Read abua Jọn 21 Bible Online

Jọn 21 - abua bible

Jọn 21

¹Ịphen phọ reten bọ, kụ ạJizos ạḅile kẹn aḍeenaan loor ọdi bụmatuan phọ ọdi ẹpe Ọphiiny ạTaibirias. Ọdi aḍighi ịduon.

²ASaimon Pita, rꞌạTomos phọ ọpo oghol bọ mọ ạDidimos phọ rꞌạNataniel phọ ọpo aKena ẹpe Galili, rꞌạnmuny phọ aZebidi, rꞌịyal ạbunon ạbumatuan phọ ạJizos ụrologhu ni eniin esi.

³Kụ aSaimon Pita ạḅeni bịdi mọ, “Mị rạki ạkoni.” Kụ bịdi mọ, “Yoor kọki aani ni.” Kụ bịdi ọghi oḍigh ologhi oghuugh phọ, kụ oomo aḍughul phọ ạḍiphe bịdi ịyaar úkiigh.

⁴Mem dị ạḍiroor rẹḅaal, kụ ạJizos ạmeera ẹpe oogbom ọphiiny phọ, kụ ạbumatuan phọ úlegheri mọ ạJizos.

⁵Kụ ạJizos apuru bịdi mọ, “Nmụny phọ, nyina ekiigh ni ịyaar ḍụghum?” Kụ bịdi mọ, “Eeye.”

⁶Kụ ọdi mọ, “Izu ọzuguru phọ anyina ẹpe ḍịghaagh elhiom oghuugh phọ, nyina kẹmiin ni ịyaar.” Kụ bịdi ọtuugh ịduon phọ oḍighi, kụ ozuom iboom ina dị útue mun ụkpaaghi ọzuguru phọ.

⁷Kụ ạmatuan phọ ọpo ạJizos ạphomoghian bọ ạḅeni Pita mọ, “Ọphon Ọmoogh-we phọ ni.” Kụ mem dị aSaimon Pita ạnaghan bọ mọ Ọmoogh-we phọ, ọdi ạkpologhian ni ạsuoma phọ ọdi, ạkagh ịkpuku (loor esi dị ọdi ạrol ẹdaḅa) kụ apel asuma pạ ọphiiny phọ.

⁸Kụ ạbueri phọ ạbumatuan phọ oḍurogh ọzuguru phọ rꞌina phọ osiemi ẹpe oolhe phọ. (Bịdi ụ́kelan ạnyu ade, ịman oniin okuron akuḅu bịn.)

⁹Bịdi osul bọ ophunughu, bịn ụmiin ni nịan ịnye dị ọkpooni rọpoghi ghan ena rꞌạbred.

¹⁰Kụ ạJizos ạḅeni bịdi mọ, “Ịsighe iniin ina phọ pụruku nyina ẹze bọ eru ẹphen.”

¹¹Kụ aSaimon Pita aḍigh oghuugh phọ aḍur ọzuguru phọ rꞌigbogh ina phọ emuza bọ aphune ẹpe ạnyu ade phọ. Kụ ogbi bọ ina phọ, ịman oniin okuron ooghdi rꞌịraar. Kụ ghạlamo ịduon ina phọ emuza bọ ni bịn ọzuguru phọ ọ́phanyu.

¹²Kụ ạJizos ạḅeni bịdi mọ, “Itu ele eḍien.” Kụ rꞌoniin ọnyo ạmatuan phọ ómighirom opuru nyọdi mọ, “Nạ ạnhian?” loor esi dị bịdi ulegheri ni mọ Ọmoogh-we phọ ni.

¹³Kụ ạJizos ạghi ạsighe ạbred phọ ạngo bịdi, ḅịle rꞌena phọ kẹn.

¹⁴Ịphen phọ kụ imuneniom ịraar amem dị ạJizos aḍeenaan loor phọ ọdi bụmatuan phọ ọdi, emiigh kꞌaḍio phọ dị aḅetenu bọ sịphe aḍuugh phọ.

¹⁵Bịdi role bọ eḍien phọ rọwile, kụ ạJizos apuru Saimon Pita mọ, “Saimon, ọony phọ ạJon, nạ ụphomoghian ịmi apu ịdi ạbueri phọ ụphomoghian ịmi ḍụghum?” Kụ ọdi mọ, “Ii, Ọmoogh-we, nạ alegheri ni mọ mị ạphomoghian ni nyịna.” Kụ ạJizos mọ, “Ngọ eḍien nmụny iyool-ịga phọ ạmi.”

¹⁶Ọdi apuru amuneniom ịyal amem mọ, “Saimon, ọony phọ ạJon, nạ ụphomoghian ni ịmi?” Kụ ọdi mọ, “Ii, Ọmoogh-we, nạ alegheri ni mọ mị ạphomoghian ni nyịna.” Kụ ạJizos mọ, “Uphoghonaan ịmi iyool-ịga phọ ạmi.”

¹⁷Ọdi apuru amuneniom ịraar amem mọ, “Saimon, ọony phọ ạJon, nạ ụphomoghian ni ịmi?” Kụ aloor aPita eḅonyonu ịdipho ọdi apuru bọ nyọdi amuneniom ịraar amem mọ mọ, “Nạ ụphomoghian ịmi?” kụ ọdi mọ, “Ọmoogh-we, nạ alegheri ni mọ mị ạphomoghian ni nyịna.” Kụ ạJizos mọ, “Ngọ eḍien iyool-ịga phọ ạmi.

¹⁸Mị ạkar rạḅeni ghan nyịna mọ mem mọ nạ aḍighi bọ onyugheel phọ nạ ụkparamian ghan ni ukpe ạghi ekpisi lọ ẹḅeeraan nyịna, kụ mem dị nạ kaḍighi okumoor oye, nạ kasele ni rạghaagh ạna, kụ ọnon oye aḍiemiom nyịna ạkimom ekpisi lọ nạ ụ́wa ọghi.”

¹⁹(Ọdi ạghaaph ịduon phọ ọmaam ọdo phọ aḍuugh phọ ọdi aPita kamugh bọ dị kẹngo eghuan Ẹnaan.) Kụ ạJizos rọghaaph ịduon phọ kụ ạḅeni nyọdi mọ, “Ụdaph ịmi.”

²⁰Kụ aPita akiton aphogh ọman kụ ạmiin mạtuan phọ ọpo ạJizos ạphomoghian bọ, ọpo ạbedenom bọ ekpologhi phọ ọdi mem mọ amalhe ẹyaal phọ, kụ apuru bọ mọ, “Ọmoogh-we, ạnhian kụ kaakeleghi bọ nyịna abool?”

²¹APita ạmiin bọ nyọdi apuru ni Jịzos mọ, “Ọmoogh-we, koḍighi ika oye phọ ọphon?”

²²Kụ ạJizos mọ, “Eḍighi ịyaar dị ịḅeeraan ịmi mọ ọdi ạrol li tụtu mị ạḅile aru, eeghe kụ ịḅaram nyịna esi ọghaaph phọ ọphon? Ụdaph ịmi.”

²³Kụ ọghaaph phọ ọphon aleeny eleeny ogbo ạbuo asiya phọ mọ ạmatuan phọ ọpo kámugh. Ọbo ạJizos ọ́ḅem mọ ọdi kámugh, ạḅem mọ, “Eḍighi ịyaar dị ịḅeeraan ịmi mọ ọdi ạrol li tụtu mị ạḅile aru, eeghe kụ ighol nyịna esi ọghaaph phọ ọphon?”

²⁴Ọphon phọ kụ ạmatuan phọ ọpo ạghaaph bọ, ạḅile ạge rạraar phọ ịphen, kụ yoor olegheri ni mọ ịpe ọdi mạghaaph bọ ọkar igey ni.

²⁵Ịnon ịbadi ạraraar ẹḅile ni edi dị ạJizos ạḅile aḍighi yogh. Ọgeeghi oomo phọ ịdi, eniin etum nyeniin, mị ragbi mọ oomo aḅirini phọ múḍigh osereghi ạrinya phọ.