Read abua Jọn 2 Bible Online

Jọn 2 - abua bible

Jọn 2

¹Ịyal aḍughul-otu reten, kụ ọghi kꞌọyogo pạ ẹmha phọ aKena sịphe eelhe phọ aGalili. Onhiin phọ ạJizos ạrol aani ni.

²Ụmagh aani kẹn ni Jịzos rꞌạbumatuan phọ ọdi ọghi kꞌọyogo phọ.

³Mem dị mọphughol oomo phọ amiim mọ ọmadan kụ onhiin phọ ạJizos ạḅeni Jịzos mọ, “Amiim ósugha mun.”

⁴Kụ ạJizos mọ, “Nịr phọ, nạ kụ ịmi kụ́ḅeni ịlo oḍighi. Amem ạmi kẹ̋teeny.”

⁵Kụ onhiin phọ ạJizos ạḅeni butelhedom mọ mọ, “Iḍighi ni tọrobo ịlo ọdi ịḅeni inyina!”

⁶Kụ ẹri, bụphe rọdaph bọ omeeraam ạbuo aJu phọ ọmoogh ni iilogh ịlo ootola ghan ạraghaagh. Esi ịduon phọ, odiiny aroko ạrana ịrologhu ni sịphe dị oko oko ạbugh ni dị katue ni aḍigh oniin okuron aruuku.

⁷Kụ ạJizos ạḅeni butelhedom mọ mọ, “Ịsanyan mụum emuzeḍi roko phọ ịphen!” Kụ bịdi ọsanyan omuzeḍi koi kꞌọnhu.

⁸Kụ ọdi ạḅeni bịdi mọ, “Nyịidipho, ipoor ekor mụum sịphe aroko phọ ẹsighe ẹghiomaan uwo ẹmhu ạgada kꞌọyogo phọ.” Kụ bịdi ọsighe mụum mọ ọghiomonaan nyọdi.

⁹Kụ ọdi ạnam apogh makitonu aḍighi miim. Ọdi ólhegheri ekpisi phọ amiim mọ ạmuen phọ ạḍua bọ kụ aru. Abutelhedom mọ ạbuphe okor bọ mụum mọ bịn ulegheri. Kụ ọdi ạmagh olhom mọ,

¹⁰kụ ạḅeni nyọdi mọ, “Oomo ạbunon awe ọpur ghan rọngo ọto ạrogo phọ mugey amiim mọ, tụtu rạperogh, kụ kogbi omitiom ạmulo ụ́karaghi ụnighe; kụ nạ ạḅile ghụn asugheeny mugey amiim mọ kꞌạnyiidipho!”

¹¹Ịphen kụ ịḅel ịiḍaany dị ạJizos aḍighi kụ amiighom sịphe ẹmha aKena eelhe phọ aGalili. Ẹpe kụ ekpisi dị ọdi agananami eghuan phọ ọdi, kụ ạbumatuan phọ ọdi omeeraam nyọdi.

¹²Ịphen phọ reten, kụ ạJizos rꞌonhiin phọ ọdi, rꞌabumor rꞌạbumatuan phọ ọdi onyeene ọghi ẹpe Kạpaniom, kụ ọrol ịyal-ikpo aḍughul-otu.

¹³Mẹkar rẹkpul olhe ẹyaal ọphel otene phọ, kụ ạJizos ạghi Jeruselem,

¹⁴kụ aḍigh sịphe Otu Ịiḅereghi phọ, kụ ạmiin we dị roboologhi sịnam, rꞌiyool-ịga, rꞌạrukurughozo, rꞌạbudi ọrologhu ịdaabili ronmeeghi ghan ikpoki ạbidi.

¹⁵Kụ ọdi ạphur oḍigh aḍighi ịkpara kụ aphoroghom oomo phọ ịnam mọ, iyool-ịga phọ rꞌạsinam mọ, sịphe Otu Ịiḅereghi phọ. Ọdi agborion ni ịdaabili phọ azuughi ikpoki ạbuphe ronmeeghi bọ.

¹⁶Kụ ọdi ạḅeni we phọ ạbuphe robologhi bọ rụkurughozo phọ mọ, “Ịsighe ịnun anyina ẹḍuanam sịen! Kẹ́sighe otu Ọde phọ ạmi eḍighi otu aḍighi!”

¹⁷Ạbumatuan phọ ọdi ụutughian ni ẹkpigh sịphe ạḍinya iigbia phọ dị ọge mọ, “Ẹnaan, mị ạsighe ologhi phọ ạmi ạḅam loor otu phọ ạna, kụ ologhi phọ ạmi raamor ịdipho ạnian.”

¹⁸Ạbuo aJu phọ opuru nyọdi mọ, “Eeghe ọdo ịiḍaany kụ ịdi nạ kaḍighi oḍeenaan ayoor mọ nạ ạsighe ịikpo phọ Ẹnaan kụ raḍighinom bọ ịphen phọ?”

¹⁹Kụ ạJizos mọ, “Ilereghi Otu Ịiḅereghi phọ ọphon, mị kạḅile ni ạlogh ọnon ạmadan esi ịraar aḍughul-otu.”

²⁰Kụ bịdi ọḅeni nyọdi mọ, “Ẹsighe bọ inyadi rꞌodiiny ạsia ọlogh Otu Ịiḅereghi phọ ọphon, ọmadan kụ nạ ạḅem mọ nạ kạlogh esi ịraar aḍughul-otu bịn!”

²¹Kụ ọlo otu ịiḅereghi phọ ọpo ạJizos ạghaaph bọ, pọ aḍizu phọ ọdi.

²²Ịphen kụ iḍighi bọ ịyaar phọ, mem mọ ọpo oḅeton bọ nyọdi sịphe aḍuugh phọ, ạbumatuan phọ ọdi ọghiom bọ ni ologhi mọ ọdi mạḅem ghan ni ịduon phọ. Kụ bịdi omeeraam ịpe ọge bọ sịphe ạḍinya iigbia phọ rꞌikpo ọnhu phọ ịpe ạJizos ạghaaph bọ.

²³Mem mọ ọpo ạJizos ạrol bọ ẹpe Jeruselem olhe ẹyaal ọphel otene phọ, ịbadi umeeraam ni nyọdi ịdipho bịdi ọmiin bọ ịiḍaany phọ dị aḍighi yogh bọ.

²⁴Kụ ạJizos ọ́ngo bịdi ọgel ologhi phọ ọdi, ịdi eḍighi bọ ọdi alegheri ni iloghi oomo phọ awe phọ ạmadan.

²⁵Ịlo ọḅem mọ oye kụ kạgba ịlo awe ạḅeni nyọdi ị́tol mun, ịdi eḍighi bọ ọdi alegheri ni agey ịdi bịdi rọotughian pạ iloghi phọ ạbidi.