Read abua Jọn 17 Bible Online

Jọn 17 - abua bible

Jọn 17

¹ẠJizos rọghaaph ịphen phọ kụ aphoophe ghisigh phọ ọdi aphogh kꞌạke kụ ạḅem mọ, “Ọde, amem mọ mẹteeny. Gananami eghuan Ọony phọ ạna, ọbo Ọony phọ ạna agananami aani eghuan phọ ạna,

²ịdipho nạ mạḅogh bọ ịikpo ọdaam oomo awe phọ ạlogh ḍịghaagh ọdi, mọ ọdi ạngo ghuḍum kꞌagee-pọ oomo ạbuphe nạ ạngo bọ nyọdi.

³Kụen kụ aghuḍum kꞌagee-pọ phọ mọ bịdi olegheri nyịna egina ọkaraghi Ẹnaan phọ, ḅịle rꞌạJizos Kraist phọ nạ kụ arom bọ.

⁴Mị ugananami ni eghuan phọ ạna sịen ade phọ. Mị ụmadan ni oḍighi phọ nạ ụngo bọ ịmi oḍighi phọ.

⁵Ọde, ughueni aani ịmi rꞌeghuan phọ ẹpe mị ạmoogh bọ egbodo phọ ạna mem mọ kọ̋lhem bọ aḅirini phọ.

⁶“Mị maḍighi ni dị awe phọ nạ ạsaḅar bọ sịen aḅirini phọ ụngo ịmi molhegheri nyịna. Bịdi phọ uḍighi ni bụo ạna, kụ nạ ụngo bọ ịmi. Bịdi mọnaghanan ni ikpo ọnhu phọ ạna.

⁷Nyịidipho bịdi molhoghoma mọ oomo ạraraar phọ ịpe nạ ụngo bọ ịmi ịḍua ni kꞌạna kụ eru bọ.

⁸Mị ụḅeni ni bịdi ịpe nạ ụḅeni bọ ịmi kụ bịdi ụmaghami ni ịyaar kụ molhoghoma mọ mị ụḍua ni kꞌạna kụ aru bọ, ọḅile omeeraam mọ nạ kụ urom bọ ni ịmi.

⁹“Mị rạaḅereghinaan ghan ni kạngo bịdi, mị rạ́aḅereghinaan ghan aḅirini phọ. Mị rạaḅereghi ghan kạngo bụphe nạ ụngo bọ ịmi, loor esi dị bịdi ạbuo ạna ni.

¹⁰Oomo ịlo ạmi, pọ ịlo ạna, ḅịle oomo ịlo ạna, pọ ịlo ạmi. Mị magananami ni eghuan phọ ạmi loor ạbidi.

¹¹Kụ nyịidipho mị úlho mun sịen aḅirini phọ, bịdi kụ odi, kụ mị ratigheel kꞌạna. Ọde Iigbia, mạar ạphamam bịdi ịikpo aḍien phọ ạna nạ ụngo bọ ịmi, pịdi bịdi oḍighi nyoniin ịdipho ayira.

¹²Mem mọ mị ạrolan bọ bịdi, mị ụphamam ni bịdi ịikpo aḍien phọ ạna nạ ụngo bọ ịmi. Mị ụmaar ri ạpham bịdi dị rꞌoniin ọnyo ạbidi úpe, emuton nyọpo ẹgianaan bọ ophe phọ, ọbo omuneniom ịpe ạḍinya iigbia phọ ẹḅem bọ.

¹³Kụ nyịidipho mị ratigheel kꞌạna kụ mị rạkaaph ghan ịphen phọ sịen aḅirini phọ, ọbo bịdi ọmoogh iboh phọ ạmi omuzeḍi sịphe iloghi phọ ạbidi.

¹⁴Mị ụghaaph ni ọghaaph phọ ạna ạḅeni bịdi, kụ aḅirini phọ ụlogh ni bịdi ḍien, ịdi eḍighi bọ bịdi kạ́buo aḅirini phọ, ịdipho mị útu bọ ọlo aḅirini phọ.

¹⁵Mị nyịna rạ́lom mọ sịghe bịdi sịen aḅirini phọ. Mị rạlom ghan ghụn mọ bịdi okoronaan Ọkaraph phọ.

¹⁶Ịdipho mị útu bọ ọlo aḅirini phọ, bịdi kẹn kạ́buo aḅirini phọ.

¹⁷Sịghe ịpe eru bọ ịne phọ aselemiom bịdi aseerian. Ọghaaph phọ ạna ịne ni.

¹⁸Ịdipho nạ urom bọ ịmi kụ mị aru bọ sịen aḅirini phọ kụ ịdi mị arom aani bọ ni bịdi sịen aḅirini phọ.

¹⁹Mị ughol ẹmhu ạbidi kụ aselemian bọ loor phọ ạmi, ọbo bịdi ọsighe aani ịpe eru bọ ịne phọ oselemianam loor phọ ạbidi.

²⁰“Mị rạ́aḅereghi ghan kạngo bịdi bịn, mị akolom aani ni bụphe ọtuan bọ ọghaaph phọ ạbidi umeeraam ịmi.

²¹Mọ oomo phọ ạbidi oḍighi nyoniin. Ọde, mị rạlom mọ bịdi ụḅophoghan iyira, ịdipho nạ rꞌạmi ọḅophan bọ, ọbo aḅirini phọ omeeraam mọ nạ kụ urom ni ịmi.

²²Eghuan phọ nạ ụngo bọ ịmi mị mạngo aani ni bịdi, ọbo bịdi oḍighi nyoniin, ịdipho nạ rꞌạmi oḍighi bọ nyoniin phọ.

²³Mị ạḅophoghan ni bịdi, kụ nạ ụḅophan ni ịmi ọbo bịdi oḍighi nyoniin ọmadan, aḅirini phọ ọḅile kẹn olegheri mọ nạ kụ urom ni ịmi, ḅịle mọ nạ ạpomoghian ni bịdi, ịdipho nạ ụphomoghian bọ ịmi.

²⁴“Ọde, nạ kụ ụḅogh bọ bịdi ạlogh ḍịghaagh phọ ạmi. Mị rạwa mọ bịdi ụrolan ịmi ẹpe mị odi bọ, ọbo bịdi ọmiin aani eghuan phọ ạmi, eghuan phọ ẹpe nạ ụngo bọ ịmi, loor esi dị nạ ụphomoghian ni ịmi kꞌamem mọ kọ̋lhem bọ aḅirini phọ.

²⁵Ọde Aruukuan, aḅirini phọ nyịna úlegheri, kụ mị alegheri ni nyịna, ḅịle bụen phọ olegheri ni mọ nạ kụ urom bọ ịmi.

²⁶Mị maḍighi ni dị bịdi molegheri ḍien phọ ạna, kụ mị kaḍighi ni ạkiom ghisigh, ọbo ẹphomoghian phọ ẹpe nạ ụphomoghian bọ ịmi ẹrolan aani bịdi, mị ạḅile kẹn ạrolan aani bịdi.”