Read abua Jọn 20 Bible Online

Jọn 20 - abua bible

Jọn 20

¹Eḅon ạḍiroor ạSondi phọ dị kọ̋kar ri ọmiina siloor, kụ aMeri ọpo ạMagdala phọ ạghi asi sịphe oḍi phọ, kụ ạmiin dị mọsighe ḍighiigh phọ opukiom bọ ọnhu oḍi phọ ọghiom ḍiniin ạḍighaagh.

²Kụ ọdi aghiil ạghi ạteeny Saimon Pita rꞌọphori phọ ạmatuan phọ ọpo ạJizos ạphomoghian bọ kụ ạḅeni bịdi mọ, “Mọsighe Ọmoogh-we phọ sịphe oḍi phọ ọḍuanam, kụ yoor úlegheri ekpisi lọ oseere nyọdi.”

³Kụ aPita rꞌọphori phọ ạmatuan phọ ọḍua onyeene ẹpe oḍi phọ.

⁴Ịyal phọ ạbidi ughiil li, kụ ọphori phọ ạmatuan phọ aghiil apu Pita, kụ ạphur asi ẹpe oḍi phọ.

⁵Kụ ọdi aḅiriman aphogh, kụ ạmiin ịphalaḅaal iidugha phọ, kụ ọdi óḍigh.

⁶Kụ aSaimon Pita ạdaph ni nyọdi asi aani, kụ aḍigh ologhi oḍi phọ, kụ ạmiin ịphalaḅaal iidugha dị ezuan sịphe phọ bịn.

⁷Ạpookisi phọ ọpo ọkagham bọ ẹmhu phọ ạakpulughian ni gem esi, ọ́rol otuman aani ịphalaḅaal iidugha phọ.

⁸Kụ ọphori phọ ạmatuan phọ ọpo ạphur bọ asi sịphe oḍi phọ aḍigh aani ni kụ ạmiin kụ ameeraam.

⁹(Kꞌạnyiidipho bịn bịdi úlegheri ni ẹmhu ẹkpigh ạḍinya iigbia phọ ẹghaaph bọ mọ ọdi kaḅetenu ni esi aḍuugh phọ ọdi.)

¹⁰Kụ ạbumatuan phọ ọḍua ogheel kꞌạbidi.

¹¹Kụ aMeri ạmeera ni atuman oḍi phọ amoghi ghan. Kụ ịdipho ọdi ramoghi bọ, kụ aḅiriman aḅiila ologhi oḍi phọ,

¹²kụ ạmiin dị ịyal ạruukpaany kꞌẸnaan dị oonmenan ịphalaḅaal iinmenan ọrologhu ude, oniin ẹpe ẹmhu phọ, ọphori phọ ẹpe aruwol phọ, pạ ọmuneen bọ ḍizu phọ ạJizos.

¹³Kụ bịdi opuru nyọdi mọ, “Nịr phọ, uḍighi ika kụ nạ ramoghi bọ?” Kụ ọdi mọ, “Ịdi eḍighi bọ mọsighe Ọmoogh-we phọ ạmi, kụ mị úlegheri esi lọ oseere nyọdi.”

¹⁴Ọdi rọḅem bọ ịphen phọ kụ akiton aphogh ọman kụ ạmiin Jịzos dị ạmeera, kụ ólhegheri mọ ạJizos phọ ni.

¹⁵Kụ ạJizos apuru nyọdi mọ, “Nịr phọ, uḍighi ika kụ nạ ramoghi bọ? Nạ rạwa ghan ạnhian?” Kụ ọdi agbi mọ ọdi opoghom oghoony phọ, kụ ạḅeni nyọdi mọ, “Oye phọ, eḍighi ịyaar dị nạ kụ ạsighe nyọdi, pọ ụḅeni ịmi esi phọ nạ aseere bọ nyọdi, mị kakori ạki ạsighe nyọdi ạḍuanam.”

¹⁶Kụ ạJizos ạmagh nyọdi mọ, “Meri.” Kụ ọdi akiton aphogh, kụ ạḅeni nyọdi ọnhu aHibru mọ, “Rạbonai.” (Ịduon phọ pọ “Ọtughemia”.)

¹⁷Kụ ạJizos ạḅeni nyọdi mọ, “Ịmi kụ́ḅol loor ạna, ịdi eḍighi bọ mị kőgheel ọteeny Ọde phọ ạmi ẹpe kꞌạke. Kịa ạḅeni bụo asiya phọ ạmi mọ, ‘Mị rakeel kꞌỌde phọ ạmi rꞌỌde phọ anyina, ḅịle kꞌẸnaan phọ ạmi rꞌanyina.’”

¹⁸Kụ aMeri ọpo ạMagdala phọ ạghi ạḅeni bụmatuan phọ mọ ọno mạmiin Ọmoogh-we phọ, kụ mọ ọdi kụ ạghaaph ịphen phọ ạḅeni nyịno.

¹⁹Dulhe ạSondi phọ ọpo phọ, ạbumatuan phọ mọtuan oghiilaan ạbuo aJu phọ ookpomoghan eniin esi, okughi yogh rughuugh phọ ọkasaghi, kụ ạJizos aru ạmeera pạ ogbo phọ ạbidi ekperenom, kụ ạḅeni bịdi mọ, “Ẹepho ịrolonaan inyina!”

²⁰Kụ rọḅem bọ ịduon phọ, kụ aḍeenaan bịdi rạghaagh phọ rꞌịkporogaany phọ ọdi. Kụ ẹḅaal ologhi ạbumatuan phọ, mem mọ bịdi ọmiin bọ Ọmoogh-we phọ.

²¹Kụ ạJizos ạḅile ạḅeni bịdi mọ, “Ẹepho ịrolonaan inyina! Ịdipho Ọde phọ ạmi urom bọ ịmi kụ ẹdi mị rirom inyina.”

²²Kụ rọḅem ịduon phọ, kụ aphooghuom bịdi kụ ạḅeni mọ, “Itiin Uwaloor Iigbia phọ.

²³Oye lọ nyina ẹsar ịkaraph ẹwilenaan, pọ mọsar ri ọbilenaan. Kụ oye lọ ịkaraph nyina ị́sar ịbilenaan, pọ kọ́sar ọwilenaan.”

²⁴Kụ ạTomos, ọpo oghol bọ mọ ạDidimos phọ, oniin sịphe aḍioph rꞌịyal ạbumatuan phọ, ọ́rol aani rꞌạbidi mem mọ ạJizos aru bọ.

²⁵Kụ ạbueri phọ ạbumatuan phọ ọḅeni nyọdi mọ, “Yoor mọmiin ni Ọmoogh-we phọ.” Kụ ạTomos ạḅeni bịdi mọ, “Emuton dị mị mạmiin ropogh iḍugh phọ pạ ạraghaagh phọ ọdi, ạḅile ạsighe ghụnugh ạmi ạlogh ropogh iḍugh phọ, ạḅile ạsighe ḍịghaagh ạmi ạlogh ịkpurugaany phọ ọdi, mị kámeeraam romeeraam.”

²⁶Ọphaanya aḍughul-otu reten, kụ ạbumatuan phọ mọḅile kẹn okughi yogh rughuugh phọ ookpomoghan esi phọ, kụ ạTomos ạrol aani ni rꞌạbidi, kụ ạJizos aru ạmeera pạ ogbo phọ ạbidi ekperenom, kụ ạḅeni mọ, “Ẹepho ịrolonaan inyina!”

²⁷Kụ ạJizos ạḅeni Tọmos mọ, “Sele ghụnugh ạna aruom ẹphen aphogh rạghaagh phọ ạmi: aḅulemi ḍịghaagh ạna ẹphen ạlogh ịkpurugaany phọ ạmi. Kạ́tol mun dọl emeeraam. Tọl aani dọl omeeraam.”

²⁸Kụ ạTomos mọ, “Ọmoogh-we rꞌẸnaan phọ ạmi.”

²⁹Kụ ạJizos ạḅeni nyọdi mọ, “Nạ ụtuan dị nạ mụmiin bọ ịmi kụ ameeraam bọ. Iboh kꞌẸnaan edianaan ni bụphe kọ̋miin bọ kụ omeeraam bọ.”

³⁰ẠJizos aḍighi yogh ni ịbadi ịnon ịiḍaany ghisigh ạbumatuan phọ ọdi, dị sịen ạḍinya phọ ạḍien ụ́ge aani,

³¹kụ ụge ịphen phọ, pịdi nyina emeeraam mọ ạJizos kụ aMesaya Ọony phọ Ẹnaan ni, ḅịle nyina ẹtuan omeeraam aḍien phọ ọdi ẹmoogh ghuḍum kꞌagee-pọ.