Read abua Jọn 3 Bible Online

Jọn 3 - abua bible

Jọn 3

¹Igbo aFarisi phọ, oniin oye ạrol li dị oghol mọ aNikodimos. Ọdi okpolom oye ni esi ạbuo aJu phọ.

²Oye phọ ọphon aru ạteeny Jịzos ḍiniin aḍughul, kụ ạḅeni mọ, “Rạbai, yoor olegheri ni mọ nạ ọtughemia dị Ẹnaan eseere. Oye ólho dị kaḍighi ịiḍaany phọ nạ raḍighi ghan bọ, dị Ẹnaan nyọdi ílhoonaan.”

³Kụ ạJizos ạphagharanaan mọ, “Mị ạkar rạḅeni nyịna mọ oye lọ ụ́mar ụḅile ụmar kạ́miin ọmar phọ kꞌẸnaan.”

⁴Kụ aNikodimos apuru nyọdi mọ, “Ika nụun kụ ịdi kọḅile bọ ọmar oye dị mạkpo? Ọdi kạḅile aḍigh ọkuruḅaka onhiin phọ ọdi kụ ọḅile ọmar nyọdi ḍụghum?”

⁵Kụ ạJizos mọ, “Mị ạkar rạḅeni nyịna mọ oye lọ ụ́maram mụum rꞌUwaloor Iigbia phọ káḍigh ọmar phọ kꞌẸnaan.

⁶Iphulupul rẹmar ghan iphulupul, ḅịle, uwaloor rạmar ghan uwaloor.

⁷Kụ kị́ngo nyịna iikia ịduon mị ạḅem bọ mọ kọ́bile ọḅile ọmaraghi oomo phọ anyina.

⁸Ookuugh rakugh ghan ni ịlo ạteeny, kụ nạ kạnaghan ni oghur phọ ọdi kụ ekpisi phọ ạḍua bọ ratu rꞌẹpe rạki bọ, nạ ólhegheri. Ịduon kụ ịdi edianaan oomo ạbulo ọmaram Uwaloor phọ.”

⁹Kụ aNikodimos apuru mọ, “Ịphen phọ kemite bọ ika?”

¹⁰Kụ ạJizos ạphagharanaan mọ, “Nạ kụ ọtughemia phọ Ịzirel, kụ ịphen phọ nạ ólhegheri?

¹¹Mị ạkar rạḅeni nyịna mọ yoor rọkaaph ghan ịlo yoor olegheri, ọḅile kọgba ịlo yoor mọmiin, kụ nyina iyoor ímeeraam.

¹²Ịduon mịna mịḅeni bọ inyina ịlo ịsien ade phọ kụ nyina ímeeraam bọ, nyina kemeeraam bọ ika dị mị ịḅeni inyina ịlo kꞌạke.

¹³Oye dị magheel ghan kꞌạke ólho, emuton Ọony phọ Oye, ọpo ạḍua bọ kꞌạke kụ aru.”

¹⁴Ịdipho aMozis aphoophe bọ ẹkaraph-ịyaar phọ ẹpe ẹdala phọ kụ ịdi kopoophe Mọony phọ Oye,

¹⁵pịdi tọrobo oye lọ ameeraam nyọdi ạmoogh ghuḍum kꞌagee-pọ,

¹⁶ịdi eḍighi bọ Ẹnaan ịphomoghian iboom aḅirini phọ, dị tụtu ẹngo Ogina Ọony phọ ọdi, ịdi tọrobo oye lọ ameeraam nyọdi kápe, kạmoogh ghụn ghuḍum kꞌagee-pọ.

¹⁷Ẹnaan ítom Mọony phọ ọdi mọ aru sịen aḅirini phọ aagbo ịiruen, ịtuan mọ esi ọdi kụ aḅirini phọ ọmoogh pẹleeny.

¹⁸Kụ ọpo ameeraam bọ nyọdi ịiruen ílhoonaan, kụ ọpo úmeeraam bọ, pọ mosoph ọoruen opume, ịdi eḍighi bọ ọdi maghel omeeraam Ogina Ọony phọ Ẹnaan.

¹⁹Ẹphen kụ ẹmhu phọ kọsighe bọ oogboom ịiruen phọ mọ: ạḍiḅaal phọ memite sịen aḅirini phọ, kụ awe mọzua ufiri ọbile ḍịḅaal phọ, ịdi eḍighi bọ bịdi roḍighi yogh ghan ịkaraph.

²⁰Oye lọ raḍighi ghan ịkaraph ạlogh ḍien ḍịḅaal phọ, ómeera oḍigh ẹphen ạḍiḅaal phọ, ọbo ịkaraph phọ ọdi keganana.

²¹Kụ ọlo, ọpo aḍighi bọ ịpe eru bọ ịne phọ kaḍigh ni ẹpe ạḍiḅaal phọ, ọbo eḍeenaan mọ ọdi ạtuugh ni ịpe Ẹnaan ẹḅeni bọ nyọdi kụ aḍighi bọ.

²²Ịphen phọ reten, kụ ạJizos rꞌạbumatuan phọ ọdi ọghi eelhe phọ aJudia. Ọdi ạrolan rꞌạbidi ẹpe awurogh ghan we mụum.

²³ẠJon kẹn awurogh aani ni we mụum ẹpe Ainon, esi dị ị́kelan Salim, ịdi eḍighi bọ ạmuum amuza ni sịphe phọ. Awe ụghi ghan ni ọteeny nyọdi kụ ọdi awurogh ghan bịdi mụum.

²⁴(Mem mọ ọpo kọ̋lhogh Jọn ikoli phọ.)

²⁵Buniin ạbumatuan phọ ạJon omiigh ọogbaghanaan rꞌọnyo aJu ịlo oselemian aloor.

²⁶Kụ bịdi ọghi ọteeny Jọn kụ ọḅeni nyọdi mọ, “Rạbai, nạ alegheri ni oye phọ ọpo rꞌạna ẹrolan bọ ẹpe ẹḅeenyom ọphiiny phọ ạJodan nyọpo nạ ạghaaph ghan bọ aghol. Nyịidipho ọdi raburogh we mụum kụ oomo awe rọkiighi ghan kọteeny nyọdi.”

²⁷Kụ ạJon mọ, “Oye kátue bịn ạmoogh ịlo Ẹnaan kụ nyọdi ị́ngo.

²⁸Nyina rꞌaloor anyina bịn ketue ni ẹgba ịphelom ịmi mọ mị ụḅem mọ, ‘Mị káMesaya phọ, kụ ọlo urom ịmi oḍiemi ghan kụ ọdi kagbi oru.’

²⁹Ọpo ạmoogh bọ ạnir phọ kụ olhom mọ. Ọyaghiri olhom mọ rạmeera ghan bịn kạnaghan aani, kụ ologhi ọdi kạḅaal ọnaghanan ẹḍogh olhom mọ. Ịduon kụ ịdi ọḅaal ologhi phọ ạmi mamunughan.

³⁰Ọdi kaḍighi ghan ekpo oye ạki ghisigh, kụ mị apogh ghan osoorom bịn.”

³¹Ọpo ạḍua bọ kꞌạke kụ aru kụ ạbugh apu oomo ạbueri phọ; ọpo ạḍua bọ sịen aḅirini phọ kụ amite ọlo aḅirini phọ, kụ rạkaaph ghan ịlo ạraraar aḅirini phọ bịn. Ọpo ạḍua bọ kꞌạke kụ aru kụ ạbugh apu bụeri phọ.

³²Ịpe ọdi mạmiin bọ, ạḅile ạnaghan, kụ ịdi ọdi rạkaaph ghan bọ, kụ oye dị ạsighe ịpe ọdi ạghaaph bọ ạmanami ịyaar ólho.

³³Oye lọ ạsighe ịpe ọdi ạghaaph bọ ạmanami ịyaar maḍeenaan aani mọ Ẹnaan ogey ni.

³⁴Ọpo Ẹnaan kụ erom bọ rạkaaph ghan ọghaaph phọ Ẹnaan, ịdi eḍighi bọ Ẹnaan ẹngo ni nyọdi Uwaloor phọ ọdi ẹbalabalami.

³⁵Ọde phọ ạpomoghian Mọony phọ, kụ mạḅogh oomo ạraraar ạlogh ḍịghaagh ọdi.

³⁶Ọpo ameeraam bọ Mọony phọ mạmoogh ghuḍum kꞌagee-pọ phọ; kụ ọlo Mọony phọ úmeeraam kạ́moogh ghuḍum, kụ ạghelhe phọ Ẹnaan kameelom ni nyọdi kꞌagee-pọ.