen?’

⁶Kụ nyịidipho mị mạghaaph bọ ịphen phọ ịḅeni inyina, nyina memeelom ọto.

⁷Kụ mị rịḅeni inyina ịpe eru bọ ịne phọ mọ ịnighenaan ghụn inyina dị mị kakeel, ịdi eḍighi bọ mọ mị úkeel, pọ Ọodereghia phọ kíruanaan inyina. Kụ mị agheel, mị kạsighe ni nyọdi iruomonaan inyina.

⁸Mem dị ọdi aru asi, ọdi kagananami ni ịyaar dị ịkaraph rꞌaruukuan rꞌasiph rꞌakeel eru aḍeenaan aḅirini phọ.

⁹Ịdipho bịdi ịmi úmeeraam bọ, kụ ẹdi ologh ịkaraph phọ asiph bọ bịdi.

¹⁰Ịdipho mị rakeel bọ kꞌỌde phọ kụ nyina ịmi kị́miin mun bọ kụ ịdi ọdi kagananami ruukuan phọ ạmi aḍeenaan bịdi.

¹¹Ịdipho erugh phọ mephum bọ ni ọdaam aḅirini phọ ọphon kụ ịdi bịdi kolegheri mọ Ẹnaan keegbo ni ịiruen ẹngo bụno.

¹²“Ọbo esugha ni ịbadi ạraraar ọḅeni anyina, kụ adool phọ keemor ẹpughan esi anyina.

¹³Kụ mem dị Uwaloor Igey phọ aru asi, ọdi kiḍiemiom ni inyina aḍereghinaan oomo phọ ịpe eru bọ igey phọ. Ọdi kạ́kaaphom ịitughian ọdi bịn. Ọdi kạkaaph ni ịpe ọdi ạnaghan bọ, ạḅile ịḅeniom inyina ịlo ạraraar dị kemiteghu.

¹⁴Uwaloor Igey phọ kạsighe ni ịlo mị ạghaaph ịḅeni inyina, agananamiom eghuan phọ ạmi.

¹⁵Oomo phọ ạraraar phọ ịpe Ọde phọ ạmoogh bọ ịlo ạmi ni. Ịduon kụ iḍighi kụ mị ạḅem bọ mọ ọdi kạsighe ni ịlo mị ạghaaph ạḅeni inyina.”

¹⁶“Ọony amem bịn nyina ịmi kị́miin mun. Onyebel roten, bịn nyina kịmiin ghan ni ịmi.”

¹⁷Kụ buniin ạbumatuan phọ ọdi opuru bụeri phọ mọ, “Ẹmhu ịphen phọ eeghe? Ọdi rụḅeni ghan iyira mọ, ‘Ọony amem bịn nyina ịmi kị́miin mun. Onyebel roten bịn nyina kịmiin ghan ni ịmi.’ Ḅịle kẹn mọ, ‘Ịdi eḍighi bọ mị rakeel kꞌỌde phọ.’

¹⁸Ẹmhu ‘ọony amem’ mọ eeghe? Yira úlegheri ẹmhu ịphen ọdi rạkaaph bọ.”

¹⁹Kụ ạJizos alegheri ni mọ bịdi rọwa opuru ọno sipuru kụ ạḅeni bịdi mọ, “Mị ụḅem mọ, ‘Ọony amem bịn nyina ịmi kị́miin mun. Onyebel roten bịn nyina kịmiin ghan ni ịmi.’ Ịphen phọ kụ ịdi nyina eghol bọ reepuruan ghan ḍụghum?

²⁰Mị ạkar rịḅeni ghan inyina mọ nyina kemeelom ni ọto kụ aḅirini phọ kọmoogh ni ọḅaal ologhi; nyina kemeelom ọto, kụ ọto phọ anyina katen ni iboh.

²¹Mem dị oghun-aḍien rakun ạnir-ephoph, ọdi rameelom ghan ni ọto ịdi eḍighi bọ mesiom nyọdi, kụ rọmar mọony phọ roseere, bịn mawula ịminimiin phọ, ịdi eḍighi bọ ologhi ọdi mạḅaal mọ ọno mạmar mọony aseere sịen aḅirini phọ.

²²Ịduon phọ kụ ịdi idianaan bọ inyina. Nyịidipho nyina emeelom ọto, kụ mị kạḅile ni ịmiin inyina kụ iboh kemuza ni iloghi phọ anyina, kụ oye dị katue ạar inyina kạ́tol.

²³“Kụ ḍio phọ ạḍiphe nyina ịmi ịyaar kípuru. Mị ạkar rịḅeni ghan inyina mọ Ọde phọ kịngo ni inyina tọrobo ịyaar dị nyina eghol ḍien phọ ạmi kụ ẹlhom nyọdi.

²⁴Tụtu ẹteeny bọ kꞌạnyiidipho, nyina ke̋ghol ḍien phọ ạmi ẹlhom ịyaar. Ịlom ghan, kịngo ni inyina, ọbo iboh phọ anyina emunughan.”

²⁵“Mị adoghogh ni ịphen phọ kụ rịḅeni bọ inyina, kụ amem retu ni dị mị kạ́sighe mun sidogh kụ ạkaaphom. Mị kagboton ni ạkaaph ịlo Ọde phọ ịḅeni inyina.

²⁶Ḍio phọ ạḍiphe, nyina kekol ḍien phọ ạmi kụ ẹlom, kụ mị rạ́ḅem ghan mọ mị kighol li inyina apuru,

²⁷ịdi eḍighi bọ Ọde phọ rꞌaloor ọdi ịphomoghian ni inyina. Ọdi ịphomoghian ni inyina, ịdi eḍighi bọ nyina ịphomoghian ni ịmi, ẹḅile emeeraam mọ mị ụḍua ni kꞌẸnaan kụ aru bọ.

²⁸Mị ụḍua ni kꞌỌde phọ kụ aru bọ sịen aḅirini phọ, kụ nyịidipho mị rạbile aḅirini phọ kagheel kꞌỌde phọ.”

²⁹Kụ ạbumatuan phọ ọdi ọḅeni nyọdi mọ, “Ịhii, pụruku nạ magboton ọghaaph phọ kụ nạ sidogh rạ́kaaphom mun.

³⁰Pụruku yoor molegheri mọ nạ alegheri ni oomo ạraraar. Nạ rákori ghan ọnaghan aḍipuru kụ agbi olegheri ịlo oye phọ rạatughian. Ịduon kụ ịdi yoor ọsighe bọ omeeraam mọ nạ ụḍua ni kꞌẸnaan kụ aru bọ.”

³¹ẠJizos mọ, “Nyịidipho phọ nyina memeeraam?

³²Amem retu ni — kụ mesi ni sịen — dị kịiwalami inyina, uwotu akeel otu, kụ nyina ẹsar ogina ạmi ẹbile sịen. Kụ ọlo mị ụ́kar ulho ẹkpororoony, loor esi dị Ọde phọ odianaan ni rꞌạmi.

³³Mị ụghaaph ịphen phọ ịḅeni inyina, pịdi nyina ịḅophoghan ịmi ẹmoogh ẹepho. Nyina kẹmiinom ni ịminimiin sịen aḅirini phọ, kụ ọlo ịkparami ni iloghi anyina. Mị mạkpar ri apu aḅirini phọ.”