Read abua Jọn 19 Bible Online

Jọn 19 - abua bible

Jọn 19

¹Kụ aPailet ạsighe Jịzos ạngo kụ ọgurogh.

²Kụ ạbuo ẹgham mọ olho eghoony iitoor ozu nyọdi, kụ ọsighe oodor ọkpologhi nyọdi,

³kụ oru ghan ọteeny nyọdi ọḅeni mọ, “Oboom oboom ạbuo aJu,” kụ ooḅorogh ghan nyọdi.

⁴Kụ aPailet ạḅile kẹn amite ạghi ạteeny bịdi kụ ạḅeni mọ, “Ịmiin, mị mạsighe nyọdi riruomaan inyina, pịdi nyina elegheri mọ mị ụ́miin ologh dị ọdi asoor.”

⁵Kụ omitiom Jịzos erugh rꞌeghoony iitoor phọ ozu bọ nyọdi, rꞌoodor phọ ọkpologhi bọ. Kụ aPailet ạḅeni bịdi mọ, “Ịporono oye phọ!”

⁶Kụ ạbuo ạrumhu ariil ạrikia phọ rꞌabukoriom mọ rọmiin bọ nyọdi, kụ ọyughuron mọ, “Kạn nyọdi aghiigh! Kạn nyọdi aghiigh!” Kụ aPailet ạḅeni bịdi mọ, “Nyina kụ ịsighe nyọdi ẹkan eghiigh; ạmi ạmi, mị ụ́miin ologh dị ọdi asoor.”

⁷Kụ ạbuo aJu phọ mọ, “Yoor ọmoogh ni ologh dị yoor rọdaph ghan, kụ ọdi ạkpe ni oghiigh, ịdi eḍighi bọ ọdi akophora akola mọ ọno kụ Ọony phọ Ẹnaan.”

⁸Mem dị aPailet ạnaghan bọ ọghaaph phọ ọphon, aruugu dị asiph nyọdi apu kụḅel phọ.

⁹Kụ ọdi ạḅile aḍigh ogiga phọ ọdi kụ apuru Jịzos mọ, “Nạ ọlo ẹghen?” Kụ ạJizos nyọdi ọnhu ọ́ngo.

¹⁰Kụ aPailet apuru nyọdi mọ, “Rꞌạmi phọ kẹn ni kụ nạ aḅoronom ni? Nạ ọ́kar ri olegheri mọ mị ạmoogh ni ịikpo oseere ạna, ḅịle rꞌịikpo ọkan ạna oghiigh ḍụghum?”

¹¹Kụ ạJizos mọ, “Nạ mụ́moogh ịikpo ọdaam ạmi, mọ Ẹnaan kụ nyịna mị́ngo bọ. Esi ịduon phọ, ịkaraph ọpo ụḅogh bọ ịmi ạngo nyịna kụ eeph epu ịlo ạna.”

¹²Emiigh kꞌamem mọ ọpo phọ, aPailet ạwa ghan ni ịlo oseere ọdi, kụ ạbuo aJu phọ ọyughuron mọ, “Nạ ạkaraghi aseere oye phọ ọphon, pọ nạ kọ́yaghiri aSiza mun. Tọrobo oye lọ aghola mọ ọno ọdaam ẹmha, pọ maruphiom Siza.”

¹³Kụ aPailet rọnaghan bọ ikpo ọnhu phọ ịphen, kụ ạsighe Jịzos amitiom, kụ ạrolom ạgada ịiruen phọ pạ egbolom mọ oghol bọ ọnhu aHibru mọ ạGabata.

¹⁴Ạḍien phọ iḍighi ḍio ookolobian ẹyaal ọphel otene phọ kụ iḍighi ogbo ootaany. Kụ aPailet ạḅeni bụo aJu phọ mọ, “Ịporono ọdaam ẹmha phọ anyina.”

¹⁵Kụ bịdi ọyughuronaan mọ, “Kiigh nyọdi, kiigh nyọdi, kạn nyọdi aghiigh.” Kụ aPailet mọ, “Mị ụkan ọdaam ẹmha phọ anyina ukiigh?” Kụ ạbuo ạrumhu ariil ạrikia phọ mọ, “Emuton Siza, yoor ọnon ọdaam ẹmha ụ́moogh.”

¹⁶Kụ ọdi ạḅogh Jịzos ạngo bịdi mọ ọkan oghiigh. Kụ bịdi ọsighe Jịzos ọḍuanam.

¹⁷Kụ ọsighe oreeny phọ kọkanam bọ nyọdi ọngo mọ ọdi arool ạghimom esi dị oghol ọnhu aHibru mọ ạGolgota ịsien phọ esi ạwara, ạkpaḍi igbaany ạrumhu.

¹⁸Kụ ọkan nyọdi loor oreeny phọ ọḅaram ịyal ạbunon awe, oniin ekeeny, oniin elhiom. Kụ ạJizos ạrol pạ ogbo phọ ạbidi.

¹⁹Kụ aPailet ạge ḍịnya ạdaphari sịphe oreeny phọ mọ, “Jịzos ọpo ạNazeret, Ọdaam ẹmha ạbuo aJu phọ.”

²⁰Kụ ịbadi ạbuo aJu phọ ạal li ịphen phọ, ịdi eḍighi bọ esi phọ ọkan bọ Jịzos ituman ni ẹmha phọ. Ụge ni ịphen phọ ọnhu aHibru rꞌaRom rꞌaGris.

²¹Kụ ạbuo ạrumhu ariil ạrikia phọ ọghi ọḅeni Pailet mọ, “Nạ ạḅile ạge mọ ‘Ọdaam ẹmha ạbuo aJu phọ.’ Gẹ ghụn mọ, ‘Oye phọ ọphon ạḅem mọ ọno Ọdaam ẹmha ạbuo aJu phọ.’”

²²Kụ aPailet mọ, “Ịpe mị mạge bọ, mị mạge.”

²³Kụ ạbuo ẹgham mọ rọkan bọ Jịzos loor oreeny phọ rogim kụ bịdi ọsighe iinmenan phọ ọdi odi inya abin, oye ye bin. Ụsighe kẹn ni ạsuoma phọ ọdi, dị ụ́kolom iri ulho ezeleleeny bịn.

²⁴Kụ oniin ạḅeni nyoniin mọ, “Kụ́panyi. Ọsaaghi ghụn ẹlhel olegheriom nyọpo kemeelom bọ!” Ịphen phọ imite ịlo omuneniom ịpe ạḍinya iigbia phọ ẹḅem bọ mọ, “Bịdi kọsighe ni iinmenan ạmi odian, ọḅile ọsaaghi ẹlhel olegheriom oye phọ kạmoogh bọ ạsuoma phọ ạmi.” Ịphen phọ kụ ịdi ạbuo ẹgham mọ oḍighi bọ.

²⁵Kụ onhiin phọ rꞌumarani onhiin phọ ạJizos, rꞌaMeri, ạnir phọ aKlopas, rꞌaMeri ọpo ạMagdala phọ, ụmeregha ni otuman oreeny phọ.

²⁶Kụ ạJizos rọmiin bọ onhiin phọ ọdi rꞌạmatuan phọ ọpo ọdi ạphomoghian bọ iboom mọ, dị ọmeregha, kụ ọdi ạḅeni onhiin phọ ọdi mọ, “Nịr phọ, pọrono ọony ạna!”

²⁷Kụ ạḅeni kẹn mạtuan phọ ọpo phọ mọ, “Pọrono onhiin ạna!” Kụ emiigh kꞌamem mọ ạmuphe, ạmatuan phọ ọpo ạsighe onhiin phọ ạJizos agheelom kꞌọdi.

²⁸Ịphen phọ reten bọ, bịn ạJizos alegheri ni mọ oomo ạraraar memunughan kụ ạḅem ịlo omuneniom ịpe ạḍinya iigbia phọ ẹḅem bọ mọ, “Ạmuum rụphu ịmi.”

²⁹Useere ni pạ phọ oko dị omuzeḍi mụkpueneen amiim. Kụ bịdi ọsighe iisighom ọotoghoḍiom miim mọ kụ ọpharari loor ọla ạhisop kụ osu ọghi ọlogh ọnhu phọ ọdi.

³⁰Kụ ạJizos rọnam miim mọ kụ ạḅem mọ, “Memuneen.” Kụ ọdi azumeri ẹmhu ọdi kụ ạwile uwaloor phọ ọdi ạḍua.

³¹Kụ ạbuo aJu phọ ọghi ọoḅereghian Pailet mọ owunughi ruwol ạbuphe mọkan bọ ọsighe ruzu phọ osoore ude. Bịdi uḍighi ni ịduon phọ ịdi eḍighi bọ ḍịphe phọ aḍio ookolobian phọ reghul kẹḅaal ḍigbogh aḍio ophooghian phọ, kụ bịdi ụ́wa mọ aruzu phọ ạbidi ẹrol ạnyu ireeny phọ ẹteeny ḍio ophooghian phọ.

³²Kụ ạbuo ẹgham mọ oru owunughi ruwol ọḅel phọ rꞌọphori phọ ạbuphe ọḅaram bọ Jịzos ọkan.

³³Bịdi ọteeny bọ Jịzos, ụmiin ni mọ ọdi mamugh kụ ruwol phọ ọdi úbunughi aani.

³⁴Kụ oniin ọnyo ẹgham mọ dị ạpham ọsoph, ạsighe agim ịkpurugaany ọdi, kụ egina amem bịn ịḅaal rꞌạmuum ekil emite.

³⁵Kụ ọpo ạmiin bọ ịphen phọ ạgba ni amitiom, pịdi nyina emeeraam aani. Ịpe ọdi mạghaaph bọ ọkar igey ni, kụ ọdi alegheri ni mọ ọno rạkaaph ni igey.

³⁶Ịphen phọ imite omuneniom ịpe ạḍinya iigbia phọ ẹḅem bọ mọ, “Rꞌoniin ọḅarara ọdi kóbun.”

³⁷Kụ ẹnon ẹkpigh sịphe ạḍinya iigbia phọ edi ni dị ẹḅem mọ, “Bịdi kopogh ni ọmiin nyọpo bịdi ogim bọ ọsoph phọ.”

³⁸Ịphen phọ reten bọ, kụ ạJosef ọpo Arimatia phọ ạghi ạteeny Pailet ạlom mọ ọno kạsighe ḍizu phọ ạJizos ạḍuanam. (ẠJosef phọ aḍighi aani ni mạtuan ạJizos kụ eepuph ạbuo aJu phọ ímeera mọ ọdi amite egaan.) APailet ameera ni kụ ọdi ạghi ạsighe ḍizu phọ.

³⁹ẠJosef rꞌaNikodimos phọ ọpo ạphur bọ ạghi ḍughul ọmiin ạJizos kụ ụghi bọ. ANikodimos ạpham ịraardi igbogh ịtoom ẹemor ọota dị ọsighe maa rꞌalos kụ oḍighinom kụ ạghimom bọ.

⁴⁰Kụ bịdi ọsighe ḍizu phọ ạJizos, kụ romuur ọota phọ, kụ ophurughiom ịphalaḅaal iidugha esi eḍighinom ịyaar ạbuo aJu phọ.

⁴¹Sịphe phọ ọkan bọ Jịzos, oghoony ạrol li rꞌomoom oḍi dị oguph loor asighiigh dị oye kőḍi ghan.

⁴²Ịpa phọ kụ ẹdi bịdi ọsighe bọ ḍizu phọ ạJizos oḍi, ịdi eḍighi bọ esi phọ ituman ni, ḅịle aḍio phọ ạḍiphe iḍighi ḍio ookolobian phọ.